‘Mwakumbuchileje Ŵakulolela Ŵenu’

MALOŴE gaŵalembile ndumetume Pauloga, gagali pa Ahebeli 13:7, mpaka gagopoleledwesoni kuti: “Mwakumbuchileje ŵakulongolela ŵenu.” Kutandila pa Pentekosite mu 33 C.E, ŵandumetume ŵakulupichika ŵa Ambuje Yesu Klistu ŵakwanilisye udindo wawo mpela likuga lyakulongolela. Jemanjaji ŵakwanilisyaga udindowu mwakupeleka malamusi ku mpingo wa Chiklistu wawagambile kupagwa kwene. (Mase. 6:2-4) Pachayikaga chaka cha 49 C.E., likuga lyakulongolelali lyajonjechekwe ni ŵandu ŵane ŵanganaŵa ŵandumetume. Paŵalondesyaga ngani ja kuwumbala, m’likuga lyakulongolela mwaliji mwana “ŵandumetume soni achakulungwa ŵa mpingo” ŵa ku Yelusalemu. (Mase. 15:1, 2) Waliji udindo wawo kuganichisya ngani syasyakwayaga Aklistu wosope. Ŵatumisyaga yikalata ni malamusi m’mipingo, yayakamuchisyaga kuti jilimbeje m’chikulupi soni kuti wosope aŵe ŵakamulana nganisyo soni yakutenda. Mipingo josope japikanilaga soni kamulana ni malamusi gagatyochelaga ku likuga lyakulongolela. Yakuyichisya yakwe yaliji yakuti Yehofa ŵajijaliwaga mipingojo soni yindu yajendaga chenene.—Mase. 8: 1, 14, 15; 15:22-31; 16:4, 5; Ahe. 13:17.

² Paŵagambile kuwa ŵandumetume, ŵandu ŵatandite kusapuka. (2 Ates. 2:3-12) Mpela muŵaŵechetele Yesu mu chitagu chakwe chakwamba ya tiligu ni namsongole, namsongole (jwakwimila Aklistu ŵakuliwanichisya) jwapandidwe pasikati pa tiligu (jwakwimila Aklistu ŵasagulwe ni msimu). Kutandila ndaŵi jelejo, maguluga ŵagakundile kuti gakulile yalumo mpaka ndaŵi jagowola jajili, “kumala kwa chilambo chapasi chino.” (Mat. 13:24-30, 36-43) Ndaŵiji, Yesu ŵamkamuchisyaga Mklistu jwalijose jwamsagulwe, nambo paliji pangali likuga lyakulongolela, soni litala lyakumanyika chenene lyaŵalikamulichisyaga masengo pakupeleka malamusi kwa ŵakumkuya ŵakwe. (Mat. 28:20) Nambope, jwalakwe ŵasasile mkanipaŵe kuti yindu yichichenga pandaŵi jagowola.

³ “Ana ŵani ŵali kapolo jwakulupichika ni jwalunda?” Pakwanga chiwusyochi, Yesu Klistu ŵasasile ngani jakuwanichisya, mpela mbali jimo ‘jakulosya’ yayichitendekwa “mbesi ja chilambo chapasi,” jili jiŵandichile. (Mat. 24:3, 42-47, NWT) Yesu ŵasasile kuti kapolo jwakulupichikaju chachikola masengo gamakulungwa gakupeleka chakulya chausimu kwa ŵandu ŵa Mlungu “pa ndaŵi jakwe.” Mpela muyaŵelele mu yaka 100 yandanda kuti Yesu ŵakamulichisyaga masengo gulu ja ŵandu mmalo mwa mundu jumo pakulongolela mpingo, myoyosoni kapolo jwakulupichika jwakumkamulichisya masengo Yesu mu ndaŵi ja mbesi jino, nganaŵa mundu jumo.

KUMMANYILILA “KAPOLO JWAKULUPICHIKA NI JWALUNDA”

⁴ Ana Yesu ŵasagwile ŵani kuti ŵalisyeje ŵakumkuya ŵakwe? Ŵasagwile Aklistu ŵasagulwe ni msimu pachilambo chapasi. Baibulo jikusasala ya jemanjaji kuti ali “ŵambopesi ŵa ku uchimwene” ŵalamulidwe kuti ‘akalalichile ya masengo gamachili ga jwele juŵaŵilasile jemanjajo kuti akopoche mu chipi ni akajinjile mu lilanguka lyakwe lyakusimonjesya.’ (1 Pet. 2:9; Mal. 2:7; Chiw. 12:17) Ana ŵasagulwe wosope ŵali pachilambo chapasi ni ŵali kapolo jwakulupichika ni jwalunda? Iyayi. Ndaŵi jele Yesu mwakusimojesya ŵapeleche yakulya ku gulu ja achalume ŵakwana 5,000, ngaŵalanjila achakongwe ni ŵanache, chandanda jwalakwe ŵapeleche kwa ŵakulijiganya ŵakwe, kaneko ŵakulijiganyawo ŵapeleche ku gulu ja ŵanduwo. (Mat. 14:19) Jwalakwe ŵapeleche yakulya kwa ŵandu ŵajinji pakamulichisya masengo ŵandu ŵamnono. Jwalakwe akutenda myoyosoni masiku agano.

⁵ Myoyo “kapolo jwakulupichika ni jwalunda,” ali gulu jamwana ja abale ŵasagulwe ni msimu ŵakusalinganya soni kupeleka chakulya chausimu mundaŵi ajino ja kuŵapo kwa Klistu. (Luk. 12:42) M’masiku gambesi gano, achalume ŵasagulwe ŵali “kapolo jwakulupichika ni jwalunda” aŵele ali mkutumichila yalumo ku likulu. Masiku agano, achalume ŵasagulweŵa ni ŵali Likuga Lyakulongolela lya Mboni sya Yehofa.

⁶ Klistu akukamulichisya masengo guluji pakuwandisya yakwamba kwanilichikwa kwa yakulochesya ya m’Baibulo, soni kusala mwampaka tukamulichisye masengo malamusi ga m’Baibulo pa umi wetu lisiku lililyose. Chakulya chausimuchi akusachipeleka kupitila m’mipingo ja Mboni sya Yehofa. (Yes. 43:10; Aga. 6:16) Ndaŵi sya m’Baibulo, kapolo juŵamkulupililaga, ŵampaga udindo wakulolela nyumba josope. Myoyosoni, kapolo jwakulupichika ni jwalunda, ampele udindo wakulolela liŵasa lya ŵakulupilila. Jwalakwe akusalolelasoni yipanje ya gulu, masengo gakulalichila, misongano jekulungwakulungwa, kusagulidwa kwa ŵakulolela ŵakusatumichila mbali syakulekanganalekangana sya mu guluji, soni kupanganyidwa kwa mabuku. Yosopeyi yikusakamuchisya “ŵamasengo” ŵa pamlango.—Mat. 24:45.

⁷ Ana “ŵamasengo” ŵeleŵa ali ŵani? Jemanjaji ali wosope ŵakusalya chakulyachi. Pandanda, ŵamasengo wosope ŵaliji ŵasagulwe. Mkupita kwa ndaŵi, gulu ja ŵandu ŵangaŵalanjika ja “ngondolo sine” jaŵelesoni ŵamasengoŵa. (Yoh. 10:16) Magulu gaŵiliga gakusalya chakulya chausimu chachikusatyochela kwa kapolo jwakulupichika.

⁸ Mkati mwa yisawusyo yekulungwa, Yesu pachachiyika kukupeleka chilango ku chilambo chakusakalachi, jwalakwe chachim’ŵika kapolo jwakulupichika kuti aŵe “jwakulolela yipanje yakwe yosope.” (Mat. 24:46, 47) Wosope ŵakupanganya kapolo jwakulupichika chachipochelela mboto jawo kwinani. Jemanjaji yalumo ni ŵane ŵa 144,000, chachilamulila yimpepe ni Klistu kwinani. Atamose kuti pachilambo chapasi ngasipapagwasoni kapolo jwakulupichika ni jwalunda, Yehofa ni Yesu chachipelekagape malamusi kwa ŵandu ŵachachitama pachilambo chapasi mu Uchimwene wa Mesiya kupitila mwa ŵachachisagulidwa kuti atumichileje mpela ŵakulongolela ŵa pachilambo chapasi.—Sal. 45:16.

LIGONGO CHICHI TUKOSOSEKWA ‘KWAKUMBUCHILA ŴAKULAMULILA ŴETU’?

⁹ Tukwete magongo gamajinji gakututendekasya ‘kwakumbuchila ŵakulamulila ŵetu’ soni kulosya kuti tukusitwakulupilila. Ligongo chichi kutenda yeleyi kuli kwakusosekwa kwa m’weji? Ndumetume Paulo ŵaŵechete kuti, “Jemanjajo ŵangapumulila kose kulolela umi wenu, pakuti akwenela kusala ya masengo gawo pameso pa Mlungu. Naga mkwapikanila, jemanjajo, tachikamula masengo mwakusangalala, ngaŵa mwakutumbila, ligongo naga ngatenda yeleyo ni kuti jemanja ngasiyimkamuchisya kose.” (Ahe. 13:17) Yili yakusosekwa mnope kwa m’weji kwapikanila ŵakutulongolela ligongo jemanjaji akusatulolela mwausimu kuti yindu yitujendeleje chenene.

¹⁰ Pa 1 Akolinto 16:14, Paulo ŵasasile kuti, “Yosope yimkutenda, m’yitendeje kutyochela m’chinonyelo.” Ŵakulongolela akusasagula yakutenda yakwaya ŵandu ŵa Mlungu mwakamulana ni ndamo japenani ja chinonyelo. Pakwamba ya chinonyelo, lilemba lya 1 Akolinto 13:4-8 likusati, “Chinonyelo chili chakuwusimana mtima nambosoni chakulisinga. Chinonyelo changali wiwu, changalilumba kapena kulikwesya. Chinonyelo changatenda chipongwe, changalinonyela, changatumbila, soni changasunga ngani naga jwine achilemwechesye. Chinonyelo changasangalala naga jwine atesile yangalumbana, nambo chikusasengwa kapena kuti kusangalala ni yakuwona yisyesyene. Chinonyelo changapela pakutenda yindu, chikusakulupilila ndaŵi syosope, changajasa mtima, nambosoni chikusapilila ndaŵi syosope. Chinonyelo chili changamala.” Ligongo lyakuti chinonyelo chili mchiga wa yakusagula yosope yayikusatendekwa pakwakamuchisya ŵakutumichila ŵa Yehofa, tukwete magongo gakusangalalila ligongo lya kutulongolela kweleku. Yeleyi yikusalosya chinonyelo cha Yehofa.

¹¹ Mpela muyaŵelele mu yaka 100 yandanda, ŵandu ŵakwakamulichisya masengo Yehofa pakulongolela ŵandu ŵakwe ali ŵangali umlama. Nambope, kalakala Yehofa ŵakamulichisyaga masengo ŵandu ŵangali umlama pakwanilisya chakulinga chakwe. Nowa ŵataŵile chombo soni ŵalalichilaga pakwamba ya chonasiko chachaliji mkwisa. (Gen. 6:13, 14, 22; 2 Pet. 2:5) Mose ŵasagulidwe kuti alongolele ŵandu ŵa Yehofa pakwakoposya mu Iguputo. (Eks. 3:10) Yehofa ŵakamulichisye masengo ŵandu ŵangali umlama kuti alembe Baibulo. (2 Tim. 3:16; 2 Pet. 1:21) Atamose kuti masiku agano Yehofa akukamulichisya masengo ŵandu ŵangali umlama kuti alongolele masengo gakulalichila ni kwiganya ŵandu, ngayikusatendekasya kuti tukajikulupililaga gulu ja Mlungu. Nambo, yikusatulimbikasya kumanyilila kuti yikaŵe kuti Yehofa ngakutukamuchisya, guluji mkanijikwanilisya yosope yajitesile. Kupitila mu yakusawusya yejinji soni yindu yasimene nayo, kapolo jwakulupichika alosisye kuti msimu wa Mlungu ni wawukumlongolela pa masengo gakwe. Masiku agano Yehofa ajijaliwe mbali jakuwoneka ni meso ja gulu jakwe m’matala gejinji. Myoyo, kwende tujikamuchisyeje soni kujikulupilila guluji ni mtima wosope.

ANA TUKUSALOSYA CHAMTULI KUTI TUKUSAJIKULUPILILA GULUJI?

¹² Ŵandu ŵakusaŵichidwa m’maudindo mumpingo akusalosya kuti akusajikupilila guluji mwakupochela maudindo gawo mwakusangalala soni kugakwanilisya mwakulupichika. (Mase. 20:28) Mpela ŵakulalichila ya Uchimwene ŵakulimbichila, tukusakamula masengo gakulalichila kunyumba ni nyumba, kutenda maulendo gakuwilisya, soni kutendesya majiganyo ga Baibulo ga panyumba. (Mat. 24:14; 28:19, 20) Kuti chakulya chausimu chakutyochela kwa kapolo jwakulupichika chitukamuchisye mnope, tukusakosechelaga soni kusimanikwa pa misongano ja Chiklistu, kupwatikapo misongano jekulungwakulungwa. Kusongana ni Aklistu achimjetu kukusatukamuchisya mnope ligongo tukusalimbikasyana.—Ahe. 10:24, 25.

¹³ Patukujikamuchisya guluji ni yakupeleka yetu, tukusalosya kuti tukusajikulupilila. (Mis. 3:9, 10) Patumanyilile kuti Aklistu achimjetu akusosechela yindu yakuchilu, mwachitema tukusitwakamuchisya. (Aga. 6:10; 1 Tim. 6:18) Tukusatenda yeleyi ni msimu wachinonyelo. Ndaŵi syosope tukusasosasosa mapesa gakumlosya Yehofa soni gulu jakwe kuti tukusayamichila umbone watupele.—Yoh. 13:35.

¹⁴ Tukusalosyasoni kuti tukusajikulupilila guluji mwakukamulana ni yosope yajikusasagula. Yeleyi yikupwatikapo kuya mwakulinandiya yakusatusalila ŵaŵaŵisile kuti atuloleleje, mpela ŵakulolela dela soni achakulungwa ŵa mumpingo. Abale ŵeleŵa ali mu gulu ja ‘ŵakulolela ŵetu,’ ŵatukusosekwa kwapikanila. (Ahe. 13:7, 17) Atamose naga ngatukupikanichisya ligongo lyasagulile yindu yine, tukusamanyilila kuti kukamulana ni yasagwileyo kuchitukamuchisya kuti yindu yitujendeleje chenene. Yakuyichisya yakwe yikusaŵa yakuti Yehofa akusatupa yindu yambone ligongo lya kupikanila kwetu Maloŵe gakwe soni gulu jakwe. Yeleyi yikusalosya kuti tukusampikanila Mlongola jwetu, Yesu Klistu.

¹⁵ Kusala yisyene, tukwete magongo gamajinji gakututendekasya kumkulupilila kapolo jwakulupichika ni jwalunda. Satana, jwali mlungu jwa chilambo chapasi chino, akutenda yampaka akombole kuti asakasye lina lya Yehofa soni gulu jakwe. (2 Akoli. 4:4) Tukakunda kuti Satana atuteje ni yitega yakwe yaukalamusi. (2 Akoli. 2:11) Jwalakwe akumanyilila kuti “jigambile kumsigalila ndaŵi panandipe” mkanajawule ku lisimbo lyangali mbesi, myoyo ali jwakusachilila kwatendekasya ŵandu ŵa Yehofa kuti aleche kumtumichila Mlungu. (Chiw. 12:12) Nambope, Satana pakupitilisya kutulinga mwamachili, kwende tupitilisye kuŵa paunasi wakulimba ni Yehofa. Kwende tumkulupilileje Yehofa soni litala lyakulikamulichisya masengo masiku agano pakwalongolela ŵandu ŵakwe. Yeleyi yikusatukamuchisya kuti tuŵe mu gulu jakamulana ja pachilambo chosope.