Yampaka Atende Kuti Aŵe Paunasi ni Mlungu
Mlungu ali jwamachili nambosoni akwete ndamo syambone. Akusasaka kuti tummanyilile soni kuti tuŵe najo paunasi. (Yohane 17:3; Yakobo 4:8) Ni ligongo lyakwe akusatukamuchisya kuti tummanyilile chenene.
Mlungu Akwete Lina
‘Amanyilile kuti ŵalakwe jika ŵele lina lyawo lili [‘Yehofa’ NWT.] ali Ŵakwinani Mnope ni ŵakulamulila pa chilambo chosope chapasi.’—SALIMO 83:18.
Baibulo jikusasala kuti Yehofa ni jwali Mlungu jwakuwona. Jwalakwe ni juŵapanganyisye chilambo chapasi soni ya umi yosope. Myoyo tukusasosekwa kumtumichila jwalakwe jika basi.—Chiwunukuko 4:11.
Yehofa Ali Mlungu Jwachinonyelo
“Mlungu ali chinonyelo.”—1 YOHANE 4:8.
Yehofa akusatusalila ndamo syakwe kupitila m’Baibulo soni mu yindu yiŵapanganyisye. Chinonyelo jili ndamo jakwe jekulungwa. Yindu yosope akusayitenda ligongo lya chinonyelo. Patukulijiganya yejinji yakwamba Yehofa ni patukusamnonyela mnope.
Yehofa Ali Mlungu Jwakululuchila
“Wawo ali Mlungu jwakululuka.”—NEHEMIYA 9:17.
Yehofa akusamanyilila kuti ndaŵi sine tukusalemwesya. Myoyo akusaŵa jwakoseka kutukululuchila. Patumsalile kuti tulemwisye ni kuleka kutenda yakusakalayo, jwalakwe akusatukululuchila. Jwangatujimbasoni magambo pa yakulemwa yatwalesile.—Salimo 103:12, 13.
Yehofa Akusajanga Mapopelo Getu
“AMBUJE ali pakuŵandichila mundu jwalijose jwakwaŵilanga . . . akusakupikana soni kulila kwawo, ni kwakulupusya.”—SALIMO 145:18, 19.
Ngatukusasosekwa kukamulichisya masengo yiwanichisyo kapena kukuya miyambo jinejakwe patukumlambila Yehofa. Jwalakwe akusapikana mapopelo getu, mpela mwakusatendela nangolo jwachinonyelo pakumpikanila mwanache jwakwe pakuŵecheta.