Mlungu Jwakwe Jwamlimbikasisye

1, 2. Ana cici cacatendekwe palisiku lyangaliŵalicika pa umi wa Eliya?

ELIYA jwawutukagape atamose kuti wula jajendelecelaga kunya soni kusa kwatendaga cipi. Jwalakwe ŵasosekwaga kuwutuka lutando lwelewu kuti akayice ku Yeseliyele. Eliya jwaliji mundu jwacikulile, nambope nganapela ligongo “ligasa lya Yehofa” lyaliji pa jwalakwe. Citandilile, jwalakwe nganakoleje macili mpela gelega, mwati ŵakombwele kugapeleta mahaci gagawutaga ligaleta lya Mwenye Ahabu.—Aŵalanje 1 Mafumu 18:46.

² Ali apelete ligaleta lila, Eliya jwaliji jika pa ulendo ŵakwe welewuwo. Aganicisye mesi ga wula gali kumgwila Eliya kumeso, kwineku aciganisyaga ya yindu yangaliŵalicika yayitendekwe palisikuli. Mwangakayicila, Mlungu jwa Eliya, Yehofa soni kulambila kusyesyene kwapundile palisikuli. Sambano ligongo lyakuti Eliya ajesile lutando lwelewu soni kusa kutesile cipi ligongo lya wula jamacili, jwalakwe ngakukombolasoni kuliwona Litumbi lya Kalimeli. Kulitumbili, Yehofa kupitila mwa Eliya ŵatesile cakusimonjesya cekulungwa cakulosya kuti Baala jwaliji mlungu jwawunami. Ŵakulocesya macilamacila ŵa Baala ŵawonecele kuŵa ŵakusakala soni ŵawunami mwati ŵapocele cilango cakuwulajidwa. Kaneko Eliya jwapopesile kwa Yehofa kuti amasye cilala cacalagasisye ŵandu kwa yaka yitatu ni litika. Mlungu jwajanjile lipopelo lya Eliya mwati wula jagwile.—1 Maf. 18:18-45.

3, 4. (a) Ligongo cici Eliya jwaganisyaga kuti yindu ciyicenje paŵajawulaga ku Yeseliyele? (b) Ana citutagulilane yiwusyo yapi?

³ Eliya paŵawutukaga wula jili mkunya, ŵajembeceyaga kuti yindu ciyicenje. Jwalakwe jwayiwonaga kuti cipaŵe kucenga kusyesyene ligongo lyakuti ŵakulambila Baala ŵaliji ali awulajidwe. Aganisyeje kuti Ahabu nombe najo capitikuce mtima ligongo jwalakwe ŵalilolele jika yayatendekweyo. M’yoyo ŵasosekwaga kuleka kulambila Baala, kwalekasya ŵamkwakwe kutenda yindu yakusakala, nambosoni kuti akalagasyaga ŵakutumicila ŵa Yehofa.

⁴ Ŵandu tukusaganisya kuti yindu ciyitujendeleje cenene naga yikutendekwa m’litala lyatukusacila m’weji. Soni mwine mpaka tuganisyeje kuti yakusawusya yetu ciyimale. Ngaŵa mkuŵa yakusimonjesya kuti nombe Eliya jwaganisyaga yeleyi pakuŵa jwalakwe “jwaliji mundu mpela m’weji.” (Yak. 5:17) Nambo yakusawusya ya Eliya nganiyimala. Soni pagambile kumala ndaŵi jamnono jwalakwe ŵasimene ni yindu yakutesya woga, soni jwalagaga nayo nganisyo, mwati jwagambaga kusaka kuwa. Ana cici cacatendekwe kuti yindu yiyikane pelepa, soni ana Yehofa ŵamkamucisye catuli jwakulocesya jwakwe kolasoni cikulupi soni kupata macili? Kwende tulole yayatendekwe.

Yindu Yamgalawucile Mwacisisimucisya

5. Ana Ahabu jwalijigenye kumjogopa Yehofa panyuma pakuyiwona yakusimonjesya yayatendekwe ku Litumbi lya Kalimeli? Atagulile.

⁵ Ahabu paŵayice ku nyumba jakwe ja ucimwene ku Yeseliyele, pangali cilicose cakulosya kuti jwacenjile nganisyo. Tukuŵeceta yeleyi ligongo lyakuti tukusaŵalanga kuti: “Ahabu ŵamsalile Yesebele yosope yiŵatesile Eliya, soni mwaŵawulajile ŵakulocesyawo ni upanga.” (1 Maf. 19:1) Nganiji jangalosya kuti Ahabu jwasasile yiliyose yakwamba Mlungu jwa Eliya, Yehofa. Jwalakwe jwayiwonaga yindu mwakucilu, ligongo yakusimonjesya yayatendekwe palisikulyo jwayiwonaga mpela ‘yitendekwe ni Eliya.’ Jwalakwe nganalijiganya kumjogopa Yehofa Mlungu. Ana ŵamkwakwe Ahabu ŵatesile cici paŵapikene nganiji?

6. Ana Yesebele ŵamtumicisye Eliya utenga watuli, soni ana utengawu wagopolelaga cici?

⁶ Yesebele yamsakalisye mnope. Jwalakwe jwatumbile mnope mwati jwatumisye utenga kwa Eliya wakuti: “Milungu jangu jinjelusye naga malaŵi pakwanaga ndaŵi mpela ajino ngimba ndili nawutendekasisye umi wenu mpela mwawuŵelele wa ŵakulocesyawo!” (1 Maf. 19:2) Pelepatu ŵaliji mkujogoya Eliya kuti cam’wulaje. Soni Yesebele ŵalumbile kuti kuli cenene jwalakwe kuwa naga Eliya ngawulajidwa lisiku lyakuyicisya. Jwalakwe jwasakaga kuwucisya yaŵatesile Eliya. Aganicisye Eliya ali kumjimusya cilo celeco mu kanyumba kakwe ku Yeseliyele, ni kumsalilaga utenga wakogoya wakutyocela kwa ŵamkwawo mwenye. Ana Eliya ŵatesile cici paŵapikene utengawu?

Jwatengwice Soni Ŵamkamwile Mnope Woga

7. Ana utenga wakutyocela kwa Yesebele ŵamkwayiye catuli Eliya, soni ana jwalakwe jwatesile cici?

⁷ Naga Eliya jwasangalalaga kuti ngondo jakulimbana ni kulambila Baala jimasile, nikuti jwalakwe jwalilambusyaga. Yesebele nganacenga nganisyo pa yindu yayatendekweyo. Pakuya yaŵalamulaga jwalakwe, ŵakulocesya ŵakulupicika ŵajinji ŵaliji ali awulajidwe kala. Sambano yawonece kuti Eliya nombe najo cam’wulaje. Ana Eliya paŵapikene utenga wa Yesebele ŵatesile cici? Baibulo jikusati: jwalakwe “ŵatesile woga mnope.” Ana Eliya jwaganicisyaga kuti Yesebele cam’wulaje mwangalwe? Naga jwalakwe ŵaganicisyaga mnope yeleyi nikuti mwangakayicila yamtendekasisye kuti akole woga mnope. Mulimosemo, nambo Eliya, “ŵanyakwice ni kutanda kutila kuti akulupusye umi wakwe.”—1 Maf. 18:4; 19:3.

8. (a) Ana yaŵatesile Petulo ali asimene ni yakusawusya yikusalandana catuli ni yaŵatesile Eliya? (b) Ana mpaka tulijiganye cici kutyocela kwa Eliya ni Petulo?

⁸ Eliya nganaŵa mundu jwakulupicika jika jwaŵatesile woga. Pali papite yaka yejinji, nombe najo ndumetume Petulo ŵatesilepo woga. Mwambone, Yesu ali amkundile Petulo kuti ajende najo pamesi, jwalakwe jwatandite ‘kucilolecesya cimbungo.’ Kaneko ŵamkamwile woga mwati jwatandite kutiŵila. (Aŵalanje Matayo 14:30.) Mpaka tulijiganye cindu cakusosekwa mnope kutyocela pa cisyasyo ca Eliya ni Petulo. Naga tukusaka kuti tujendelecele kuŵa ŵakulimba mtima patusimene ni yindu yakutesya woga, tukusosekwa kuŵambala kuganicisya yakogoyayo. Tukusosekwa kwegamila mnope pa Yehofa jwakusatupaga cembeceyo soni macili.

“Basi, Mbesile Nayo!”

9. Atagulile mwaŵajendele Eliya paŵatilaga, soni muŵapikanilaga mumtima.

⁹ Ligongo lyakutenda woga, Eliya jwajesile lutando lwa makilomita 150 acitililaga ku Beele-seba tawuni jajaliji kummwela kwa cilambo ca Yuda. Paŵayice ku maloga, jwalakwe jwamlesile jwakutumicila jwakwe ni jwajinjile mwipululu jika. Nganijo jikusasala kuti, jwalakwe “jwajesile lutando lwa lisiku limo.” Aganicisye ali kum’wona jwakulocesyaju ali awutandite ulendowu kundaŵi lyuŵa lili likopwece. Komboleka kuti jwalakwe nganajigala yakulya, kapena cilicose cakumkamucisya pa umi. Ligongo lya woga, jwalakwe jwalasile mnope nganisyo, mwati jwajesile mumsewu wakusawusya wa mwipululu mwamwagombaga mnope lyuŵa. Lyuŵa palyakapilaga, Eliya jwaliji juli jupesile mnope mwati ngamkanajendelecelasoni kwenda ulendowo. Ligongo lya kupela kwenda mwipululumu, jwalakwe mwaupile ŵapatile kacitela ni ŵatemi pasi pakwe kuti apate m’bwilili.—1 Maf. 19:4.

10, 11. (a) Ana Eliya ŵapikanaga catuli paŵapopelaga kwa Yehofa? (b) Pakamulicisya masengo malemba, atagulile muŵapikanilagasoni ŵakutumicila Mlungu ŵane ŵaŵalasilepo nganisyo.

¹⁰ Kaneko ligongo lyakusingalilwa, Eliya jwapopesile kwa Mlungu. Jwalakwe jwaŵendaga kuti agambe kuŵa. Ni jwatite: “Une nganimba jwakupunda acinangolo ŵangu.” Jwalakwe jwamanyililaga kuti acinangologwe ŵaŵawile kalakala, ŵasyucile luwundu lwangali mate soni kuti mwilembemo mwasigele mawupawupape gele nganigaŵa gatesile cilicose. (Mlal. 9:10) Jwalakwe jwaliwonaga kuŵa jwangali mate. Ni ligongo lyakwe yili yangasimonjesya kuti jwagumisile kuti: “Basi, mbesile nayo!” Jwalakwe nganaliwonasoni ligongo lyakuti ajendelecele kuŵa cijumi.

¹¹ Ana mpaka yiŵe yakusimonjesya kuti mundu jwa Mlungu alajeje nganisyo? Iyayi. Ligongo m’Baibulo mwana yisyasyo yejinji ya acalume ni acakongwe ŵakulupicika ŵaŵalasile nganisyo mwati ŵagambaga kusaka kuwa basi. Ŵane mwa jemanjaji ŵaliji Labeka, Yakobo, Mose soni Yobu.—Gen. 25:22; 37:35; Num. 11:13-15; Yobu 14:13.

12. Ana mpaka amsyasye catuli Eliya naga akulaga nganisyo ni yakusawusya yine?

¹² Lelojino tukutama “mundaŵi jakusawusya.” M’yoyo yili yangasimonjesya kuti ŵandu ŵajinji, atamose ŵakutumicila ŵa Mlungu ŵakulupicika ndaŵi sine akusalagaga nganisyo. (2 Tim. 3:1) Naga akulaga nganisyo ni yindu yakusawusya, asyasye yaŵatesile Eliya. Amsalile Yehofa mwakupikanila mumtima mwawo. Akaliŵalila kuti, Yehofa ali “Mlungu jwakusatutondoya m’litala lililyose.” (Alaŵalanje 2 Akolinto 1:3, 4.) Ana Yehofa jwamtondweye Eliya?

Yehofa Jwamlimbikasisye Jwakulocesya Jwakwe

13, 14. (a) Ana Yehofa kupitila mwa lilayika jwalosisye catuli kuti jwamganicisyaga Eliya jwaŵalagaga nganisyo? (b) Ligongo cici yili yakulimbikasya kuti Yehofa akusamanyilila yosope yakwamba mundu jwalijose, kupwatikapo yindu yanganituŵa tuyikombwele?

¹³ Ana akuganisya kuti Yehofa jwapikanaga wuli paŵam’wonaga jwakulocesya jwakwe jwakunonyelwa ali agonile pasi pakatela mwipululu ni kuŵendaga kuti agambe kuŵa? Kwende tulole yayatendekwe. Eliya paŵagonile lugono lwa kuwa nalyo, Yehofa ŵamtumicisye lilayika. Lilayikalyo lyamjimwisye mwacinonyelo ni lyatite: “Mjimuce mlye.” Ni Eliya jwajimwice ni kulya, pakuŵa lilayika lila lyamjigalile jwalakwe mkate wa moto ni mesi. Ana Eliya jwaliyamicile lilayikali ligongo lyakwika ni yakulya? Nganiji jikusagamba kusala kuti jwakulocesyajo jwalile ni kumwa ni jwagonilesoni. Ana Eliya nganaliyamicila lilayikalyo ligongo lyakuti jwalagaga mnope nganisyo? Mulimosemo, nambo lilayika lila lyamjimwisyesoni kaŵili, komboleka kuti kwaliji cakumasikusiku. Lyamsalilesoni kuti “Mjimuce mlye,” soni lyaŵecete maloŵe gakulimbikasya gakuti, “pakuŵa ulendowu uli wakupesya kwa m’mwejo.”—1 Maf. 19:5-7.

¹⁴ Ni cikamucisyo ca Mlungu, lilayika lila lyamanyililaga kwaŵajawulaga Eliya. Lyamanyililagasoni kuti ulendowo waliji welewu mnope mwati Eliya ngaŵa mkuwukombola mwajika. Yili yakulimbikasya kumtumicilaga Mlungu jwakusamanyilila cenene yatukusaka kutenda soni yindu yanganituŵa tuyikombwele. Jwalakwe akusamanyilila cenene yeleyi kupunda acimsyewe. (Aŵalanje Salimo 103:13, 14.) Ana cakulya cila camkamucisye catuli Eliya?

15, 16. (a) Ana cakulya ca ŵapelece Yehofa kwa Eliya camkamucisye kutenda cici? (b) Ligongo cici tukusosekwa kuyamicila litala lyakusalikamulicisya masengo Yehofa pakutulisya lelo jino?

¹⁵ Ni tukusaŵalanga kuti: “M’yoyo ŵajimwice nipo ŵalile ni kumwa. Paŵalile cakulyaco, ŵapitile macili gakwanila mwati ŵajesile kwa masiku 40 musi ni cilo cakwe mpaka ŵayice kwitumbi lya Mlungu jwakuwona, ku Holebe.” (1 Maf. 19:8) Yaka 600 Eliya mkanapagwe, nombe najo Mose jwalijimile yakulya kwa masiku 40 musi ni cilo. Pali papite yaka 1,000, nombe najo Yesu jwalijimilesoni yakulya kwa masiku 40 musi ni cilo. (Eks. 34:28; Luk. 4:1, 2) Cakulyaci nganicimasya yakusawusya yosope ya jwakulocesyaju, nambo campele macili gakusimonjesya. Aganicisye jwakulocesyaju ali mkulajilila kwenda pakupita mwipululu ligongo lyakuti mwangali matala. Jwalakwe ŵaliji mkwenda kwa mwesi wa mtundu ni litika.

¹⁶ Lelo jinosoni Yehofa akusiŵalisya ŵakutumicila ŵakwe, ngaŵa ni cakulya cakucilu nambo ni cakulya causimu, cacikusatukamucisya kuŵa pa mkamulano wambone ni jwalakwe. (Mat. 4:4) M’yoyo, kulijiganya mwakusamala Maloŵe ga Mlungu soni mabuku gagakusasala ya m’Baibulo kuli mpela tukulya cakulya campaka citukamucisye kwendelecela kumtumicila Yehofa. Kulya cakulya cambone causimu, ngaŵa mkutukamucisya kumasya yakusawusya yetu yosope, nambo mpaka citukamucisye kupilila yakusawusya yampaka yiwonece kuŵa yangakomboleka kuyipilila. Mpaka yitulongolelesoni ku “umi wangamala.—Yoh. 17:3.

17. Ana Eliya ŵajawulaga kwapi, soni ligongo cici maloga galiji gakusosekwa mnope?

¹⁷ Eliya ŵajesile lutando lwakwana makilomita 320 mpaka ŵayice ku litumbi lya Holebe. Pamaloga patendekwe yindu yangaliŵalicika kalakala Eliya mkanapagwe. Paliji pamaloga pele Yehofa jwawonecele kwa Mose pa liwukutu lyakolela moto kupitila mwa lilayika. Kaneko Yehofa jwatesile Cilangano cakwe ca Cilamusi ni mtundu wa Ayisalayeli pamalo gelega. Paŵayice ku litumbili, Eliya jwajinjile mu mbanga kuti agonemo.

Yehofa Jwamlimbikasiye Jwakulocesya Jwakwe

18, 19. (a) Ana lilayika lya Yehofa lyawusisye ciwusyo catuli, soni ana Eliya jwajanjile catuli? (b) Ana yindu yitatu yapi yayamtendekasisye Eliya kulaga nganisyo?

¹⁸ Paŵayice ku litumbi lya Holebe, komboleka kuti Yehofa jwaŵecete kwa jwalakwe kupitila mwa lilayika. Ni jwam’wusisye kuti: “Ana mkusaka cici akuno?” Yikuwoneka kuti ciwusyoci Yehofa ŵaciwusisye mwacinonyelo, ligongo lyakuti Eliya ŵawuweni kuŵa upile wakwe ŵakuŵeceta mwaŵapikanilaga. Eliya jwaŵecete yosope yakulukosi, jwalakwe jwatite: “Ngwatendela wiwu mnope wawo Yehofa Mlungu jwa makuga, pakuŵa ŵanace ŵa Ayisalayeli aliŵalile cilangano cawo, agwisisye malo gawo gakupelecela mbopesi, soni awuleje ŵakulocesya wawo ni upanga, mwati une gambile kusigala jika. Apano atandite kumsosasosa une kuti ambulaje.” (1 Maf. 19:9, 10) Maloŵe ga Eliya gakusalosya kuti paliji yindu yitatu yayamtendekasisye kulaga nganisyo.

¹⁹ Candanda, Eliya jwayiwonaga kuti masengo gaŵatesile galiji gangali mate. Atamose kuti jwalakwe kwa yaka yejinji jwamtumicilaga Yehofa ‘mwakumtendela wiwu,’ yayikugopolela kuti jwaliwonaga lina lyeswela lya Mlungu soni kulambila kwakwe kuŵa yakusosekwa kupunda cilicose, nambope Eliya jwayiweni kuti yindu yajendelecele kusakala. Ŵanduwo ŵajendelecele kuŵa ŵangakulupicika ni ŵakusapuka, soni kulambila kwawunami kwawandagape. Caŵili, jwalakwe jwaliwonaga kuti jusigele jika. Jwalakwe jwatite: “Une gambile kusigala jika.” Jwaliwonaga kuti mu mtundu wosopewo jwalakwe jika ni juŵatumicilaga Yehofa. Catatu, jwakwete woga, ligongo ŵakulocesya acimjakwe ŵaliji ali awulajidwe, ni jwaganicisyaga kuti jwalakwesoni cam’wulaje. Yaliji yakusawusya kwa jwalakwe kusala yakusawusya yakweyi, nambope jwalakwe nganakunda kuti kupoka soni sooni simlepelekasye kumsalila Yehofa. Ligongo lya kumsalila Mlungu yosope ya mumtima mwakwe, jwalakwe ŵapelece cisyasyo cambone kwa ŵandu wosope ŵakulupicika.—Sal. 62:8.

20, 21. (a) Atagulile yindu yaŵayiweni Eliya paŵaliji pakamwa pa mbanga ja ku Litumbi ya Holebe. (b) Ana macili gaŵagalosisye Yehofa gamjigenye cici Eliya?

²⁰ Ana Yehofa ŵamkamucisye catuli Eliya kumalana ni woga soni yindu yaŵalagaga nayo nganisyo? Lilayikalila lyamsalile Eliya kuti ajime pakamwa pa mbanga. Jwalakwe ŵapikanile, nambo mwangamanyilila cacicitendekwe. Kaneko mwacisisimucisya cimbungo ca macili catandite kupuga. Komboleka kuti caliji cimbungo camasegwe gakupwetecesya m’maŵiwi, ligongo caliji ca macili mnope mwati cakasaga matumbi soni malwala. Ni aŵanicisye ali kum’wona Eliya ali mkulisiŵilicisya ku meso kwineku akamulile mnope yakuwala yakwe yamanyunya pacikuputa cimbungoco. Kaneko jwalakwe akulepela kwima cenene ligongo lya macili gacimbungoco, soni malogo gakutenganyikwa mnope ligongo lya cisicinya ca macili. Kaneko woga wakwe mkanumale, cilangali ca moto cikupita ciŵandika ni jwalakwe, ni akutilila mkati mwa mbangajo pakusaka kutila koca kwa motowo.—1 Maf. 19:11, 12.

²¹ Muyakutendekwa yam’cipagoyi, Yehofa nganaŵaga mu mbungojo, mu cisicinyaco soni mu motowo. Eliya jwamanyililaga kuti Yehofa apali soni ali jusyesyene, Jwalakwe nganaŵa mpela Baala mlungu jwaunami jwele ŵandu ŵajinji ŵamkulupililaga kuti ni juŵagwisyaga wula. Macili gosope gagakusasimanikwa mu yakupanganyikwa gakusatyocela kwa Yehofa. Jwalakwe ali jwamacili mnope kupunda cilicose caŵacipanganyisye. Atamose kwinani kusyesyeneku, Yehofa ngaŵa mkwanilako. (1 Maf. 8:27) Ana yakutendekwa ya m’cipagoyi, yamkamucisye catuli Eliya? Akaliŵalila kuti jwalakwe ŵamkamwile woga. Eliya nganasosekwaga kwajogopaga mwanja Ahabu ni ŵamkwakwe Yesebele, ligongo Yehofa Mlungu jwamacili gakupundanganya mnope jwaliji kumbali jakwe.—Aŵalanje Salimo 118:6.

22. (a) Ana “maloŵe gakutulaka” gamlimbikasisye mwatuli Eliya kuti ŵaliji mundu jwakusosekwa mnope? (b) Ana “maloŵe gakutuluka” komboleka kuti gatyocelaga kwapi? (Alole maloŵe gamwiŵanda.)

²² Paŵamasile motowo kupita, kusa kwatulele, kaneko Eliya ŵapikene ‘maloŵe gakutuluka.’ Maloŵego gamtendekasisye Eliya kuti asale yayamlagasyaga nganisyo. Jwalakwe ŵasasilesoni kaŵili yakulukosi kwakwe.a Komboleka kuti yeleyi yamlimbikasisyesoni Eliya. Mwangakayicila, “maloŵe gakutuluka” gala pagajendelecele gamlimbikasisye mnope. Yehofa jwamsimicisye Eliya kuti jwaliji jwakutumicila jwakwe jwakusosekwa mnope. Ana ŵatesile yeleyi mwatuli? Mlungu jwamsalile cakulinga cakwe ca msogolo cakumasya kulambila Baala mu Yisalayeli. Mwangakayicila, masengo ga Eliya galiji gakusosekwa mnope ligongo cakulinga ca Yehofa cakumalana ni kulambila Baala caliji cakuti cicitendekwa. Konjecesya pelepa, Yehofa ŵajendelecele kumkamulicisya masengo pakwanilisya cakulingaci ligongo ŵamsalile kuti awujile, soni yacakatende pacakayicepo.—1 Maf. 19:12-17.

23. Ana Yehofa ŵamkamucisye Eliya m’matala gaŵili gapi kuti amasye lipowo lyakwe?

²³ Ana wuli pakwamba ya lipowo lyalyamkamwile Eliya? Yehofa ŵatesile yindu yiŵili pakusaka kumkamucisya. Candanda, ŵamsalile Eliya kuti akam’ŵice Elisa kuŵa jwakulocesya jwacacijinjila m’malo mwakwe. Elisa ŵaliji jwakuti caciŵa mjakwe soni cacimkamucisyaga Eliya kwa yaka yejinji. Celecitu caliji cakamucisyo cambone! Caŵili, Yehofa jwamsalile ngani jakusangalasya jakuti: “Ndesile ŵandu 7,000 mu Yisalayeli, jemanjaji nganamtindiŵalila Baala, soni nganamkomasyeje ni ngomo syawo.” (1 Maf. 19:18) Eliya nganaŵa jika. Komboleka kuti Eliya yamlimbikasisye paŵapikene kuti ŵapali ŵandu 7,000 ŵakulupicika ŵaŵakanile kulambila Baala. Eliya jwaliji jwakusosekwa ligongo cisyasyo cakwe cambone cakamucisyaga ŵane. Yeleyi yamlimbikasisye kuti atumicileje Yehofa mwakulupicika mundaŵi jakusawusyajo. Maloŵe gakutyocela kwa Yehofa gamlimbikasisye mnope Eliya.

24, 25. (a) Ana lelojino tukusapikana mwatuli “maloŵe gakutuluka” ga Yehofa? (b) Ana cici cacikutusimicisya kuti Eliya ŵapatile macili ligongo lya cilimbikasyo caŵampele Yehofa?

²⁴ Mpela muyaŵelele ni Eliya nombe m’weji mpaka tutendeje woga ligongo lya macili gamakulungwa ga mu cipago. Yindu yakupanganyikwa yikusalosya macili ga Mkupanganya. (Alo. 1:20) Yehofa akwendelecelape kamulicisya masengo macili gakwe gekulungwago pakwakamucisya ŵakutumicila ŵakwe. (2 Mbiri 16:9) Nambosoni Mlungu akusaŵeceta mnope ni m’weji kupitila mu Maloŵe gakwe, Baibulo. (Aŵalanje Yesaya 30:21.) Naga m’weji tukusakunda kuti Baibulo jitulongoleleje, nikuti mpaka jiŵe mpela “maloŵe gakutuluka.” Kupitila m’Baibulo Yehofa akusatujamuka, kutulimbikasya, soni kutusimicisya ya cinonyelo cakwe.

²⁵ Ana yaŵatesile Yehofa pakulimbikasya Eliya pa Litumbi lya Holebe yamkamucisye? Elo! Mwangacelewa jwalakwe jwatanditesoni kamula masengo mwamtawu soni mwakulimba mtima. Jwajendelecele kuŵa jwakulocesya jwakulupicika juŵasalilaga ŵandu kusakala kwa kulambila milungu jaunami. Nombe m’weji naga tukusakuyaga ni mtima wosope yagakusasalaga Maloŵe ga Mlungu, ‘gagakusatutondoya,’ nikuti tucipakombola kusyasya cikulupi ca Eliya.—Alo. 15:4.