Ligongo Chichi Tukusalaga, Kalambala Soni Kuwa?

Achinangolo Ŵetu Ŵandanda Ŵatendekasisye Kuti Tulajeje

“Ulemwa wayiche pa chilambo chapasi ligongo lya mundu jumo, nipo ulemwawo wayiche nacho chiwa. Myoyo chiwa chijendelechele kwa ŵandu wosope.”—ALOMA 5:12.

Mlungu ŵapangenye achinangolo ŵetu ŵandanda Adamu ni Hawa. Jemanjaji ŵaliji ŵamlama. Jwalakwe ŵaŵisile jemanjaji mu paladaiso pachilambopa, jwakolanjikwa kuti mgunda wa Edeni. Mlungu ŵasalile ŵanduŵa kuti alyeje yisogosi yosope ya mumgundamu. Nambo ŵalekasisye yisogosi ya m’chitela chimo. Nambope Adamu ni Hawa ŵasagwile kulya yisogosi ya m’chitela chaŵalekasisyechi. Kwelekutu kwaliji kulemwa. (Genesesi 2:15-17; 3:1-19) Ligongo lya yaŵatesileyi Mlungu ŵatopolenye mumgunda mula. Kaneko ŵatandite kusimana ni yakusawusya. Kupita kwa ndaŵi jemanjaji ŵatandite kuŵeleka ŵanache. Nombe nawo ŵanache ŵawoŵa ŵalagaga. Adamu ni Hawa ŵakalambele kaneko ŵawile. (Genesesi 3:23; 5:5) Wosopewe tukusalwala, kalambala soni kuwa, ligongo lyakuti tuli ŵakutyochela kwa Adamu ni Hawa.

Misimu Jakusakala Jikusatendekasya Kuti Tulajeje

‘Chilambo chosope chapasi chili m’myala mwa jwakusakala jula.’—1 YOHANE 5:19.

Jwakusakala jweleju ali Satana. Jwalakwe ali lilayika lyalyamjimuchile Mlungu. (Yohane 8:44; Chiwunukuko 12:9) Pali papite ndaŵi malayika ganesoni gamjimuchile Mlungu mwamti gaŵele kumbali ja Satana. Malayika gelega gakusakolanjikwa kuti yiŵanda. Misimu jakusakala jeleji jikusatendekasya ŵandu kuti akampikanilaga Mlungu. Jikusalimbikasyasoni ŵandu ŵajinji kuti atendeje yakusakala. (Salimo 106:35-38; 1 Timoteo 4:1) Satana soni yiŵanda akusasangalala mnope pakwawona ŵandu ali mkulaga.

Ndaŵi Sine Yatukusasagula Yikusatendekasya Kuti Tulajeje

“Yele yakusapanda mundu, tachigowola iyoyo.”—AGALATIYA 6:7.

Yili yisyene kuti wosope tukusalaga ligongo lya ulemwa watwajigalile kwa achinangolo ŵetu. Nambosoni ligongo lya yindu yakusakala yayikutendekwa m’chilambo cha Satanachi. Nambo ndaŵi sine ŵandu akusasimana ni yipwetesi ligongo lya yindu yasagwile kutenda. Mundu pasagwile yindu mwakulemwechekwa kapena patesile yakusakala akusagowola yakusakalasoni. Nambo naga mundu akutenda yindu yambone, akusagowolasoni yindu yambone. Mwachisyasyo, naga mtati ali jwachilungamo, jwakulimbichila masengo soni akusanonyela liŵasa lyakwe, jwalakwe akusagowola yindu yambone yejinji soni akusatendekasya kuti liŵasa lyakwe liŵeje lyakusangalala. Nambo naga mtati akusachesya juga, kumwa mnope ukana soni ali jwaulesi mpaka atendekasye liŵasa lyakwe kuŵa pausawuchi. Myoyo mpaka luŵe lunda kumpikanilaga Mlungu. Jwalakwe akusasaka kuti yindu yitujendeleje chenene soni kuti tukole “mtendele wejinji.”—Salimo 119:165.

Tuli ‘m’Masiku ga Mbesi’

“M’manyilile kuti masiku gambesi . . . , ŵandu tachiŵa ŵakulinonyela achimsyene, ŵakunonyela mbiya, . . . ŵangapikanila achinangolo ŵawo, . . . Tachiŵa ŵandewo soni ŵakogoya, ni ŵanganonyela yambone.”—2 TIMOTEO 3:1-5.

Yalisasile lilembali ni yakutenda ŵandu ŵajinji masiku agano. Welewutu uli umboni wamachili wakulosya kuti tukutama m’masiku gambesi. Malemba gasasilesoni kuti m’masiku gambesi kuchiŵa ngondo, kusoŵa kwa yakulya, yifomelesi soni yilwele. (Mateyu 24:3, 7, 8; Luka 21:10, 11) Yeleyi yikusatendekasya kuti ŵandu alajeje soni kuwa.