Akumbuchileje Kwapopelela Ŵane

1. Ana tukusamanyilila chamti uli kuti mapopelo getu gali gakusosekwa kwa Yehofa?

LIPOPELO lili lyakusosekwa mnope. Aganichisye ayi. Yehofa ŵapeleche masengo gakulekanganalekangana kwa malayika. (Sal. 91:11) Jwalakwe ŵapelechesoni maudindo gekulungwa kwa Mwanache jwakwe. (Mat. 28:18) Nambi udindo wakupikanila mapopelo getu ŵawupeleche kwa ŵani? Udindo welewu uli myala mwa Yehofa jika. Mwamti Yehofa jwali Mlungu ‘jwakupikana lipopelo,’ akusapikanila lipopelo lya mundu jwalijose pajika.—Sal. 65:2.

2. Ana ndumetume Paulo jwapeleche chisyasyo chamti uli pangani jakwapopelela ŵane?

² Atamose kuti mpaka tumsalile Yehofa mwipopelo yayikutulagasya nganisyo, tukusosekwasoni twapopeleleje ŵane. Yeleyi ni yajwatesilesoni ndumetume Paulo. Mwachisyasyo, jwalakwe jwalembile chikalata chakwawula kumpingo wa ku Efeso chachasasile kuti, “Ngupitilisyape kumkolanga jemanja m’mapopelo gangu.” (Aef. 1:16) Paulo jwampopelelagasoni mundu jwalijose pajika. Mwachisyasyo, jwalakwe ŵamsalile Timoteyo kuti, “Ngumyamichila mnope Mlungu . . . ligongo pangupopela mwakumchondelela chilo ni musi, ngangusaliŵalila kumpopelela mmwejo.” (2 Tim. 1:3) Paulo jwapopelaga kwa Yehofa ligongo lya yakusawusya yakwe. (2 Akoli. 11:23; 12:​7, 8) Atamose yaliji myoyo, jwalakwe jwapopelelagasoni ŵane.

3. Ligongo chichi mpaka tuliŵalile kwapopelela ŵane?

³ Ndaŵi sine mpaka tuliŵalileje kwapopelela ŵane. Ligongo chichi yeleyi mpaka yitutendechele? Mlongo jwine lina lyakwe Sabrinaa jwasasile ligongo limo. Jwalakwe jwatite, “Masiku agano tukusatanganidwa mnope. Yeleyi mpaka yitusokonasyeje ni kwambaga kupopelelaga yakusawusya yetupe.” Ana wawojo yikusiyatendechela yeleyi ndaŵi sine? Naga yili myoyo, nganiji chijakamuchisye mnope. Tukuŵecheta yeleyi ligongo lyakuti chijilondesye (1) ligongo lyakwe kwapopelela ŵane kuli kwakusosekwa mnope nambosoni (2) chijilondesye yindu yampaka yakamuchisye kuti akombole kutenda yeleyi.

LIGONGO LYAKWE TUKUSASOSEKWA KWAPOPELELA ŴANE

4-5. Ana lipopelo lyakwapopelela ŵane “likusaŵa lyamachili” chamti uli? (Yakobo 5:16)

⁴ Lipopelo lyakwapopelela ŵane “likusaŵa lyamachili.” (Aŵalanje Yakobo 5:16.) Ana kwapopelela ŵane mpaka kuchenje mwayiŵelele yindu paumi wa ŵandu ŵane? Elo. Atamose kuti Yesu jwamanyilile kuti ndumetume Petulo chamkane jwalakwejo, Yesu jwamsalile jwalakwejo kuti, “Une mbopesile kala yakwamba mmwejo kuti chikulupi chenu chikamala.” (Luk. 22:32) Nombe Paulo jwamanyililaga kuti lipopelo mpaka lichenje yindu yayikumtendechela mundu. Myoyo jwalakwe pajwaliji mundende ku Loma, jwamlembele Filimoni kuti, “Ngukulupilila kuti kupitila m’mapopelo ga jemanja, changopole ni kumbuchisya kwa jemanja.” (Fil. 22) Mwamti yeleyi ni yayatendekwe. Mkanipapite ndaŵi Paulo ŵagopoledwe soni jwapitilisye kulalichila.

⁵ Nambotu yeleyi ngayikugopolela kuti mpaka tumkanganichisye Yehofa kutenda yine yakwe kupitila m’mapopelo getu. Yakusatenda jwalakwe yili kupikanila yindu yayikwadandawulisya ŵakutumichila ŵakwe, mwamti ndaŵi sine akusasagula kutendapo kandu. Kumanyilila yeleyi mpaka kutukamuchisye kuti tupopeleje kwa Yehofa mwakutyochela mumtima kaneko ni kujileka nganijo myala mwakwe.—Sal. 37:5; alole 2 Akolinto 1:11.

6. Ana kwapopelela ŵane kukusatukamuchisya kuti twawoneje chamti uli? (1 Petulo 3:8)

⁶ Kwapopelela ŵane kukusatukamuchisya kuti ‘twatendeleje chanasa.’ (Aŵalanje 1 Petulo 3:8.) Mundu jwachanasa akusamanyilila yakusawusya ya mundu jwine, mwamti akusasachilila kumkamuchisya. (Maliko 1:​40, 41) Jwamkulungwa jwa mumpingo jwine lina lyakwe Michael jwatite, “Panapopelele ŵane pa yindu yakusosechela, yikusangamuchisya kupikanichisya yakusawusya yakusimana nawo, mwamti yeleyi yikusandendekasya kuti nanonyeleje mnope. Ngusalipikana kuti jemanjaji ali achimjangu ŵapamtima, atamose yili mkuti jemanjajo ngakumanyilila.” M’bale Richard jwelesoni ali jwamkulungwa jwa mumpingo jwasasilesoni umbone wine. Jwalakwe jwatite, “Patumpopelele mundu jwine, tukusaŵa ŵakusachilila mnope kutenda yine yakwe pakusaka kumkamuchisya.” Jwalakwe jwasasilesoni kuti, “Patumkamuchisye mundu jwele twamkolasile mu lipopelo lyetu, yikusaŵa mpela kuti tukukamuchisya nawo kuti lipopelo lyetulyo lijanjidwe.”

7. Ana kwapopelela ŵane kukusatukamuchisya chamti uli kuti tuŵambaleje kuganichisya mnope yakusawusya yetu? (Afilipi 2:​3, 4) (Alolesoni yiwulili.)

⁷ Kwapopelela ŵane kukusatukamuchisya kuti tuyiwoneje mwakuŵajilwa yakusawusya yetu. (Aŵalanje Afilipi 2:​3, 4.) Wosopewe tukusasimana ni yakusawusya yine yakwe yayikusayika ligongo lyakuti tukutama m’chilambo chakulamulila Satanachi. (1 Yoh. 5:19; Chiw. 12:12) Myoyo, naga tukukola chakulinga chakwapopelela ŵane ndaŵi syosope, yikusatukamuchisya kumbuchila kuti nombe ‘achalongo achimjetu pachilambo chosope akusimanasoni ni yakusawusya yakulandanayo.’ (1 Pet. 5:9) Mpayiniya jwine lina lyakwe Katherine jwatite, “Kwapopelela ŵane kukusangumbusya kuti ŵanesoni akusimana ni yakusawusya. Mwamti kumbuchila yeleyi kukusangamuchisya kuti ŵambaleje kuganichisya mnope yakusawusya yangu.”

JEMANJAJI AKUSASOSECHELA MAPOPELO GETU

8. Ana ŵani ŵatukusasosekwa kwakolangasoni m’mapopelo getu? Asale yisyasyo.

⁸ Ana ni ŵandu ŵane ŵapi ŵatukusasosekwa kwakolanga m’mapopelo getu? Mpaka twapopeleleje ŵandu ŵakulwala, ŵachinandipile ŵakusalagasidwaga ku sukulu, kapena ŵandu ŵakulaga ligongo lya uchekulu. Panasoni abale ni alongo ŵetu ŵajinji ŵakupilila kulagasidwa ni ŵachibale ŵawo kapena ŵaboma. (Mat. 10:​18, 36; Mase. 12:5) Abale ŵetu ŵane ŵatisile msimangwawo ligongo lya ngondo kapena yachiwawa yakusatandisya ŵandale. Pele ŵane akulaga ligongo lya ngosi syachilengedwe. Yisyene kuti abale ni alongo ŵeleŵa mpaka yiŵe kuti nganituwoneganeje nawo. Nambope, patukwapopelela jemanjaji tukusalosya kuti tukupikanila lilamusi lya Yesu lyakuti “mnonyelaneje.”—Yoh. 13:34.

9. Ligongo chichi tukusasosekwa kwapopelela abale ŵakusalongolela mu gulu ja Yehofa pampepe ni achiŵamkwawo?

⁹ Mpaka twapopelesoni abale ŵakusalongolela mu gulu ja Yehofaji. Jemanjaji akupwatikapo abale ŵa mu Likuga Lyakulongolela soni ŵakwakamuchisya ŵawo, abale ŵa mu Komiti ja Nyambi, abale ŵakusalolela ma dipatimenti pa Beteli, ŵakulolela madela, achakulungwa ŵa mumpingo, nambosoni ŵakutumichila ŵakamuchisya. Atamose kuti abaleŵa akusatukamuchisyaga, nambope nombenawo akusalimbana ni yakusawusya yawo. (2 Akoli. 12:15) Mwachisyasyo, jwakulolela dela jwine lina lyakwe Mark jwatite, “Chakusawusya changu chekulungwa chili kutama kutali mnope ni achinangolo ŵangu ŵelesoni ali ŵachekulupe. Achinangoloŵa akusalwalasoni ndaŵi ni katema. Atamose kuti chemwali ŵangu yalumo ni ŵamkwawo akusiŵasamalilaga achinangoloŵa, yikusambwetekape kuyiwona kuti jwangakombola kwatendela yindu yine yangakombwele kutenda yikaŵe kuti tuŵandikene.” Chinga tukumanyilila yakusawusya yakusimana nayo abale ŵakusakamula masengo mwakulimbichilaŵa kapena iyayi, mpaka tutende chenene kwakolangaga m’mapopelo getu. (1 Ates. 5:​12, 13) Mpaka twapopelelejesoni achiŵamkwawo ŵa abaleŵa. Yili myoyo ligongo lyakuti alongo ŵeleŵa akusatenda yindu yejinji yayikusiyakamuchisyaga achiŵamkwawo kupitilisya kutenda mautumiki gawo.

10-11. Ana Yehofa akusasangalala ni mapopelo getu atamose yili mkuti nganitusala ŵandu ŵasyesyene ŵatukwapopelela? Alondesye.

¹⁰ Mpela mwatuyiwonele munganiji, pana magulu gejinji ga abale ni alongo ŵatukusitwapopelela. Mwachisyasyo, atamose yili mkuti ngatukuganichisya ya mundu jwinejwakwe, mpaka tumŵende Yehofa kuti ŵakamuchisyeje ŵandu ŵali mundende kapena kuti ŵalimbikasye ŵandu ŵawililwe. M’bale Donald jwelesoni ali jwamkulungwa jwa mumpingo jwatite, “Pana abale ni alongo ŵetu ŵajinji ŵakusimana ni yakusawusya ŵele ndaŵi sine mpaka tugambe kwakolanga m’magulu patukwapopelela.”

¹¹ Ana Yehofa akusangalala ni mapopelo mpela gelega? Elo. Pajatu ngatukusamanyilila yindu yisyesyene yakusosechela abale ni alongo ŵetu wosope. Myoyo, nganikuŵa kulemwa kumŵenda Yehofa kuti agakamuchisye magulu ga abale ni alongo ŵakusimana ni yakusawusya yine yakwe. (Yoh. 17:20; Aef. 6:18) Mapopeloga gakusalosya kuti tukusajinonyela ‘gulu josope ja ŵakulupilila achimjetu.’—1 Pet. 2:17.

YAMPAKA TUTENDE PATUKUMPOPELELA MUNDU PAJIKA

12. Ana kulolechesya yayikwatendechela ŵane mpaka kutukamuchisye chamti uli kumpopelela jwalijose pajika?

¹² Alolechesyeje yayikwatendechela ŵane. Kupwatika pakwapopelela abale ni alongo mpela gulu, yikusaŵa chenene kumpopelelaga mundu jwalijose pajika mwakumkolanga lina lyakwe. Ana mumpingo mwawo mwana mundu jwaŵele ali mkulwala kwandaŵi jelewu? Kapena mwana jwachinyamata jwatengwiche mwine ligongo lyakuti achimjakwe ŵa kusukulu akusamkanganichisya kutenda yakusakala? Ana pana nangolo jwine jwayikumsawusya kulela jika ŵanache ŵakwe ‘mwakwajamuka soni kwajiganya yakwamba Yehofa’? (Aef. 6:4) Naga akusalolechesya yayikwatendechela ŵane, yichiŵa yangasawusya kwatendela chanasa jemanjajo yayichalimbikasya kuti ŵapopeleleje.b—Alo. 12:15.

13. Ana mpaka twapopelele chamti uli ŵandu ŵanganituwoneganeje nawo?

¹³ Ŵapopeleleje ŵane mwakwakolanga mena. Mpaka tutende yeleyi atamose kwa ŵandu ŵanganituwoneganeje nawo. Mwachisyasyo, aganichisye ya abale ni alongo ŵetu ŵali mundende m’yilambo mpela ya Crimea, Eritrea, Russia, soni Singapore. Pa jw.org, mpaka apate mena ga ŵandu ŵali mundendeŵa.c Jwakulolela dela jwine lina lyakwe Brian jwatite, “Nayiweni kuti kulemba lina lya jwakutumichila mjetu jwali mundende ni kulikolangaga mwakwesya maloŵe, yikusangamuchisyaga kuti namkumbuchile mundujo ni kumkolanga pangupopela.”

14-15. Ana chichi champaka chitukamuchisye kuti tupopelele chikamuchisyo chisyesyene champaka asosechele mundujo?

¹⁴ Tusaleje chikamuchisyo chisyesyene chakusosechela mundu. Michael jwamtukolasile jula jwatite, “Panguŵalanga ngani pa jw.org sya abale ni alongo ŵali mundende, ngusaganichisya mwangapikanilaga yikaŵe kuti unejo ni jwandaŵidwe. Ngumanyilila kuti ngadandawulaga ya ŵamkwangu soni ngasakaga kulolechesya kuti akusamalidwa chenene. Kuganichisya yeleyi kukusangamuchisya kupata yindu yampaka nayikolanje pangwapopelela abale ŵalombele ŵali mundende.”—Aheb. 13:​3, maloŵe gamwiŵanda.

¹⁵ Patukuganichisya mwawuŵelele umi wa abale ni alongo ŵali mundende, mpaka tupate yindu yejinji yampaka tuyikolanje m’mapopelo getu. Mwachisyasyo, mpaka tupopele kuti ŵakulolela ndende aŵe ŵa chanasa soni kuti achakulungwakulungwa ŵa kundendewo ŵakundeje abale ni alongowo kutenda misongano mwagopoka. (1 Tim. 2:​1, 2) Mpaka tupopelesoni kuti chisyasyo chambone cha mundu jwataŵidwe chilimbikasyeje abale ni alongo ŵa mumpingo mwakwe. Kapenasoni kupopela kuti ŵandu ŵanganaŵa ŵa mboni alole ndamo syambone sya mundujo ni kusachilila kupikanila utenga wetu. (1 Pet. 2:12) Mpaka tutendesoni yatukambileneyi patukusaka kwapopelela ŵandu ŵakusimana ni yakusawusya yine. Mwamti patukulingalinga kulolechesya yayikwatendechela ŵane, kukolanga mena gawo mwipopelo, soni kusala ya chikamuchisyo chisyesyene chakusosechela ŵanduwo, tuchilosya kuti ‘tukusanonyelana mnope.’—1 Ates. 3:12.

TUGAWONEJE MWAKUŴAJILWA MAPOPELO GETU

16. Ana mapopelo getu mpaka tugawoneje chamti uli mwakuŵajilwa? (Mateyu 6:8)

¹⁶ Mpela mwatuyiwonele kala, mapopelo getu mpaka gachenje mwayiŵelele yindu pa umi wa mundu jwine. Nambope, tukusosekwa tugawoneje mapopelo getu mwakuŵajilwa. Patukupopela, tukusosekwa kumanyilila kuti tukusamsalila Yehofa yindu yakuyimanyilila kala soni kuti jwalakwe jwangasosechela m’weji kuti tumsalileje litala lyambone lyakwanjila lipopelo lyetu. Yili myoyo ligongo lyakuti Yehofa akusamanyilila yakusasosechela ŵakutumichila ŵakwe atamose yili mkuti m’weji nganituŵe kuyimanyilila. (Aŵalanje Mateyu 6:8.) Nambo ligongo chichi tukusasosekwape kwapopelela ŵane? Kupwatika pa yindu yatukambilene kala munganiji, yeleyi ni yakusatendaga ŵandu ŵakusasamala ya achimjawo. Nambosoni chinonyelo chikusatutendekasya kuti tupopelelaneje jwine ni mjakwe. Mwamti Yehofa akusasangalala pakwawona ŵakutumichila ŵakwe ali mkulosya chinonyelo chakwe.

17-18. Ana kwapopelela Aklistu achimjetu mpaka tukulandanye ni chichi?

¹⁷ Ndaŵi sine mapopelo getu mpaka gawonecheje kuti nganigakamuchisya nawo kuchenga mwayiŵelele yindu paumi wa mundu. Atamose yili myoyo mapopelo getugo gakusalosya kuti tukusitwanonyela abale ni alongo ŵetu. Mwamti Yehofa akusayiwona yatukusatendagayi. Mpaka tulandanye yatukusatendagayi ni liŵasa lyalikwete ŵanache ŵachinandipile jwine jwamkongwe jwine jwamlume. Nambo mwanache jwamlumeju jukulwala. Kaneko mwanache jwamkongweju jukwaŵenda babagwe kuti, “Chonde ŵakamuchisye achimwene ŵanguŵa, ngati paja akulwala mnope.” Yisyene kuti mtatiju jukutenda kala mbali jakwe mwakumsamalila chenene mwanache jwakwe jwamlumeju. Atamose yili myoyo, jwalakwe mpaka asangalale mnope kumwona mwanache jwakwe jwamkongweju ali mkulosya kuti akusasamala mnope ya mchimwenegweju mpaka kwika pakwaŵenda babagwewo kuti amkamuchisye m’bale jwakweju.

¹⁸ Yeleyi ni yakutulimbikasyasoni Yehofa kuti tutendeje. Jwalakwe akusaka kuti twanonyeleje ŵane soni tupopelelaneje jwine ni mjakwe. Patukutenda yeleyi tukusalosya kuti tukusasamalaga ya ŵane, mwamti Yehofa akusayiwonaga yeleyi. (2 Ates. 1:3; Aheb. 6:10) Nambosoni mpela mwatuyiwonele kala, ndaŵi sine lipopelo lyetu mpaka likamuchisye kuchenga mwayiŵelele yindu paumi wa mundu jwine. Myoyo, kwende ndaŵi syosope tukumbuchileje kupopelelana jwine ni mjakwe.