Ana Akusosekwa Kutenda Chichi Kuti Akapate Umi Wangamala?
Yajikusasala Baibulo
Baibulo jikusasala kuti, “Mundu jwakutenda yakusasaka Mlungu, akusatama chitamile kwa ndaŵi syosope.” (1 Yohane 2:17) Ana Mlungu akusaka kuti wawojo atende chichi?
Alijiganyeje yakwamba Mlungu soni Mwanache jwakwe, Yesu. Yesu paŵapopelaga kwa Mlungu, ŵatite, “Nipo umi wangamala ugopolela kuti ŵandu ŵamanyilile ŵalakwe ŵali Mlungu jikape ŵakuwona, nipo soni ammanyilile Yesu Klistu juŵamtumile wawojo.” (Yohane 17:3) Ana ‘kummanyilila’ Mlungu soni Yesu kukugopolela chichi? Mpaka tummanyilile Mlungu soni Yesu mwakulijiganya Baibulo soni kukamulichisya masengo yatukulijiganyayo pa umi wetu.a Baibulo jikusasala nganisyo sya Yehofa Mlungu, jwali Mkupeleka umi soni Mkupanganya jwetu. (Masengo 17:24, 25) Jikusasalasoni yakwamba Yesu jwali Mwanache jwakwe juŵajiganyisye “maloŵe gakupeleka umi wangamala.”—Yohane 6:67-69.
Akulupilileje mbopesi jakutuwombola jaŵapeleche Yesu. Yesu ŵayiche pa chilambo chapasi kuti “ŵatumichile ŵandu, nikupeleka umi wakwe kuti ŵawombole ŵandu ŵajinji.” (Mateyu 20:28) Mbopesi jakuwombola jiŵapeleche Yesu jawugwile litala lyakuti ŵandu chakombole kutama kwangamala mu Paladiso pa chilambo chapasi. (Salimo 37:29) Yesu jwatite, “Mlungu ŵachinonyele chilambo chapasi mnope mwakuti jwalakwe ŵampeleche Mwanache jwakwe jumopejo, ni kuti jwalijose jwakukulupilila mwa jwalakwe akawa nambo akole umi wangamala.” (Yohane 3:16) Yeleyi yikugopolela kuti tukusosekwa kutenda yindu yejinji kupunda pakwamba kummanyililape Yesu. Tukusosekwa kukola “chikulupi” mwa jwalakwe. Mpaka tutende yeleyi mwakukuya yaŵajiganyaga soni kutenda yindu mwakukamulana ni nganisyo sya Atatigwe.—Mateyu 7:21; Yakobo 2:17.
Alimbisyeje unasi wawo ni Mlungu. Mlungu akusaka kuti tumŵandichile soni kuti tuŵe najo pa ujakwe. (Yakobo 2:23; 4:8) Mlungu ali jwangali mbesi. Jwalakwe ngasawa, soni akusaka kuti achimjakwe atamejesoni mpaka kalakala. Baibulo jikusasala yakusaka Mlungu kwatendela ŵandu ŵakumsosasosa jwalakwe. Jikusasala kuti, ‘Mitima jawo jiŵe ni umi ndaŵi syosope.’—Salimo 22:26.
Nganisyo Syakulemwecheka Pakwamba Kupata umi Wangamala
Nganisyo syakulemwecheka: Ŵandu chachitama kwangamala ligongo lyakulimbichila kwawo.
Yakuwona yakwe: Atamose kuti mitela jine mpaka jilewuye umi wa mundu, nambope kulingalinga kweleku nganikuŵa kutendekasisye ŵandu kukola umi wangamala. Mlungu jikape ni jwampaka apeleche umi wangamala, ligongo “Umi wosope uli wakutyochela kwa ŵalakwe.” (Salimo 36:9) Jwalakwe akusala kuti “tachichimasya chiwa mpaka ndaŵi jangali mbesi” ni kupeleka umi wangamala kwa ŵandu ŵakwe ŵakulupichika.—Yesaya 25:8; 1 Yohane 2:25.
Nganisyo syakulemwecheka: Ŵandu ŵangosyo sine syakwe ni ŵachachikulupuka.
Yakuwona yakwe: Mlungu jwangali lusagu. Maloŵe gakwe gakusasala kuti, “Jwalijose jwakusamjogopa jwalakwe ni kutenda yambone akumpochela, pangalolela kuti akutyochela mtundu wapi.” (Masengo 10:34, 35) Ŵandu ŵa mitundu josope ŵakusampikanila Mlungu mpaka atame kwangamala.
Nganisyo syakulemwecheka: Umi wangamala uchiŵa wakupesya.
Yakuwona yakwe: Mlungu ni juchachitupa umi wangamala. Jwalakwe akusatunonyela soni akusasaka kuti tusangalaleje. (Yakobo 1:17; 1 Yohane 4:8) Mlungu akusamanyilila kuti tukusosekwa kukamulaga masengo gakwikasya yambone kuti tuŵe ŵakusangalala. (Jwakulalicila 3:12) Mlungu akusala kuti ŵandu ŵachachitama kwangamala pa chilambo chapasi chachikamulaga masengo gambone, gakukola yakuyichisya yambone yayichapindulilaga achimisyene soni ŵane.—Yesaya 65:22, 23.
Konjechesya pelepa, ŵandu ŵachachitama kwangamala chachipitilisya kulijiganya yindu yasambano yakwamba Mlungu soni masengo gakwe gekulungwa gakupanganya yindu. Mlungu jwapanganyisye ŵandu ni mitima jakusachilila kutama kwangamala soni kulijiganya yakwamba jwalakwe, atamose “kuti nganiyiŵa yikomboleche kuti tuyimanyilile yosope yene.” (Jwakulalicila 3:10, 11) Yeleyi yikulosya kuti ŵandu ŵachachitamaga kwangamala chachikolaga ndaŵi syosope yindu yakusangalasya yakuti alijiganye soni kutenda.
a Mboni sya Yehofa sikwete pologalamu jakulijiganya Baibulo kwalulele pa intaneti. Kuti amanyilile yejinji, alolele fidiyo jakuti Ana pa Lijiganyo lya Baibulo Pakusatendekwa Yamtuli?