KUGALONDESYA CHENENE MALEMBA GA M’BAIBULO
Salimo 37:4—“Sangalalani mwa AMBUJE”
“Asangalaleje mwa Yehofa, soni jwalakwe chachapa yakumbila ya mtima wawo.”—Salimo 37:4, New World Translation.
‘Sangalalani mwa AMBUJE, ni tampe yiwukusaka mtima wenu.’—Salimo 37:4, Buku Jeswela.
Ngopolelo ja lilemba lya Salimo 37:4
Jwamasalimoju jukwaŵenda ŵakutumichila wosope ŵa Mlungu kuti aŵe paunasi wambone ni Yehofa ni chakulinga chakuti asangalaleje. Ŵandu wosope ŵakusasangalala ni unasi welewu ngakusosekwa kayichila kuti Yehofaa chachikwanilisya yindu yakusakumbila.
“Asangalaleje mwa Yehofa.” Maloŵega mpaka gagopolelesoni kuti “asangalaleje mnope mwa Yehofa,” “asangalaleje pakwatumichila AMBUJE,” kapena “asangalaleje ni yindu yambone yaŵasasile AMBUJE kuti chachapa.” Kusala mwakata mpaka tujile kuti tukusosekwa ‘tusangalaleje mnope’ patukumtumichila Mlungu jwakuwona. (Salimo 37:4, maloŵe gamwiŵanda) Ligongo chichi tukuŵecheta myoyo?
Ŵandu ŵakusatumichila Yehofa akusakamulichisya masengo yajikusasala Baibulo kuti ayiwoneje yindu mpela mwakusayiwonela Yehofa. Jemanjaji akusammanyilila chenene Mlungu nambosoni akusayiwona kuti luli lunda kumpikanila jwalakwejo. Yeleyi yikusiyakamuchisya kuti akoleje chikumbumtima chambone, asaguleje chenene yindu soni kuti aŵambaleje kutenda yindu yakulemwecheka. (Misyungu 3:5, 6) Mwachisyasyo, jemanjaji pakwawona ŵandu ŵaumbombo kapena ŵachinyengo yindu yili mkwajendela chenene ŵangatendelaga jelasi. (Salimo 37:1, 7-9) Ŵandu ŵa Mlungu akusaŵa ŵakusangalala kumanyilila kuti jwalakwe chamasye yindu yangali chilungamo pachangakaŵapa soni kuti chachapa upile ŵandu ŵakutenda yambone. (Salimo 37:34) Jemanjaji akusaŵa ŵakusangalala mnope kumanyilila kuti Atati ŵawo ŵakwinani akusiŵanonyela.—Salimo 5:12; Misyungu 27:11.
“Jwalakwe chachapa yakumbila ya mtima wawo.” Maloŵega mpaka gagopolelesoni kuti “jwalakwe chachijanga mapopelo gawo” kapena “jwalakwe chachapa yakusosechela mnope.” Nambope tukumbuchileje kuti Yehofa ngaŵa kuti chachitupa chilichose chatumŵendile. Mwakulandana ni nangolo jwambone, Yehofa akusamanyilila chenene yindu yambone yampaka ŵape ŵanache ŵakwe. Nambope yatukusaŵenda nambosoni ndamo syetu yikusosekwa yikamulaneje ni yakusasaka jwalakwe. (Misyungu 28:9; Yakobo 4:3; 1 Yohane 5:14) Naga tukutenda yeleyi, Mlungu jwali ‘jwakupikana mapopelo’ chachipikana kuŵenda kwetu.—Salimo 65:2; Mateyu 21:22.
Mfundo ja pa Salimo 37:4
Mwenye Daudi juŵalamulilaga Ayisalayeli ni juŵalembile Salimo 37. Jwalakwe jwalembile salimoji mwakuya chenene afabeti ja Chihebeli.b
Daudi jwasimene ni yindu yangali chilungamo yejinji. Jwalakwe jwatamaga ni umi wakutilatila ligongo lyakuti Mwenye Sauli nambosoni ŵandu ŵane ŵasakaga kumwulaga. (2 Samuele 22:1) Atamose kuti yaliji myoyo, ndaŵi syosope Daudi ŵamdalilaga Mlungu jwakwe. Daudi jwamanyililaga kuti Yehofa chachajonanga ŵandu wosope ŵakutenda yakusakala. (Salimo 37:10, 11) Atamose yiwonecheje kuti ŵandu ŵakusakalaŵa yindu yikwajendela chenene mpela “manyasi” gagakumela kwene, nambope chachimala mwakusisimuchisya.—Salimo 37:2, 20, 35, 36.
Salimo 37 jikusasala yindu yakusasimana nayo ŵandu ŵakusakuya Malamusi ga Mlungu soni ŵele ngakusakuya. (Salimo 37:16, 17, 21, 22, 27, 28) Myoyo salimoji jikusatukamuchisya kuti tuŵe ŵandu ŵalunda nambosoni kuti tuŵe ŵandu ŵele Mlungu akusasangalala nawo.
Alolele fidiyo jejipiji kuti amanyilile yayili m’buku ja Masalimo.
a Patugopolele lina lya Mlungu kutyochela mu chiŵecheto cha Chihebeli, ndaŵi syejinji mu Chiyao tukusagopolela kuti Yehofa. Kuti amanyilile ligongo lyakwe Mabaibulo gejinji gakamulichisye masengo lina lya udindo lyakuti Ambuje mmalo mwa lina lya Mlungu lisyesyene, aŵalanje ngani jakuti “Ana Yehofa ali Ŵani?”
b Pakamulichisya masengo kalembe keleka, fesi jandanda kapena gulu ja mafesi gandanda jikusatanda ni chilembo chandanda cha afabeti ja Chihebeli. Kaneko mafesi gane gakusakuya chilembo chaŵili cha afabetiji ni akusatenda yeleyi mpaka kumbesi. Kalembe keleka kakamuchisyaga ŵandu kuti akumbuchileje salimoji mwangasawusya.