Ana Satana Akusawoneka Mwamtuli?

Kwanga kwakutyochela m’Baibulo

Satana ali chakupanganyikwa cha usimu changawoneka ni meso.—Aefeso 6:11, 12.

Ndaŵi syejinji ŵandu akusamjambula Satana ali mkuwoneka mpela mbusi jajikwete misengo, mchila soni ali ajigele chindu chakuwoneka mpela fosholo myala mwakwe. Ŵandu ŵane akusaganisya kuti chakwambulidwachi chajambulidwe ni ŵandu ŵakumanyilila yakwambula ŵaŵatemi m’yaka 1000 yipiteyo. Ŵakwambula ŵamasiku agano akusamjambula Satana pakujigalila muŵajambulile ŵandu ŵakalakalawo.

Ana Baibulo jikusamlondesya chamtuli Satana?

Baibulo jikusamlondesya Satana m’matala gakulekanganalekangana. Yeleyi yikusatukamuchisya kumanyilila ndamo syakwe ngaŵaga uwoneche wakwe. Yine mwa yindu yakusamanyika nayo yili yakuyichisyayi:

Ali mpela lilayika lya lilanguka. Jwalakwe akusalitendekasya mpela mundu jwambone jwakusaka kwakamuchisya ŵandu. Nambo akusatenda yeleyi ni chakulinga chakuti ŵandu amkuyeje jwalakwe ngaŵaga Mlungu.—2 Akolinto 11:14.
Lisimba lyakubangula. Jwalakwe akusiŵajimuchilaga ŵakutumichila ŵa Mlungu.—1 Petulo 5:8.
Chingwena chekulungwa. Jwalakwe ali jwakogoya, jwamachili soni jwakonanga.—Chiwunukuko 12:9.

Mafesi ga m’Baibulo gagakusasala ya Satana

2 Akolinto 11:14: “Satana msyene akulilandanya jika kuti awoneche mpela lilayika lya lilanguka.”

Yayikugopolela: Satana akusalolosya mpelaga mundu jwambone pakusaka kwanyenjelela ŵandu kuti atendeje yakusaka yakwe ngaŵaga ya Mlungu.
Aefeso 6:11: “M’wale yida yosope yakumpa Mlungu, kuti mpakombole kulimbana ni kalamuka kwa Satana.”

Yayikugopolela: Satana mwakalamuka akusiŵatendekasyaga ŵandu kuti akampikanilaga Mlungu.
Yakobo 4:7: “Mlipelecheje kwa Mlungu. Mumkaneje Satana nipo tachimtila.”

Yayigopolela: Mundu mpaka akombole kulimbana ni Satana naga akusampikanila Mlungu.
1 Petulo 5:8: “M’magongo jwenu Satana akusaŵa ali mkwendajenda aku nakuku mpela lisimba lyakumbangula, kupita mchisosa jwakuti amlye.”

Yayigopelela: Satana akusaŵengana ni ŵandu ŵakusampikanila Mlungu soni jwalakwe akusiŵasokonasya kuti akaŵa paunasi wambone ni Mlungu.