Abale Ŵaŵili Ŵasambano mu Likuga Lyakulongolela

PA 5 OKOTOBA, 2024, pa msongano wapachaka papelechedwe chimanyisyo chapadela. Chimanyisyochi chaliji chakuti M’bale Jody Jedele soni Jacob Rumph asagulidwe kuti atumichileje mu Likuga Lyakulongolela lya Mboni sya Yehofa. Abale wosopeŵa aŵele ali mkutumichila Yehofa mwakulupichika kwa yaka yejinji.

M’bale Jedele jwapagwile mu msinda wa Missouri, ku U.S.A. soni jwakulile m’liŵasa lya Mboni sya Yehofa. Liŵasa lyawo lyatamaga mudela jajakwete ŵakulalichila ŵakuŵalanjikape. Yeleyi yatendekasisye kuti m’baleju akole upile wakusimana ni abale ni alongo ŵajinji ŵaŵayikaga kukukamuchisya kulalichila mudelaji. Yaŵatiga pakulosya chinonyelo soni mkamulano wawo yamlimbikasisye mnope m’baleju. Jwalakwe jwabatisidwe pa 15 Okotoba, 1983. M’baleju jwasangalalaga mnope kukamula masengo gakulalichila, mwamti ali amalisisye majiganyo gakwe ga ku sekondale jwatandite upayiniya mu Sepetemba 1989.

M’bale Jedele pajwaliji jwachinyamata, achinangolo ŵakwe ŵamjigalaga jwalakwejo yalumo ni mlumbugwe kwawula kukulola malo ku Beteli. Yeleyi, yakamuchisye jemanjaji kola chakulinga chakutumichila pa Beteli chelesoni chakwanilichikwe. M’bale Jedele jwakopochele pa Beteli ja ku Wallkill mu Sepetemba 1990. Pandanda jwatumichilaga mu Dipatimenti Jakuswejesya soni kaneko mu Dipatimenti ja Yachipatala.

Pandaŵi jelejo, mipingo ja Chisipanishi jajaliji pakuŵandika jasosekwaga abale. Myoyo, M’bale Jedele jwalinganyisye yakuti asonganeje umo mwa mipingoji, soni jwatandite kulijiganya chiŵechetochi. Mkanipapite ndaŵi m’baleju jwasimene ni Mlongo Damaris. Pandaŵijo mlongoju jwatendaga upayiniya mu dela jaŵasonganaga m’baleju. Mwamti kaneko ŵalombene, soni wosope ŵatandite kutumichila pa Beteli.

Mu 2005, jemanjaji ŵatyosile pa Beteli kuti akasamalileje achinangolo ŵawo ŵakulupichika. Mwamti pandaŵi jelejo ŵatumichilaga mpela Apayiniya ŵakutamilichika. M’bale Jedele jwakamuchisye nawo kwiganya mu Sukulu ja Apayiniya, soni jwatumichile mu Komiti Jakuŵechetana ni Ŵachipatala nambosoni mu Komiti ja Yakutaŵataŵa ja Chigawo.

Mu 2013, M’bale ni Mlongo Jedele ŵaŵilanjidwesoni kuti akatumichileje pa Beteli pa masengo ga yakutaŵataŵa ku Warwick. Kutandila pandaŵiji, jemanjaji atumichile ku Patterson soni ku Wallkill. M’bale Jedele aŵele ali mkutumichila mu Dipatimenti Jakulola ya Mapulani Soni Yakutaŵataŵa nambosoni dipatimenti jakulolela yachipatala. Mu Malichi 2023, m’baleju jwaŵichidwe kuŵa jwakamuchisya mu Komiti ja Utumiki ja Likuga Lyakulongolela. Pakuganichisya ya ma utumiki gaŵele ali mkutenda jwalakwe jwatite, “Pampochele utumiki wasambano, ndaŵi sine ukusakukamula woga. Nambo payitendekwe yeleyi ni pawukusasosekwa kumbuchila kumdalila Yehofa, ligongo jwalakwejo ni jwakusatukamuchisya kuti tukombole kutenda utumiki watupele.”

M’bale Rumph jwapagwile ku California, ku U.S.A. Pajwaliji mwanache, mamagwe ŵalesile kusongana soni kulalichila, nambope ŵamsalilaga yajikusajiganya Baibulo. Konjechesya pelepa, chaka chilichose jwalakwe jwajawulaga kukwalola angangagwe ŵakongwe ŵaŵamtumichilaga Yehofa mwakulupichika. Angangagweŵa ŵamkamuchisye jwalakwejo kutanda kuyinonyela yisyesyene. Mwamti ali akwete yaka 13 jwaŵendile kuti alijiganyeje Baibulo. Myoyo jwalakwe jwabatisidwe pa 27 Sepetemba, 1992, mkanaŵe kwanisya yaka 20. Chakusangalasya chine chaliji chakuti mamagwe ŵala ŵatanditesoni kusongana soni kulalichila mwamti ŵandu ŵanesoni ŵa m’liŵasa lyakwe ŵatandite kwawula pasogolo soni kaneko ŵabatisidwe.

Pajwaliji mnyamata, M’bale Rumph jwayiwonaga yaŵatiga pakusangalala apayiniya. Myoyo, ali agambile kumalisya majiganyo ga ku sekondale, jwatandite upayiniya mu Sepetemba 1995. Mu 2000, jwalakwe jwapite kukutumichila kumalo kukwasosekwaga ŵakulalichila ŵajinji. Pajwaliji kweleku, m’baleju jwasimene ni mlongo jwine jwa ku Canada juŵatendaga upayiniya lina lyakwe Inga. Mwamti kaneko ŵalombene. Jemanjaji ŵasonganaga ni kagulu ka ŵakulalichila ŵamnono kakaliji mu katawoni kane ku Ecuador peko. Apano kagulu keleka kali mpingo wekulungwa.

Pali papitile ndaŵi, M’bale ni Mlongo Rumph ŵaŵichidwe kuŵa apayiniya ŵapadela soni kaneko ŵaŵele ŵakulolela dela. Mu 2011 jemanjaji ŵaŵilanjidwe kuti akajinjile Sukulu ja Giliyadi kalasi nambala 132. Ali amalisisye majiganyoga, jemanjaji ŵatumichile m’yilambo yejinji soni ŵasangalalaga kutenda mautumiki gejinji mpela kutumichila pa Beteli, kutenda umishonale, soni kulolela dela. M’baleju jwakwetesoni upile wakwiganya nawo mu Sukulu ja Ŵakulalichila ya Uchimwene.

M’bale ni Mlongo Rumph ŵawujile ku United States ligongo lya mlili wa COVID-19. Jemanjaji ŵaŵilanjidwe ku Beteli ja ku Wallkill, kwele M’bale Rumph ŵapochelaga majiganyo mu Dipatimenti ja Utumiki. Kaneko, jemanjaji ŵatumisyesoni ku ofesi ja nyambi ja Ecuador kwele M’bale Rumph ŵatumichilaga mu Komiti ja Nyambi. Mu 2023 jemanjaji ŵatumisye ku Warwick. Mwamti mu Januwale 2024, M’bale Rumph ŵaŵichidwe kuŵa jwakamuchisya mu Komiti ja Utumiki ja Likuga Lyakulongolela. Pajwaganichisyaga ya malo gaŵele ali mkutumichila, m’baleju jwatite, “Chindu chachikusatendekasya utumiki kuŵa wakusangalasya nganichiŵa malo gawukutumichila nambo ŵandu ŵawukwatumichilawo.”

Tukusayamichila mnope ligongo lya kulipeleka kwa abaleŵa, mwamti ‘ŵandu mpela ŵeleŵa tukusasosekwa kwachimbichisyaga mnope.’—Afil. 2:29.