NGANI JAKULIJIGANYA 49
Ana Yehofa Mpaka Ajanje Mapopelo Gangu?
“Pandaŵi jelejo timchimbilanga ni kwika kukupopela kwa une, nipo une tinjimjanga.”—YEL. 29:12.
NYIMBO NA. 41 Chonde Apikane Lipopelo Lyangu
YACHITULIJIGANYEa
1-2. Ligongo chichi mpaka tulipikaneje kuti Yehofa ngakwanga mapopelo getu?
MALOŴE gagali pa Salimo 37:4 gali gakulimbikasya mnope. Maloŵega gakusati, “Sangalalani mwa AMBUJE, ni tampe yawukusaka mtima wenu.” Nambo ana tujembecheyeje kuti Yehofa chatupeje ndaŵi jijojo chilichose chatuŵendile? Chiwusyochitu chili chakusosekwa kuchiganichisya. Aganichisye yisyasyo yakuyichisyayi: Mlongo jwanganaŵa peŵasa akumŵenda Yehofa kuti akajinjile nawo Sukulu ja Ŵakulalichila ya Uchimwene. Nambope yaka yikumala ngaŵilanjidwa ku sukuluji. M’bale jwachinyamata akumŵenda Yehofa kuti amposye ulwele wakwe ni chakulinga chakuti atendeje yejinji pakumtumichila jwalakwe mumpingo. Nambope ulwele wakwe ngawukumala. Achinangolo ŵa Chiklistu akupopela kuti mwanache jwawo apitilisye kumtumichila Yehofa. Nambo mwanachejo akusagula yakuleka kumtumichila Yehofa.
2 Komboleka wawojosoni ŵamŵendile Yehofa mwipopelo yindu yineyakwe, nambope yaŵaŵendileyo nganiyiŵepe kutendekwa. Yakuyichisya yakwe mpaka atande kuganisya kuti Yehofa akusajanga mapopelo ga ŵandu ŵane nambo ngaŵaga ga wawojo. Mwine mpaka atandesoni kuganisya kuti ŵatesile ulemwa winewakwe. Mwelemu ni muŵalipikanilagasoni Mlongo Janice.b Jwalakwe ni ŵamkwakwe ŵapopelaga kuti chakatumichile ku Beteli. Mlongoju jwatite, “Nakulupililaga kuti ngapapita ndaŵi mkanatuŵilanje ku Beteli.” Nambotu liŵasali lyatemi yaka yejinji ngaŵilanjidwa. Mlongoju jwatite, “Yangwayiye mnope mwamti naliwusyaga kuti ‘ndemwisye chichi?’ Ligongo namŵendaga Yehofa kuti angamuchisye kukola upile wakwawula ku Beteli. Nambo ligongo chichi nganajangaga lipopelo lyangu?”
3. Ana chitukambilane chichi munganiji?
3 Ndaŵi sine mpaka tukayichileje naga Yehofa akusapikana mapopelo getu. Atamosesoni ŵakutumichila ŵane ŵakulupichika ŵa Mlungu munyumamu ŵaganisyaga myoyo. (Yob. 30:20; Sal. 22:2; Hab. 1:2) Ana ni chichi champaka chitusimichisye kuti Yehofa chachijanga mapopelo getu? (Sal. 65:2) Kuti tupate kwanga kwa chiwusyochi, chandanda tukusosekwa kupata kaje kwanga kwa yiwusyo yakuyichisyayi: (1) Ana tujembecheyeje yindu yamtuli kutyochela kwa Yehofa? (2) Ana Yehofa akusajembecheya yindu yamtuli kwetuwe? (3) Ana ligongo chichi tukusasosekwa kuchenga yindu yine yatukusamŵenda Yehofa?
ANA TUJEMBECHEYEJE YINDU YAMTULI KUTYOCHELA KWA YEHOFA?
4. Mwakamulana ni Yelemiya 29:12, ana Yehofa akutusimichisya chichi?
4 Yehofa akusasala kuti akusapikana mapopelo getu. (Aŵalanje Yelemiya 29:12.) Mlungu jwetu akusiŵanonyela ŵakutumichila ŵakwe ŵakulupichika, mwamti nganaŵa alepele kupikanila mapopelo gawo. (Sal. 10:17; 37:28) Nambope yeleyi ngayikugopelela kuti chagambeje kutupa chilichose chatuŵendile. Myoyo tukusosekwa kwembecheya chilambo chasambano mwatuchipochela yindu yine yatukusaŵenda.
5. Ana Yehofa akusalola yindu yapi pakupikanila mapopelo getu? Alondesye.
5 Yehofa akusaganichisyasoni yindu yatukuŵenda mwakamulana ni chakulinga chakwe. (Yes. 55:8, 9) Mbali jimo ja chakulinga chakwechi jili kugumbasya pachilambopa achalume ni achakongwe ŵachachisangalala ni mkamulano usyesyene mu ulamusi wakwe. Nambope Satana akusasala kuti ŵandu mpaka yajendele chenene naga akulilamulila achimsyene. (Gen. 3:1-5) Pakusaka kulosya kuti yakusasalayi yili yaunami, Yehofa ŵakundile ŵandu kulilamulila achimsyene. Nambope ulamusi wa ŵandu ni wawutendekasisye yakusawusya yatukusimana nayo masiku agano. (Jwak. 8:9) Tukumanyilila kuti Yehofa nganaŵa atyosisye yakusawusyayi pandaŵi ajino. Ligongo naga akutenda yeleyo ŵane mpaka asaleje kuti ulamusi wa ŵandu ukwenda chenene soni ukukombola kumasya yakusawusya.
6. Ligongo chichi tukusosekwa kuŵa ŵakusimichisya kuti Yehofa ndaŵi syosope akusatenda yindu mwachinonyelo soni mwachilungamo?
6 Yehofa akusajangaga mapopelo gakulandana m’matala gakulekanganalekangana. Mwachisyasyo, Mwenye Hesekiya pajwalwasile mnope jwamŵendile Yehofa kuti amposye. Mwamti Yehofa ŵamposisye. (2 Ayi. 20:1-6) Nambo pandaŵi jine ndumetume Paulo pajwamŵendile Yehofa kuti amtyochesye ‘chakusoma mpela miŵa m’chilu mwakwe’ chele komboleka kuti walijisoni ulwele, Yehofa nganamtyochesya. (2 Akoli. 12:7-9) Aganichisyesoni yayamtendechele ndumetume Yakobo ni Petulo. Mwenye Helodi jwasakaga kwawulaga wosopeŵa. Mwamti mpingo ŵapopelelaga wosopeŵa kuti akawulajidwa. Nambo chakutesya chanasa chaliji chakuti Yakobo jwawulajidwe, pele Petulo, lilayika lyamkulupwisye mwakusimonjesya. (Mase. 12:1-11) Mwine mpaka tuliwusyeje kuti, ‘Ligongo chichi Yehofa jwamkulupwisye Petulo nambo ni kukunda kuti Yakobo awulajidwe?’ Baibulo jangasala chilichose panganiji.c Nambo chatukumanyilila chili chakuti ndaŵi syosope matala ga Yehofa gakusaŵa “gagoloka ni gachilungamo.” (Det. 32:4) Tukumanyilila kuti Yehofa ŵamnonyelaga Petulo soni Yakobo. (Chiw. 21:14) Ndaŵi sine Yehofa nganaŵa ajanjile lipopelo lyetu mwatwasachilaga. Nambo ligongo lyakuti tukusakulupilila kuti Yehofa chachijanga mapopelo getu mwachinonyelo soni mwachilungamo, nganituŵa tumjimbile magambo pa litala lyasagwile kuti ajanjile mapopelo getu.—Yob. 33:13.
7. Ana tukusosekwa kuŵambala chichi soni ligongo chichi?
7 Tuŵambaleje kulandanya yakusawusya yetu ni ya ŵane. Mwachisyasyo, mpaka tumŵende Yehofa kuti atukamuchisye pa chindu chinechakwe nambo jwalakwe ni ngatupa yatukusakayo. Nambo kaneko ni kuyikopochela kuti mundu jwine jwamŵendile Yehofa yindu yakulandanayo mwamti Yehofa jwamkamuchisye. Yeleyi ni yayamtendechele Mlongo Anna. Jwalakwe jwapopelelaga ŵamkwakwe lina lyawo Mathew kuti apole ulwele wa kansa. Mundaŵi jakulandanajo alongo ŵaŵili ŵachikulile ŵalwalagasoni kansa. Mlongo Anna jwapopelaga mwakuchondelela kuti ŵamkwakwe soni alongowo apole ku ulwele wa kansa. Mwamti alongowo ŵaposile ulwelewo nambo ŵamkwakwewo ŵawile. Mlongo Anna jwaliwusyaga kuti, ‘Naga Yehofa ŵaposisye alongoŵa, ligongo chichi nganiŵaposyasoni ŵamkwangu?’ Kusala yisyene ngatukumanyilila ligongo lyakwe alongoŵa ŵaposile. Nambo chatukumanyilila ni chakuti Yehofa chachimasya ma ulwele gosope soni kuti ali jwakusachilila kwajimusya ŵandu wosope ŵaŵawile ali najo paunasi.—Yob. 14:15.
8. (a) Mwakamulana ni Yesaya 43:2, ana Yehofa akusatukamuchisyaga mwamtuli? (b) Ana lipopelo mpaka litukamuchisye chamtuli patukusimana ni yakulingwa? (Alolele fidiyo jakuti, Lipopelo Likusatukamuchisya Kuŵa Ŵakupilila.)
8 Ndaŵi syosope Yehofa akusatukamuchisya. Mpela Atati ŵetu ŵachinonyelo, Yehofa jwangasaka kutuwona tuli mkulaga. (Yes. 63:9) Nambo jwalakwe jwangamasya yakusawusya yetu yosope yampaka tuyilandanye ni sulo kapena malamba ga moto. (Aŵalanje Yesaya 43:2.) Nambope, Yehofa akusatusalila kuti chachitukamuchisya “komboka” sulo soni malamba ga moto. Nambosoni ngasakunda kuti yakusawusya yetu yijonanje unasi wetu ni jwalakwe. Yehofa akusatupasoni machili ga msimu wakwe weswela kuti gatukamuchisye kupilila. (Luk. 11:13; Afil. 4:13) Yakuyichisya yakwe, mpaka tuŵe ŵakusimichisya kuti ndaŵi syosope jwalakwe chachitupa yindu yatukusosechela kuti tukombole kupilila soni kupitilisyape kuŵa ŵakulupichika kwa jwalakwe.d
ANA YEHOFA AKUSAJEMBECHEYA YINDU YAMTULI KWETUWE?
9. Mwakamulana ni Yakobo 1:6, 7, ligongo chichi tukusosekwa kukulupilila kuti Yehofa chachitukamuchisya?
9 Yehofa akusasaka kuti tumkulupilileje. (Aheb. 11:6) Ndaŵi sine mpaka tulagasicheje mnope nganisyo ni yakusawusya yetu. Mpaka tutandesoni kukayichila kuti Yehofa nganaŵa atukamuchisye. Nambo Baibulo jikusatusimichisya kuti ni machili ga Mlungu mpaka tukombole “kukwela lipupa.” (Sal. 18:29, NWT.) Myoyo, m’malo mwakunda kuti kukayichilaku kukule tukusosekwa kupopela ni mtima wosope tuli tukwete chikulupi chakuti Yehofa chachijanga mapopelo getu.—Aŵalanje Yakobo 1:6, 7.
10. Alondesye mwampaka tutendele yindu mwakamulana ni yatukumŵenda Yehofa.
10 Yehofa akusajembecheya kuti tutendeje yindu mwakamulana ni mapopelo getu. Mwachisyasyo, m’bale mpaka apopele kwa Yehofa kuti abwana ŵakwe amkunde kuja kutenda nawo msongano wachigawo. Ana Yehofa mpaka ajanje chamtuli lipopelo lyeleli? Yehofa mpaka amkamuchisye kuti akaŵechete mwakulimba mtima kwa abwana ŵakwe. Nambope m’baleju akusosekwa kutenda yindu mwakamulana ni lipopelo lyakwe. Jwalakwe akusosekwa kwawula kwa abwana ŵakwewo kuja kuŵenda. Akusosekwa kutenda yeleyi mwakuwilisyawilisya. Mwine mpaka asosekwe kuchengana masiku gakukamulila masengo ni mjakwe. Nambosoni naga yakomboleka mpaka agambe kundilila kuti masiku gele ngasakamula masengogo chamkate mbiya.
11. Ligongo chichi tukusosekwa kuŵenda kwa Yehofa mwakuwilisyawilisya?
11 Yehofa akusajembecheya kuti tupopeleleje mwakuwilisyawilisya yindu yatukusosechela. (1 Ates. 5:17) Yesu jwasasile kuti mapopelo getu gane nganigaŵa gajanjidwe ndaŵi jijojo. (Luk. 11:9) Myoyo ngatukusosekwa kutenguka naga mapopelo getu ngagakwanjidwa. Mwamti tukusasosekwa kupopela ndaŵi syosope soni mwangalechesya. (Luk. 18:1-7) Patukupitilisya kupopela tukusalosya kuti yatukupopelelayo yili yakusosekwa mnope kwetuwe. Nambosoni tukusalosya kuti tukwete chikulupi chakuti Yehofa mpaka atukamuchisye.
LIGONGO CHICHI TUKUSASOSEKWA KUCHENGA YINDU YINE YATUKUSAMŴENDA YEHOFA?
12. (a) Ana ni chiwusyo chimo chapi chatukusosekwa kuliwusya pa yindu yatukuŵenda soni ligongo chichi? (b) Ana mpaka tulosye chamtuli kuti mapopelo getu gakumchimbichisya Yehofa? (Alole libokosi lyakuti, “Ana Yakuŵenda Yangu Yikusalosya Kuti Ngusamchimbichisya Yehofa?”)
12 Naga ngatukupata kwanga pa yindu yatukuyipopelela, tukusasosekwa kuliwusya yiwusyo yitatu ayi: Chiwusyo chandanda, ‘Ana nguŵenda yindu yakuŵajilwa?’ Ndaŵi syejinji tukusaganisya kuti tukumanyilila yayili yambone kwa m’weji. Nambo yindu yine yampaka tuŵende nganiŵa yitukamuchisye. Mwambone naga tukupopelela chakusawusya chinechakwe, mpaka paŵe kuti pana litala lyambone lyakumalana ni chakusawusyacho kulekangana ni yatukuganisyayo. Kombolekasoni yindu yine yatukusaŵenda yikusaŵa yangakamulana ni chakulinga cha Yehofa. (1 Yoh. 5:14) Mwachisyasyo, aganichisye ya achinangolo ŵatwakolasile kundanda kwa nganiji. Jemanjaji ŵamŵendile Yehofa kuti mwanache jwawo apitilisyepe kuŵa mu yisyesyene, yayawonekaga kuti lyaliji lipopelo lyakuŵajilwa. Nambo Yehofa jwangamkanganichisya jwalijose kuti amtumichileje. Nambo akusasaka kuti wosopewe kupwatikapo ŵanache ŵetu tusaguleje jika kumtumichila jwalakwe. (Det. 10:12, 13; 30:19, 20) Myoyo achinangoloŵa ŵasosekwaga kum’ŵenda Yehofa kuti jwakamuchisyeje kumjiganya mwanache jwawo mwakumyika pamtima yampaka yimtendekasye kuti amnonyeleje mnope Yehofa soni kuŵa mjakwe.—Mis. 22:6; Aef. 6:4.
13. Mwakamulana ni Ahebeli 4:16, ana Yehofa chachitukamuchisya pandaŵi japi? Alondesye.
13 Chiwusyo chaŵili champaka tuliwusye chili chakuti, ‘Ana jili ndaŵi jakuŵajilwa kuti Yehofa ajanje lipopelo lyangu?’ Ndaŵi sine mpaka tusacheje kuti Yehofa ajanje mwachitema lipopelo lyetu. Nambotu Yehofa akusamanyilila ndaŵi jambone jakutukamuchisya. (Aŵalanje Ahebeli 4:16.) Naga ngatukupata kwanga kwa lipopelo lyetu pandaŵi jatusachileje mpaka tutande kuganisya kuti Yehofa ‘nganajanga’ lipopelolyo. Nambo jwalakwe akusaŵa kuti ‘nganaŵepe’ kwanga. Mwachisyasyo, aganichisye ya m’bale jwachinyamata jwaŵapopelaga kuti apole ulwele wakwe jwatumkolasile kundanda jula. Yikaŵe kuti Yehofa ŵamposisye mwakusimonjesya ulwelewo, Satana akaganisisye kuti m’balejo akupitilisya kumtumichila Yehofa ligongo lyakuti amposisye ulwele wakwe. (Yob. 1:9-11; 2:4) Konjechesya pelepa, Yehofa jwalinganyisye kala ndaŵi jachachimasya ma ulwele gosope. (Yes. 33:24; Chiw. 21:3, 4) Nambo pandaŵi ajino tukajembecheyaga kuti Yehofa chatuposyeje yilwele yetu mwakusimonjesya. Myoyo, m’baleju akatesile chenene kumŵenda Yehofa kuti ampe machili soni mtendele wa mumtima kuti akombole kupilila ulwele wakwe soni kuti apitilisye kumtumichila Yehofa mwakulupichika.—Sal. 29:11.
14. Ana tukulijiganya chichi kutyochela kwa Mlongo Janice?
14 Aganichisyesoni ya Mlongo Janice juŵapopelaga kuti akatumichile ku Beteli jula. Pamasile yaka 5 mkanaŵe kukopochela yaŵatite Yehofa pakwanga lipopelo lyakwe. Jwalakwe jwatite, “Yehofa jwakamulichisye masengo ndaŵiji kunjiganya kuti mbe Mklistu jwambone. Nasosekwaga kumkulupilila mnope jwalakwe. Nambosoni nasosekwaga kongolela katende kangu ka lijiganyo lyapajika. Nalijiganyisyesoni kuti ngusosekwa kuŵa jwakusangalala pangumtumichila Yehofa kulikose.” Kaneko Janice ni ŵamkwakwe ŵasalilidwe kuti akatendeje utumiki wakulolela dela. Pakuganichisya ya munyuma Mlongo Janice jwasalile kuti, “Yehofa jwajanjile mapopelo gangu, nambo ngaŵa m’litala lyanajembecheyaga. Yanjigalile ndaŵi kuti mbikanichisye kuti Yehofa ŵanjanjile m’litala lyakuŵajilwa. Apano ndili jwakusangalala mnope ligongo lya yindu yambone yandendele Yehofa.”
Naga akuyiwona kuti nganaŵe kwanjidwa mpaka atende chenene kupopelasoni kwa Yehofa nambo pa yindu yine (Alole ndime 15)f
15. Ligongo chichi tukusosekwa kuŵambala kuŵenda chindu chimopecho? (Alole chiwulili.)
15 Chiwusyo chatatu champaka tuliwusye chili chakuti ‘Ana ngusosekwa kuchenga yindu yangusaka kuŵenda?’ Yili yisyene kuti yikusaŵa yambone kuchikolangaga mu lipopelo lyetu chindu chisyesyene chatukusaka. Nambope ndaŵi sine mpaka yiŵe chenene kuŵambalaga kutenda yeleyi ligongo Yehofa ni jwakusamanyilila yindu yatukusosechela. Aganichisyesoni ya mlongo jwanganaŵa peŵasa juŵapopelaga kuti akajinjile Sukulu ja Ŵakulalichila ya Uchimwene jula. Jwalakwe jwasakaga ali ajinjile sukuluji kuti akatumichile kukwasosekwaga ŵakulalichila ŵajinji. Myoyo mmalo mwakwamba kupopela kuti amŵilanje ku sukuluji, akatesilesoni chenene kumŵenda Yehofa kuti amkamuchisye kumanyilila ma utumiki ganesoni gampaka atende. (Mase. 16:9, 10) Kaneko ni kutendaga yindu mwakamulana ni lipopelo lyakwe. Akatesile yeleyi mwakumwusya jwakulolela dela, mpingo wawukusosechela apayiniya ŵajinji. Kapena akatesile yeleyi mwakulembela chikalata ku nyambi kuwusya kwakusosechela ŵakulalichila ŵajinji.e
16. Ana tukusosekwa kuŵa ŵakusimichisya ya chichi?
16 Mpela mwatulijiganyichisye munganiji tuli ŵakusimichisya kuti Yehofa chachijanga mapopelo getu mwachinonyelo soni m’litala lyakuŵajilwa. (Sal. 4:3; Yes. 30:18) Ndaŵi sine Yehofa nganaŵa atujanjile mwatukuganichisya. Nambope jwalakwe nganaŵa alepele kwanga mapopelo getu. Jwalakwe akusatunonyela mnope soni nganaŵa atulesile. (Sal. 9:10) Myoyo ‘tumkulupilileje Mlungu ndaŵi syosope’ mwakumsalila yosope yayili mu mtima mwetu kupitila mwipopelo.—Sal. 62:8.
NYIMBO NA. 43 Lipopelo Lyakuyamichila
a Ngani ajino chijilondesye ligongo lyakwe tukusosekwa kukulupilila kuti ndaŵi syosope Yehofa chachijanga mapopelo getu mwachinonyelo soni m’litala lyakuŵajilwa.
b Mena gane munganiji gachenjile.
c Alole ngani jakuti “Ana Akusakulupilila Kuti Yehofa Akusatenda Yambone Ndaŵi Syosope?” mu Sanja ja Mlonda ja Febuluwale 2022 ndime 3-6.
d Kuti amanyilile yejinji yakusatenda Yehofa pakutukamuchisya kuti tukombole kupilila yakulingwa, alolele fidiyo pa jw.org ja mtwe wakuti, Lipopelo Likusatukamuchisya Kuŵa Ŵakupilila.
e Kuti apate malangiso gakwakamuchisya kuti akatande kutumichila ku nyambi ja chilambo chine, alole buku ja Gulu Jakutenda Yakusasaka Yehofa mtwe 10 ndime 6-9.
f KULONDESYA CHIWULILI: Alongo ŵaŵili akupopela mkanaŵe kuwuchisya Sukulu ja Ŵakulalichila ya Uchimwene. Kaneko jumo mwa jemanjaji akumŵilanga. Jwanganaŵilanjidwajo m’malo mwakuti adandawuleje akupopela kwa Yehofa kuti amkamuchisye kumanyilila mbali sine syampaka atende pakumtumichila jwalakwe. Kaneko akulemba chikalata ku nyambi chakuwusya kuja kutumichila ku mpingo wawukusosechela ŵakulalichila ŵajinji.