Ana Yijiganyo Yisyesyene Yili Yakamuchisyape?

Ana wawojo akuyiwona kuŵa yakusawusya kulekanganya yijiganyo yisyesyene soni yaunami? M’malo mwakuti ŵandu akulupilileje yindu yayili yisyesyene soni yakola maumboni gakwe, ŵandu akwamba kujigalika ni mwakuyiwonela yindu soni nganisyo syawo. Mwambone, masiku agano ŵandu ayikene pakupanganya maloŵea pakusaka kulosya kuti pachilambopa nganiyiŵa yikomboleche kumanyilila yijiganyo yisyesyene.

Kusala yisyene, yeleyi nganiyiŵa yachilendo. Yaka chiŵandika 2,000 yipiteyo, mwenye jwine jwakolanjidwa kuti Pontiyo Pilato juŵalamulilaga chigawo chine cha ulamusi wa Roma, ŵam’wusisye Yesu chiwusyo. Chiwusyo chakwe chaliji chakuti: “Ana yisyesyene ni chichi?” (Yohane 18:38) Pilato nganawusimana mtima mwakwembecheya kuti apate kwanga kwa chiwusyo chakusosekwachi. Nambo Baibulo jikwete kwanga kwa chiwusyochi, soni mpaka ajikutile ni kwanga kwakwe mwamti mpaka kwakamuchisye kumanyililaga yijiganyo yisyesyene soni yaunami.

Ana yijiganyo yisyesyene yipali?

Elo yipali. Baibulo jikusakamulichisyaga masengo maloŵe gakuti “yindu yayili yisyesyene” kapena yijiganyo yisyesyene pakulondesya yindu yangakayikasya yakola maumboni soni yakuŵajilwa. Baibulo jikusasala kuti Yehofab Mlungu ni kumangwakwe kwa yijiganyo yisyesyene, mwamti jikusamkolanga Mlungu kuŵa “jwakulupichika,” “[Mlungu jwakuwona.” NWT] (Salimo 31:5) Baibulo jikusasalaga yijiganyo yisyesyene yakutyochela kwa Mlungu. Jikusalandanya yijiganyoyi ni lilanguka, mwamti mpaka jitulongolele kumanyilila yindu yisyesyene m’chilambo chesokonechelechi.—Salimo 43:3; Yohane 17:17.

Ana yijiganyo yisyesyene mpaka tuyimanyilile chamtuli?

Mlungu jwangasaka kuti tugambeje kwitichisya mwawujinga yijiganyo yatukusalijiganya m’Baibulo. Jwalakwe akusasakaga kuti tukulupilileje yindu panyuma pakuwungunya soni pakamulichisya masengo machili getu gakuganisya, ngaŵaga kwamba kujigalika ni mwatukuyiwonela yindu. (Aloma 12:1) Akusasaka kuti tummanyilile soni tumnonyeleje ni ‘nganisyo syetu syosope.’ Akusatulimbikasyasoni kuti tulolechesyeje kuti yijiganyo yisyesyene yatukulijiganya m’Baibulo tujikutileje nayo.—Mateyu 22:37, 38; Masengo 17:11.

Ana unami wayiche chamtuli pachilambopa?

Baibulo jikusasala kuti unami jwawutandikasisye ali mmagongo jwa Mlungu jwali Satana. Baibulo jikusamkolanga kuti ali “msyene unami.” (Yohane 8:44) Satanaju ŵalambwisye ŵandu yakwamba Mlungu. (Genesesi 3:1-6, 13, 17-19; 5:5) Kutyochela pelepo, Satana akupitilisyape kuwandisya yindu yaunami soni kusisa yisyesyene yakwamba Mlungu.—Chiwunukuko 12:9.

Ana ligongo chichi yindu yaunami yiwandile mnope pachilambopa?

Ndaŵi jetuji, jele Baibulo jikusajikolanga kuŵa “masiku gakumalisya,” Satana akwasokonasya ŵandu kupundana ni kalakose. Ndaŵi syejinji ŵandu akusasalaga yaunami kuti ŵasokonasye achimjawo pakusaka kupata yindu yine. (2 Timoteyo 3:1, 13) Dini syejinji nombe nasyo sikusatendaga yindu yaunami. Ni ligongo lyakwe Baibulo jasasile yakwamba ndaŵi jetuji kuti ŵandu “chachilipatila ŵakwiganya ŵane kuti agambeje kwajiganya yakusaka kupikana,” mwamti “chachileka kupikanila yijiganyo yisyesyene.”—2 Timoteyo 4:3, 4.

Ligongo chichi kumanyilila yijiganyo yisyesyene kuli kwakusosekwa?

Kuti ŵandu akulupililaneje, yikusasosekwa kuti asalilaneje yisyesyene. Naga yeleyi ngayikutendekwa, ŵandu akusakayichilana soni yindu yangajendaga chenene. Ni ligongo lyakwe Baibulo jikusasalaga kuti Mlungu akusasakaga kuti kulambila kwetu kutyocheleje pa yijiganyo yisyesyene. Baibulo jikusati: “Wosope ŵakumtumichila [Mlungu] akusosekwa kumtindiŵalila mwakulongoleledwa ni msimu soni mwakamulana ni yayili yisyesyene.” (Yohane 4:24) Kuti amanyilile mwayikusati yijiganyo yisyesyene kwakamuchisya kumanyilila unami wasikusajiganya dini soni yampaka atende kuti unami wa dinisi ukasokonasya, aŵalanje ngani ja Chichewa mu Sanja ja Mlonda ja mtwe wakuti “Maboza Omwe Amalepheretsa Anthu Kukonda Mulungu.”

Ana ligongo chichi Mlungu akusasaka kuti amanyilileje yijiganyo yisyesyene?

Chakulinga cha Mlungu chili chakuti wawojo chakulupuche. Soni kuti yeleyi yikomboleche, akusosekwa kumanyilila yisyesyene yakwamba Mlungujo. (1 Timoteyo 2:4) Naga akulijiganya soni kukuya mfundo soni malamusi gakusasakaga Mlungu kuti wawojo akuyeje paumi wawo, nikuti chachiŵa paujakwe wakulimba ni Mlungu. (Salimo 15:1, 2) Mwamti, Mlungu ŵamtumisye Yesu pachilambochi pakusaka kutukamuchisya kumanyilila yijiganyo yisyesyene.—Mateyu 17:5; Yohane 18:37.

Ana Mlungu chachityosya unami?

Elo. Jwalakwe akusaŵengana ni ŵandu ŵakusiŵakalamuchila achimjawo pakwalambusya. Mwamti jwalakwe ali jwakusimichisya kwatyosya ŵandu ŵele ngakuchenga ni kuleka yaunami. (Salimo 5:6) Mlungu pachachitenda yeleyi, maloŵe gakwe gachikwanilichikwa. Maloŵe gakwe gali gakuti: “Ngomo syakusala yakuwona sikusatamilichika.”—Misyungu 12:19.