NGANI JAKULIJIGANYA 22
NYIMBO NA. 15 Amjimbileje Jwandanda Kupagwa jwa Yehofa!
Ligongo Chichi Lina lya Yehofa Lili Lyakusosekwa Mnope kwa Yesu?
“Une namanyisye jemanjaji lina lyawo soni chimbitilisye kwamanyisya.”—YOH. 17:26.
CHAKULINGA CHA NGANIJI
Chitulole yaŵatesile Yesu pakulimanyikasya lina lya Yehofa, pakulichimbichisya, soni pakulosya umboni wakuti yajwasasile Satana yakwamba Mlungu yili yaunami.
1-2. (a) Ana Yesu jwatesile chichi pa chilo chakumalisya kuti malaŵi gakwe chawulajidwe? (b) Ana chitukambilane yiwusyo yapi mungani ajino?
LYALIJI Lyamcheche chilo pa Nisani 14, m’chaka cha 33 C.E. Palisikuli Yesu ŵajembecheyaga kupelechedwa, kulamulidwa, kulagasidwa, soni kuwulajidwa pachitela chakulagasichila. Palisikuli, jwalakwe ali amalisisye kwene kulya chakulya chapadela m’chipinda chapenani pampepe ni ŵandumetume ŵakwe ŵakulupichika, jwasalile ŵandumetumewo maloŵe gakulimbikasya. Mwamti Jemanjajo mkanaŵe kutyoka m’chipinda chapenanicho, Yesu jwapeleche lipopelo lyakusosekwa mnope. Mwamti ndumetume Yohane jwalembile lipopeloli lyalikusasimanikwa m’buku ja Yohane chaputala 17.
2 Ana lipopelo lyajwapeleche Yesu likusalosya chamti uli yindu yajwayiganichisyaga mnope pandaŵijo? Ana lipopeloli lyalosisye chamti uli chindu chiŵachiwonaga jwalakwe kuŵa chakusosekwa mnope pandaŵi josope jaŵatendaga utumiki wakwe pachilambopa? Kwende tukambilane kwanga kwa yiwusyo yeleyi.
“UNE NAMANYISYE JEMANJAJI LINA LYAWO”
3. Ana Yesu jwasasile yamti uli pakwamba ya lina lya Yehofa? Ana jwalakwe jwagopolelaga chichi? (Yohane 17:6, 26)
3 Mu lipopelo lyakweli, Yesu jwatite, “Une namanyisye jemanjaji lina lyawo.” Mwamti jwalakwe jwasasile kwa maulendo gaŵili kuti jwalimanyikasisye lina lya Yehofa kwa ŵakulijiganya ŵakwe. (Aŵalanje Yohane 17:6, 26.) Ana jwalakwe jwagopolelaga chichi pelepa? Ana jwasalilaga lina lyakuti jemanjajo nganalimanyililaga? Pakuŵa ŵakulijiganya ŵa Yesu ŵaliji Ayuda, yili yangakayikasya kuti jemanjajo ŵalimanyililaga lina lya Mlungu lyakuti Yehofa. Linali lyasimanikwaga kwa maulendo gejinji m’Malemba ga Chihebeli. Myoyo, mpaka tujile kuti Yesu nganagambaga ya lina lisyesyene lya Mlungu, mmalomwakwe jwasalaga yalikusajimila linali. Yesu jwakamuchisye ŵakulijiganya ŵakwe kummanyilila chenene Yehofa. Yeleyi yapwatikagaposoni kumanyilila chakulinga cha Yehofa kwa ŵandu soni chilambochi, yatesile jwalakwe, yachachitenda, soni ndamo syakwe syambone. Mwamti Yesupe ni jwakusammanyilila chenene Yehofa.
4-5. (a) Ana ni chisyasyo chapi chachikulosya ngopolelo jakumanyilila lina lya mundu? (b) Ana ŵakulijiganya ŵa Yesu ŵalimanyilile chamti uli lina lya Yehofa?
4 Kuti tupikanichisye yeleyi, kwende tuwanichisye kuti mumpingo mwawo mwana jwamkulungwa jwa mumpingo lina lyakwe David jwalisoni dokotola. Wawojo aŵele ali mkumanyilila m’baleju kwa yaka yejinji. Nambo lisiku line yisimanikwe kuti wawojo alwasile mnope. Myoyo mwachitema akuwutuchila ku chipatala kwakusakamulasoni masengo m’bale jula. Mwamti m’balejo akukamulichisya masengo lunda lwakwete pa yachipatala pakulupusya umi wawo. Ngatukukayichila kuti kutandila pelepa, m’baleju mpaka aŵe jwakusosekwa mnope kwa wawojo. Mwamti kupwatika pakumwona m’baleju kuti ali jwamkulungwa jwa mumpingo mwawo, mpaka atande kumwonasoni kuŵa dokotala jwaŵakulupwisye umi wawo.
5 Mwakulandana ni yeleyi, nombenawo ŵakulijiganya ŵa Yesu ŵalimanyililaga kala lina lya Yehofa. Nambo kupitila mu utumiki wa Yesu, jemanjaji ŵatandite kuliwona lina lya Yehofa kuŵa lyakusosekwa mnope. Ligongo chichi tukuŵecheta yeleyi? Yili myoyo ligongo lyakuti yiliyose yajwatendaga Yesu soni kuŵecheta yalosyaga mwaŵelele Atati ŵakwe. Myoyo, ŵandumetume ŵakwe ‘ŵammanyilile’ chenene Yehofa mwakulola yaŵatiga Yesu pakwiganya soni mwakulola mwajwatendelaga yindu ni ŵandu.—Yoh. 14:9; 17:3.
“LINA LYAWO, LYELE ŴAMBELE UNE”
6. Ligongo chichi mpaka tujile kuti Yehofa ŵampele Yesu lina lyakwe? (Yohane 17:11, 12)
6 Mu lipopelo lyakweli, Yesu jwapopesile kuti, “Ŵalolele jemanjaji ligongo lya lina lyawo, lyele ŵambele une.” (Aŵalanje Yohane 17:11, 12.) Ana yeleyi yagopolelaga kuti Yesu chatande kumanyika kuti ali Yehofa? Iyayi. Mpaka ayiwone kuti mu lipopelo lyakweli pakwamba ya lina lya Yehofa, Yesu jwasasile kuti “lina lyawo.” Myoyo, yaliji yangakomboleka kuti lina lya Yehofa likaŵesoni lina lya Yesu. Sano, ana Yesu jwagopolelaga chichi pajwaŵechete kuti lina lya Mlungu ŵampele jwalakwejo? Chandanda, Yesu jwaliji jwakumjimila soni Jwakumŵechetela Yehofa. Jwalakwe jwayiche pachilambopa mu lina lya Atati ŵakwe soni jwatendaga yakusimonjesya kupitila mu lina lya Yehofali. (Yoh. 5:43; 10:25) Konjechesya pelepa, lina lyakuti Yesu likusagopolela kuti “Yehofa Ali Chikulupusyo.” Myoyo, ngopolelo ja lina lya Yesu jikusakamulana ni lina lya Yehofa.
7. Asale chisyasyo chakulosya kuti Yesu jwaŵechetaga mu lina lya Yehofa?
7 Kuti tupikanichisye yeleyi kwende tuganichisye ayi. Ligongo lyakuti mundu jwakusakola udindo wakwimila chilambo akumsamjimila jwakulamulila jwa chilambocho, myoyo yakusaŵecheta jwalakwejo akusayiŵecheta mu lina lya jwakulamulilajo. Mwamti yaŵechete mundujo yikusakola machili mpela yakaŵechete jwakulamulilajo. Mwakulandana ni yeleyi, Yesu ŵamjimilaga Yehofa soni kuŵecheta kwa ŵandu kupitila mu lina lya Yehofajo.—Mat. 21:9; Luk. 13:35.
8. Ana lina lya Yehofa lyaliji chamti uli “mwa” Yesu mkanaŵe kwika pachilambopa? (Ekisodo 23:20, 21)
8 Yesu aŵele ali mkutumichila mpela jwakumŵechetela Yehofa mwakupeleka utenga soni malangiso kwa yakupanganyika yine yausimu soni kwa ŵandu. Mwamti jwalakwe aŵele ali mkutenda yeleyi ligongo lyakuti akwete udindo wakuŵa Maloŵe. (Yoh. 1:1-3) Komboleka kuti Yesu jwaliji lilayika lyele Yehofa jwalitumisye kuti likalongoleleje Ayisalayeli paŵaliji m’chipululu. Yehofa pajwasalilaga Ayisalayeli kuti alipikanileje lilayikali jwatite, “pakuŵa lina lyangu lili mwa lilayikalyo.”a (Aŵalanje Ekisodo 23:20, 21.) Lina lya Yehofa lyaliji “mwa” Yesu mulitala lyakuti jwalakwejo ŵamjimilaga Yehofa soni jwalakwejo ni juŵalosisye kuti Yehofa akusatendaga yakuŵajilwa soni ali jwamswela.
“ATATI, ALICHIMBICHISYE LINA LYAWO”
9. Ana lina lya Yehofa lyaliji lyakusosekwa chamti uli kwa Yesu? Alondesye.
9 Lina lya Yehofa lyaliji lyakusosekwa mnope kwa Yesu atamose mkanaŵe kwika pachilambopa. Mwamti yili yangasimonjesya kuti yiliyose yajwatendaga Yesu pachilambopa yaliji yakamulana ni lina lya Yehofa. Yesu ali asigele panandi kumalisya utumiki wakwe wa pachilambopa, jwamŵendile Yehofa kuti, “Atati, alichimbichisye lina lyawo.” Mwamti ndaŵi jijojo, Yehofa jwajanjile kupitila m’maloŵe gagumila gakutyochela kwinani kuti, “Nalichimbichisye soni chinjilichimbichisya.”—Yoh. 12:28.
10-11. (a) Ana Yesu jwalichimbichisye chamti uli lina lya Yehofa? (Alolesoni chiwulili.) (b) Ligongo chichi lina lya Yehofa lyasosekwaga kulichimbichisya soni kuliswejesya?
10 Nombenajo Yesu jwalichimbichisye lina lya Atati ŵakwe. Ana jwatesile chamti uli yeleyi? Litala limo lyajwatendele yeleyi lyaliji kwasalila ŵane yakwamba ndamo syambone syakwete Atati ŵakwe soni yakusatendaga. Konjechesya pelepa, lina lya Yehofa lyasosekwaga kulichimbichisya soni kuliswejesya.b Myoyo, Yesu jwalosisye kusosekwa kwakutenda yeleyi pajwajiganyaga ŵakumkuya ŵakwe lipopelo lya chisyasyo. Jwalakwe jwatite, “Atati ŵetu ŵakwinani, lina lyawo lichimbichikwe.”—Mat. 6:9.
11 Ligongo chichi lina lya Yehofa lyasosekwaga kulichimbichisya soni kuliswejesya? Yili myoyo ligongo lyakuti kalako mu mgunda wa Edeni, Satana jwaŵechete yaunami yakwamba Yehofa Mlungu. Jwalakwe jwasasile kuti Yehofa ali jwaunami soni kuti ŵajimaga yindu yambone Adamu ni Hawa. (Gen. 3:1-5) Satana jwasasilesoni kuti Yehofa jwangatendaga yindu m’litala lyakuŵajilwa. Yindu yamabosa yajwasasile Satanayi yajonasile mbili ja Yehofa kapena kuti lina lyakwe. Kaneko m’masiku ga Yobu, Satana jwasasile kuti ŵandu akusamtumichilaga Yehofa pakusaka kupata yindu yineyakwe yambone kutyochela kwa Yehofajo. Yajwasasile Satanayi yalosisye kuti ŵandu ŵangamnonyelaga Yehofa yisyesyene, mwamti pasimene ni yakusawusya mpaka aleche kumtumichila. (Yob. 1:9-11; 2:4) Myoyo, pasosekwaga kupita ndaŵi jakwanila kuti amanyiche juŵaliji jwaunami pasikati pa Satana ni Yehofa.
Yesu jwajiganyisye ŵakumkuya ŵakwe kusosekwa kwakulichimbichisya lina lya Mlungu (Alole ndime 10)
“NGUPELEKA UMI WANGU”
12. Ana Yesu jwaliji jwakusachilila kutenda chichi ligongo lyakumnonyela Yehofa?
12 Ligongo lyakuti Yesu ŵamnonyelaga mnope Yehofa, jwatesile yiliyose yakakombwele pakusaka kulichimbichisya soni kuliswejesya lina lya Yehofa. Yesu jwayikene pakuŵecheta kuti, “Ngupeleka umi wangu.” (Yoh. 10:17, 18) Mwamti Yesu jwaliji jwakusachilila kuwa ligongo lya lina lya Yehofa.c Ŵandu ŵamlama ŵaŵili ŵandanda Adamu ni Hawa ŵamjimuchile Yehofa ni kuŵa kumbali ja Satana. Nambo Yesu jwaliji jwakusachilila kwika pachilambopa soni kulosya kuti akusamnonyelaga Yehofa. Yesu jwalosisye yeleyi, mwakuŵa jwakulupichika kwa umi wakwe wosope. (Aheb. 4:15; 5:7-10) Jwalakwe jwaŵelepe jwakulupichika kwa umi wakwe wosope mpaka pajwawile pachitela chakulagasichila. (Aheb. 12:2) Mwakutenda yeleyi, jwalakwe jwalosisye kuti akusamnonyela mnope Yehofa soni lina lya Yehofajo.
13. Ligongo chichi Yesu jwaliji pamalo gambone gakulosya kuti Satana ali jwaunami? (Alolesoni chiwulili.)
13 Kwa umi wakwe wosope, Yesu jwalosisye kuti Satana ni jwali jwaunami ngaŵaga Yehofa. (Yoh. 8:44) Yesu jwammanyililaga chenene Yehofa kupunda mundu jwalijose juŵapali. Mwamti yikaŵe kuti yajwasasile Satana yakwamba Yehofa yili yisyene, nikuti Yesu akayimanyilile. Nambo Yesu jwatesile yakomboleka pakuliswejesya lina lya Yehofa. Atamose pandaŵi jele yawonekaga kuti Yehofa amlesile jwalakwejo, Yesu jwaliji jwakusachilila kuwa m’malo mwakuleka kumpikanila Yehofa.—Mat. 27:46.d
Kwa umi wakwe wosope, Yesu jwalosisye kuti Satana ni jwali jwaunami ngaŵaga Yehofa (Alole ndime 13)
“MALISISYE MASENGO GAŴAMBELE”
14. Ana Yehofa jwamtendele chichi Yesu ligongo lya kulupichika kwakwe?
14 Mu lipopelo lyajwapeleche Yesu pa chilo chakuti malaŵi gakwe chawulajidwe, jwalakwe jwatite, “Malisisye masengo gaŵambele kuti nagatende.” Yesu jwakulupililaga kuti Yehofa chachimpa upile jwalakwejo ligongo lya kulupichika kwakwe. (Yoh. 17:4, 5) Yesu nganalemwa kwakulupilia Atati ŵakwe. Mwamti Yehofa nganakunda kuti Yesu aŵepe m’malembe. (Mase. 2:23, 24) Jwalakwe ŵamjimwisye Yesu kuchiwa soni ŵampele udindo wapenani kwinani. (Afil. 2:8, 9) Pali papitile ndaŵi, Yesu jwatandite kulamulila mpela Mwenye jwa Uchimwene wa Mlungu. Ana Uchimwene welewu uchikwanilisya yindu yapi? Mbali jaŵili ja lipopelo lya chisyasyo jikusasala kuti, “Uchimwene wawo uyiche. Yakusaka yawo yitendekwe pachilambo chapasi, mpela mwayikutendechela kwinani.”—Mat. 6:10.
15. Ana ni yindu yine yapi yele Yesu chachiyikwanilisya?
15 Pachangakaŵapa kusogoloku, Yesu chachiputa ngondo jakulimbana ni achimmagongo ŵa Mlungu. Mwamti chachajonanga ŵandu ŵakusakala pangondo ja Alamagedo. (Chiw. 16:14, 16; 19:11-16) Payichigamba kutendekwa yeleyi, jwalakwe chachimponya Satana “palisimbo,” mwamti ngasakombolaga kutenda chilichose. (Chiw. 20:1-3) Kaneko, Yesu chachitendekasya kuti pachilambopa paŵe mtendele soni chachatendekasya ŵandu kuŵa ŵamlama mkati mwa Ulamusi wakwe wa Yaka 1,000. Jwalakwe chachajimusya ŵandu ŵaŵawile. Nambosoni chachichitendekasya chilambo chosope kuŵa paladaiso. Mwamti chakulinga cha Yehofa chichikwanilichikwa.—Chiw. 21:1-4.
16. Ana umi uchiŵa uli panyuma pa Ulamusi wa Yaka 1,000?
16 Ana umi uchiŵa uli panyuma pa Ulamusi wa Yaka 1,000? Ulemwa wa ŵandu soni ungali umlama uchimala. Mwamti ŵandu ngasasosekwasoni kumŵenda Mlungu kuti ŵakululuchile ulemwa wawo kupitila mu mbopesi jakutuwombola. Nambosoni ngasipasosekwa ŵa 144,000 kuŵa ŵakutaga mbopesi kapena Yesu kuŵa Jwamkulungwa jwa Ŵakutaga Mbopesi. Nambosoni “mdani jwakumalisya” jwali chiwa “chachigomechedwa,” mwamti ŵandu ŵaŵawile chachijimuka. Konjechesya pelepa, mundu jwalijose pachilambopa chachiŵa jwamlama.—1 Akoli. 15:25, 26.
17-18. (a) Ana pambesi pa Ulamusi wa Yaka 1,000 pachitendekwa chichi? (b) Ana Yesu chachitenda uli pambesi pa ulamusi wakwe? (1 Akolinto 15:24, 28) (Alolesoni chiwulili.)
17 Ana pachitendekwasoni chindu chapi panyuma pa Ulamusi wa Yaka 1,000? Pandaŵiji pachitendekwa chindu chine chapadela. Pachilambopa pachiŵa pali pangali mundu jwalijose juchachikayichilaga yakuti Yehofa ali jwamswela soni jwachilungamo. Ligongo chichi tukuŵecheta yeleyi? Paja mu mgunda wa Edeni Satana jwasasile kuti Yehofa ali jwaunami soni jwangalamulilaga ŵandu mwachinonyelo. Myoyo, kutandila pandaŵiji, lina lya Yehofa liŵele lili mkuswejesedwa kwamaulendo gejinji ni ŵandu ŵakusamchimbichisya jwalakwejo. Myoyo pambesi pa Ulamusi wa Yaka 1,000, lina lya Yehofa lichiŵa lili lichimbichikwe. Mwamti Yehofa chachilosya kuti ali Atati ŵetu ŵakwinani ŵachinonyelo.
18 Panyuma pa Ulamusi wa Yaka 1,000, jwalijose chachimanyilila kuti yajwasasile Satana yakwamba Mlungu yaliji yaunami. Ana Yesu chachitenda chichi pambesi pa ulamusi wakwe? Ana jwalakwe chachitenda mpela Satana mwakumjimuchila Yehofa? Iyayi. (Aŵalanje 1 Akolinto 15:24, 28.) Yesu chachiwuchisya Uchimwene kwa Atati ŵakwe. Mwamti jwalakwejo chachipikanilaga ulamusi wa Yehofa. Mwakulekangana ni Satana, Yesu ali jwakusachilila kupeleka chilichose ligongo lyakumnonyela Yehofa.
Yesu mwakusachilila akumwuchisya Yehofa umwenye pambesi pa yaka 1,000 (Alole ndime 18)
19. Ligongo chichi lina lya Yehofa lili lyakusosekwa mnope kwa Yesu?
19 Kusala yisyene, Yehofa jwakwete magongo gambone gagamtendekasisye kumpa Yesu lina lyakwe. Yesu jwalosisye ndendende mwaŵelele Atati ŵakwe. Sano ana ligongo chichi Yesu akusaliwona lina lya Yehofa kuŵa lyakusosekwa mnope? Yili myoyo ligongo lyakuti kwa jwalakwe linali lili lyakupunda chindu chilichose. Mwamti jwalakwe jwaliji jwakusachilila kuwa ligongo lya linali, soni chachiŵa jwakusachilila kumwuchisya Yehofa chilichose panyuma pa Ulamusi wa Yaka 1,000. Ana m’weji mpaka tumsyasye chamti uli Yesu? Tuchikambilana kwanga kwa chiwusyo chelechi mungani jakuyichisya.
NYIMBO NA. 16 Amjimbile Yehofa Ligongo lya Jwamsagulwe Jwakwe
a Ndaŵi sine, nombenago malayika gamjimilaga Yehofa pakupeleka utenga mu lina lyakwe. Ni ligongo lyakwe m’Baibulo mwana ngani sine syele pakusala ya malayika sikusasala mpela kuti jwaliji Yehofa msyene. (Gen. 18:1-33) Atamose kuti Malemba gakusasala kuti Mose jwapochele Chilamusi kutyochela kwa Yehofa, nambope, ndime sine sikusalosya kuti Yehofa jwakamulichisye masengo malayika pakupeleka Chilamusichi kupitila mu lina lyakwe.—Lef. 27:34; Mase. 7:38, 53; Agal. 3:19; Aheb. 2:2-4.
b NGOPOLELO JA MALOŴEGA: Maloŵe gakuti “kuchimbichisya” gakusagopolela kupeleka ulemu, kapena kuchiwona chindu kuŵa cheswela. Pele maloŵe gakuti “kuswejesya” gakusagopolela kutendekasya mbili ja mundu kuŵasoni jambone pa yindu yaŵamlambuchisye, soni kulosya kuti mundujo ali jwangalemwa.
c Chiwa cha Yesu chapelechesoni upile kwa ŵandu wakupata umi wangamala.
d Alole “Yiwusyo Yakutyochela kwa Ŵakuŵalanga” mu Sanja ja Mlonda ja Epulo 2021, pp. 30-31.