Yesu akwinjila mu Yelusalemu ali akwesile bulu

Ana Yakulochesya Yakwamba Mesiya Yikusalosya Kuti Yesu Jwaliji Mesiya?

Kwanga kwakutyochela m’Baibulo

Elo. Yesu ali pa chilambo chapasi jwakwanilisye yakulochesya yejinji yakwamba Mesiya ‘Jwakulamulila’ jutachiŵa “Mkulupusyo jwa chilambo chosope chapasi.” (Daniele 9:25; 1 Yohane 4:14) Ali ajimwiche panyuma pachiwa chakwe, jwapitilisye kwanilisya yakulochesya yakwamba Mesiya.—Salimo 110:1; Masengo 2:34-36.

Ana maloŵe gakuti Mesiya gakusagopolela chichi?

Maloŵe ga Chihebeli gakuti Ma·shiʹach (Mesiya) gali gakulandana ni maloŵe ga Chigiliki gakuti Khri·stos (Klistu). Maloŵe gosopega gakusagopolela “Jwakusagulidwa ni msimu.” Myoyo maloŵe gakuti “Yesu Klistu” gakusagopolela kuti “Jwakusagulidwa ni msimu,” kapena “Mesiya.”

Mu ndaŵi ja m’Baibulo, ndaŵi syejinji mundu ŵamtagaga mauta pamtwe naga asagulidwe kuti aŵe pa udindo wapajika mnope. (Lefitiko 8:12; 1 Samuele 16:13) Yesu ŵasagulidwe ni Mlungu kuti aŵe Mesiya wawuli udindo wapenani mnope. (Masengo 2:36) Mlungu nganamsagula Yesu pakamulichisya masengo mauta nambo ŵakamulichisye masengo msimu weswela.—Mateyu 3:16.

Ana yakulochesya yakwamba Mesiya yakwanilichikwe ni ŵandu ŵajinji?

Iyayi. Mpela mwayikusaŵelaga ni chidindo cha chala cha mundu changajimilaga ŵandu ŵaŵili, yeleyi yikulosya kuti yakulochesya ya m’Baibulo yakusala Mesiya kapena Klistu, yakwanilichikwe ni mundu jumo. Baibulo jasasile kuti, ‘Tikuchiwoneka ŵandu ŵaunami ŵitachiŵechetaga kuti, ‘Klistu jula ni une,’ pane kuti, ‘Jwakulochesya jula ni une.’ Ŵandu ŵaunamiŵa tachitendaga yindu yamachili ni yakusimonjesya kuti naga kuli kwakomboleka ŵasokonasye atamose ŵandu ŵakusagulidwa ŵa Mlungu.’—Mateyu 24:24.

Ana Mesiya tachiwonechela kusogoloku?

Iyayi. Baibulo jasasile kuti Mesiya tachiŵa chisukulu cha Mwenye Daudi jwa ku Isalaeli. (Salimo 89:3, 4) Nambope yakulemba yakusala ya msele wakupagwila Mesiya, yasokonechele pandaŵi jele Aloma ŵajonasile msinda wa Yelusalemu mu 70 C.E.a Kutandila ndaŵi jelejo yaliji yakusawusya kwa mundu kusala kuti Yesu ali Mesiya jwa mu liŵasa lya Daudi. Atamose ŵanduŵa ŵaŵechetaga yeleyi, nambope mu ndaŵi ja Yesu yakulembayi yaliji yili yipali. Mwamti ŵandu ŵaŵasisyaga nganakayichila kuti jwalakwe ali jwa muliŵasa lya Daudi.—Mateyu 22:41-46.

Ana m’Baibulo mwana yakulochesya yilingwa yakusala ya Mesiya?

Yili yakusawusya kusala winji wa yakulochesya yakwamba Mesiya yayikusasimanikwa m’Baibulo. Litala lya kaŵalanjile yakwamba yakulochesya mpaka liŵe lyakulekangana atamose kuti nganijo jikusala ya Mesiya. Mwachisyasyo, ngani ja pa Yesaya 53:2-7 jikusasala ya yakulochesya yejinji yakusala ya Mesiya. Ŵane mpaka aganisyeje kuti ngani josopeji jikusala ya chakulochesya chimpepe. Nambo ŵane mpaka aganisyeje kuti chilichose chakuchisala m’maloŵe gakulochesyago chikwete ngopolelo jine.

Yakulochesya yine yayakwanilichikwe ni Yesu

Maloŵe gakulochesya	Gakusimanikwa pa	Kwanilichikwa
Yisukulu ya Abulahamu	Genesesi 22:17, 18	Mateyu 1:1
Chisukulu cha Isaki mwanache jwa Abulahamu	Genesesi 17:19	Mateyu 1:2
Tachipagwila mu mtundu wa Chiyuda	Genesesi 49:10	Mateyu 1:1, 3
Tachipagwila mu msela wa Mwenye Daudi	Yesaya 9:7	Mateyu 1:1
Tachipagwila kutyochela kwa mwali	Yesaya 7:14	Mateyu 1:18, 22, 23
Tachipagwila ku Betelehemu	Mika 5:2	Mateyu 2:1, 5, 6
Lina lyakwe tachiŵa Emanuweleb	Yesaya 7:14	Mateyu 1:21-23
Tachipagwila mu liŵasa lya kulaga	Yesaya 53:2	Luka 2:7
Ŵanache ŵawulajidwe paŵapagwile jwalakwe	Yelemiya 31:15	Mateyu 2:16-18
Ŵamsalile kuti akopoche mu Iguputo	Hoseya 11:1	Mateyu 2:13-15
Tachikolanjidwa kuti Mnasaletic	Yesaya 11:1	Mateyu 2:23
Tachitumisya jwamtenga	Malaki 3:1	Mateyu 11:7-10
Mu 29 C.E.d ŵasagulidwe kuŵa Mesiya	Daniele 9:25, NWT	Mateyu 3:13-17
Mlungu ŵapeleche umboni wakuti Yesu ali Mwanache jwakwe	Salimo 2:7	Masengo 13:33, 34
Tachiŵa jwakulipeleka mnope pa nyumba ja Mlungu	Salimo 69:9	Yohane 2:13-17
Tachilalichila ngani syambone	Yesaya 61:1	Luka 4:16-21
Tachilalichila ku Galileya mwamti ŵandu ŵajinji tachiliwona lilanguka	Yesaya 9:1, 2	Mateyu 4:13-16
Tachitenda yakusimonjesya mpela muŵatendele Mose	Detulonomo 18:15	Masengo 2:22
Tachiŵechetaga maloŵe gakutyochela kwa Mlungu mpela muŵatendele Mose	Detulonomo 18:18, 19	Yohane 12:49
Tachiposya yilwele ya ŵandu ŵajinji	Yesaya 53:4	Mateyu 8:16, 17
Ngasaŵa mundu jwakulinonyela	Yesaya 42:2	Mateyu 12:17, 19
Tachatendela chanasa ŵakulaga	Yesaya 42:3	Mateyu 12:9-20; Maliko 6:34
Tachiŵa jwachilungamo	Yesaya 42:1, 4	Mateyu 12:17-20
Pungu Jwakusimonjesya	Yesaya 9:6, 7	Yohane 6:68
Tachilalichila ya lina lya Yehofa	Salimo 22:22	Yohane 17:6
Tachijiganya pakamulichisya masengo yiwanichisyo	Salimo 78:2	Mateyu 13:34, 35
Jwakulamulila	Daniele 9:25	Mateyu 23:10
Ŵandu ŵajinji nganamkulupilila	Yesaya 53:1	Yohane 12:37, 38
Liganga lyakwakuŵasya ŵandu	Yesaya 8:14, 15	Mateyu 21:42-44
Ŵandu tachimkana	Salimo 118:22, 23	Masengo 4:10, 11
Ŵandu tachimŵenga pangali ligongo	Salimo 69:4	Yohane 15:24, 25
Tachijinjila mu Yelusalemu ali akwesile bulu	Sakaliya 9:9	Mateyu 21:4-9
Ŵanache tachimchimbichisya	Salimo 8:2	Mateyu 21:15, 16
Tachiyika mu lina lya Yehofa	Salimo 118:26	Yohane 12:12, 13
Jwapelechedwe ni mjakwe jwapamtima	Salimo 41:9	Yohane 13:18
Ŵampeleche ni mbiya 30 sya silifae	Sakaliya 11:12, 13	Mateyu 26:14-16; 27:3-10
Ŵakulijiganya ŵakwe ŵamtisile	Sakaliya 13:7	Mateyu 26:31, 56
Ŵandu ŵapeleche maumboni gaunami	Salimo 35:11	Mateyu 26:59-61
Nganajanga chilichose paŵamjimbaga magambo	Yesaya 53:7	Mateyu 27:12-14
Ŵamsunile mata	Yesaya 50:6	Mateyu 26:67; 27:27, 30
Ŵamputile mumtwe	Mika 5:1	Maliko 15:19
Ŵamputile	Yesaya 50:6	Yohane 19:1
Nganawuchisya paŵamputaga	Yesaya 50:6	Yohane 18:22, 23
Mayimwene gakamulene yakumjimuchila	Salimo 2:2	Luka 23:10-12
Magasa ni sajo syakwe ŵayikomele pa chitela	Salimo 22:16	Mateyu 27:35; Yohane 20:25
Ŵandu tachigaŵana yakuwala yakwe	Salimo 22:18	Yohane 19:23, 24
Tachiwonedwa kuŵa jwakulemwa	Yesaya 53:12	Mateyu 27:38
Ŵandu tachimtendela yachipongwe	Salimo 22:7, 8	Mateyu 27:39-43
Ŵalagasidwe ligongo lya ŵandu ŵakulemwa	Yesaya 53:5, 6	1 Petulo 2:23-25
Yichiwoneka mpela ngakusamalidwa ni Mlungu	Salimo 22:1	Maliko 15:34
Tachimpa finyo jechesuche soni ndulu kuti amwe	Salimo 69:21	Mateyu 27:34
Mkanawe jamkwete njota	Salimo 22:15	Yohane 19:28, 29
Ŵapeleche msimu wakwe kwa Mlungu	Salimo 31:5	Luka 23:46
Tachiwa	Yesaya 53:12	Maliko 15:37
Ŵapeleche umi pakutuwombola ku ulemwa	Yesaya 53:12	Mateyu 20:28
Mawupa gakwe ngasigatemangulidwa	Salimo 34:20	Yohane 19:31-33, 36
Tachisomedwa	Sakaliya 12:10	Yohane 19:33-35, 37
Tachiŵichidwa m’malembe yalumo ni ŵakusichila	Yesaya 53:9	Mateyu 27:57-60
Tachijimuka panyuma pa chiwa chakwe	Salimo 16:10	Masengo 2:29-31
Jwakumpeleka tachijinjilidwa mmalo ni mundu jwine	Salimo 109:8	Masengo 1:15-20
Tachitama ku mkono wa mlyo wa Mlungu	Salimo 110:1	Masengo 2:34-36

a Buku jine (McClintock and Strong’s Cyclopedia) jasasile kuti, “Yili yangakayikasya mnope kuti kuwungunya kwakwamba ya mtundu wa Ayuda soni maŵasa kwasokonechele pandaŵi jele Yelusalemu jwajonanjidwe ngaŵaga mkanajonanjidwe.”

b Lina lya Chihebeli lyakuti Emanuwele, likusagopolela kuti, “Mlungu ali ni uwe.” Linali likulosya ya udindo wakwete Yesu mpela Mesiya. Kusimanikwa kwakwe pachilambo chapasi soni yaŵatendaga yikulosya kuti Mlungu akwasamalila ŵakutumichila ŵakwe.—Luka 2:27-32; 7:12-16.

c Maloŵe gakuti, “Mnasaleti” komboleka kuti gatyochele ku maloŵe ga Chihebeli gakuti neʹtser gagakusagopolela kuti “kusipuka.”

d Kuti amanyilile yejinji pakwamba yakulochesya ya m’Baibulo ya 29 C.E, chachili chaka chaŵayiche Mesiya, aŵalanje ngani jakuti, “Yaŵalochesye Daniyele Pakwamba ya Kwisa kwa Mesiya.”

e Maloŵe gakulochesyaga gakusimanikwa m’buku ja Sakaliya. Yeleyi yikukamulana ni yaŵaŵechete Mateyu kuti, “yatendekwe yiŵaŵechete jwakulochesya Yelemiya.” (Mateyu 27:9) Yikuwoneka kuti buku ja Yelemiya jasimanikwaga kundanda kwa mabuku ga “ŵakulochesya.” (Luka 24:44) Myoyo Mateyu komboleka kuti ŵakamulichisye masengo “Yelemiya” pakusaka kusala ya mabuku gosope ga ŵakulochesya kupwatikapo buku ja Sakaliya.