Yampaka Tutende Pakupeleka Malangiso

1. Ana ŵani ŵakusasosekwa kupeleka malangiso? Alondesye.

ANA akusayiwona kuŵa yangasawusya kwapa ŵane malangiso? Ŵane akusajogopa kwajamuka achimjawo kapena kupeleka malangiso. Chinga yikusatusawusya kupeleka malangiso kapena iyayi, wosope tukusasosekwa kupelekaga malangiso ndaŵi ni katema. Tukuŵecheta yeleyi ligongo lyakuti Yesu jwasasile kuti ŵandu chachamanyilila ŵakumkuya ŵakwe ligongo lyakunonyelana. (Yoh. 13:35) Myoyo litala limo lyakulosya chinonyelochi lili kupeleka malangiso kwa abale ni alongo ŵetu naga pakusosekwa kutenda yeleyo. Maloŵe ga Mlungu gakusati ‘mjakwe jwambone’ ni ‘jwakusakujamuka mwangapita mumbali.’—Mis. 27:9.

2. Ana achakulungwa ŵa mumpingo akusasosekwa kutenda chichi soni ligongo chichi? (Alole libokosi lyakuti “Kupeleka Malangiso pa Msongano wa Utumiki ni Umi Wetu Wachiklistu.”)

² Achakulungwa ŵa mumpingo akusasosekwa kumanyilila yampaka atende kuti apelecheje malangiso gambone kwa ŵane. Mwamti kupitila mwa Yesu, Yehofa jwapele jemanjaji utumiki wakusamalila mpingo. (1 Pet. 5:​2, 3) Litala limo lyakusapelechela malangiso achakulungwaŵa lili kupitila mu ngani syakusaŵecheta pa mpingo. Achakulungwaŵa akusapelekasoni malangiso kwa Mklistu jwalijose pajika. Nambosoni akusiŵakamuchisya ŵandu ŵaŵalesile kumtumichila Yehofa kuti awujile. Nambo ana achakulungwa ŵa mumpingo soni wosopewe mpaka tupeleche chamti uli malangiso?

3. (a) Ana chichi champaka chitukamuchisye kuti tupelecheje malangiso gambone kwa ŵane? (Yesaya 9:6; alole libokosi lyakuti “Amsyasyeje Yesu Pakupeleka Malangiso.”) (b) Ana chitukambilane chichi munganiji?

³ Chindu champaka chitukamuchisye kuti tuŵe ŵakupeleka malangiso ŵambone chili kulijiganya m’Baibulo ngani sya ŵandu ŵaŵapelekaga malangiso gambone. Mwamti Yesu jwaliji chisyasyo chambone panganiji. Pangani jakupeleka malangiso jwalakwe ŵampele lina lyakuti, “Pungu Jwakusimonjesya.” (Aŵalanje Yesaya 9:6.) Mungani ajino, chitulole yampaka tutende mundu patuŵendile malangiso, soni yampaka tutende naga tukusaka kupeleka malangiso kwa ŵandu ŵele nganatuŵenda. Chitulolesoni umbone wawukusapaga naga tukupeleka malangiso pandaŵi jambone soni m’litala lyakuŵajilwa.

YAMPAKA TUTENDE MUNDU PATUŴENDILE MALANGISO

4-5. Ana tukusasosekwa kuliwusya chiwusyo chapi mundu jwine patuŵendile malangiso? Asale chisyasyo.

⁴ Ana chichi chachikusayika mwachitema munganisyo mwetu jwine patuŵendile malangiso? Tukusasangalala soni kusachilila kumkamuchisya ndaŵi jijojo. Nambope, chandanda tukusasosekwa kuliwusya kuti, ‘Ana ndili jwakuŵajilwa kupeleka malangiso pangani jeleji?’ Mwamti ndaŵi sine mpaka yiŵe chenene kwamba kumlongolela mundujo kwa mundu jwakuŵajilwa jwampaka akapeleche malangiso gambone panganijo.

⁵ Kuti tupikanichisye yeleyi kwende tuganichisye ayi. Tujile kuti mjawo julwasile mnope. Mwamti jukwasalila kuti jukuwungunya mitela jampaka jimkamuchisye. Kaneko ni jukwawusya wawojo kuti amsalile mtela wampaka umkamuchisye. Komboleka mpaka asachilileje mnope kumkamuchisya mjawojo, nambo yili mkuti wawojo ŵangamanyililaga ya chipatala. Ana mpaka atende uli pelepa? Litala lyambone mpaka liŵe kumkamuchisya mjawojo kupata mundu jwine jwampaka amkamuchisye jwakusamanyilila ya chipatala.

6. Ligongo chichi tukusasosekwa kwembecheya kaje mkanitupeleche malangiso?

⁶ Atamose patukuyiwona kuti tuli ŵakuŵajilwa kupeleka malangiso kwa mundu jwine, ndaŵi sine mpaka tutende chenene kwembecheya kaje kwa kandaŵi mkanituŵe kupeleka malangisogo. Ligongo chichi tukuŵecheta yeleyi? Pa Misyungu 15:28 pakusasala kuti ‘mundu jwakulungama akusaganichisya kaje mkanajanje.’ Nambi mpaka tutende uli naga tukuyiwona kuti tukumanyilila malangiso gakusosekwa mundujo? Mpaka tusosekwepe ndaŵi jakwanila kuti tuwungunye, kupopela, soni kuganichisya mwakusokoka. Kutenda yeleyi, kuchitukamuchisya kuti tupeleche malangiso gakamulana ni nganisyo sya Yehofa panganijo. Kwende tulole chisyasyo cha jwakulochesya Natani.

7. Ana alijiganyisye chichi pangani ja jwakulochesya Natani?

⁷ Jwakulochesya Natani pajwaŵechetanaga ni Mwenye Daudi, mwenyejo jwasasile kuti jwasakaga kutaŵa nyumba ja Yehofa. Kaneko ndaŵi jijojo, Natani jwamsalile mwenyejo kuti mpaka atende yakusakayo. Nambotu, Natani jwasosekwaga kuwusya kaje malangiso kwa Yehofa. Tukuŵecheta yeleyi ligongo lyakuti Yehofa nganasakaga kuti Daudi ataŵe nyumbajo. (1 Mbi. 17:​1-4) Mpela mwatuyiwonele mungani jeleji, naga ŵane atuŵendile kuti twape malangiso mpaka tutende chenene kuŵambala ‘kuwutuchila kuŵecheta.’—Yak. 1:19.

8. Ana ni ligongo line lyapi lyalikusatutendekasya kuŵa ŵakusamala patukupeleka malangiso?

⁸ Kwende tulolesoni ligongo line lyalikusatutendekasya kuŵa ŵakusamala mnope patukupeleka malangiso. Patumpele mundu jwine malangiso gakulemwecheka ni kusimana ni yakusawusya, mpaka yiŵe kuti m’wejo twakamuchisye nawo kuti mundujo asimane ni yakusawusyayo. Ni ligongo lyakwe tukusasosekwa kuganichisya chenene mkanituŵe kupeleka malangiso kwa mundu jwine.

YAMPAKA TUTENDE PATUKUSAKA KUPELEKA MALANGISO KWA ŴANDU ŴANGANATUŴENDA

9. Ana achakulungwa ŵa mumpingo akusasosekwa kusimichisya chichi mkanaŵe kupeleka malangiso? (Agalatiya 6:1)

⁹ Ndaŵi ni katema, achakulungwa ŵa mumpingo akusasosekwa kupeleka malangiso kwa m’bale kapena mlongo jwatandite kwenda pa “litala lyakulemwecheka.” (Aŵalanje Agalatiya 6:1.) Yeleyi mpaka yitendekwe naga Mklistu atandite kutenda yindu mwangali lunda yampaka yimlongolele kutenda ulemwa wekulungwa. Myoyo, chakulinga cha achakulungwa ŵa mumpingo chikusaŵa kumkamuchisya mundu mpela jweleju kuti apitilisye kwenda palitala lyakwawula ku umi. (Yak. 5:​19, 20) Myoyo, kuti malangiso gakupeleka gaŵe gakamuchisya, chandanda achakulungwawo akusasosekwa kusimichisya kuti mundujo jutandite kwenda palitala lyakulemwecheka. Achakulungwawo akusasosekwa kumbuchilasoni kuti mundu pakutenda yindu yineyakwe yakulekangana ni mwakatendele jemanjajo yangagopolelaga kuti yakutenda mundujo yili yakulemwecheka. (Alo. 14:​1-4) Ana achakulungwa pasimichisye kuti mundu jwine jutandite kwenda palitala lyakulemwecheka mpaka ampe chamti uli malangiso?

10-12. Ana achakulungwa ŵa mumpingo akusasosekwa kutenda chichi pakupeleka malangiso kwa mundu jwele nganiŵaŵenda malangisogo? Asale chisyasyo. (Alolesoni yiwulili.)

¹⁰ Yikusaŵaga yakusawusya kwa achakulungwa ŵa mumpingo kupeleka malangiso kwa mundu jwanganaŵenda malangisogo. Ligongo chichi tukuŵecheta yeleyi? Ndumetume Paulo jwasasile kuti ndaŵi sine mundu pakwenda palitala lyakulemwecheka yikusaŵa kuti atamose msyenejo ngakumanyilila. Myoyo, mkanaŵe kupeleka malangiso, jwamkulungwa jwa mumpingo akusasosekwa kutenda kaje yindu yine yampaka yimkamuchisye mundujo kupochela malangisogo.

¹¹ Kupeleka malangiso kwa mundu jwanganatuŵenda, mpaka tukulandanye ni kupanda mbeju pa litaka lyakulimba. Mundu mkanaŵe kupanda mbeju akusatanda kaje kulima chenene. Yeleyi yikusatendekasya kuti litakalyo liŵe lyangalimba. Kaneko akusapanda mbeju syakwe soni kwitilila kuti mbejusyo simele chenene. Mwakulandana ni yeleyi, pana yindu yine yampaka asosekwe kutenda jwamkulungwa jwa mumpingo mkanawe kupeleka malangiso kwa mundu jwanganaŵenda malangisogo. Mwachisyasyo, mmalo mwakuwutuchila kupeleka malangiso, jwamkulungwa jwa mumpingo mpaka alinde ndaŵi jambone. Kaneko mpaka amsalile mundujo kuti akusamnonyela mnope mwamti pana yindu yine yakamuchisya yakusaka kukambilana najo. Mundu pakupeleka malangiso mwachinonyelo soni mwachanasa, yikusaŵa yangasawusya kwa ŵane kupochela malangiso gakwego.

¹² Pakukambilana ni mundujo, jwamkulungwa jwa mumpingo mpaka amkumbusyesoni kuti pangali jwangalemwa, mwamti wosopewe tukusasosekwa kupochela malangiso ndaŵi sine. Kutenda yeleyi mpaka kumkamuchisye mundujo kuti agapochele chenene malangisogo. (Alo. 3:23) Kaneko jwamkulungwajo mpaka akamulichisye masengo maloŵe gachinonyelo soni gakumchimbichisya mundujo pakumlosya Lilemba lyalikulosya kuti jwalakwejo atandite kwenda palitala lyakulemwecheka. Mundujo pamanyilile kuti alemwisye, jwamkulungwajo mpaka asosekwe kulondesya mwakupikanika chenene yindu yakusosekwa kuchenga mundujo kuti yimjendele chenene. Pambesi pakwe, jwamkulungwajo mpaka amtendekasye mundujo kupochela malangisogo ni makono gaŵili mwakumsalila ndamo sine syambone syakwete soni mwakupopela najo yimpepe.—Yak. 5:15.

13. Ana achakulungwa mpaka atende uli pakusaka kusimichisya kuti mundu jwakumpa malangiso jupikanichisye chenene?

¹³ Ndaŵi sine, mundu jwakupochela malangisojo mpaka alepele kugapikanichisya chenene. Ana achakulungwa ŵa mumpingo akusasosekwa kutenda chichi kuti amanyilile naga ŵane apikanichisye chenene malangiso gawo? Mpaka atende yeleyi mwakumwusya mundujo yiwusyo yine nambo mwakumchimbichisya. (Jwak. 12:11) Kwanga kwa mundujo mpaka kumkamuchisye jwakupeleka malangisojo kumanyilila naga mundujo jupikanichisye malangisogo kapena iyayi.

YAMPAKA TUTENDE KUTI TUPELECHEJE MALANGISO PANDAŴI JAMBONE SONI MWAKUŴAJILWA

14. Ana tukusasosekwa kupeleka malangiso patutumbile? Alondesye.

¹⁴ Ligongo lyakuti wosopewe tuli ŵangali umlama, ndaŵi sine tukusatenda kapena kuŵecheta yindu yangasangalasya ŵane. (Akolo. 3:13) Mwamti Maloŵe ga Mlungu gakusasala kuti ndaŵi sine mpaka tutende yindu yakwatumbilikasya ŵane. (Aef. 4:26) Atamose yili myoyo, tukusasosekwa kuŵambala kupeleka malangiso tuli tutumbile. Tukuŵecheta yeleyi ligongo lyakuti “mundu patumbile jwangatenda yindu yambone pameso pa Mlungu.” (Yak. 1:20) Mwamti naga tukupeleka malangiso tuli tutumbile, tuchigamba kutendekasya kuti nganijo jisawusye mnope. Nambotu pelepa ngatukugopolela kuti tulepeleje kusala nganisyo syetu kapena kulosya mwatukupikanila kwa ŵandu ŵatutumbilikasisye. Nambo mfundo jakwe jili jakuti, mpaka tuŵechete yakupikanika kwa ŵane, naga tukwembecheya mpaka mtima wetu uli utemi mmalo. Mpaka tulijiganye yejinji panganiji kutyochela kwa Elihu juŵapeleche malangiso kwa Yobu.

15. Ana tukulijiganya chichi kutyochela kwa Elihu? (Alolesoni chiwulili.)

¹⁵ Pamasile masiku Elihu ali kumpikanila Yobu pajwalichenjelaga kwa achimjakwe ŵaŵayiche kukumtengusya. Kaneko Elihu jwatandite kumtendela chanasa Yobu. Nambo Elihu jwamtumbililesoni Yobu ligongo lyakuti nganamchimbichisya Yehofa soni jwagambaga ganichisya yakwepe. Atamose kuti yaliji myoyo, Elihu jwajembecheye mpaka jili jiyiche ndaŵi jakuti aŵechete. Mwamti jwalakwe pajwapelekaga malangiso kwa Yobu jwaŵechete mwachinonyelo soni mwakumchimbichisya. (Yob. 32:2; 33:​1-7) Yajwatesile Elihuyi yikusatujiganya mfundo jakusosekwa mnope. Mfundo jakwe jili jakuti, yikusaŵa chenene kupeleka malangiso mtima wetu pawuli mmalo. Nambosoni maloŵe getu galosyeje kuti tukusamchimbichisya soni kumnonyela mundujo.—Jwak. 3:​1, 7.

TUKALEKA KUPELEKA SONI KUPOCHELA MALANGISO

16. Ana tulijiganyisye chichi pa Salimo 32:8?

¹⁶ Lilemba lyakulongolela nganiji lisasile kuti ‘Yehofa akusatupa malangiso soni kutulolela.’ (Aŵalanje Salimo 32:​8, NWT.) Yeleyitu yikwamba kulosya kuti jwalakwe chachitukamuchisya ndaŵi syosope. Nambotu, ngaŵa kuti Yehofa akusagamba kutupa malangisope. Mmalomwakwe akusatukamuchisyasoni kumanyilila yampaka tutende pakugakamulichisya masengo. Kusala yisyene, chelechitu chili chisyasyo chambone chatukusasosekwa kujigalila. Mwamti patukwete upile wakwapa ŵane malangiso, mpaka tutende chenene kumsyasya Yehofa mwakupitilisya kwakamuchisya jemanjajo kuti akomboleje kukamulichisya masengo malangisogo.

17. Ana achakulungwa ŵa mumpingo pakupeleka malangiso ga m’Baibulo gangapita mumbali akusaŵa mpela chichi? Alondesye. (Yesaya 32:​1, 2)

¹⁷ Kupundana ni kalakose, apano ni patukusosekwa mnope kupeleka soni kupochela malangiso gambone. (2 Tim. 3:1) Mwamti achakulungwa ŵa mumpingo pakupeleka malangiso ga m’Baibulo gangapita mumbali akusaŵa mpela “lusulo [lwa mesi] m’chilambo chejumu.” (Aŵalanje Yesaya 32:​1, 2.) Nombenawo achimjetu ŵakusamanyilila yindu yampaka yitusangalasye nambo ni kutusalila yindu yatukusosechela akusatupa mtuka wambone mnope wawukusaŵa mpela “maapulo mu mbale ja silifa.” (Mis. 25:11) Myoyo, kwende wosopewe tupitilisye kupata lunda lwakutukamuchisya kuti tupelecheje soni kupochela malangiso gambone.