Yiwusyo Yakutyocela Kwa Ŵakuŵalanga

Ligongo cici acimmagongo ŵa Yesu ŵajiwonaga ngani ja kunaŵa m’myala kuŵa jekulungwa?

Cilamusi ca Mose casalaga yayamtendekasyaga mundu kuti akaŵa jwamswela. Mwambone casalaga yakwayana ni kwasa miyasi, matana, mundu jwam’we soni cinyama cewe. Casalagasoni yaŵasosekwaga mundu kutenda kuti aŵesoni jwamswela. Ŵatendaga yeleyi mwa kupeleka mbopesi, koga kapena kumisa miyasi.—Lev., mtwe 11-15; Num., mtwe 19.

Acimlongola Ŵaciyuda ŵajonjecesye malamusi gawo pa malamusi gagapali kala. Mwambone, buku jine jikusasala kuti acimlongolaŵa ŵajonjecesye malamusi gakusala yampaka yimtendekasye mundu kuti akaŵa jwamswela kapena kuti aŵe jwamswela soni mwampaka ŵatendekasye ŵane kuti akaŵa ŵaswela. Ŵasalagasoni ya yindu yaŵakamulicisyaga masengo yayamtendekasyaga mundu kuti aŵe jwamswela kapena iyayi, soni misyungu jaŵasosekwaga kuya kuti aŵesoni jwamswela.

Acimmagongo ŵa Yesu ŵam’wusisye kuti, “Ligongo cici ŵakumkuya ŵenu ngakusakuya misyungu ja acinangolo ŵakala, nambo akwamba kulya m’myala muli mwakusakala?” (Maliko 7:5) Acimlongolaŵa pakuŵeceta maloŵe gelega, nganagopolelaga kuti mpaka uŵe ungali casa naga mundu akulya m’myala muli mwakusakala. Nambo acimmagongoŵa ŵaliji ali aŵisile lilamusi lyakuti mundu mkanatande kulya ŵasosekwaga kunaŵa mwakumjitilila mesi. Buku jatujikolasile jila jajonjecesyesoni kuti, “acimlongolaŵa ŵasisyanaga mnope ya yindu yaŵasosekwaga kamulicisya masengo pa kumjitilila mundu jwakusaka kunaŵa m’myala, mesi gagaliji gambone kamulicisya masengo, ŵaŵasosekwaga kumjitilila mundu soni mwaŵasosekwaga kupelela pakunaŵa.”

Ana Yesu ŵajanjile catuli ŵandu ŵaŵaŵisile malamusi gawogawopeŵa. Jwalakwe ŵasalile acimlongola Ŵaciyudaŵa kuti, “Yesaya ŵalocesye yakwamba jemanja ŵawulamba, mpela mwayilembedwele kuti, ‘Ŵandu ŵeleŵa akusagamba kunjimbicisya ni pakamwape nambo mitima jawo jili kwakutalikangana ni une [Yehofa]. Kundindiŵalila kwawo kuli kwangali mate ligongo akusajiganya malamusi ga ŵandu mpela kuti akwiganya yijiganyo ya Mlungu.’ Jemanja mkusaleka kwiganya malamusi ga Mlungu ni mkusimnyambatila misyungu ja ŵandu.”—Maliko 7:6-8.