Ana Baibulo Jikusasala Yamtuli Pakwamba Yakuŵecheta Malilime?
Yajikusasala Baibulo
Patukusala ya “kuŵecheta yiŵecheto ya chilendo [‘malilime,’ NWT]” tukwamba yaŵatendaga Aklistu ŵane ŵandanda. Jemanjaji mwakusimonjesya, ŵakombolaga kuŵecheta chiŵecheto chine mwangadalila kulijiganya chiŵechetocho. (Masengo 10:46) Aklistuŵa paŵatendaga yeleyi ŵandu ŵapikanaga mwangasawusya m’chiŵecheto chawo. (Masengo 2:4-8) Mlungu kupitila mwa msimu wakwe ŵapele Aklistu ŵandandaŵa upile wakuŵecheta yiŵecheto yine.—Ahebeli 2:4; 1 Akolinto 12:4, 30.
Ana kuŵecheta malilime kwaliji kwakuti kuchipitilila mpaka kalakala?
Ana Mlungu akusiŵakamuchisya ŵandu kuŵecheta malilime masiku agano?
Ana kuŵecheta malilime kwatandile kwapi soni chakachi?
Kuŵecheta malilime kwatandile ku Yelusalemu pa chisangalalo cha Ayuda cha Pentekosite m’chaka cha 33 C.E. Pandaŵiji ŵakulijiganya ŵa Yesu ŵakwana 120 ŵasongene pamo, kaneko ‘wosopewo ŵapochele msimu weswela ni ŵatandite kuŵecheta yiŵecheto yachilendo.’ (Masengo 1:15; 2:1-4) Gulu jekulungwa ja ŵandu “ŵakutyochela myilambo yakulekanganalekangana pachilambo chosope chapasi” ŵayiche soni “jwalijose jwapikene ŵakulupililawo ali mkuŵecheta chiŵecheto chakwe.”—Masengo 2:5, 6.
Ana ligongo chichi ŵandu ŵaŵechetaga malilime?
Kwalosyaga kuti Mlungu akuwujitichisya mpingo wa Chiklistu. Kalakala ŵakutumichila ŵa Mlungu mpela Mose, ŵakwete upile wakutenda yakusimonjesya. Mlungu jwapaga machili gelega pakusaka kusimichisya kuti akwakamulichisya masengo. (Ekisodo 4: 1-9, 29-31; Numeli 17:10) Myoyosoni mpingo wa Chiklistu pawapagwile Mlungu jwakamuchisyaga Aklistu pakwapa machili ga kuŵecheta malilime, yayalosyaga kuti Mlungu akwajitichisya jemanjajo. Paulo jwalembile kuti, “Kuŵecheta mu chiŵecheto chachilendo, chili chimanyisyo kwa ŵandu ŵangakulupilila, ngaŵa kwa ŵandu ŵakulupilila.”—1 Akolinto 14:22.
Kuti kwakamuchisye Aklistu kutendela umboni mwakwanila. Ŵandu ŵaŵapikanaga ŵakumkuya ŵa Yesu ali mkuŵecheta malilime pa Pentekosite ŵatite, ‘Tukwapikana ali mkuŵecheta m’yiŵecheto yetu pakwamba ya masengo gamakulungwa gatesile Mlungu.’ (Masengo 2:11) Myoyo chakulinga chine cha Mlungu pakwakunda Aklistu kuti aŵecheteje malilime chaliji chakuti, “atendeleje umboni” soni kuti “ŵajiganye ŵandu ŵamitundu josope kuti aŵe ŵakulijiganya” mpela muŵalamulile Yesu. (Masengo 10:42; Mateyu 28:19, NWT) Myoyo palisikuli ŵandu ŵakwana 3,000 ŵaŵayiweni yakusimonjesyayi soni ŵaŵapikanile utengawo, ŵaŵele ŵakulijiganya.—Masengo 2:41.
Ana kuŵecheta malilime kwaliji kwakuti kuchipitilila mpaka kalakala?
Iyayi, ligongo Baibulo jasasile kala kuti kuŵecheta malilime soni yakusimonjesya yine yaŵatendaga Aklistu yaliji yakuti yichimala. Jatite, “kulochesya tikuchimala, kuŵecheta yiŵecheto yachilendo tikuchimala.”—1 Akolinto 13:8.
Ana kuŵecheta malilime kwamasile chakachi?
Mlungu kupitila mwa ŵandumetume, ŵapaga Aklistu ŵane machili gakutendela yakusimonjesya. Ŵandumetumeŵa ŵatendaga yeleyi mwakwasajika Aklistuwo makono. (Masengo 8:18; 10:44-46) Yikuwoneka kuti ŵandu ŵaŵapochele machili kupitila mwa ŵandumetumeŵa, nganakolasoni upile wakwakamuchisya ŵane kuti akole machiligo. (Masengo 8:5-7, 14-17) Mwachisyasyo, ŵa boma akwete udindo wakupeleka layisesi ja galimoto kwa mundu nambo mundujo nganakola udindo wakutenda yeleyi. Myoyo, yikuwoneka kuti kuŵecheta malilime kwamasile panyuma pakuti ŵandumetume soni ŵandu ŵane ŵaŵapochele machili kutyochela kwa ŵandumetumewo awile.
Ana Mlungu akusiŵakamuchisya ŵandu kuŵecheta malilime masiku agano?
Yikuwoneka kuti upile wakuŵecheta malilime wamasile chakumbesi kwa yaka 100 ya Aklistu ŵandanda. Myoyo masiku agano, Mlungu nganaŵa amkamuchisye mundu kuti aŵecheteje malilime.
Ana Aklistu ŵasyesyene mpaka twamanyilile mwamtuli?
Yesu jwasasile kuti tuchamanyilila ŵakumkuya ŵakwe ligongo lya ndamo ja chikondi. (Yohane 13:34, 35) Nombenajo ndumetume Paulo jwasasile kuti tuchamanyilila Aklistu ŵasyesyene ligongo lya chikondi. (1 Akolinto 13:1, 8) Jwalakwe jwasasilesoni kuti “msimu wa Mlungu” wuchakamuchisya Aklistu kulosya ndamo syele msimu weswela ukusakoposya. Ndamo jandanda pa ndamo syelesi jili chikondi. —Agalatiya 5:22, 23.