LIJIGANYO 37
Yajikusasala Baibulo Pakwamba ya Masengo Soni Mbiya
Ana pakwete palasile nganisyo ligongo lya kusoŵa kwa masengo soni mbiya? Naga yili myoyo mpaka yiŵe yakusawusya kuti tupateje yakusosechela paumi wetu soni pandaŵi jijojo nikumtumichilaga Yehofa. Nambope Baibulo jikusasala yindu yampaka yitukamuchisye.
1. Ana Baibulo jikusasala yamtuli yakwamba masengo?
Mlungu akusasaka kuti tusangalaleje ni masengo getu. Baibulo jikusati, “Pangali chindu chine chambone champaka mundu akombole kutenda kupunda . . . kwikutila pamasengo gakwego.” (Jwakulalichila 2:24) Yehofa akusakamula masengo mwakulimbichila. M’wejisoni patukamula masengo mwakulimbichila, tukusamsangalasya jwalakwe soni tukusaŵa ŵakusangalala.
Masengo gali gakusosekwa. Nambo tukakunda kuti masengo gaŵeje gakusosekwa mnope kupunda kumlambila kwetu Mlungu. (Yohane 6:27) Jwalakwe akusatusimichisya kuti naga tukusakuwona kumtumichila jwalakwe kuŵa kwakusosekwa mnope, chachitukamuchisya pa yakusosechela yetu ya paumi.
2. Ana tukoleje nganisyo syamtuli pangani ja mbiya?
Atamose kuti Baibulo jikusatusalila kuti mbiya “sikusamchinjilichisya” mundu, nambope jikusatukalamusya kuti mbiyape nganisiŵa simkamuchisye mundu kuŵa jwakusangalala. (Jwakulalichila 7:12) Ni ligongo lyakwe ngatukusosekwa kunonyela mnope mbiya nambo ‘tujikutileje’ ni yatukwete. (Aŵalanje Ahebeli 13:5.) Patukuŵa ŵakwikutila, yikusatukamuchisya kuti tukalagaga ni kusosasosa yindu yejinji paumi wetu. Tukusaŵambala kongola mbiya mwachisawawa. (Misyungu 22:7) Tukusaŵambalasoni kutenda nawo juga soni kulingalinga kuti tusichile m’matala gakulemwecheka.
3. Ana tutendeje yamtuli kuti tuŵe ŵakoloŵa magasa ni mbiya syetu?
Yehofa ali Mlungu jwakoloŵa magasa, soni mpaka tumsyasyeje jwalakwe patukuŵa ‘ŵakoloŵa magasa ni ŵakunonyela kugaŵana yindu yetu ni achimjetu.’ (1 Timoteo 6:18) Patukuwukamuchisya mpingo ni mbiya syetu soni kwakamuchisya ŵane mnopemnope ŵakulupilila achimjetu, tukusalosya kuti tuli ŵakoloŵa magasa. Yehofa ngaŵa kuti akusagamba kusangalala ni winji wa yindu yampaka tupeleche, nambo akusasangalala mnope naga tukupeleka ni mtima wetu wosope. Myoyo patukupeleka ni mtima wetu wosope, tukusaŵa ŵakusangalala soni tukusamchimbichisya Yehofa.—Aŵalanje Masengo 20:35.
KULIJIGANYA YEJINJI
Chitulole umbone wakola nganisyo syambone pa masengo soni wakwikutila ni yindu yatukwete.
4. Yatukusatenda ku masengo yimchimbichisyeje Yehofa
Unasi wetu ni Yehofa, utukamuchisyeje kugawona masengo mwakuŵajilwa. Alolele FIDIYO, kaneko akambilane yiwusyo ayi.
Mu fidiyoji, ana asangalele ni chichi pa ndamo ja Jason soni muŵatendelaga yindu ku masengo?
Ana jwalakwe jwatesile uli kuti masengo gakasokonasya unasi wakwe ni Yehofa?
Aŵalanje Akolose 3:23, 24, kaneko akambilane chiwusyo achi:
Ligongo chichi tukusosekwa tugawoneje masengo mwakuŵajilwa?
Masengo gali gakusosekwa. Nambope tukagawonaga kuŵa gakusosekwa mnope kupundana ni kumtumichila Yehofa
5. Kuŵa ŵakwikutila kukusatukamuchisya
Ŵandu ŵajinji akusasisakula mnope mbiya. Nambo Baibulo jangatulimbikasyaga yeleyi. Aŵalanje 1 Timoteo 6:6-8, kaneko akambilane chiwusyo achi:
Ana Baibulo jikutulimbikasya kutenda chichi?
Mpaka tuŵe ŵakusangalala atamose tuli tukwete yindu yamnono. Alolele FIDIYO, kaneko akambilane chiwusyo achi.
Atamose kuti maŵasaga nganigakola mbiya syakwanila, ana ni chichi chachakamuchisye kuti gaŵe gakusangalala?
Nambi uli naga tukwete yindu yejinji paumi nambo nikusachililagasoni yine? Yesu jwasasile chiwanichisyo chikulosya kogoya kwakwe. Aŵalanje Luka 12:15-21, kaneko akambilane chiwusyo achi:
Ana akulijiganya yamtuli kutyochela ku chiwanichisyo cha Yesuchi?—Alole vesi 15.
Aŵalanje Misyungu 10:22 ni 1 Timoteo 6:10. Kaneko akambilane yiwusyo ayi:
Ana akuganisya kuti chindu chakusosekwa mnope chili kuŵa paunasi ni Yehofa kapena kola mbiya syejinji? Ligongo chichi?
Ana ni yakusawusya yapi yampaka yipagwe naga tukusisakula mnope mbiya?
6. Yehofa chachitupa yakusosechela yetu ya paumi
Yakusawusya ya pamasengo soni kusoŵa kwa mbiya mpaka yitukamuchisye kumanyilila naga tuli ŵakulupichika kwa Yehofa kapena iyayi. Alolele FIDIYO kuti amanyilile yampaka atende naga akusimana ni yakusawusya mpela yeleyi. Kaneko akambilane yiwusyo yakuyichisyayi.
Mu fidiyoji, ana ni yakusawusya yapi yaŵasimene nayo m’baleju?
Ana jwalakwe jwatesile yamtuli kuti akombole kumalana ni yakusawusyayo?
Aŵalanje Mateyu 6:25-34, kaneko akambilane chiwusyo achi:
Ana Yehofa akwasimichisya yamtuli ŵandu ŵakusakuwona kumtumichila jwalakwe kuŵa kwakusosekwa mnope?
YAKUSAŴECHETA ŴANDU ŴANE: “Ngusosekwa kukamula masengo mwakulimbichila kuti nalikamuchisyeje liŵasa lyangu. Nganimba ngombwele kwawulaga kumisongano wiki jilijose.”
Ana ni lilemba lyapi lyalikwasimichisya kuti kutumichila Yehofa kuli kwakusosekwa mnope kupunda chilichose?
YALIJIGANYISYE
Kukamula masengo soni mbiya yili yakusosekwa, nambo yeleyi yikatusokonasyaga kumtumichila Yehofa.
Yiwusyo Yakuwilisya
Ana ni chichi champaka chakamuchisye kola nganisyo syakuŵajilwa pangani ja mbiya?
Ana kuŵa ŵakwikutila kukusatukamuchisya chamtuli?
Ana mpaka alosye chamtuli kuti akusakulupilila yasasile Yehofa kuti chachakamuchisya ŵandu ŵakwe?
YAKULINGA YINESONI
Awungunye naga Baibulo jikusasala kuti mbiya sili syakulemwecheka.
“Ana Mbiya Uli Mchiga Wayakusakala Yosope?” (Ngani ja pa intaneti)
Alole yampaka tutende kuti tumsangalasyeje Mlungu ni mbiya syetu.
“Ana Baibulo Jikusasala Yamtuli Pangani ja Kupeleka?” (Ngani ja pa Intaneti)
Ana kuchesa juga kuli kwakulemwecheka?
“Yajikusasala Baibulo Pangani ja Kuchesa Juga” (Ajimuche!, Malichi 2015)
Alole yayamkamuchisye mundu juŵachesaga juga soni kwiŵa kuchenga umi wakwe.
“Nanonyelaga Ung’asi Wakwela Mahachi” (Sanja ja Mlonda, Nofemba 1, 2011)