Twakamuchisyeje Ŵakulijiganya Baibulo Ŵetu Kusagula Kumtumichila Yehofa

1-2. (a) Ligongo chichi ŵakulijiganya Baibulo ŵane akusachelewa kulipeleka kwa Yehofa? (b) Ana chitukambilane chichi munganiji?

ANA pana yindu yayalepelekasyaga wawojo kuŵa jwa Mboni sya Yehofa? Komboleka kuti ŵajogopaga ŵandu ŵaŵakamulaga nawo masengo, achimjawo, kapena ŵachinasi ŵawo kuti chiŵajimuchile. Kwa ŵane mwine ŵajogopaga kuti yichasawusyaga kukola ndamo syambone syakamulana ni malamusi ga Mlungu. Naga ŵasimene ni yeleyi, nikuti mpaka akombole kumpikanichisya jwakulijiganya Baibulo jwakutenda woga kuti alipeleche kwa Yehofa.

² Yesu jwamanyililaga kuti woga welewu mpaka umlepelekasye mundu kutenda yindu yakumsangalasya Yehofa. (Mat. 13:​20-22) Nambope, jwalakwe nganaleka kwakamuchisya ŵandu ŵayasawusyaga kumkuya jwalakwe. Mwamti jwasalile ŵakulijiganya ŵakwe yampaka atende pakwakamuchisya ŵandu mpela ŵeleŵa mmatala gakuyichisyaga. (1) Kumanyilila yindu yayikwalepelekasya kwawula pasogolo, (2) kwakamuchisya kuti amnonyeleje mnope Yehofa, (3) kwakamuchisya kuti aŵicheje pandanda kumtumichila Yehofa, soni (4) kwakamuchisya kuti amalaneje ni yakusawusya yawo. Ana mpaka tukamulichisye masengo chamti uli yajwasasile Yesu kwa ŵakulijiganya ŵakweyi patukukamulichisya masengo buku ja Asangalaleje Mpaka Kalakala! pakumkamuchisya jwakulijiganya Baibulo kuti alipeleche kwa Yehofa?

AMKAMUCHISYEJE JWAKULIJIGANYA BAIBULO JWAWO KUMANYILILA CHACHIKUMLEPELEKASYA KWAWULA PASOGOLO

3. Ana komboleka kuti chaliji chichi chichamlepelekasyaga Nikodemo kuŵa jwakulijiganya jwa Yesu?

³ Mundu jwine juŵaliji Myuda jwakumanyika mnope lina lyakwe Nikodemo jwalagaga kuti aŵe jwakumkuya jwa Yesu. Jwalakweju jwayikopochele kuti Yesu jwatumidwe ni Mlungu Yesujo ali atesile utumiki wakwe kwa miyesi 6. (Yoh. 3:​1, 2) Nambope, Nikodemo jwasagwile kuti asimaneje ni Yesu mwakusisa ligongo lyakuti “ŵajogopaga Ayuda.” (Yoh. 7:13; 12:42) Komboleka kuti jwalakweju jwayiwonaga kuti chaluse yejinji naga akutanda kumkuya Yesu.a

4. Ana Yesu jwamkamuchisye chamti uli Nikodemo kupikanichisya yajwasakaga Mlungu kuti jwalakwejo atendeje?

⁴ Nikodemo jwamanyililaga Chilamusi, nambope jwasosekwaga kumkamuchisya kuti amanyilile yindu yajwasakaga Yehofa kuti jwalakwejo atendeje. Ana Yesu jwamkamuchisye chamti uli Nikodemo? Yesu jwaliji jwakoseka kumkamuchisya Nikodemo atamose mwakumjendela chilo. Konjechesya pelepa, Yesu jwasasile mwangasisa yindu yajwasosekwaga kutenda Nikodemo kuti aŵe jwakumkuya jwakwe. Yindu yakwe yaliji mpela kugalawuka mtima soni kuleka yakulemwa yakwe, kubatisidwa mmesi, nambosoni kumkulupilila Mwanache jwa Mlungu.—Yoh. 3:​5, 14-21.

5. Ana mpaka tumkamuchisye chamti uli jwakulijiganya kumanyilila chachikumlepelekasya kulipeleka kwa Yehofa?

⁵ Atamose yili mkuti jwakulijiganya jwetu akusamanyilila chenene yajikusasala Baibulo, tukusasosekwape kumkamuchisya kumanyilila chachikumlepelekasya kulipeleka kwa Yehofa. Mwine chindu chachikumwujikasya munyuma jwalakwejo mpaka chiŵe masengo gakusakamula mwinesoni mpaka yiŵe kuti ŵachibale ŵakwe akusamsisya mnope. Myoyo, mpaka atende chenene kupataga ndaŵi jakumkamuchisya jwakulijiganya jwawojo. Mpaka alinganye yakumŵilanjila yakulya kapena kuja kunguluka najo panepakwe. Pandaŵi jelejo, mpaka amkamuchisye jwalakwejo kuŵa jwagopoka kusala yakusawusya yakusimana nayo. Kaneko mpaka amlimbikasye kuti atende yakomboleka mwakuchenga yine ni yine paumi wakwe pakusaka kulosya kuti akusamnonyela Yehofa.

6. Ana mpaka amkamuchisye chamti uli jwakulijiganya jwawo kuti atande kuliwona kuti mpaka akombole kumsangalasya Yehofa? (1 Akolinto 16:13)

⁶ Jakulijiganya jwawo patandite kulupilila kuti Yehofa chachimkamuchisya kukola ndamo syambone, yichiŵa yangasawusya kwa jwalakwejo kukamulichisya masengo yakusalijiganya. (Aŵalanje 1 Akolinto 16:13.) Udindo wakusakola wawojo ukusalandana ni udindo wa mtichala jwa pa sukulu. Paganichisye ya ndaŵi jaŵaliji pa sukulu, ana ŵasangalalaga ni achiticha ŵamti uli? Yili yangakayikasya kuti ŵasangalalaga ni achiticha ŵaŵakamuchisyaga wawojo mwakuwusimana mtima soni ŵaŵakamuchisyaga kuti akalikayichilaga. Mwakulandana ni yeleyi, nombe jwakwiganya Baibulo jwambone jwangagambaga kwiganya yakusasaka Mlungu kuti tutendeje. Mmalomwakwe akusamkamuchisyasoni jwakulijiganya jwakwe kumanyilila kuti Yehofa mpaka amkamuchisye jwalakwejo kuchenga. Ana mpaka atende chamti uli yeleyi?

AMKAMUCHISYEJE JWAKULIJIGANYA BAIBULO JWAWO KUTI AMNONYELEJE MNOPE YEHOFA

7. Ana Yesu jwakamuchisye chamti uli ŵandu ŵaŵampikanilaga kuti amnonyeleje mnope Yehofa?

⁷ Yesu jwamanyilile kuti naga mundu akumnonyela mnope Mlungu nikuti mpaka asachilileje kukuya yindu yalijiganyisye. Ni ligongo lyakwe ndaŵi syejinji, jwalakwe jwajiganyaga ŵakumkuya ŵakwe yindu yayikakamuchisye kuti amnonyeleje mnope Yehofa. Mwachisyasyo, jwalakwe jwamlandenye Yehofa ni mtati jwakusapeleka yindu yambone kwa ŵanache ŵakwe. (Mat. 7:​9-11) Komboleka ŵane mwa ŵandu ŵaŵampikanilaga Yesuwo nganakola baba ŵachinonyelo mpela ŵeleŵa. Ni agambe ganisya muŵapikanile mumtima jemanjajo paŵampikene Yesu ali mkulondesya ngani jakusala ya mtati jwachinonyelo juŵampochelesoni mwanache jwakwe jwamlume jujwasokonechele. Apatu Yesu jwakamuchisye jemanjaji kuyiwona kuti Yehofa akusiŵanonyela mnope soni akusasaka kwakamuchisya.—Luk. 15:​20-24.

8. Ana mpaka amkamuchisye chamti uli jwakulijiganya jwawo kuti amnonyeleje mnope Yehofa?

⁸ Wawojosoni mpaka amkamuchisye jwakulijiganya jwawo kuti amnonyeleje mnope Yehofa. Mpaka atende yeleyi mwakumgombelechesya ndamo syambone syakwete Yehofajo. Pamalisisye lijiganyo lililyose, akusosekwa kumkamuchisyaga kuti aloleje kukamulana kwakupali pasikati pa yindu yakulijiganyayo ni chinonyelo chakwete Yehofa. Pakukambilana ya mbopesi jakutuwombola, akusosekwa kugombelechesya yajikusati mbopesiji pakumkwaya jwalakwejo pajika. (Alo. 5:8; 1 Yoh. 4:10) Naga jwakulijiganya Baibulo jwawo akupikanichisya yakusati Yehofa pakumnonyela jwalakwejo pajika, nikuti yichiŵa yangasawusyasoni kwa jwalakwejo kutanda kumnonyela mnope Yehofajo.—Agal. 2:20.

9. Ana ni chichi chachamkamuchisye Michael kuchenga umi ŵakwe?

⁹ Aganichisye yayamtendechele Michael jwakusatama ku Indonesia. Jwalakwe jwapagwile m’liŵasa lya Mboni sya Yehofa nambo nganayika pakubatisidwa. Pajwakwete yaka 18, jwalakwe jwapite ku chilambo chine kukukamula masengo ga kwendesya galimoto. Kaneko jwalombele nambo jwalilesile liŵasa lyakwelyo kumangwawo ni chakulinga chakuti akapitilisye kukamula masengo gakwe gala m’chilambo chine. Nkanipapite ndaŵi jelewu, ŵamkwakwe ŵala soni mwanache jwakwe jwamkongwe ŵatandite kulijiganya Baibulo mwamti ŵajawulaga pasogolo. Panyuma pa chiwa cha mamagwe, Michael jwaganisisye yakuwujila kumangwawo kuti akasamalileje babagwe. Mwamti nombenajo jwakundile kutandila kulijiganya Baibulo. Jwalakwe yamkwayiye mnope pajwaganichisyaga ya mbali ja “Kulijiganya Yejinji” ja mu lijiganyo 27 m’buku ja Asangalaleje Mpaka Kalakala! Michael jwayikene pakugwisya misosi pajwaganichisyaga mwayamkwayile Yehofa paŵam’weni Mwanache jwakwe ali mkulaga. Pajwapikanichisye yakusati Yehofa soni Yesu pakumnonyela jwalakwe, yamtendekasisye kola mtima wakuyamichila. Mwamti jwachenjile umi wakwe soni kaneko jwabatisidwe.

AMKAMUCHISYEJE JWAKULIJIGANYA BAIBULO JWAWO KUTI AŴICHEJE PANDANDA KUMTUMICHILA YEHOFA

10. Ana Yesu jwakamuchisye chamti uli ŵakulijiganya ŵakwe kuti aŵicheje pandanda kumtumichila Yehofa? (Luka 5:​5-11) (Alolesoni chiwulili.)

¹⁰ Ŵane mwa ŵandu ŵaŵalalichilaga Yesu nganachelewa kuyikopochela yakuti Yesu jwaliji Mesiya. Nambope, jemanjajo ŵasosekwaga kwakamuchisya kumanyilila kuti akusosekwa kulipeleka mnope pa masengo gakulalichila. Yesu paŵamŵendaga Petulo ni Andileya kuti aŵe ŵakumkuya ŵakwe, paliji pali papitile ndaŵi kutyochela paŵaŵele ŵakulijiganya ŵakwe. (Mat. 4:​18, 19) Jemanjaji pampepe ni Yakobo soni Yohane ŵatendaga bisinesi jakuwulaga somba, mwamti bisinesi jawojo jajendelaga chenene. (Maliko 1:​16-20) Yili yangakayikasya kuti Petulo ni Andileya ‘paŵalesile makoka gawo,’ ŵapatile matala gane gakwakamuchisya kupata yakusosechela ya m’maŵasa gawo kwineku ali kumkuya Yesu. Ana chichi chichatendekasisye jemanjaji kugawonaga masengo gakulalichila kuŵa gakusosekwa mnope kupunda kuwulaga somba? Ngani jajikusasimanikwa m’buku ja Luka jikusatusalila kuti Yesu jwatesile chakusimonjesya chachakamuchisye jemanjaji kulupilila mnope kuti Yehofa chachakamuchisya mwakwapa yakusosechela yawo.—Aŵalanje Luka 5:​5-11.

11. Ana mpaka tukamulichisye masengo chamti uli yindu yayiŵele yili mkututendechela paumi wetu pakumlimbikasya jwakulijiganya Baibulo jwetu?

¹¹ M’weji nganituŵa tukombwele kutenda yakusimonjesya mpela mujwatendelaga Yesu. Nambope, mpaka tukombole kwasalila ŵane yakusatenda Yehofa pakwasamalila ŵandu ŵakusamkulupilila mnope. Mwachisyasyo, ana wawojo akusakumbuchila yaŵatite Yehofa pakwakamuchisya paŵatandite kusimanikwa pa misongano ja mpingo? Naga ŵaliji pa masengo, komboleka ŵasosekwaga kwalondechesya abwana ŵawo kuti ngakamulaga masengo maawala gane ni chakulinga chakuti akasimanikweje nawo pamisongano ja mpingo. Pakumsalila jwakulijiganya Baibulo jwawo yindu yaŵele ali mkusimana nayo, amsalileje yachatite pakulimba chikulupi chawo paŵayiweni yaŵatendaga Yehofa pakwakamuchisya kuti akomboleje kuŵika pandanda yindu yakwayana ni kumtumichila jwalakwejo.

12. (a) Ligongo chichi tukusasosekwa kwajigalaga ŵane ku lijiganyo lyetu lya Baibulo? (b) Ana mpaka atende uli kuti ajiganyeje mwakamula mtima pakamulichisya masengo mafidiyo? Asale chisyasyo.

¹² Jwakulijiganya jwawo, mpaka yimlimbikasyesoni kupikana yaŵele ali mkutenda Aklistu ŵane kuti aŵicheje pandanda yindu yakwayana ni kumtumichila Yehofa. Myoyo, mpaka yiŵe yakamuchisya kwajigala ŵane pakwawula kukutendesya lijiganyo lya Baibulo. Ŵawusyeje jemanjajo yayakamuchisye kuti atande kumtumichila Yehofa, soni yaŵatesile kuti aŵicheje pandanda yindu yakwayana ni kumtumichila jwalakwejo. Mpaka atende chenenesoni kupataga ndaŵi jakulolela yimpepe mafidiyo gagakusasimanikwa pa mbali jakuti “Kulijiganya Yejinji” kapena pambali jakuti “Yakulinga Yinesoni” m’buku ja Asangalaleje Mpaka Kalakala! Mwachisyasyo, pakulijiganya lijiganyo 37, mpaka akambilane ni jwakulijiganya jwawojo fidiyo jakuti Yehofa Chachitupa Yatukusosechela.

AMKAMUCHISYEJE JWAKULIJIGANYA JWAWO KUMANYILILA YAMPAKA ATENDE PAKUMALANA NI YAKUSAWUSYA

13. Ana Yesu jwakamuchisye chamti uli ŵakulijiganya ŵakwe kukosechela yampaka atende ŵane pakwasisya?

¹³ Ndaŵi ni katema Yesu jwasalilaga ŵakumkuya ŵakwe kuti chachilagasidwa ni ŵandu ŵane mwinesoni ŵachinasi ŵawo. (Mat. 5:11; 10:​22, 36) Yesu ali asigele panandi kuwa, jwasalile ŵakulijiganya ŵakwe kuti ŵane mwa jemanjajo chachiwulajidwa. (Mat. 24:9; Yoh. 15:20; 16:2) Myoyo, jwalimbikasisye jemanjajo kuti atendeje utumiki wawo mwakusamala. Jwasalilesoni kuti akalimbanaga ni jwalijose juchachisisyaga yakusakulupilila. Nambosoni jwasalile kuti atendeje yindu mwakusamala ni chakulinga chakuti apitilisye kukamula masengo gakulalichila.

14. Ana mpaka tumkamuchisye chamti uli jwakulijiganya kumanyilila yampaka atende ŵane pakumsisya? (2 Timoteyo 3:12)

¹⁴ Mpaka tumkamuchisye jwakulijiganya kukosechela yampaka atende ŵane pakumsisya mwakumsalila yindu yampaka amŵechetele achimjakwe ŵa kumasengo, kapena ŵachinasi ŵakwe. (Aŵalanje 2 Timoteyo 3:12.) Ŵane mwa achimjakwe ŵa kumasengo mpaka amnyosyeje ligongo lyakuti jwalakwejo akulingalinga kutenda yindu yajikusasala Baibulo. Ŵandu ŵane mwinesoni ŵachinasi ŵakwe mpaka amnyosyeje ligongo lya yindu yakusakulupilila. Patutandite kumkamuchisya mwachitema jwakulijiganya jwetu kukosechela yampaka atende ŵane pakumsisya, chachimanyilila yakutenda pachachisimana nayo.

15. Ana chichi champaka chimkamuchisye jwakulijiganya Baibulo kupilila ŵachinasi ŵakwe pakumsisya?

¹⁵ Naga jwakulijiganya jwawo akwete ŵachinasi ŵakwe ŵakusamsisyaga, amkamuchisyeje kumanyilila ligongo lyakwe akusatendaga yeleyo. Komboleka ŵachinasi ŵakwewo mpaka aganisyeje kuti jwalakwejo asokonechele, kapenasoni mpaka yiŵe kuti akusagamba kuŵengana ni ŵa Mboni sya Yehofa basi. Atamose Yesu jwenejo ŵachinasi ŵakwe ŵamsisyaga. (Maliko 3:21; Yoh. 7:5) Myoyo, amkamuchisyeje jwakulijiganya jwawo kuti atendeje yindu mwakuwusimana mtima ni ŵandu ŵane kupwatikapo ŵachinasi ŵakwe.

16. Ana mpaka tumkamuchisye chamti uli jwakulijiganya jwetu kuti alalichileje mwakusamala?

¹⁶ Jwakulijiganya jwawo akusosekwa kumanyilila kuti atamose ŵachinasi ŵakwe palosisye kuti akusaka kumanyilila yejinji, ngakusosekwa kwasalila yosope ndaŵi jimo. Ligongo naga akwasalila yejinji mpaka yapesye yampakasoni yatendekasye kuti akakumbilaga kuŵechetana najo yakusakulupilila. Myoyo, mpaka atende chenene kumlimbikasya jwakulijiganya jwawo kuti aŵechetaneje ni ŵane m’litala lyakuti ndaŵi jine chapate pakutandila. (Akolo. 4:6) Mwine jwalakwejo mpaka alinganye yakwasalila ŵachinasi ŵakwe kuti ajinjile pa webusayiti ja jw.org. Yeleyi mpaka yape upile jemanjajo wakumanyilila yejinji yakwamba ŵa Mboni sya Yehofa pajika jawo.

17. Ana mpaka amkamuchisye chamti uli jwakulijiganya Baibulo jwawo kuti akomboleje kwanga yiwusyo yakusakola ŵane yakwamba ŵa Mboni sya Yehofa? (Alolesoni chiwulili.)

¹⁷ Mpaka akamulichisyesoni masengo ngani syasikusasimanikwa pa jw.org sya mtwe wakuti “Yiwusyo Yakusanonyela Ŵandu Kuwusya” pakumkamuchisya jwakulijiganya jwawo kukosechela kwanga kwa yiwusyo yine yampaka amwusye ŵane. (2 Tim. 2:​24, 25) Pambesi pa lijiganyo lililyose, akambilanejesoni mbali jakuti “Yakusaŵecheta Ŵane” jajikusasimanikwa m’buku ja Asangalaleje Mpaka Kalakala! Amlimbikasyeje jwakulijiganya jwawo kuti alinjilileje kwanga m’maloŵe gakwegakwepe. Amkamuchisyeje kumanyilila yampaka atende kuti ajanjeje chenene yiwusyo ya ŵane. Kutenda yeleyi mpaka kumkamuchisye jwakulijiganya jwawo kuti atendeje yindu mwakulimba mtima pakuchenjela yakusakulupilila.

18. Ana mpaka atende uli pakusaka kumlimbikasya jwakulijiganya jwawo kuti atande kulalichila ni mpingo? (Mateyu 10:27)

¹⁸ Yesu jwalimbikasisye ŵakulijiganya ŵakwe kuti alalichileje pakulanguka. (Aŵalanje Mateyu 10:27.) Jwakulijiganya Baibulo pakutanda mwachitema kwasalila ŵane yakusakulupilila, ni pakusatandasoni mwachitema kumdalila Yehofa. Ana mpaka amkamuchisye chamti uli jwakulijiganya jwawo kutenda yeleyi? Naga papelechedwe chimanyisyo chakuti mu dela jawo muchipagwa masengo ga pa dela gakulalichila, mpaka amlimbikasye jwakulijiganya jwawo kuganichisya yakuŵa jwakulalichila. Amsalileje kuti kulalichila pandaŵiji kukusaŵa kwangasawusya. Mpaka amlimbikasyesoni yakuti akoleje mbali mu msongano wa mkati mwa wiki. Jwalakwejo pakulingalinga kukwanilisya chakulinga chelechi, chachitanda kuyiwona kuŵa yangasawusya kuŵecheta mwakulimba mtima yakusakulupilila.

AKAMKAYICHILAGA JWAKULIJIGANYA BAIBULO JWAWO

19. Ana Yesu jwalosisye chamti uli kuti nganiŵakayichilaga ŵakumkuya ŵakwe? Ana m’weji mpaka tumsyasye chamti uli?

¹⁹ Yesu mkanawujile kwinani, jwasalile ŵakulijiganya ŵakwe kuti jemanjajo chachiŵa ŵakamulana ni jwalakwejo. Pandaŵiji, ŵakulijiganyawo nganamanyililaga kuti jwalakwejo jwasalaga yakuti jemanjajo chachijawula kwinani. Atamose yaliji myoyo, Yesu jwakwete chikulupi chakuti ŵakulijiganyawo ŵasakaga kumsangalasya Yehofa. (Yoh. 14:​1-5, 8) Jwalakwe jwamanyililaga kuti ŵakulijiganyawo ŵasosekwaga ndaŵi jakwanila kuti atande kupikanichisya chenene yindu yine mpela chembecheyo chakwawula kwinani. (Yoh. 16:12) M’wejisoni tukusosekwa kulosyaga kuti tukwete chikulupi chakuti jwakulijiganya jwetu akusasaka kumsangalasya Yehofa.

20. Ana mlongo jwine jwa ku Malawi jwalosisye chamti uli kuti nganamkayichilaga jwakulijiganya jwakwe?

²⁰ Ngatukusakayichilaga yakuti jwakulijiganya jwetu akusasaka kutenda yambone. Aganichisye ya Mlongo Chifundo, jwakusatama ku Malawi. Mlongoju jwatandite kulijiganya Baibulo ni msikana jwine jwa Chikatolika lina lyakwe Alinafe. Jemanjaji ŵakamulichisyaga masengo buku ja Asangalaleje Mpaka Kalakala! Myoyo, ali agambile kumalisya kulijiganya lijiganyo 14, Chifundo ŵamwusisye Alinafe kuti asale nganisyo syakwe pakwamba ya kutindiŵalila yiwanichisyo. Yeleyi yamtengwisye mnope Alinafe mwamti jwajanjile kuti, “Kuli kusagula kwa mundu!” Mlongo Chifundo pajwapikene yeleyi, jwaganisyaga kuti lijiganyolyo chilimale basi. Nambope, mwakuwusimana mtima jwalakwe jwapitilisye kulijiganya ni Alinafe kwineku ali akwete chikulupi chakuti lisiku line chachipikanichisya mfundo jakwe. Pali pagambile kumala miyesi jamnono, Chifundo ŵamwusisye Alinafe chiwusyo chachikusasimanikwa mu lijiganyo 34 chakuti, “Ana kulijiganya Baibulo soni yakwamba Yehofa, kwakamuchisye chamti uli?” Pakulondesya yajwajanjile Alinafe, Mlongo Chifundo jwatite, “Jwasasile mfundo syejinji. Mwamti jimo mwa mfundosyo jaliji jakuti jwalijiganyisye yakuti ŵa Mboni sya Yehofa ŵangatendaga yindu yele Baibulo jikusalekasya.” Mwamti mkanipapite ndaŵi, Alinafe jwalesile kukamulichisya masengo yiwanichisyo, soni kaneko jwaŵajilwe kubatisidwa.

21. Ana mpaka tumkamuchisye chamti uli jwakulijiganya jwetu kuti anonyeleje mnope yisyesyene?

²¹ Atamose kuti Yehofa ni jwakusatendekasya mbeju ja yisyesyene kukula, m’weji tukwete udindo wakumkamuchisya jwakulijiganya jwetu kwawula pasogolo. (1 Akoli. 3:7) Tukusasosekwa kutenda yejinji konjechesya pakwajiganya yakusasaka Mlungu kuti jemanjajo atendeje. Tukusitwakamuchisyaga kuti amnonyeleje mnope Yehofa. Konjechesya pelepa, tukusitwalimbikasya kuti aŵicheje pandanda yindu yakwayana ni kumtumichila Yehofa. Nambosoni tukusitwajiganya kuti amdalileje mnope Yehofa pakusimana ni yakusawusya. Patukutenda yindu yakulosya kuti ngatukusamkayichilaga jwakulijiganya jwetu, yikusamkamuchisya jwalakwejo kulingalinga kutenda yindu yakumsangalasya Yehofa soni kunonyela mnope yisyesyene.