Tukamulaneje Mnope ni Aklistu Achimjetu

1-2. Ana chimo mwa yindu chakusachiwona Yehofa kuŵa chakusosekwa mnope chili chichi? Ana jwalakwe akusasaka kuti tutendeje chichi?

CHIMO mwa yindu chakusachiwona Yehofa kuŵa chakusosekwa mnope chili mwatukusatendela yindu ni ŵandu ŵane. Yesu jwasasile kuti twanonyeleje achimjetu mpela mwatukusalinonyelela achimsyene. (Mat. 22:​37-39) Yeleyitu yikupwatikapo kwanonyela ŵandu ŵa dini sine. Patukutenda yeleyi, tukusaŵa kuti tukumsyasya Yehofa Mlungu, ‘jwakusaŵalisya lyuŵa pa ŵakusakala ni ŵambone soni jwakusagwisya wula pa ŵakulungama ni ŵangalungama ŵakwe.’—Mat. 5:45.

² Atamose kuti Yehofa akusiŵanonyela ŵandu wosope, nambope jwalakwe akusiŵanonyela mnope ŵandu ŵakusampikanila. (Yoh. 14:21) Mwamti akusasakasoni kuti m’weji tutendeje yakulandanayo. Ni ligongo lyakwe jwalakwe akusatulimbikasya kuti ‘twanonyeleje mnope’ abale ni alongo ŵetu, kapena kuti ‘twanonyeleje yisyesyene’ jemanjaji. (1 Pet. 4:8; Alo. 12:10) Chinonyelo chelechi chikulandana ni chinonyelo champaka tulosyane ni jwachinasi jwetu kapena mjetu jwatukusamnonyela mnope.

3. Pakwamba ya chinonyelo, ana tukusosekwa kumbuchilaga chichi?

³ Mpela mwayikusaŵela kuti patupandile maluŵa tukusasosekwa kugasamalila kuti gakuleje chenene, myoyo tukusasosekwasoni kulimbichila kuti chinonyelo chetu chikule. Ndumetume Paulo jwasalile Aklistu kuti, “Mpitilisye kunonyelana mpelaga mwakusatendela ŵandu ŵapaulongo.” (Aheb. 13:1) Mwamti Yehofa akusasaka kuti tupitilisye kwanonyela mnope ŵandu ŵane. Myoyo mungani ajino, chitukambilane ligongo lyakwe tukusasosekwa kukamulanaga mnope ni Aklistu achimjetu soni yampaka tutende kuti tupitilisye kutenda yeleyi.

LIGONGO LYAKWE TUKUSASOSEKWA KUŴA ŴAKAMULANA

4. Mwakamulana ni yayili pa Salimo 133:​1, ana ni chichi champaka chitukamuchisye kupitilisya kwanonyela abale ni alongo ŵetu? (Alolesoni chiwulili.)

⁴ Aŵalanje Salimo 133:1. Mwangakayichila tukukamulana ni yajwasasile jwamasalimoju kuti kuŵa pamkamulano ni ŵandu ŵakusamnonyela Yehofa kuli ‘kwambone’ soni ‘kwakusangalasya.’ Nambope, mpela mwampaka yiŵele kuti mundu mpaka alepele kulola kusalala kwa chitela chakusachiwona lisiku lililyose, myoyosoni mpaka tulepele kumanyilila umbone soni mkamulano wawukusapagwa pasikati petu. Pakuŵapo tukusitwawona abale ni alongo ŵetu ndaŵi ni katema, ana mpaka tutende uli kuti tupitilisye kwanonyela jemanjaji? Mpaka tukombole kwanonyela mnope abale ni alongo ŵetu naga tukusitwawona jemanjaji kuŵa ŵakusosekwa mnope kwa m’weji soni mumpingo mwetu.

5. Ana patukulosya kunonyelana pakusaŵa yakuyichisya yambone yamti uli kwa ŵandu ŵane?

⁵ Ŵandu ŵane payiche kandanda pa misongano jetu, akusasangalala mnope ligongo lya chinonyelo chatukusalosyana jwine ni mjakwe. Mwamti pachiweni chinonyelochi, jemanjaji akusayiwona kuti apatile yisyesyene. Yesu jwatite, “Wosope chachimanyilila kuti mli ŵakulijiganya ŵangu naga mkunonyelana.” (Yoh. 13:35) Aganichisye yayamtendechele msikana jwine lina lyakwe Chaithra. Jwalakweju jwatandite kulijiganya Baibulo ni ŵa Mboni sya Yehofa pajwatendaga majiganyo ga ku yunifesite. Msikanaju jwapochele chipepala chakumŵilanjila ku msongano wachigawo. Nambo panyuma pakusimanikwa pa msonganowu lisiku lyandanda, jwalakwe jwamsalile mundu juŵamjiganyaga Baibulo kuti, “Achinangolo ŵangu nganambejepo hagi chitandilile. Nambo pamsonganowu mbochele mahagi gakwana 52 lisiku limpepe. Nachiweni chinonyelo cha Yehofa kupitila mwa ŵandu ŵakwe. Mwamti unejisoni ngusaka kuŵa pasikati pa jemanjaji.” Msikanaju jwapitilisye kulijiganya mwamti jwabatisidwe m’chaka cha 2024. Kusala yisyene, ŵandu ŵane pasiweni ndamo syetu syambone soni chinonyelo chatukusalosya, akusasachilila kutanda kumtumichila Yehofa.—Mat. 5:16.

6. Ana kuŵa paunasi wambone ni Aklistu achimjetu mpaka kutuchenjele chamti uli?

⁶ Kuŵa paunasi wambone ni Aklistu achimjetu kukusatuchenjela ku yindu yakogoya. Paulo jwalimbikasisye Aklistu achimjakwe kuti, “Mpitilisye kulimbikasyana lisiku lililyose . . . Mtendeje yeleyi kuti pakasimanikwa jwalijose jwakumusya mtima wakwe ligongo lya ulemwa wele ukwete machili gakulambusya.” (Aheb. 3:13) Myoyo, patukuyiwona kuti sajo syetu sisigele panandi kutelesya pa litala lisyesyene, Yehofa mpaka akamulichisye masengo Mklistu mjetu kuti atukamuchisye. (Sal. 73:​2, 17, 23) Kusala yisyene, chikamuchisyo chelechi chikusaŵa chambone mnope kwa m’weji.

7. Ana pana kukamulana kwamti uli pasikati pa chinonyelo ni mkamulano? (Akolose 3:​13, 14)

⁷ M’weji tuli mu gulu ja ŵandu ŵakusalingalinga kunonyelana jwine ni mjakwe, mwamti yeleyi yikusatendekasya kuti yindu yitujendeleje chenene. (1 Yoh. 4:11) Mwachisyasyo, chinonyelo chikusatukamuchisya kuti ‘Tupitilisye kupikana ya ŵane,’ mwamti yeleyi yikusatendekasya kuti tukamulaneje mnope. (Aŵalanje Akolose 3:​13, 14; Aef. 4:​2-6) Ni ligongo lyakwe m’weji patusongene pampepe tukusasangalala mnope kupunda gulu jine jilijose pachilambopa.

TUCHIMBICHISYANEJE MNOPE

8. Ana Yehofa akusatukamuchisya chamti uli kuti tuŵeje ŵakamulana?

⁸ Yehofa ni jwakusatendekasya kuti tukamulaneje mnope ni Aklistu achimjetu pa chilambo chosope. Mwamti yeleyi yikusakomboleka atamose kuti tuli ŵangali umlama. (1 Akoli. 12:25) Baibulo jikusasala kuti ‘Mlungu ŵatujiganyisye kuti tunonyelaneje.’ (1 Ates. 4:9) Kasale kane mpaka tujile kuti, kupitila m’Baibulo Yehofa akusatusalila yindu yatukusasosekwa kutenda kuti tukamulaneje mnope. Myoyo, patukulijiganya mwakusamala Maloŵe gakwe soni kukamulichisya masengo yatulijiganyisyeyo, yikusaŵa kuti ‘tukwiganyidwa ni Mlungu.’ (Aheb. 4:12; Yak. 1:25) Mwamti yeleyi ni yakusalingalinga kutenda ŵa Mboni sya Yehofa.

9. Ana pa Aloma 12:​9-13 pakusatujiganya chichi pangani ja kuchimbichisyana?

⁹ Ana Maloŵe ga Mlungu gakusatukamuchisya chamti uli kuti tukamulaneje mnope? Aganichisye yajwaŵechete Paulo pangani jeleji yayikusasimanikwa pa Aloma 12:​9-13. (Aŵalanje.) Palilembali Paulo jwasasile kuti, “Mŵeje ŵandanda pakwachimbichisya ŵane.” Ana maloŵega gakusagopolela chichi? Tukusasosekwa kuŵa ŵakusachilila ‘kwanonyela yisyesyene’ ŵandu ŵane mwakwakululuchila patuleŵele, mwakwapochela chenene kunyumba syetu, soni mwakuŵa ŵakoloŵa magasa. (Aef. 4:32) Wawojo akusosekwa ‘kuŵa ŵandanda’ kulosya kuti akusaka kuŵa paunasi wambone ni Aklistu achimjawo. Pangani jeleji Yesu jwasasile kuti, “Kupeleka kukusamtendekasya mundu kuŵa jwakusangalala mnope kulekangana ni kupochela.”—Mase. 20:35.

10. Ana mpaka tulosye chamti uli kulimbichila “pakwachimbichisya ŵane”? (Alolesoni chiwulili.)

¹⁰ Panyuma pakuti Paulo atusalile kuti tuŵeje ŵandanda pakwachimbichisya ŵane, jwatusalilesoni kuti, “Mŵeje ŵakulimbichila, ngaŵaga ŵaulesi.” Mundu jwakulimbichila akusaŵa mundu jwakulipeleka mnope pa masengo. Munduju papochele masengo, akusagakamula mwakulipeleka soni mwadongosolo. Pa Misyungu 3:​27, 28 pakusatulimbikasya kuti, “Mkasimleka kwatendela yambone ŵele ŵali ŵakuŵajilwa kupochela yambone, pandaŵi jimkwete machili gakuti mpaka mpakombole kuyitenda yeleyi.” Myoyo, patukuyiwona kuti mundu jwine akusosechela chikamuchisyo, tukusatenda yampaka tukombole kuti tumkamuchisye. Mwamti ngatukusajembecheya kapena kuganisya kuti ŵane ni ŵampaka amkamuchisye.—1 Yoh. 3:​17, 18.

11. Ana chichi champaka chitukamuchisye kuŵa ŵakamulana ni achimjetu?

¹¹ Litala line lyampaka tulosye kuti tukusitwachimbichisya ŵane, lili kwakululuchila patuleŵele. Pa Aefeso 4:26 pakusati, “Mtumbile, nambo mkalemwa, mkakunda kuti lyuŵa litiŵile mli chitumbilile.” Ligongo chichi lilembali likusala yeleyi? Ndime 27 jikusasala kuti naga tukuŵape chitumbilile nikuti mpaka ‘tumpe upile Satana.’ Kupitila m’Maloŵe gakwe, Yehofa akusatusalilaga mwakuwilisyawilisya kuti tukululuchilaneje. Pa Akolose 3:13 pakusatulimbikasya kuti ‘tupitilisye. . . kululuchilana ni mtima wosope.’ Chimo mwa yindu yayikusatukamuchisya kuŵa ŵakamulana mnope ni achimjetu chili kwakululuchila patuleŵele. Mwamti patukutenda yeleyi, yikusatukamuchisya kuti tuŵe ‘ŵakamulana mwakusunga mtendele watukwete wawuli mpela chindu chakutujilanya. Mtendele welewu twawupatile ni chikamuchisyo cha msimu weswela.’ (Aef. 4:3) Mwakata mpaka tujile kuti kwakululuchila ŵane kukusatukamuchisya kuti tuŵe ŵakamulana soni kuŵa pamtendele.

12. Ana Yehofa akusatukamuchisya chamti uli kuti twakululuchileje ŵane?

¹² Kusala yisyene, yikusaŵa yakusawusya mnope kumkululuchila mundu jwatuleŵele. Nambope, msimu weswela wa Mlungu mpaka utukamuchisye kuti tukombole kutenda yeleyi. Panyuma pakutulimbikasya kuti ‘twanonyeleje yisyesyene achalongo achimjetu’ soni kuti ‘tuŵeje ŵakulimbichila,’ Baibulo jikusatulimbikasyasoni kuti, ‘Tukunde kuti msimu weswela utupeje machili.’ Mundu jwele ‘msimu weswela ukusampaga machili’ akusaŵaga jwakulimbichila mnope soni jwakusangalala. Myoyo, msimu weswela wa Mlungu, mpaka utukamuchisye kuti twanonyeleje ŵane yisyesyene soni kwakululuchila ni mtima wosope. Mwamti ni ligongo lyakwe tukusasosekwa kumŵenda Yehofa kuti atukamuchisyeje.—Luk. 11:13.

“PAKAŴA KUGAŴIKANGANA PASIKATI PENU”

13. Ana chichi champaka chitutendekasye kuŵa ŵagaŵikangana?

¹³ Mumpingo mukusaŵa “ŵandu ŵamtundu uliwose” soni ŵakutyochela mundamo syakulekanganalekangana. (1 Tim. 2:​3, 4) Yeleyi yikusatendekasya kuti tusaguleje yindu mwakulekangana pangani mpela ja kawale, kalisalalisye, chikamuchisyo cha mtela kapena yakusangalasya. Mwamti naga ngasamala, yindu yeleyi mpaka yitendekasye kuti tugaŵikanganeje. (Alo. 14:4; 1 Akoli. 1:10) Ligongo lyakuti ‘Mlungu ŵatujiganyisye kala kuti tunonyelaneje,’ tukusosekwa kuŵa ŵakusamala kuti tukayiwonaga yatukusasagula kuŵa yambone mnope kupunda ya ŵane.—Afil. 2:3.

14. Ana tukusasosekwa kulingalinga kutenda chichi ndaŵi syosope, soni ligongo chichi?

¹⁴ Mpaka tuŵambalesoni kugaŵikangana mumpingo naga tukusalingalinga kulimbikasyana soni kamusyangana ndaŵi syosope. (1 Ates. 5:11) Pachangakaŵapa, ŵandu ŵajinji ŵaŵawujile munyuma kapena ŵaŵatyosyedwe mumpingo awujile mu gulu ja Yehofa. Mwamti tuli ŵakusangalala kwapochela jemanjaji ni magasa gaŵili. (2 Akoli. 2:8) Aganichisye yayamtendechele mlongo jwine juŵatandilesoni kusongana panyuma pakuleka kusongana kwa yaka 10. Jwalakwe jwatite, “Abale ni alongo ŵangomasyaga mwakusangalala.” (Mase. 3:19) Ana yaŵatesile abale ni alongoŵa yamkwayiye chamti uli mlongoju? Jwalakwe jwatite, “Yeleyi yandendekasisye kuyiwona kuti Yehofa akungamuchisya kuti ndandilesoni kusangalala.” Myoyo, patukwalimbikasya ŵandu wosope, Yesu mpaka atukamulichisye masengo pakwakamuchisya ŵandu ‘ŵakukamula masengo gakupesya soni ŵakusitopelwa.’—Mat. 11:​28, 29.

15. Ana ni litala line lyapi lyampaka litukamuchisye kulimbikasya mkamulano wetu? (Alolesoni chiwulili.)

¹⁵ Litala line lyampaka tulimbikasye mkamulano lili kupitila mu yatukusaŵecheta. Pa Yobu 12:11 pakusati, “Ana ngati liwiwi likusapasya maloŵe Mpela yalukusati lulumi pakupasya yakulya?” Mpela mwayikusaŵela kuti mundu jwakusakombola kuteleka akusatanda kupasya kaje yakutelekayo mkanaŵe kwapa ŵandu kuti alye, m’wejisoni tukusasosekwa kuganichisya chenene mkanituŵe kuŵecheta. (Sal. 141:3) Ndaŵi syosope tulolechesyeje kuti yatukuŵecheta yiŵeje yakulimbikasya soni ‘yakumkamuchisya jwakupikanajo.’—Aef. 4:29.

16. Ana ŵani kusyesyene ŵakusasosekwa kulingalinga kuŵecheta maloŵe gakulimbikasya?

¹⁶ Achalume ŵalombele soni achinangolo akusosekwa kuŵa ŵakusamala kuti aŵecheteje yakulimbikasya. (Akolo. 3:​19, 21; Tit. 2:4) Nombenawo achakulungwa ŵa mumpingo akusasosekwa kulingalinga kuti aŵecheteje yindu yakulimbikasya ngondolo sya Yehofa. (Yes. 32:​1, 2; Agal. 6:1) Mwamti msyungu wine wa m’Baibulo ukusati, “Maloŵe gakuŵechetedwa pandaŵi jakuŵajilwa gakusaŵa gambone mnope.”—Mis. 15:23.

“TULOSYEJE CHINONYELO CHISYESYENE MU YITENDO YETU”

17. Ana mpaka tutende uli kuti ndaŵi syosope twanonyeleje yisyesyene abale ni alongo ŵetu?

¹⁷ Ndumetume Yohane jwatulimbikasisye kuti “tukanonyelanaga ni maloŵepe kapena ni pakamwape, nambo tulosyeje chinonyelo chisyesyene mu yitendo yetu.” (1 Yoh. 3:18) Mwamti tukusasaka kuti twanonyeleje abale ni alongo ŵetu kutyochela mumtima. Ana mpaka tukombole chamti uli kutenda yeleyi? Patukupata ndaŵi jakunguluka ni Aklistu achimjetu, ni patukusalimbisyasoni unasi soni chinonyelo chetu. Myoyo, alinjelinjeje kupata ndaŵi jakunguluka ni ŵane pali ku misongano ja mpingo kapena pakulalichila. Apateje ndaŵi jakwajendela Aklistu achimjawo. Patukutenda yeleyi, tukusalosya kuti tukusapikanila ‘yaŵatujiganyisye Mlungu kuti tunonyelaneje.’ (1 Ates. 4:9) Mwamti patukupitilisya kutenda yeleyi, tuchiyiwona kuti “yili yambone soni yakusangalasya Ŵandu ŵapaulongo pakutama pampepe mwakamulana.”—Sal. 133:1.