Kongolela Katende Ketu ka Undumetume—Kola Ŵandu Ŵakwagaŵila Magasini

Ligongo Cici Yili Yakusosekwa?: Ŵandu ŵajinji ŵakusasangalala kuŵalanga magasini getu ŵangasaka kulijiganya Baibulo ni m’weji. Mwine ligongo lyakuti akusasangalala ni dini jawo, kapena akusaliwona kuti nganakola ndaŵi jakulijiganya. Nambope, pakuŵalanga magasini getu ndaŵi ni katema, mpaka atande kola lung’wanu ni Maloŵe ga Mlungu. (1 Pet. 2:2) Ngani jine ja m’magasini mpaka jakamule mtima, kapena yindu pa umi wawo mpaka yicenje. Kwajawulila ndaŵi ni katema ni kunguluka nawo panandi mpaka kwasangalasyeje, soni mpaka yitukamucisye kumanyilila yakusanonyela ni yayikwalagasya nganisyo. Kaneko paujo, lijiganyo komboleka kutanda.

Mwampaka Tutendele:

Mwesi wuliwose, akole ndaŵi jakumjawucisya mundujo magasini gasambano ga Sanja ja Mlonda ni Galamukani!. Mwine kombolekasoni kumjawulila mundujo ndaŵi jine mwesi uwowo kukusya lung’wanu lwakwe pa ngani jine jakwe ja m’magasini jaŵampele kapena kumpa buku jakugaŵila m’mwesiwo. Alembeje ni kusunga yatesile.—Alole Undumetume wa Ucimwene wa January 2014, peji 3.
Akoseceleje ulendo uliwose. Mmalo mwakwamba kupelekape magasini, atagulilaneje ni msyene nyumbajo, soni alinjeje kuŵa najo pa unasi wambone kuti amtendekasye kola lung’wanu.
Aloleje mapesa gampaka atandisye lijiganyo. Naga mundu jwine pa ŵandu ŵakusiŵapa magasini ŵala akwawusya pakwamba ya yajikusasala Baibulo pangani jine jakwe, amjawucisye buku jine jakamulicisya masengo pakulijiganya Baibulo jajikwete kwanga kwakwe, ni atagulilane najo. Mkanatyoce, am’wusye ciwusyo cakuŵajilwa cacacitagulilana paulendo wakuyicisya. Naga akwawulako ndaŵi ni katema nikutagulilanaga pakamulicisya masengo Baibulo kapena mabuku getu gakwiganyila, nikuti akutendesya lijiganyo lya Baibulo. Ana ampele msyene nyumba kabuku ka Ngani Syambone nikumlosya mwakata mwatukusalijiganyila Baibulo? Ana amlosisye tumafidiyo twakuti Ligongo Cici Tukusosekwa Kulijiganya Baibulo? ni Ana pa Lijiganyo lya Baibulo Pakusatendekwa Yatuli? Atamose naga mundu nganakundaga lijiganyo munyumamu, nambo yindu yikusacenga. Ana mpaka yiŵe yakamucisya kulingasoni?

Alinje Kutenda Yakuyicisyayi Mwesi Awuno:

Alembe mena ga ŵandu ŵampaka ŵampaka en magasini ndaŵi syosope. Ŵape magasini gasambano, soni ŵasalile kuti caciyika ni magasini gane m’mwesi wakuyicisya.