Yampaka Atende Kuti Kuŵalanga Baibulo Kwakamuchisyeje

Ana pakwete paganisisye yakukamula masengo gekulungwa nambo ni kuyiwonaga kuti nganaŵa akombwele? Kuti akombole kukamula masengogo mwine mpaka atande ni kamula masengo gamwanamwana soni gangasawusya. Yeleyi yikukamulanasoni ni kuŵalanga Baibulo. Mwine mpaka aliwusyeje kuti, ‘Ana mpaka ndandile papi?’ Ana mpaka atende chichi kuti asangalaleje ni kuŵalanga soni kulijiganya Baibulo? Mu lijiganyo alino chitulole yindu yampaka yakamuchisye.

1. Ligongo chichi tukusosekwa kuŵalangaga Baibulo lisiku lililyose?

Mundu jwakusaŵalanga Baibulo kapena “chilamusi cha Ambuje,” akusaŵa jwakusangalala soni yindu yikusamjendela chenene. (Aŵalanje Salimo 1:1-3.) Kuti atande kuŵalanga Baibulo, alinje kuŵalanga kwa maminisi gamnono palisiku. Pakutanda kujimanyilila chenene Baibulo ni pakusanonyela mnope kujiŵalanga.

2. Ana mpaka atende chichi kuti kuŵalanga Baibulo kwakamuchisyeje?

Kuti kuŵalanga Baibulo kutukamuchisyeje mnope, tukusosekwa kuti patukuŵalangapo tujimichileje kaje panandi ni ‘kuganichisya’ yatukuŵalangayo. (Yoswa 1:8) Mpaka aliwusyeje kuti: ‘Ana yanguŵalangayi yikunjiganya chichi pakwamba ya Yehofa? Ana mpaka nayikamulichisye masengo chamtuli paumi wangu? Ana yangulijiganyayi mpaka nayikamulichisye masengo chamtuli pakwakamuchisya ŵane?’

3. Ana ni ndaŵi japi jampaka aŵalanjeje Baibulo?

Ana yikusiyasawusya kupata ndaŵi jakuti aŵalanje Baibulo? Ŵajinjiwe yikusatusawusya. Nambope tukusosekwa kulingalinga ‘kamulichisya chenene masengo ndaŵi jetu jatukwete.’ (Aefeso 5:16) Mpaka tutende yeleyi mwakuliŵichila ndaŵi jakuŵalanga Baibulo lisiku lililyose. Ŵandu ŵane akusaŵalanga Baibulo kundaŵi, ŵane musi soni ŵane ligulo mkanagone. Ana wawojo mpaka asagule ndaŵi japi?

KULIJIGANYA YEJINJI

4. Yampaka tutende kuti tusangalaleje ni kuŵalanga Baibulo

Yikusaŵa yakusawusya kuti tutande kuŵalanga Baibulo. Nambope, mpaka tuŵeje ‘ŵakusachilila’ kujiŵalanga. Yeleyi mpaka yilandane ni mundu jwakusaka kupasya chakulya changanalyeje. Pachisyoŵelele akusatanda kuchinonyela. Aŵalanje 1 Petulo 2:2, kaneko akambilane chiwusyo achi:

• Ana akuganisya kuti kuŵalanga Baibulo lisiku lililyosye mpaka kwakamuchisye kutanda kujinonyela mnope?

Alolele FIDIYO kuti amanyilile yayakamuchisye ŵane kuti atande kusangalala ni kuŵalanga Baibulo. Kaneko akambilane yiwusyo ayi.

FIDIYO: Ŵachinyamata Akulijiganya Kuganonyela Maloŵe ga Mlungu (5:33)

• Ana ŵachinyamata ŵa mu fidiyoji ŵamalene ni yakusawusya yamtuli?

• Ana chakamuchisye chichi kuti apitilisye kuŵalanga Baibulo lisiku lililyose?

• Ana ŵatesile chichi kuti kuŵalanga Baibulo kuŵeje kwakusangalasya mnope?

Yakamuchisya kuti aŵalanjeje Baibulo:

• Asagule Baibulo jegopoleledwe chenene. Alinje kuŵalanga Baibulo la Dziko Latsopano naga akusamanyilila Chichewa.

• Chandanda aŵalanjeje ngani syasikusasangalasya mnope. Kuti apate yine yakamuchisya, aŵalanje libokosi lya mtwe wakuti “Atande Kuŵalanga Baibulo.”

• Alembeje chimanyilo palechele kuŵalanga. Akamulichisye masengo libokosi lyalikusimanikwa m’bukuji lyakuti “Alembeje Chimanyilo Pamalisisye Kuŵalanga Chaputala.”

• Akamulichisyeje masengo pologalamu ja JW Library^® Chinga ali pamalo gamtuli, nambope pologalamuji mpaka jakamuchisye kuŵalanga kapena kupikanila kuŵalanga Baibulo pa foni kapena pa yipangiso yine.

• Akamulichisyeje masengo Kabuku kakuti Kabuku Kakamuchisya Pakulijiganya Maloŵe ga Mlungu. Kabukuka kakwete yindu mpela mapu, ma chati, soni yine yampaka yakamuchisye kuti asangalaleje ni kuŵalanga Baibulo.

5. Akosecheleje yachalijiganye

Aŵalanje Salimo 119:34, kaneko akambilane chiwusyo achi:

• Ligongo chichi akusosekwa kupopelaga mkanatande kuŵalanga Baibulo kapena kukosechela yachalijiganye?

Ana mpaka atende chichi kuti kulijiganya kwawo Baibulo kuŵeje kwakamuchisya? Pakukosechela lijiganyo, alinje kamulichisya masengo litala ali:

1. Aŵalanjeje ndime syasikusaŵa kundanda kwa lijiganyo lililyose mkanayiche pa kamtwe kakuti “KULIJIGANYA YEJINJI.”

2. Aŵalanjeje malemba soni alinjeje kulola yagakuti kakamulane ni nganijo.

3. Alembeje msela papali kwanga kwa chiwusyo. Yeleyi yichakamuchisya pakukambilana ni ŵakwajiganya.

Ana akumanyilila?

Ŵa Mboni sya Yehofa alinjile kamulichisya masengo ma Baibulo gakulekanganalekangana. Nambope akusajinonyela Baibulo la Dziko Latsopano la Malemba Opatulika ligongo ŵajigopolele chenene, jili jakupikanika soni mwana lina lya Mlungu.—Alole ngani ja pa Intaneti ja mtwe wakuti “Ana ŵa Mboni sya Yehofa Akwete Baibulo Jawo?”

YALIJIGANYISYE

Kuti apikanichisye yayili m’Baibulo, apateje ndaŵi jakujiŵalanga, apopeleje kuti ajipikanichisye soni akosecheleje yachalijiganye.

Yiwusyo Yakuwilisya

• Ana mpaka atende chichi kuti kuŵalanga Baibulo kuŵeje kwakamuchisya?

• Ana ni ndaŵi japi jampaka aŵalanjeje Baibulo?

• Ligongo chichi akusosekwa kukosechela yachalijiganye pa lijiganyo lya Baibulo?

YAKULINGA YINESONI

Alolesoni yalijiganyisye mu lijiganyoli yampaka yakamuchisye pakuŵalanga Baibulo.

“Yampaka Atende Kuti Alijiganye Yejinji M’Baibulo” (Sanja ja Mlonda Na. 1 2017)

Alijiganye matala gatatu gakuŵalanjila Baibulo.

“Ana Baibulo Mpaka Jingamuchisye Chamtuli?—Mbali 1: Kulijiganya Baibulo” (Ngani ja pa intaneti)

Alole yampaka yakamuchisye kuti asangalaleje ni kuŵalanga Baibulo.

“Ana Baibulo Mpaka Jingamuchisye Chamtuli?—Mbali 2: Yampaka Atende Kuti Kuŵalanga Baibulo Kuŵeje Kwakusangalasya” (Ngani ja pa intaneti)

Alole yaŵatesile ŵane kuti kuŵalanga Baibulo kwakamuchisyeje.

Lijiganyo Lyapajika Lyakamula Mtima (2:06)

4. Apitilisye kuŵechetana ni Yehofa

Kupopela soni kulijiganya Baibulo yakamuchisye kuti aŵe mjakwe jwa Yehofa. Ana yindu yeleyi mpaka yakamuchisye chamtuli kuti aŵe paunasi wambone ni jwalakwe?

Aŵalanje Salimo 62:8, kaneko akambilane chiwusyo achi:

• Kuti alimbisye unasi wawo ni Yehofa, ana apopeleje mwamtuli kwa jwalakwe?

Aŵalanje Salimo 119:97, kaneko akambilane chiwusyo achi:

• Kuti alimbisye unasi wawo ni Yehofa, ana mpaka atende yamtuli kuti kuŵalanga Baibulo kwakamuchisyeje?

Ana mpaka atende yamtuli kuti kuŵalanga soni kulijiganya Baibulo kwawo kuŵeje kwakamuchisya? Kuti alole yindu yine yampaka yakamuchisye, alolele FIDIYO, kaneko akambilane yiwusyo yakuyichisyayi.

FIDIYO: Yampaka Atende Kuti Kulijiganya Kwawo Kuŵeje Kwambone Mnope (5:22)

• Ana ni matala gapi gasasile mu fidiyoji gampaka agakamulichisye masengo?

• Ana ni ngani syapi syampaka alijiganye?