Akalekangana Najo Gulu ja Yehofa

JWAKULIJIGANYA Yakobo ŵalembile kuti, “Mwaŵandichile Mlungu, nipo Ŵalakwe tachimŵandichila jemanja.” (Yak. 4:8) Atamose kuti tuli ŵangali umlama, Yehofa ngaŵa kuti ali jwapenani mnope kapena kuti ali kwakutalichila mnope mwamti ngaŵa mkutupikana patukuŵecheta najo. (Mase. 17:27) Ana mpaka tumŵandichile Mlungu chamtuli? Mpaka tutende yeleyi mwakusya unasi wetu ni Yehofa, yayikusapwatikapo kuŵechetana najo mwakutyochela pasi pa mtima mwipopelo. (Sal. 39:12) Mpaka tukusyesoni unasi wetu ni Mlungu patukulijiganya mwakutamilichika Maloŵe gakwe Baibulo. Patukutenda yeleyi, tukusammanyilila Yehofa Mlungu, chakulinga chakwe, soni yakusasaka kwetuwe. (2 Tim. 3:16, 17) Yeleyi yikusatukamuchisya kuti tumnonyeleje, soni kuti tukoleje woga wakuŵajilwa mwakuŵambala kutenda yindu yakumsakalisya.—Sal. 25:14.

² Kuŵa pa unasi ni Yehofa kukusakomboleka kupitila mwa Mwanagwe, Yesu. (Yoh. 17:3; Alo. 5:10) Pangali mundu jwakakombwele kutukamuchisya kuti tumanyilile chenene nganisyo sya Yehofa kupunda muŵatendele Yesu. Jwalakwe ŵaliji pa unasi wakulimba ni Atatigwe mwamti ŵasasile kuti, “Ŵelewo ni ŵakwamanyilila Mwanache. Ŵanesoni ŵakwamanyilila Atati ali Mwanache. Nambo Mwanache akusaka kwasalila ŵandu ŵane kwambaga ya Atati, kuti nombenawo jemanjajo ŵamanyilile ŵelewo.” (Luk. 10:22) Myoyo patukulijiganya yagakusasala mabuku ga ngani syambone pakwamba ya muŵaganichisyaga soni kupikanila mumtima Yesu, yikusatukamuchisya kumanyilila mwakusaganichisya soni kupikanila mumtima Yehofa. Kumanyilila yeleyi kukusatukamuchisya kuti tum’ŵandichile Mlungu.

³ Mwakulongoleledwa ni Mwanache jwa Mlungu, tukusakusya unasi wetu ni Yehofa mwakwendela yalumo ni gulu ja Yehofa jakuwoneka ni meso. Guluji jikusatukamuchisya kumanyilila mwampaka tutendele chakulinga cha Mlungu. Mwakamulana ni yaŵasasile pa Mateyu 24:45-47, Ambuje ŵali Yesu Klistu, ŵaŵisile ‘Kapolo jwakulupichika ni jwalunda’ kuti ŵagaŵileje ŵa m’nyumba jakwe “yakulya yawo pandaŵi jakwe.” Masiku agano kapolo jwakulupichikaju akutugaŵila yakulya yausimu yejinji. Kupitila mwa kapoloju, Yehofa akusatulimbikasya kuŵalanga Maloŵe gakwe lisiku lililyose, kusimanikwaga pamisongano jetu jampingo mwakutamilichika, soni kamulaga nawo mwakulimbichila masengo gakulalichila “ngani syambone syakwamba ya Uchimwene.” (Mat. 24:14; 28:19, 20; Yos. 1:8; Sal. 1:1-3) Ngatukusosekwa kumwonaga ni nganisyo sya umundu kapolo jwakulupichikaju. Tukusosekwa kulinjilila mwakulimbichila kuti tukalekangana ni gulu ja Yehofa jakuwoneka ni meso, soni tupikanileje yajikutusalila. Kutenda yeleyi kuchitukamuchisya kuŵa pa unasi wakulimba ni Mlungu jwetu Yehofa, soni kuchitulimbikasya ni kutuchenjela patusimene ni yakulingwa.

LIGONGO CHICHI YAKULINGWA YIKUTUPA?

⁴ Komboleka kuti atemi mu usyesyene kwa yaka yejinji. Naga yili myoyo, mwangakayichila akusamanyilila mwakukusaŵela kupilila yakulingwa. Nambo atamose kuti ammanyi Yehofa pachangakaŵa, soni atandite sampano kusongana ni ŵandu ŵakwe, mwangakayichila akumanyilila kuti Satana akusasisya jwalijose jwakusapikanila ulamusi wekulungwa wa Yehofa. (2 Tim. 3:12) Myoyo yangali kandu kuti aŵele ali mkupilila kwandaŵi jelewu chamtuli, nambo chakusosekwa mnope ni chakuti akajogopa kapena kutenguka. Yehofa akwasimichisya kuti chiŵakamuchisye, soni chachakulupusya ni kwapa mbote ja umi.—Ahe. 13:5, 6; Chiw. 2:10.

⁵ Wosopewe komboleka kusimana ni yakulingwa m’chilambo cha Satana chachisigele panandi kumalachi. Chitamilikachisye Uchimwene wa Mlungu mu 1914, Satana ngakusamkundasoni kwawula kwinani kwali Yehofa. Jwalakwe ŵamponyisye pachilambo chapasi, kwele jwalakwe yalumo ni malayika gakwe gakusakala akusunjidwako. Kutupa kwa yakusawusya pachilambo chapasi, yayikupwatikapo kulagasidwa mnope kwa ŵakutumichila ŵalipeleche ŵa Yehofa, kukulosya kuti Satana atumbile soni uli umboni wakuti tukutama m’masiku gambesi ga ulamusi wakwe pa ŵandu.—Chiw. 12:1-12.

⁶ Ligongo lyakuti Satana akumanyilila kuti ndaŵi jimsigalile panandi, jwalakwe ali jwakutumbila mnope ni ndamo jakutesya sooni jali. Jwalakwe yalumo ni malayika gakwe akulingalinga mwamachili kusokonasya masengo gakulalichila ya Uchimwene, soni konanga mkamulano wa ŵakutumichila ŵa Yehofa. Myoyo tukusaŵa pangondo jausimu ‘jangatukulimbana ni ŵandupe iyayi. Nambotu tukulimbana ni mauchimwene, ŵakulamulila ni machili ga chipi ga chilambo chapasi chino, nipo soni ni misimu jakusakala ja mwinani.’ Kuti tupunde ngondoji tuli kumbalipe ja Yehofa, ngatukusosekwa kupela nambo tupitilisye kuwala yida yausimu. Tukusosekwa “kulimbana ni kalamuka kwa Satana.” (Aef. 6:10-17) Kuti yeleyi yikomboleche tukusosekwa kuŵa ŵakupilila.

TUKUSYEJE NDAMO JAKUPILILA

⁷ Kupilila kukusagopolela “kupakombola kulimbana ni yakusawusya kapena yipwetesi.” Mwausimu, kupilila kuli ndamo jakuŵa jwakulimbangana pakutenda yayili yakuŵajilwa pawusimene ni yakusawusya, ŵakusisya, ŵangalwe, kapena yindu yiliyose yakukutendekasya kuti ukaŵa jwakulupichika kwa Mlungu. Aklistu akusosekwa kuti akusyeje ndamo ja kupilila. Pakusajigala ndaŵi kuti tukusye ndamoji. Patukwawula pasogolo mwausimu ni patukusapakombola kusya kupilila kwetu. Naga tukupilila yakulingwa yamwanamwana yayikusayika patutandite kwene kwenda pa litala lya Chiklistu, tukusaŵa ŵakulimbangana soni mpaka tukombole kupilila yakulingwa yakusawusya yampaka tusimane nayo kusogolo. (Luk. 16:10) Yili yangakomboleka kulindilila kuti tuchiŵa ŵakulimbangana m’chikulupi pandaŵi jatusimene ni yakulingwa yekulungwa. Tukusosekwa kuŵa ŵakoseka kumalana ni chakulingwa mkanichiyiche. Pakusaka kulosya kuti patukukusya ndamo jakupilila tukusosekwasoni kusya ndamo sine sya Mlungu, ndumetume Petulo ŵalembile kuti, “Mtende yakomboleka kuti mjonjechesye utame wambone pa chikulupi chenu, ni lunda lusyesyene pa ndamo syenu syambonesyo. Mjonjechesyepo kuligosa pa lunda lwenulo, kulimbichila pa kuligosa kwenu, nambosoni kulambila Mlungu pa kulimbichila kwenuko. Pakumlambilapo mjonjechesyepo chanasa cha pa achanasi, nipo pa chanasa cha pa achanasicho mjonjechesyepo chinonyelo.”—2 Pet. 1:5-7; 1 Tim. 6:11.

⁸ Yaŵalembile Yakobo m’chikalata chakwe yikutukamuchisya kumanyilila kusosekwa kwa kupilila. Jwalakwe ŵalembile kuti, “Achalongo achimjangu m’ŵeje ŵakusengwa pimkusimangana ni yakulingwa yejinji, ligongo mkumanyilila kuti kulinjikwa kwa chikulupi chenu kukusamtendekasya kuŵa ŵakupilila. Nambo kupimilila kweleku, kukamuleje masengo gakwe ndaŵi syosope, kuti jemanja msimanikwe mli ŵangali ulemwa soni chakumsisya nacho chilichose, soni kuti, mŵe ŵangapelembela mu yiliyose.” (Yak. 1:2-4) Yakobo ŵasasile kuti Aklistu akusosekwa kuŵa ŵakusangalala pasimene ni yakulingwa ligongo yikusakamuchisya kuti apilileje. Ana wawojo akusayiwona yakulingwa mwalitala lyeleli? Kaneko Yakobo ŵalosisye kuti kupilila kukusakamuchisya kuti tukole umundu wambone wa Chiklistu, yayikusatendekasya kuti Mlungu atujitichisye. Myoyo, kupilila kukusakulaga naga tukumalana ni yakulingwa yatukusasimana nayo lisiku lililyose. Yakuyichisya yakwe yikusaŵa yakuti, kupilila kukusatutendekasya kola ndamo sine syambone syatukusasosechela.

⁹ Kupilila kwetu kukusamsangalasya Yehofa, soni kuchimtendekasya kuti atupe mbote ja umi wangamala. Yakobo ŵasasilesoni kuti, “Jwana upile mundu jwakusapimilila ali mkulinjidwa, ligongo naga apundile tachipochela umi, jeleji jili mbote ja chilanga cha Mlungu kwa ŵandu wosope ŵakusamnonyela.” (Yak. 1:12) Tukusapilila pakuganichisya ya umi watuchipochela msogolo. Ngakomboleka kuŵa mu usyesyene naga ngatukupilila. Naga yakusawusya ya m’chilambochi yikutugomeka, yichiŵa yangasawusya kuti tuwujile kuchilambo chakusakalachi. Naga ngatukupilila, ngasitupitilisya kola msimu wa Yehofa, myoyo ndamo syawukusakoposya msimuwo ngasisiwonechela pa umi wetu.

¹⁰ Kuti tupitilisye kupilila mundaŵi jakusawusyaji, m’weji mpela Aklistu tukusosekwa kolaga nganisyo syakuŵajilwa patukusimana ni yipwetesi. Tukumbuchileje yaŵalembile Yakobo kuti, “Mŵeje ŵakusengwa kapena kuti ŵakusangalala.” Kusangalala pa yipwetesi kuli kwakusawusya, mnopemnope naga tukulaga mwakuchilu kapena tukulagasika nganisyo. Nambo tukumbuchileje kuti naga ngasamala mpaka tulepele kuja kupochela umi msogolo. Yayatendechele ŵandumetume mpaka yitukamuchisye kumanyilila mwampaka tusangalalileje patuli pa yipwetesi. Nganiji jikusasimanikwa m’buku ja Masengo, ni jikusati, “Ŵaŵilasile ŵandumetumewo. Ŵaputile, ni ŵalekasisye kuti akasaŵechetasoni m’lina lya Yesu, nipo ŵakundile kuti ajawuleje. Ŵandumetumewo ŵatyosile ku nganyako ali mkusangalala kuti Mlungu ŵatesile aŵe ŵakwenela kunyosyedwa kwa ligongo lya lina lya Yesu.” (Mase. 5:40, 41) Ŵandumetume ŵayimanyi kuti yipwetesi yaŵasimanaga nayo yaliji umboni wakusimichisya kuti ŵapikanilaga yaŵalamwile Yesu, soni kuti Yehofa ŵajitichisyaga. Pali papite yaka, m’chikalata chakwe chandanda, Petulo ŵatajile mang’ombe pakwamba ya kusosekwa kwa kusimana ni yipwetesi ligongo lya chilungamo.—1 Pet. 4:12-16.

¹¹ Ŵane ŵaŵasimene ni yipwetesi ŵaliji Paulo ni Sila. Paŵakamulaga masengo gawo ga umishonale ku Filipi, ŵataŵile soni kwajimba magambo gakuti ŵasokonasyaga ŵandu mumsindawo soni ŵalalichilaga misyungu jangakundidwa. Yakuyichisya yakwe yaliji yakuti ŵaputile mnope soni ŵaponyisye m’nyumba ja akayidi. Baibulo jikusasala kuti paŵaliji chiŵela m’nyumba ja akayidijo ali maŵangaŵangape, “pasikati chilo, Paulo ni Sila ŵaliji mkupopela soni kwimbaga nyimbo syakumlumba Mlungu, nipo akayidi ŵane ŵaliji mkwapikanila.” (Mase. 16:16-25) Paulo ni mjakweju ŵayiwonaga mwakuŵajilwa yipwetesi yaŵasimanaga nayo ligongo lya Klistu. Jemanjaji nganayiwonagape yipwetesi mpela litala lyakulosya kuti ali ŵakulupichika kwa Mlungu ni ŵandu, nambosoni mpela litala lyakutendela umboni kwa ŵandu ŵampaka asache kupikanila ngani syambone. Jemanjaji ŵayimanyi kuti umi wa ŵane waliji pangosi. Chilo chichocho, jwakulolela akayidi ni liŵasa lyakwe ŵapikanile utenga ni ŵaŵele ŵakulijiganya. (Mase. 16:26-34) Paulo ni Sila ŵakulupilile Yehofa, machili gakwe, soni kusachilila kwakwe kwakamuchisya paŵaliji payipwetesi. Jemanjaji nganatenguka ni yipwetesiyi.

¹² Masiku aganosoni, Yehofa atupele yindu yakutukamuchisya kupilila patukulingwa. Jwalakwe akusaka tupilileje yipwetesi. Atupele Maloŵe gakwe kuti gatukamuchisyeje kumanyilila chenene yakwamba chakulinga chakwe. Yeleyi yikusalimbikasya chikulupi chetu. Tukwetesoni upile wakusongana ni ŵakulupilila achimjetu kuti tulijiganye Maloŵe ga Mlungu, soni kutumichila nawo Mlungu. Tukusakolasoni upile wakulimbikasya unasi wetu ni Yehofa kupitila mwipopelo. Jwalakwe akusatupikanila patukumlumba soni patukumŵenda kutyochela pasi pa mtima kuti atukamuchisye kupitilisya kola ndamo syambone pameso pakwe. (Afi. 4:13) Tukaliŵalilasoni kuti kuganichisya ya chembecheyo chatukwete kukusatulimbikasya.—Mat. 24:13; Ahe. 6:18; Chiw. 21:1-4.

KUPILILA YAKULINGWA YAKULEKANGANALEKANGANA

¹³ Yakulingwa yatukusimana nayo masiku agano yili yakulandana ni yaŵasimanaga nayo ŵakulijiganya ŵandanda ŵa Yesu Klistu. Masiku agano, ŵandu ŵakusisya ŵangamanyilila yisyesyene aŵele ali mkusilagasya Mboni sya Yehofa mwakusiŵechetela yachipongwe soni kusiputa. Mpela muyaŵelele m’masiku ga ŵandumetume, ndaŵi syejinji ŵadini ni ŵakusatandisya kusisyaku. Jemanjaji akusatenda yeleyi ligongo lyakuti Maloŵe ga Mlungu gakusalosya kuti yijiganyo soni yitendo yawo yili yaunami. (Mase. 17:5-9, 13) Ndaŵi sine, Mboni sya Yehofa sikusakataga yisamani ku luŵala lwa magambo pakusaka kuti sikole ufulu wawukusapelechedwa ni maboma. (Mase. 22:25; 25:11) Nambope ndaŵi sine, ŵakulamulila akusalekasyaga masengo getu gakulalichila pakusaka kuti gamale. (Sal. 2:1-3) Muyakutendekwa yeleyi, tukusakuya mwakulimba mtima chisyasyo cha ŵandumetume ŵakulupichika, ŵaŵaŵechete kuti, “Tukwenela kumpikanila Mlungu kupunda kupikanila mundu.”—Mase. 5:29.

¹⁴ Ligongo lyakutupilatupila kwa msimu wakunonyela chilambo chakwe, ŵakulalichila ngani syambone akusiŵakanganichisya kuti aleche masengo gaŵapele Mlunguga. Ŵakutumichila Mlungu wosope akusamanyilila chenene yalikusakalamusya lilemba lya Chiwunukuko 14:9-12 pakwamba ya kulambila “chilombo ni chiwanichisyo chakwe.” Tukusamanyilila kusosekwa kwa maloŵe ga Yohane gakuti, ‘Pelepa pakusosekwa kuti ŵandu ŵa Mlungu aŵe ŵakupilila, ŵele ŵakugakuya malamusi gakwe nipo soni ŵakwete chikulupi mwa Yesu.’

¹⁵ Yakulingwa yayikusayika ligongo lya ngondo, kusaka kuti yindu yichenje m’chilambo, kapena kwamba kutujimuchila kwene, soni kutulekasya masengo getu, mpaka yitendekasye kuti tukakombolaga kulambila mwagopoka. Mpaka tulepeleje kusongana pampepe mpela mpingo, mpaka paŵe pangali matala gakuŵechetanilana ni ofesi ja nyambi, maulendo ga jwakulolela dela mpaka gasokonechele soni mabuku mpaka galepelechekweje kwika. Ana akusosekwa kutenda chichi naga yeleyi yikutendekwa?

¹⁶ Akusosekwa kutenda yiliyose yampaka yakamuchisye mundamo jalijo. Komboleka kutendaga lijiganyo lyapajika. Ŵandu mpaka alijiganyeje m’tumagulu twamwana mnyumba sya abale. Mpaka akamulichisyeje masengo mabuku gatwalijiganyisye kala, soni Baibulo pamisongano. Nambo ngakusosekwa kudandawula mnope. Mwangachelewa, Likuga Lyakulongolela lichipata litala lyakuti liŵechetaneje ni abale ŵali pa udindo.

¹⁷ Atamose yili yitendekwe kuti alekangene ni abale ŵawo ŵa Chiklistu, nambo akaliŵalila kuti nganalekangana ni Yehofa soni Mwanagwe, Yesu Klistu. Chembecheyo chawo mpaka chipitilisye kuŵa chakulimba. Yehofa mpaka apikaneje mapopelo gawo, soni ni msimu wakwe mpaka ŵakamuchisye kuŵa ŵakulimbangana. Amŵende jwalakwe kuti ŵalongolele. Akumbuchile kuti wawojo ali jwakutumichila jwa Yehofa soni jwakulijiganya jwa Yesu Klistu. Myoyo akamulichisyeje masengo mwakuŵajilwa mapesa gakulalichilila. Yehofa chachijaliwa kulimbichila kwawo, soni mwangakaŵa ŵane mpaka atande kulambila kusyesyene.—Mase. 4:13-31; 5:27-42; Afi. 1:27-30; 4:6, 7; 2 Tim. 4:16-18.

¹⁸ Mwakulandana ni ŵandumetume, soni ŵakutumichila ŵakulupichika ŵane, naga yiyikene pakuti mpaka ajase umi, aŵicheje chikulupi chawo pa “Mlungu jwakusajimusya ŵawe.” (2 Akoli. 1:8-10) Chikulupi chawo chakwamba kwimuka kwa ŵawe mpaka chakamuchisye kupilila atamose pakwasisya mnope. (Luk. 21:19) Klistu Yesu ŵapeleche chisyasyo panganiji. Jwalakwe ŵamanyililaga kuti kulupichika kwakwe pandaŵi jakusimana ni yakulingwa mpaka kulimbikasye ŵane kupilila. Wawojosoni komboleka kwalimbikasya Aklistu achimjawo mpela muŵatendele Yesu.—Yoh. 16:33; Ahe. 12:2, 3; 1 Pet. 2:21.

¹⁹ Konjechesya pa kulagasidwa soni kwasisya, panasoni yakusawusya yine yakusosekwa kupilila. Mwambone, ŵane ayikene pakutenguka ligongo lya ungakola chidwi cha ŵandu ŵa mu dela mwawo. Soni ŵane akulimbana ni ulwele kapena kulagasika nganisyo, soni yakulepela yayikusayikaga ligongo lya ungali umlama. Ndumetume Paulo ŵasosekwagasoni kupilila chakulinga chachasokonasyaga utumiki wakwe. (2 Akoli. 12:7) Epafulodito, Mklistu jwa m’yaka 100 yandanda jwa ku Filipi, ‘jwalagasiche mu mtima pakumanyilila kuti [achimjakwe] ŵapikene kuti jwalakwejo akulwala.’ (Afi. 2:25-27) Yakulemwa yetu soni ya ŵane mpaka yitendekasye yakusawusya yine yampaka tulajilile kuyipilila. Mpaka paŵe yakusawusya ligongo lya kulekangana umundu wetu ni ŵakulupilila achimjetu kapena ŵa m’liŵasa lyetu. Nambo yakusawusyayi mpaka tukombole kuyipilila soni kumalana nayo naga tukukuya yagakusatusalila Maloŵe ga Yehofa.—Esek. 2:3-5; 1 Akoli. 9:27; 13:8; Akolo. 3:12-14; 1 Pet. 4:8.

TUSIMICHISYE MTIMA KUTI TUŴE ŴAKULUPICHIKA

²⁰ Tukusosekwa kumkulupilila Yesu Klistu juŵasagulidwe ni Yehofa kuŵa Mtwe wa mpingo. (Akolo. 2:18, 19) Tukusosekwa tukamulileje masengo yalumo ni ‘kapolo jwakulupichika ni jwalunda’ soni wosope ŵasagulidwe kuŵa ŵakulolela. (Ahe. 13:7, 17) Naga tukutenda yindu mwakamulana ni yalinganyisye Mlungu soni kamulana ni wosope ŵakulongolela, tuchiŵa gulu jakutenda yakusasaka Yehofa. Tukusosekwa tukamulichisyeje masengo mwakwanila upile watukwete wa lipopelo. Tukumbuchileje kuti, atamose ali atuŵisile m’nyumba ja ukaidi kapena ku malo kwajika, yeleyi ngaŵa mkutulepelekasya kuŵechetana ni Atati ŵetu ŵachinonyelo ŵakwinani kapena kusokonasya mkamulano wetu ni ŵakulupilila achimjetu.

²¹ Mwakusimichisya mtima soni mwakupilila, kwende tutende yampaka tukombole pakwanilisya masengo gakulalichila gaŵatulamwile. Kwende tupitilisye kutenda masengo gele Yesu Klistu juŵajimwiche ku ŵawe ŵagapeleche kwa ŵakumkuya ŵakwe, paŵatite, “Ni ligongo lyakwe jemanja mjawule, mkajiganye ŵandu ŵangosyo syosope. Mkabatisyeje m’lina lya Atati, ni lya Mwanache, ni lya msimu weswela, ni kwajiganya yosope yele yinamlamulile. Nipo unejo ndili ni jemanja masiku gosope, mpaka mbesi ja chilambo chapasi chino.” (Mat. 28:19, 20) Mpela muŵatendele Yesu, kwende tupitilisye kupilila, soni kola chembecheyo pa Uchimwene wa Mlungu soni tusimichisyeje kuti umi wangamala tuchiwupata. (Ahe. 12:2) Mpela ŵakulijiganya ŵa Klistu ŵabatisidwe, tukwete upile wakwanilisya nawo yakulochesya ya Yesu yakwamba “mbesi ja chilambo chapasi.” Jwalakwe ŵasasile kuti, “Nipo ngani syambone syakwamba ya Uchimwene wa Mlungu tisichilalichidwa pachilambo chosope chapasi, kuti ŵandu ŵamitundu josope asipikane, kaneko mbesi ni tijichiyika.” (Mat. 24:3, 14) Naga masiku agano, tukutenda nawo masengo gelega ni mtima wosope, tuchisangalala kupata umi wangamala m’chilambo chasambano chakulungama cha Yehofa.