Numeli

28 Kaneko Yehofa ŵamsalile Mose kuti, 2 “Mwalamule Ayisalayeli kuti, ‘Mlolechesyeje kuti mkupeleka kwa une mbopesi syangu syasili chakulya changu. Mbopesi syangu syakocha pamoto sya kaliwungo kambone kakusangalasya* syelesi, mkasipelecheje pandaŵi jakwe jakuŵajilwa.’

3 “Mwasalilesoni jemanjajo kuti, ‘Mbopesi syakocha pamoto syachimkapelecheje kwa Yehofa ni asi: lisiku lililyose mkapelecheje ŵanache ŵa ngondolo ŵamkambako ŵaŵili ŵangalemala, mwanache jwalijose akaŵeje jwa chaka chimo. Mkapelecheje ŵanache ŵeleŵa mpela mbopesi jakutinisya. 4 Mwanache jwa ngondolo jwamkambako jumo mkampelecheje mbopesi kundaŵi, soni mwanache jwa ngondolo jwamkambako jwinejo mkampelecheje mbopesi lyuŵa paligambile kukapila kwene. 5 Pamkupeleka mwanache jwa ngondolo jwalijose mkapelechejesoni utandi wetililiche wewanganye ni mawuta gejenje chenene kuti uŵe mbopesi jambeju. Utandiwo mlingo wakwe ukaŵeje mbali jimo kutyochela pa mbali 10 sya efa jimo* soni mawutago mlingo wakwe ukaŵeje mbali jimo kutyochela pa mbali mcheche sya hini jimo.* 6 Jeleji jili mbopesi jakutinisya jakupeleka lisiku lililyose, janamlamwile pa Litumbi lya Sinai, jajili mbopesi jakocha pamoto jakaliwungo kambone kakumsangalasya* Yehofa. 7 Pamkupeleka mwanache jwalijose jwa ngondolo jwamkambakojo, mkapelechejesoni mbopesi jachakumwa. Mbopesi jachakumwa jeleji jikaŵeje yakumwa yampaka yimtendekasye mundu kukolelwa ya mlingo wakwanila mbali jimo kutyochela pa mbali mcheche sya hini jimo. Yakumwayo akayikusulileje pamalo gagali geswela kuti jikaŵe mbopesi jachakumwa jakwawula kwa Yehofa. 8 Mwanache jwa ngondolo jwamkambako jwinejo mkampelechejesoni mpela mbopesi lyuŵa paligambile kukapila kwene. Pamkupeleka mbopesijo, mkapelechejesoni mbopesi jakwe jambeju soni mbopesi jakwe jachakumwa, yakulandana ni yachimkapelecheje kundaŵi. Yosope yeneyi mkayipelecheje kuti yikaŵe mbopesi jakocha pamoto jakaliwungo kambone kakumsangalasya* Yehofa.

9 “‘Nambo pa lisiku lya Sabata mkapelecheje ŵanache ŵa ngondolo ŵamkambako ŵaŵili ŵangalemala, jwalijose jwa chaka chimo, kuti akaŵeje ŵambopesi jakutinisya. Pamkupeleka mbopesi jeleji, mkapelechejesoni utandi wetililiche wewanganye ni mawuta kuti ukaŵe mbopesi jambeju pampepe ni mbopesi jakwe jachakumwa. Utandiwo mlingo wakwe ukaŵeje mbali siŵili kutyochela pa mbali 10 sya efa jimo.* 10 Jeleji jili mbopesi jakutinisya jamkusosekwa kupeleka pa lisiku lya Sabata kupwatika pa mbopesi jakutinisya pampepe ni mbopesi jakwe jachakumwa jachimkapelecheje lisiku lililyose.

11 “‘Kundanda kwa mwesi uliwose mkapelecheje kwa Yehofa mbopesi jakutinisya ja ng’ombe siŵili syamkambako, ngondolo jimo jamkambako, nambosoni ŵanache ŵa ngondolo ŵamkambako ŵakwana 7, jwalijose jwa chaka chimo. 12 Pa ng’ombe jilijose jamkambako mkapwatichejesoni utandi wetililiche wewanganye ni mawuta kuti ukaŵe mbopesi jakwe jambeju, mlingo wakwe ukaŵeje mbali sitatu kutyochela pambali 10 sya efa jimo.* Pa ngondolo jamkambako jila mkapwatichejesoni utandi wetililiche wewanganye ni mawuta kuti ukaŵe mbopesi jakwe jambeju, mlingo wakwe ukaŵeje mbali siŵili kutyochela pa mbali 10 sya efa jimo. 13 Nambosoni pa mwanache jwa ngondolo jwamkambako julijose jula, mkapwatichejesoni utandi wetililiche wewanganye ni mawuta kuti ukaŵeje mbopesi jakwe jambeju, mlingo wakwe ukaŵeje mbali jimo kutyochela pa mbali 10 sya efa jimo. Mkapelecheje yosope yeneyi mpela mbopesi jakutinisya jakaliwungo kambone kakusangalasya,* jajili mbopesi jakocha pamoto jakwawula kwa Yehofa. 14 Pa ng’ombe jamkambako jilijosejo mkapelechejesoni finyo jwamlingo wakwanila hafu ja hini* kuti jukaŵe mbopesi jakwe jachakumwa. Pa ngondolo jamkambako jila mkapelecheje finyo jwa mlingo wakwanila mbali jimo kutyochela pambali sitatu sya hini jimo,* kuti jukaŵeje mbopesi jakwe jachakumwa. Nambosoni pa mwanache jwa ngondolo jwamkambako jwalijose, mkapelechejesoni finyo jwamlingo wakwanila mbali jimo kutyochela pa mbali mcheche sya hini jimo, kuti jukaŵeje mbopesi jakwe jachakumwa. Jeleji jili mbopesi jakutinisya jakuti mkapelecheje mwesi uliwose kwa chaka chosope. 15 Pamkupeleka mbopesi jakutinisya ja lisiku lililyose pampepe ni mbopesi jakwe jachakumwa, mkapelechejesoni kwa Yehofa mwanache jwa mbusi jumo kuti jukaŵeje mbopesi jaulemwa.

16 “‘Chaka chilichose, m’mwesi wandanda, pa lisiku lya 14 lya mwesiwo, mkatendeje chisangalalo cha Pasika pakumchimbichisya Yehofa. 17 Pa lisiku lya 15 lya mwesiwo, mkatendeje chisangalalo cha mikate jangali yakusasaŵisya. Pachisangalalochi mkalyeje mikate jangali yakusasaŵisya kwa masiku 7. 18 Palisiku lyandanda lya chisangalalo chelechi mkatendeje msongano wapadela. Palisikuli ngamkusosekwa kukamula masengo galigose gakupesya. 19 Pandaŵi ja chisangalalo chelechi mkapelecheje ŵanache ŵaŵili ŵa ng’ombe ŵamkambako, ngondolo jamkambako jimo, soni ŵanache ŵa ngondolo ŵamkambako ŵakwana 7, jwalijose jwa chaka chimo. Mkapelecheje yilango yeleyi kuti yikaŵeje mbopesi jakutinisya jakocha pamoto jakwawula kwa Yehofa. Chilango chilichose chamkupelekacho chikaŵeje changalemala. 20 Pa chilango chilichosecho mkapelechejesoni utandi wetililiche wewanganye ni mawuta kuti ukaŵe mbopesi jakwe jambeju. Pa ng’ombe jamkambako jilijosejo mkapelecheje utandi, mlingo wakwe ukaŵeje wakwana mbali sitatu kutyochela pa mbali 10 sya efa jimo, soni pa ngondolo jamkambako jila mkapelecheje utandi, mlingo wakwe ukaŵeje wakwana mbali siŵili kutyochela pa mbali 10 sya efa jimo. 21 Nambosoni mkapelecheje utandi wetililiche, mlingo wakwe ukaŵeje wakwana mbali jimo kutyochela pa mbali 10 sya efa jimo pa mwanache jwalijose jwa ngondolo jwamkambako pa ŵanache 7 ŵala. 22 Mkapelechejesoni mbusi jimo ja mbopesi jaulemwa kuti jikaŵeje jakusimasya ulemwa wenu. 23 Mkapelecheje mbopesi syelesi kupwatika pa mbopesi jakutinisya jakundaŵi jajili mbopesi jakutinisya jakupeleka lisiku lililyose. 24 Mkapelecheje mbopesi syosopesi m’litala lyakulandana palisiku lililyose kwa masiku gosope 7 mpela yakulya, yayili mbopesi jakocha pamoto jakola kaliwungo kambone kakumsangalasya* Yehofa. Mkapelecheje mbopesi syelesi kupwatika pa mbopesi jakutinisya pampepe ni mbopesi jakwe jachakumwa jakupeleka palisiku lililyose. 25 Palikwanile lisiku lya 7 lya chisangalalochi, mkatendejesoni msongano wapadela. Palisikuli ngamkusosekwa kukamula masengo galigose gakupesya.

26 “‘Palisiku lyamkupeleka mbeju syenu syandanda kukomala pachisangalalo chenu chamawiki, pamkupeleka kwa Yehofa mbeju syenu syasigambile kukomala kwenesyo, mkatendejesoni msongano wapadela. Palisikuli ngamkusosekwa kukamula masengo galigose gakupesya. 27 Palisiku lyeleli mkapelecheje ŵanache ŵa ng’ombe ŵamkambako ŵaŵili, ngondolo jamkambako jimo nambosoni ŵanache ŵa ngondolo ŵamkambako ŵakwana 7, jwalijose jwa chaka chimo. Yilango yeleyi mkayipelecheje kuti yikaŵeje mbopesi jakutinisya jakaliwungo kambone kakumsangalasya* Yehofa. 28 Pamkupeleka yilango yeleyi mkapelechejesoni utandi wetililiche wewanganye ni mawuta kuti ukaŵe mbopesi jakwe jambeju. Pa mwanache jwa ng’ombe jwalijosejo mkapelecheje utandi wetililiche, mlingo wakwe ukaŵeje wakwana mbali sitatu kutyochela pa mbali 10 sya efa jimo, pa ngondolo jamkambako mkapelecheje utandi wetililiche, mlingo wakwe ukaŵeje wakwana mbali siŵili kutyochela pa mbali 10 sya efa jimo. 29 Nambosoni mkapelecheje utandi wetililiche, mlingo wakwe ukaŵeje wakwana mbali jimo kutyochela pa mbali 10 sya efa jimo pa mwanache jwalijose jwa ngondolo jwamkambako pa ŵanache 7 ŵala. 30 Mkapelechejesoni mbusi jimo kuti jikaŵeje jakusimasya ulemwa wenu. 31 Mkapelecheje mbopesi syelesi kupwatika pa mbopesi jakutinisya ja lisiku lililyose pampepe ni mbopesi jakwe jambeju. Yilango yeleyo yikaŵeje yangalemala, soni mkayipelecheje pampepe ni mbopesi syakwe sya yakumwa.