LIJIGANYO 53
Tusaguleje Yakusangalasya Yampaka Yimsangalasye Yehofa
Yehofa ali “Mlungu jwakusangalala.” (1 Timoteo 1:11, NWT) Jwalakwe akusasaka kuti tuŵeje ŵakusangalala paumi wetu. Akusasangalala patukupata ndaŵi jakupumula pa masengo getu kuti tusangalale. Mu lijiganyoli, chitulole yampaka tutende kuti ndaŵiji jiŵeje jakusangalasya soni jakumchimbichisya Yehofa.
1. Ana tukusosekwa kukumbuchila yindu yapi patukusagula yakusangalasya?
Ana pandaŵi jakupumula akusasangalalaga kutenda chichi? Ŵane pali kumangwawo akusasangalalaga ni kuŵalanga mabuku, kupikanila nyimbo, kulolela mafidiyo kapena kuwungunya yindu pa intaneti. Pele ŵane akusasangalala papite kunyasa, kuputa mpila ni achimjawo soni kuchesa bawo. Chinga tukusasangalala ni chichi, nambo chakusosekwa mnope chili chakuti yakusangalasyayo yiŵeje “yakwasangalasya Ambuje.” (Aefeso 5:10) Yili yakusosekwa mnope kumanyilila yeleyi ligongo lyakuti yakusangalasya yejinji yikusalimbikasya yachiwawa, chikululu kapena yamisimu. Yinduyi Yehofa akusayiŵenga. (Aŵalanje Salimo 11:5.) Ana ni chichi champaka chitukamuchisye kuti tusaguleje mwalunda yakusangalasya?
Naga tukusagula achimjetu ŵakusamnonyela Yehofa, mpaka atukamuchisye kusagula yakusangalasya yambone. Mu lijiganyo lipite lila, twalijiganyisye kuti “mundu jwakwenda ni ŵandu ŵa lunda nombe najo akusaŵa jwalunda.” Nambo naga tukusanonyela kunguluka ni ŵandu ŵangakuya malamusi ga Mlungu ‘tuchijonasika.’—Misyungu 13:20.
2. Ligongo chichi ngatukusosekwa kumalilaga ndaŵi jejinji pa yakusangalasya?
Atamose kuti mpaka tusagule yakusangalasya yambone, nambo tukusosekwa kuŵa ŵakusamala kuti yikatumalilaga ndaŵi. Naga ngasamala mpaka tulepeleje kupata ndaŵi jakutendela yindu yakusosekwa mnope. Ni ligongo lyakwe Baibulo jikusatulimbikasya kuti “tukamulichisyeje chenene masengo ndaŵi jetu.”—Aŵalanje Aefeso 5:15, 16.
KULIJIGANYA YEJINJI
Chitulijiganye yampaka tutende kuti tusaguleje chenene yakusangalasya.
3. Tuŵambaleje yakusangalasya yakusakala
Ligongo chichi tukusosekwa kuŵa ŵakusamala patukusagula yakusangalasya? Alolele FIDIYO, kaneko akambilane yiwusyo yakuyichisyayi.
Ana masewela gagatendekwaga kalakala ku Loma gakulandana chamtuli ni ga masiku agano?
Mu fidiyoji, ana Dani jwamanyilile yamtuli pakwamba yakusangalasya?
Aŵalanje Aloma 12:9, kaneko akambilane chiwusyo achi:
Ana lilembali mpaka lyakamuchisye wuli kusagula yakusangalasya yakuŵajilwa?
Ana ni yindu yapi yakusayiŵenga Yehofa? Aŵalanje Misyungu 6:16, 17 soni Agalatiya 5:19-21. Pamalisisye kuŵalanga lilemba lililyose, akambilane chiwusyo achi:
Ana ni yindu yapi yayisasile m’malembaga yayiwandile mu yakusangalasya ya masiku agano?
Yampaka tutende pakusagula yakusangalasya
Aliwusye kuti:
Ana yakusangalasyayi, yikwete chilichose chakusachiŵenga Yehofa?
Ana yikusalepelekasya kutenda yindu yakusosekwa mnope?
Ana yeleyi chiyindendekasye kuti mbe paunasi ni ŵandu ŵangamnonyela Yehofa?
Kutenda yindu mwakusamala kukusatukamuchisya kuŵambala yindu yampaka yituwulasye. Myoyo tukusosekwa kuŵambala yakusangalasya yatukuyiwona kuti nganiyiŵa yambone
4. Akamulichisyeje masengo ndaŵi jawo mwalunda
Alolele FIDIYO, kaneko akambilane chiwusyo chakuyichisya.
Mu fidiyoji, atamose kuti m’baleju nganalolelaga yakusakala, nambo ana chakusawusya chakwe chaliji chichi?
Aŵalanje Afilipi 1:10, kaneko akambilane chiwusyo achi:
Ana lilembali mpaka litukamuchisye chamtuli kuti kumalilaga ndaŵi jejinji pakutenda yakusangalasya?
5. Tusaguleje yakusangalasya yambone
Atamose kuti yakusangalasya yine yangamsangalasya Yehofa, nambope pana yakusangalasya yejinji yayikusamsangalasya. Aŵalanje Jwakulalichila 8:15 soni Afilipi 4:8, kaneko akambilane chiwusyo achi:
Ana ni yakusangalasya yapi yakusayinonyelaga wawojo?
Mpaka asangalaleje ni yakusangalasya yambone
YAKUSAŴECHETA ŴANDU ŴANE: “Pangali chakusawusya ni yakusangalasya ya chiwawa, yachikululu kapena yamisimu, bola naga ukuŵambala kuyitenda.”
Ana wawojo mpaka asale yamtuli?
YALIJIGANYISYE
Yehofa akusasaka kuti tusaguleje soni kutenda yakusangalasya yambone.
Yiwusyo Yakuwilisya
Ana Aklistu akusosekwa kuŵambala yakusangalasya yapi?
Ligongo chichi tukusosekwa kuŵaga ŵakusamala ni ndaŵi jatukusamalila pa yakusangalasya?
Ligongo chichi akusosekwa kusagula yakusangalasya yambone?
YAKULINGA YINESONI
Amanyilile jwakwete udindo wakwasagulila yakusangalasya.
Alole yampaka atende kuti asaguleje mwalunda yakusangalasya.
“Ana Yakusangalasya Yawo Yikusiyakamuchisya?” (Sanja ja Mlonda, Okotoba 15, 2011)
Mu ngani jakuti “Namalene ni Lusagu,” alole ligongo lyakwe jwamlume jwine jwachenjile yakusangalasya yaŵasagulaga.
“Baibulo Jikusachenga Umi wa Ŵandu” (Sanja ja Mlonda, Febuluwale 1, 2010)
Alole yaŵatesile mayi jwine kuti akasagulaga yakusangalasya yamisimu.