“Ajawule Akajiganye Ŵandu . . . Kuti Aŵe Ŵakulijiganya Ŵangu”

1-2. (a) Mwakamulana ni yaŵalamwile Yesu pa Mateyu 28:18-20, ana cakulinga cekulungwa cakwete Aklistu cili capi? (b) Ana citulole kwanga kwa yiwusyo yapi?

YESU ali ajimwice kuŵawe, ŵasalile ŵandumetume ŵakwe kuti akawonegane kulitumbi lya ku Galileya. Ŵandumetumeŵa paŵasongene palitumbili, komboleka kuti ŵaliji ŵakusangalala mnope. (Mat. 28:16) Komboleka kuti mwine gelega galiji malo gele Yesu ‘ŵawonecele kwa ŵakumkuya ŵakwe ŵakupunda 500.’ (1 Akoli. 15:6) Ligongo cici Yesu jwasalile ŵakulijiganya ŵakwe kuti akasimane kweleku? Jwasalile yeleyi pakusaka kwapa lilamusi lyakuti, “M’yoyo, ajawule akajiganye ŵandu ŵa mitundu josope kuti aŵe ŵakulijiganya ŵangu.”—Aŵalanje Mateyu 28:18-20, NW.

² Ŵakulijiganya ŵa Yesu ŵaŵapikanile maloŵe gakwe ŵaŵele m’likuga lya ŵandu ŵa mumpingo wa Ciklistu wa m’yaka 100 yandanda. Aklistuŵa, cakulinga cawo cekulungwa caliji cakupanganya ŵakulijiganya ŵa Klistu.b Masiku agano, pana mipingo jejinji ja Aklistu ŵasyesyene ŵele cakulinga cawo cekulungwa cili cicici. Mungani ajino citulole yiwusyo mcece yakuyicisyayi, Ligongo cici kupanganya ŵakulijiganya kuli kwakusosekwa mnope? Ana tutendeje cici kuti tupanganye ŵakulijiganya? Ana ŵani ŵakusosekwa kujigala nawo mbali pakupanganya ŵakulijiganya? Soni cakuti, ligongo cici masengo gakupanganya ŵakulijiganya gakusasaka kuwusimana mtima?

LIGONGO CICI KUPANGANYA ŴAKULIJIGANYA KULI KWAKUSOSEKWA MNOPE?

3. Mwakamulana ni lilemba lya Yohane 14:6 soni 17:3, ligongo cici masengo gakupanganya ŵakulijiganya gali gakusosekwa mnope?

³ Ligongo cici kupanganya ŵakulijiganya kuli kwakusosekwa mnope? Ligongo ŵakulijiganya ŵa Yesupe ni ŵampaka aŵe acimjakwe ŵa Mlungu. Konjecesya pelepa, ŵakusamkuya Klistu akusakola umi wambone apanopano soni akusakola cembeceyo ca umi wangamala msogolo. (Aŵalanje Yohane 14:6; 17:3.) Kusala yisyene, Yesu ŵatupele masengo gakusosekwaga, nambo ngatukusagakamula jikape. Ndumetume Paulo paŵasalaga ya jwalakwe msyenejo nambosoni acimjakwe, jwatite, “Tuli ŵamasengo acimjakwe ŵa Mlungu.” (1 Akoli. 3:9, NW) Welewutu wuli upile wekulungwa wele Yehofa soni Yesu apelece kwa ŵandu ŵangali umlama.

4. Ana mpaka tulijiganye cici kutyocela ku cisyasyo ca Ivan soni Matilde?

⁴ Masengo gakupanganya ŵakulijiganya mpaka gatutendekasye kuŵa ŵakusangalala mnope. Kwende tulole cisyasyo ca Ivan soni ŵamkwakwe lina lyakwe Matilde ŵa ku Colombia. Jemanjaji ŵamlalicile mnyamata jwine lina lyakwe Davier. Mnyamataju jwasalile kuti, “Ngusasakaga kucenga nambo yikusasawusya.” Davier jwatendaga ung’asi wakumenyana soni jwakamulicisyaga masengo mitela jakusokonasya mtwe, kumwa mnope, nambosoni jwatamaga ni uganja wakwe lina lyakwe Erika. Twatandite kulijiganya Baibulo ni mnyamataju. Ligongo lyakuti mnyamataju jwatamaga kwakutalika, twajendaga pa njinga nambosoni misewu jakwe jaliji ja matope. Panyuma pakuyiwona kuti mnyamataju atandite kucenga ndamo syakwe, uganja wakwe wula watanditesoni kulijiganya nawo Baibulo. Kaneko Davier jwalesile ndamo syakusakala syosope sila. Mnyamataju jwalombene ni uganja wakwe wula. Matilde jwasasile kuti, “Davier ni Erika paŵabatiswe mu 2016, twakumbucile yaŵaŵecete Davier yila kuti, ‘Ngusasakaga kucenga nambo yikusasawusya.’ Twaliji ŵakusangalala mnope mwamti mpaka twagwisisye misosi.” Mwangakayicila tukusaŵaga ŵakusangalala mnope patwakamucisye ŵandu ŵane kuti aŵe ŵakulijiganya ŵa Klistu.

ANA TUTENDEJE CICI KUTI TUPANGANYE ŴAKULIJIGANYA?

5. Ana cindu candanda catukusosekwa kutenda kuti tupanganye ŵakulijiganya cili cici?

⁵ Cindu candanda catukusosekwa kutenda kuti tupanganye ŵakulijiganya cili kusosasosa ŵandu ŵakuŵajilwa kulijiganya ya Yehofa. (Mat. 10:11) Tukusalosya kuti tuli Ŵamboni sya Yehofa patukumlalicila mundu jwalijose jwatusimene najo. Tukusalosya kuti tuli Aklistu ŵasyesyene patukupikanila yaŵalamwile Klistu kuti tukalalicileje.

6. Ana tukusosekwa kutenda cici kuti tujiganyeje cenene mu undumetume?

⁶ Ŵandu ŵane akusasacilila kulijiganya Baibulo, nambo ŵane ŵatukusasimana nawo kandanda akusalosya kuti nganakola lung’wanu. Ŵandu mpela ŵeleŵa tukusosekwa kwalimbikasya kuti akole mtima wakusacilila kulijiganya yejinji. Kuti tujiganyeje cenene mu undumetume tukusosekwa kosecela cenene. Tusaguleje ngani syampaka syatendekasye lung’wanu. Kaneko tukusosekwa kulola mwampaka tulalicilile.

7. Ana mpaka atande camtuli kuŵecetana ni mundu, soni ligongo cici yili yakamucisya kumpikanila soni kumcimbicisya?

⁷ Mwacisyasyo, mpaka am’wusye msyene nyumba kuti, “Ana mpaka asangalale ndili nawusisye nganisyo syawo pangani jinejakwe? Yakusawusya yejinji yatukusasimana nayo masiku agano, ŵandu ŵanesoni akusimana nayo pacilambo cosope. Ana akuganisya kuti pana boma jampaka jimasye yakusawusyayi?” Kaneko mpaka akambilane lilemba lya Daniele 2:44. Kapena mpaka am’wusye mundu kuti, “Ana litala lyambone lyakwajiganyila ŵanace ndamo syambone lili lyamtuli? Ngusaka mbikane nganisyo syawo panganiji.” Kaneko mpaka akambilane lilemba lya Detulonomo 6:6, 7. Pangani jilijose jakusaka kuti akakambilane ni ŵandu, akusosekwa ganicisya ya ŵacakapikanileje. Akusosekwa ganicisya yindu yacakapindule jemanjajo pacakalijiganye yajikusajiganya Baibulo. Pakuŵecetana ni jemanjajo, mpaka yiŵe yakamucisya kwapikanila soni kucimbicisya nganisyo syawo. Kutenda yeleyi kucikamucisya kuti ŵapikanicisye, nombe jemanjajo cacapikanila.

8. Ligongo cici tukusosekwa kulingalinga kutenda maulendo gakuwilisya?

⁸ Mundu mkanasagule kulijiganya Baibulo, tukusosekwa kuwujilagako maulendo gejinji. Ligongo cici kutenda yeleyi kuli kwakusosekwa? Komboleka kuti mwine mpaka yiŵe yakusawusya kuti twasimane pamlango patuwujileko. Nambosoni patumanyigene najo mnope tukusosekwa kuwujilagako kwandaŵi syejinji mpaka msyene nyumbajo ali ajiticisye lijiganyo lya Baibulo. Tukumbucileje kuti mbeju sikusakula cenene naga sikwitilidwa ndaŵi syosyope. Mwakulandana ni yeleyi, mundu jwakwete lung’wanu, cinonyelo cakwe pa Yehofa soni Yesu cikusakulaga naga tukukambilana najo Maloŵe ga Mlungu mwakutamilicika.

ANA ŴANI ŴAKUSOSEKWA KUJIGALA MBALI PAKUPANGANYA ŴAKULIJIGANYA?

9-10. Ligongo cici mpaka tujile kuti Mklistu jwalijose jwakusalalicila akusakamula nawo masengo gakusosasosa ŵandu ŵambone mtima?

⁹ Mklistu jwalijose akusosekwa kujigala mbali pamasengo gakusosasosa ŵandu ŵakwete mtima wambone. Yeleyi mpaka tuyiwanicisye ni kusosasosa mwanace jwasokonecele. Mwamtuli? Aganicisye yayatendekwe pakasokonecele kamnyamata ka yaka yitatu. Ŵandu ŵakwana 500 ŵajigele nawo mbali jakumsosasosa mwanaceju. Pambesi pakwe, pali pamasile maawala 20 ŵandu ali mkusosasosa mwanacejo, mundu jwine ŵamsimene mwanacejo ali mumgunda. Mundujo jwakanile kupocela ucimbicimbi. Jwalakwe jwasasile kuti, “Ŵandu ŵajinji ŵalipelece kuti mwanacejo asimanikwe.”

¹⁰ Ŵandu ŵajinji ali mpela kamwanace kakasokoneceleka. Jemanjaji nganakola cembeceyo cilicose, nambo akusosekwa kwakamucisya. (Aef. 2:12) Ŵandu wosopewe ŵakupunda 8 miliyoni, tukusakamula nawo masengo gakusosasosa ŵandu ŵambone mtima. Mwajikajetu nganituŵa tukombwele kupata mundu jwakusaka kulijiganya Baibulo. M’malo mwakwe, ŵakulalicila ŵane mu dela jijojo mpaka apate mundu jwakusaka kulijiganya Maloŵe ga Mlungu. Naga m’bale kapena mlongo apatile mundu jwaŵele jwakulijiganya jwa Klistu, jwalijose juŵakamwile nawo masengo gakusosasosago akusakola magongo gakusangalalila.

11. Ana ni matala gane gapi gampaka akamulicisye pakupanganya ŵakulijiganya naga nganakola lijiganyo lya Baibulo?

¹¹ Naga apano nganakola lijiganyo lya Baibulo, mpaka akamucisye kupanganya ŵakulijiganya m’matala gane. Mwacisyasyo, mpaka ŵapocele cenene ŵandu ŵacasambano ŵayice ku Nyumba ja Ucimwene. Naga akulosya cinonyelo m’litala lyeleli, cacakamucisya ŵane kumanyilila kuti cinonyelo cikusamanyikasya Aklistu ŵasyesyene. (Yoh. 13:34, 35) Ndemanga syakusapeleka pamisongano atamose sili syejipi, mpaka syakamucisye ŵacasambano kusala ya cikulupi cawo mwakutyocela pasi pamtima soni mwaulemu. Mpaka ajendesoni ni jwakulalicila jwasambano mu undumetume soni kumkamucisya mwampaka alalicilile. Mwakutenda yeleyi, cacimkamucisya jwalakwe kumsyasya Klistu.—Luk. 10:25-28.

12. Ana tukusosekwa umanyilisi wapajika kuti twajiganye ŵandu kuŵa ŵakulijiganya ŵa Yesu? Alondesye.

¹² Wosopewe ngatukusosekwa ganisya kuti tukusosekwa umanyilisi wapajika kuti tumjiganye mundu kuŵa jwakulijiganya jwa Yesu. Ligongo cici ngatukusosekwa ganisya m’yoyo. Aganicisye ya cisyasyo ca Faustina jwakusatamaga ku Bolivia. Jwalakwe paŵasimene ni Ŵamboni sya Yehofa kandanda jwali jwakuti ngakukombola kuŵalanga. Nambo apano, jwalakwe akusakombola kuŵalanga panandi. Mlongoju apano jwabatiswe, soni akusanonyela kwajiganya ŵane. Nambosoni wiki jilijose akusatendesya majiganyo ga Baibulo gakwana msano. Atamose kuti Mlongo Faustina jwangamanyilila kuŵalanga cenene mpela mwakusatendela ŵakulijiganya Baibulo ŵakwe ŵane, nambope jwalakwe akombwele kwakamucisya ŵandu 6 kwikana pakubatiswa.—Luk. 10:21.

13. Ana ni yindu yambone yapi yampaka tusangalale nayo pamasengo gakupanganya ŵakulijiganya atamose kuti tukusatanganidwa mnope?

¹³ Aklistu ŵajinji akusaŵa ŵakutanganidwa mnope. Nambope, jemanjaji akusapata ndaŵi jakutendesya majiganyo ga Baibulo, soni yeleyi yikusiyatendekasya kuŵa ŵakusangalala mnope. Alole cisyasyo ca mlongo jwine lina lyakwe Melanie jwa ku Alaska. Jwalakweju jwamsamalilaga jika mwanace jwakwe jwamkongwe jwa yaka 8. Jwalakweju jwakamulaga masengo soni kusamalila nangolo jwakwe jwaŵalwalaga kasa. Mu tawuni jaŵatamaga Melanie Jwamboni jwaliji jikape. Jwalakwe jwapopelaga kuti apate macili soni kwawula kukulalicila atamose kuti kwasisimaga, jwatendaga yeleyi kuti apate mundu jwakulijiganya najo Baibulo. Kaneko jwasimene ni Sara juŵasacililaga kumanyilila lina lisyesyene lya Mlungu. Mkupita kwa ndaŵi, Sara ŵakundile kuti alijiganyeje Baibulo. Melanie jwasasile kuti, “Lyamsano lililyose ligulo, napelaga mnope. Nambope une ni mwanace jwangu twaŵaga ŵakusangalala mnope ligongo lyakwawula kukutendakasya lijiganyo lya Baibulolyo. Twasangalalaga mnope kuwungunya kwanga kwa yiwusyo yaŵakolaga Sara. Twasangalelesoni kum’wona Sara ali aŵele mjakwe jwa Yehofa.” Mwakulimba mtima, Sara ŵapililaga yakusawusya yaŵasimanaga nayo. Jwalakwe ŵalesile dini jakwe kaneko ŵabatiswe.

LIGONGO CICI MASENGO GAKUPANGANYA ŴAKULIJIGANYA GAKUSASAKA KUWUSIMANA MTIMA?

14. (a) Ligongo cici masengo gakulalicila gali mpela gakuwulaga somba? (b) Ana maloŵe ga Paulo gagakusasimanikwa pa 2 Timoteo 4:1, 2, mpaka gatukamucisye camtuli?

¹⁴ Ngatukusosekwa kuleka kusosasosa ŵakulijiganya ŵa Yesu ligongo lyakuti ngatukupata ŵandu ŵakusaka kulijiganya. Tukumbucileje kuti Yesu jwawanicisye masengo gakupanganya ŵakulijiganya ni kuwulaga somba. Ŵakuwulaga somba mpaka akamule masengo kwandaŵi jelewu mkanawulaje somba jilijose. Ndaŵi syejinji jemanjaji akusakamula masengo cilo mnope mwinesoni kumasikusiku, soni pane akusasosekwa kwenda ulendo welewu panyasa. (Luk. 5:5) Mwakulandana ni yeleyi, ŵakulalicila ŵane akusamalila maawala gejinji ali mkulalicila m’malo gakulekanganalekangana soni pandaŵi jakulekanganalekangana. Ligongo cici akusatenda yeleyi? Akusatenda yeleyi kuti apate upile wakusimana ni ŵandu ŵajinji. Ŵandu ŵakusatenda yeleyi akusapocela upile mwakupata ŵandu ŵalung’wanu ŵakusaka kupikanila utenga wetu. Ana mpaka alinje kulalicila pandaŵi soni malo gampaka ŵasimane ŵandu ŵajinji?—Aŵalanje 2 Timoteo 4:1, 2.

15. Ligongo cici kutendesya majiganyo ga Baibulo kukusasaka kuwusimana mtima?

¹⁵ Ligongo cici kutendesya majiganyo ga Baibulo kukusasaka kuwusimana mtima? Ligongo limo lili lyakuti tukusasosekwa kutenda yejinji kupunda kwamba kumkamucisya mundu kumanyilila soni kuyinonyela yijiganyo ya m’Baibulo. Tukusasosekwasoni kumkamucisya jwakulijiganyajo kumanyilila soni kumnonyela mkulemba jwa Baibulo Yehofa. Kupwatika pelepa, tukusasosekwasoni kumjiganya jwakulijiganyajo kumanyilila yindu yakusasaka Yesu kuti ŵakumkuya ŵakwe atendeje. Nambosoni tukusasosekwa kumkamucisya mwampaka akamulicisye masengo yakusalijiganyayo. Tuŵejesoni ŵakuwusimana mtima patukumkamucisya jwakulijiganyajo kamulicisya masengo yiwundo ya m’Baibulo. Ŵandu ŵane akusakombola kucenga kaganisye soni ndamo syawo atamose kwa miyesi jamnono. Nambo kwa ŵane yikusajigala ndaŵi.

16. Ana tukulijiganya cici kutyocela pa yindu yayamtendecele Raúl?

¹⁶ Mmishonale jwine jwa ku Peru, jwasimene ni yakuyicisya yambone ligongo lya kuwusimana mtima. Jwalakwe jwatite, “Nalijiganyisye mabuku gaŵili ni jwamlume jwine lina lyakwe Raúl. Nambope, jwalakwe jwasimanagape ni yakusawusya yine paumi wakwe. Jwalakwe nganakamulanaga ni ŵamwiŵasa mwakwe soni jwanonyelaga kutukana, kupwatika pelepa ŵanace ŵakwe nganamcimbicisyaga. Jwalakwe jwayikaga kumisongano mwakutamilicika, m’yoyo napitilisye kumjawulila kukumkamucisya pampepe ni liŵasa lyakwe. Jwalakwe jwabatiswe pali papitile yaka yakupunda yitatu kutyocela patwasimene.

17. Ana mungani jakuyicisya tucilijiganya cici?

¹⁷ Yesu ŵatulamwile kuti ‘tujawule tukajiganye, ŵandu ŵangosyo syosope.’ Pakusaka kupikanila lilamusili, ndaŵi syejinji tukusaŵecetana ni ŵandu ŵele kaganisye kawo kali kakulekangana ni ketu. Kupwatika pelepa tukusaŵecetanasoni ni ŵandu ŵanganakola dini soni ŵangakusakulupilila yakuti kwana Mlungu. Mungani jakuyicisya tucilijiganya yampaka tutende kuti tulalicile ngani syambone kwa ŵandu ŵakulekanganalekangana.