Lyakuŵeluka, Okotoba 25
[Shafani] ŵaŵalasile bukujo pameso pa mwenye.—2 Mbi. 34:18.
Mwenye Yosiya ali akwete yaka 26 jwatandite kukamula masengo gakulinganya nyumba ja Mlungu. Paŵakamulaga masengoga, ŵajisimene “buku ja Malamusi giŵapeleche AMBUJE Mlungu kwa Mose.” Mwenye Yosiya pajwapikene yayalembedwe m’bukujo, mwachitema jwapikanile ni kutenda yindu mwakamulana ni yayalembedweyo. (2 Mbi. 34:14, 19-21) Ana mkusanonyela kuŵalanga Baibulo ndaŵi syosope? Naga mwatandite kala kuŵalanga Baibulo lisiku lililyose, ana mkusasangalala pamkujiŵalanga? Ana mkusasunjila Malemba gampaka gamkamuchisye paumi wenu? Yosiya ali akwete yaka chiŵandika 39 jwatesile chindu chakulemwecheka chachatendekasisye kuti awe. Jwalakwe jwatesile yindu mwakulidalila mmalo mwakuŵenda lunda kwa Yehofa. (2 Mbi. 35:20-25) Ana tukulijiganya chichi pelepa? Mwangasamala kandu ya yaka yatukwete kapena ulewu wa ndaŵi jatuŵele tuli mkulijiganya Baibulo, tukusosekwa kupitilisya kumsosasosa Yehofa. Yeleyi yikupwatikapo kupopelaga ndaŵi syosope, kulijiganya Maloŵe gakwe, nambosoni kukamulichisyaga masengo malangiso gampaka atupe Aklistu ŵakumanyilila yejinji. Yeleyi yichitukamuchisya kuti tuŵambaleje kutenda yakulemwa yekulungwakulungwa mwamti tuchiŵa ŵakusangalala.—Yak. 1:25. w23.09 12 ¶15-16
Lyamlungu, Okotoba 26
Mlungu akusiŵakanaga ŵandu ŵakulikwesya, nambo akusapeleka umbone mtima wakwe wekulungwa kwa ŵandu ŵakulinandiya.—Yak. 4:6.
Baibulo jikusasala ya achakongwe ŵambone ŵaŵamnonyelaga soni kumtumichila Yehofa. Jemanjaji ‘ŵatendaga yindu mwangapundanganya malile’ soni ŵaliji “ŵakulupichika pa yindu yosope.” (1 Tim. 3:11) Kupwatika pelepa, alongo ŵachisikana mpaka apatesoni mumpingo mwawo alongo ŵachikulile ŵampaka ajigalile yisyasyo yawo. Jemanja alongo ŵachisikana, mpaka atende chenene kupata alongo ŵachikulile ŵa Chiklistu ŵampaka ajigalile yisyasyo yawo. Aloleje ndamo syambone syakwete jemanjaji, kaneko aloleje yampaka atende pakusyasya ndamosyo. Ndamo jakusosekwa mnope kuti mundu aŵe Mklistu jwakudalilichika jili kulinandiya. Naga jwamkongwe ali jwakulinandiya akusaŵa paunasi wambone mnope ni Yehofa soni ŵandu ŵane. Mwachisyasyo, jwamkongwe jwakusamnonyela Yehofa akusapikanila mwakulinandiya dongosolo jaŵalinganyisye jwalakwe jakola ŵandu ŵakwete udindo. (1 Akoli. 11:3) Dongosolo jeleji jikusakamula masengo mnope mumpingo soni mu liŵasa. w23.12 18-19 ¶3-5
Lyakulemba, Okotoba 27
Achalume ŵanonyeleje achiŵamkwawo mpelaga yakusati pakuchinonyela chilu chawo.—Aef. 5:28.
Yehofa akusajembecheya jwamlume jwamlombele kuti ŵanonyeleje ŵamkwakwe soni kwasamalila mwakwapa yakusosechela ya paumi, yausimu soni kwapikanichisya mwakupikanila mumtima. Kuganisya chenene, kwachimbichisya achakongwe soni kuŵa ŵakudalilichika, yichakamuchisya palombele. Panyuma pakuti alombele, komboleka kuti chachiŵa mtati. Ana mpaka alijiganye chichi kutyochela kwa Yehofa kuti chaŵe mtati jwambone? (Aef. 6:4) Yehofa ŵamsalilaga Mwanache jwakwe, Yesu kuti akusamnonyela soni akusasangalala najo. (Mat. 3:17) Naga chachiŵa mtati, chalolechesye kuti akwasalila ŵanache ŵawo ndaŵi ni katema kuti akusiŵanonyela. Chiŵayamichileje pa yambone yakukombola kutenda. Atati ŵakusajigalila chisyasyo cha Yehofa akusiŵakamuchisya ŵanache ŵawo kuti aŵe achalume soni achakongwe ŵa Chiklistu ŵakudalilichika. Mpaka atende chenene kutanda kukosechela apano ya udindowu. Mpaka atende yeleyi mwakwasamalila ŵandu ŵa mwiŵasa mwawo soni Aklistu achimjawo, nambosoni mwakulingalinga kwalosyaga chinonyelo soni kwayamichila jemanjajo.—Yoh. 15:9. w23.12 28-29 ¶17-18