Kulambila Kwakusakujiticisya Mlungu

1. Ana tucipata maumbone gapi naga tukumlambila Mlungu mu litala lyakuŵajilwa?

YEHOFA MLUNGU akusatusamalila mnope, soni akusasaka kuti malamusi gakwe gacinonyelo gatukamucisyeje. Naga tukusamlambila mwakuŵajilwa, tuciŵa ŵakusengwa, soni ngasitusimana ni yakusawusya yejinji pa umi wetu. Jwalakwe cacitupa majali, soni cacitukamucisya. (Yesaya 48:17) Nambope, pana dini syejinji syasikusasala kuti sikusajiganya yisyesyene pakwamba ya Mlungu. Nambo yijiganyo yawo yikusalekanganaga mnope pakwamba yakuti Mlungu ali ŵani, soni yakusasaka Mlungujo kwetuwe.

2. Ana mpaka tumanyilile catuli litala lyakuŵajilwa lyakumlambilila Yehofa, soni ana ciwanicisyo capi campaka citukamucisye kupikanicisya yeleyi?

² Ana mpaka amanyilile catuli litala lyakuŵajilwa lyakumlambilila Yehofa? Kuti amanyilile kalambile kasyesyene, ngakusosekwa kulijiganya yijiganyo ya dini syosope. Akusosekwa kwamba kulijiganya yajikusajiganya Baibulo kusyesyene. Tuwanicisye kuti m’yilambo yejinji ŵandu ŵane akupanganya mbiya syawunami. Ni naga wawojo ŵapele masengo gakuwungunya mbiya syawunamisyo, ana mpaka asimanyilile catuli? Ana cacilolecesya mbiya jawunami jilijose ni kujilandanya ni jijakwe? Iyayi. Cacitenda cenene kumalila ndaŵi jawo pakulolecesya kawonece ka mbiya jisyesyenejo. Panyuma pakumanyilila cenene kawonece ka mbiya jisyesyenejo, cacipakombola kumanyilila mbiya jawunami. Mwakulandana ni yeleyi, patukulijiganya pakwamba ya dini jisyesyene, tucipakombola kusimanyilila dini syawunami.

3. Mwakamulana ni yajikusajiganya Baibulo, ana tukusosekwa tutendaje cici kuti Mlungu atujiticisye?

³ Kuli kwakusosekwa kumlambila Yehofa mu litala lyakusalijiticisya jwalakwe. Ŵajinji akusakulupilila kuti dini syosope sikusamsangalasya Mlungu, nambo Baibulo ngajikusajiganya yeleyi. Kwamba ‘kwiticisya kuti akummanyilila Mlungu’ ngaŵa kwakwanila. Ndumetume Paulo ŵatite: “Akwiticisya kuti akummanyilila Mlungu, nambo ni yitendo akusamkanaga, pakuti ŵanganyawo ali ŵakunyalaya ni ŵakupwanya nipo ngasapakombola kutenda kandu kalikose kambone.” (Tito 1:16) Kuti Mlungu atujiticisye tukusosekwa kulijiganya yakusasaka jwalakwe kwetuwe ni kuyitendaga. Yesu ŵasasile kuti ŵangatenda lisosa lya Mlungu ali “ŵayitendo yangalumbana.” (Matayo 7:21-23) Mpela mwayiŵele kuti mbiya syawunami sili syangali mate, nombenasyo dini syawunami sili syangali mate. Kusakala kwakwesoni kuli kwakuti dinisi sili syakuwulasya.

4. Ana maloŵe ga Yesu gakwamba matala gaŵili gakugopolela cici, soni ana litala lililyose likwalongolela ŵandu kwapi?

⁴ Yehofa akusampaga mundu jwalijose upile wakupata umi wangamala. Nambo kuti tukapate umi wangamala m’paladaiso, tukusosekwa kumlambila Mlungu mu litala lyakuŵajilwa, soni kutendaga yindu mu litala lyakusalijitika jwalakwe. Yili yakutesa canasa kuti ŵajinji ngakusatenda yeleyi. Ni ligongo lyakwe Yesu ŵasasile kuti: ‘Jinjilani pacipata cakanganika. Pakuti cipata cakwinjilila ku Jahena cili cekulungwa, soni litala lyakuja ku conasiko lili lyangasawusya kwendamo, nipo ŵandu ŵajinji akusajinjilila kweleko. Nambo cipata cakwinjila ku umi cili cakanganika, soni litala lyakwijilila kweleko, lili lyakusawusya kwabasi, ni ligongo lyakwe ŵandu ŵakusalisimana lyele litalali, ali ŵakuŵalanjika.’ (Matayo 7:13, 14) Dini jisyesyene jikusalongolela ŵandu ku umi wangamala. Dini jawunami jikusalongolela ŵandu ku conasiko. Yehofa ngakusasaka kuti mundu jwalijose ajonasice, ni ligongo lyakwe akwapa upile ŵandu kulikose pacilambopa kuti alijiganye ya jwalakwe. (2 Petulo 3:9) M’yoyo, mpaka tukapate umi kapena tukajonasice mwakamulana ni litala lyatusagwile pakumlambilila Mlungu.

ANA DINI JISYESYENE MPAKA TUJIMANYILILE CATULI?

5. Ana mpaka twamanyilile catuli ŵandu ŵali mu dini jisyesyene?

⁵ Ana mpaka tulipate catuli ‘litala lya ku umi’? Yesu ŵaŵecete kuti dini jisyesyene tucijimanyilila kupitila mu yitendo ya ŵandu ŵa mu dinijo. Jwalakwe ŵatite: “Timcamanyilila ni yitendo yawo. . . . Citela cambone cikusasogola yisogosi yambone.” (Matayo 7:16, 17) Yeleyi yigopolela kuti mpaka twamanyilile ŵandu ŵali mu dini jisyesyene kupitila mu yakusakulupilila, soni yitendo yawo. Atamose kuti jemanjaji nganaŵa ŵamnama, soni akusalemwesyaga yindu yine, nambo ŵakulambila Mlungu ŵasyesyene mpela likuga akusatendaga lisosa lya Mlungu. Kwende tulole yindu msano ni cimo yampaka yitukamucisye kwamanyilila ŵali mu dini jisyesyene.

6, 7. Ana ŵakutumicila ŵa Mlungu akusajiwona wuli Baibulo, soni ana Yesu ŵapelece cisyasyo catuli pakamulicisya masengo Baibulo?

⁶ Ŵakutumicila Yehofa akusajigala yijiganyo yawo m’Baibulo. Baibulo jikusasala kuti: “Malemba gosope galembedwe ni Mlungu mwakupujila lipuje, nipo gakusakamucisya pakwiganya yindu yisyesyene, kulekasya ulemwa, kongolela yangalumbana, ni pakwiganya ŵandu yakulungamika. M’yoyo Malemba gakusamkamucisya mundu jwa Mlungu kuŵa jwakupakombola kutenda yosope ni kuliŵicila cilepe kusyesyene kutenda masengo gambone galigose.” (2 Timoteo 3:16, 17) Paulo ŵalembele Aklistu acimjakwe kuti: “Pamwapikene maloŵe ga Mlungu gele gatwamlalicile, mwagapocele ngaŵa mpela maloŵe ga ŵandu wamba, nambo mpela mwele mugaŵelele nditu maloŵe ga Mlungu.” (1 Atesalonika 2:13) Ni ligongo lyakwe, yakusakulupilila, soni kutenda ŵali mu dini jisyesyene ngayikusatyocela mu nganisyo kapena mu misyungu ja ŵandu. Yikusatyocela m’Maloŵe ga Mlungu.

⁷ Yesu Klistu ŵapelece cisyasyo cambone cakujigala yijiganyo yakwe m’Maloŵe ga Mlungu. Mwipopelo lyakwe kwa Atatigwe ŵakwinani, ŵatite: ‘Maloŵe gawo gali usyesyene.’ (Yohane 17:17) Yesu ŵakulupililaga Maloŵe ga Mlungu, soni yosope yaŵajiganyaga yaliji yakamulana ni Malemba. Yesu ŵaŵecetaga mwakuwilisyawilisya kuti: ‘M’Malemba yilembedwe kuti.” (Matayo 4:4, 7, 10) Kaneko ŵasalaga maloŵe ga m’lilemba. M’yoyosoni, ŵandu ŵa Mlungu moŵa agano ngakusajiganya nganisyo syawo. Akusakulupilila kuti Baibulo jili Maloŵe ga Mlungu, soni akusajigalaga yijiganyo yawo yosope m’Baibulo.

8. Ana kulambila Yehofa kukusapwatikapo cici?

⁸ Ŵandu ŵali mu dini jisyesyene akusalambila Yehofa jika, soni akusamanyikasya lina lyakwe. Yesu ŵatite: “Mumlambileje Ambuje Mlungu jwenu, ni kwatumicila ŵelewo pewo.” (Matayo 4:10) M’yoyo, ŵakutumicila Mlungu ngakusalambila mundu jwine, nambo Yehofa jika. Kulambilaku kusapwatikapo kwamanyisya ŵane lina lya Mlungu, soni kuti jwalakwe ali jwatuli. Lilemba lya Salimo 83:18 likusati: “Kuti amanyilile kuti wawojope, lina lyawo ni Yehofa, Ŵalakwe ali Ŵamwinani Mnope pacilambo cosope capasi cino.” Yesu ŵapelece cisyasyo cambone cakwakamucisya ŵane kumanyilila lina lya Mlungu, paŵapopesile kuti: “Une namanyisye wawojo [lina lyawo, NW] kwa ŵandu ŵiŵambele pa cilambo capasi.” (Yohane 17:6) M’yoyo, ŵakulambila Mlungu ŵasyesyene moŵa agano akusajiganya ŵane yakwamba lina lya Mlungu, lisosa lyakwe, soni ndamo syakwe.

9, 10. Ana Aklistu ŵasyesyene akusalosyaga cinonyelo m’matala gapi?

⁹ Ŵandu ŵa Mlungu akusanonyelanaga yisyesyene. Yesu ŵatite: “Naga mkunonyelana jwine ni mjakwe, pelepo ŵandu wosope tacimanyilila kuti jemanja mli ŵakulijiganya ŵangu.” (Yohane 13:35) Aklistu ŵandanda ŵakwete cinonyelo celeci. Cinonyelo cisyesyene cikusamasya lusagu lwalukusayika ligongo lyakulekangana mtundu, kapate ka yindu, cilambo cakutyocela mundu, soni cikusalimbikasya unasi wa pacilambo cosope. (Akolose 3:14) Ŵandu ŵa mu dini jawunami ngakusakola cinonyelo celeci. Ana tukumanyilila yeleyi catuli? Jemanjajo akusawulagana ligongo lyakulekangana cilambo kapena mtundu. Aklistu ŵasyesyene ngakusajigala yida ni kuwulaga nayo Aklistu acimjawo kapena ŵane. Baibulo jikusati: “Kulekangana kwa ŵanace ŵa Mlungu ni ŵanace ŵa Satana ni aku: Jwalijose jwangatenda ya cilungamo, nambosoni jwalijose jwanganonyela mjakwe, nganaŵa mwanace jwa Mlungu. . . . Tukwenela kunonyelana jwine ni mjakwe. Tukaŵa mpela Kaini juŵaliji jwakusakala jula, soni ŵawuleje mlongo mjakwe.”​—1 Yohane 3:10-12; 4:20, 21.

¹⁰ Kusala yisyene cinonyelo cisyesyene cikusapwatika yejinji ngaŵaga kwamba kuŵambala kuwulaga ŵane. Aklistu ŵasyesyene akusakamulicisya masengo ndaŵi jawo, macili, soni cipanje cawo pakwakamucisya ni kwalimbikasya ŵane. (Ahebeli 10:24, 25) Akusakamusyangana pandaŵi ja yipwetesi, soni akusatendelaga ŵane cilungamo. Jemanjaji akusakamulicisya masengo lilamusi lya m’Baibulo lyakuti “twatendeleje ŵandu ŵane wosope yindu yambone.”​—Agalatia 6:10.

11. Ligongo cici tukusosekwa kwiticisya kuti Yesu Klistu ali litala lyaŵapelece Mlungu lyakutukulupucisya?

¹¹ Aklistu ŵasyesyene akusajiticisya kuti Yesu Klistu ali litala lyaŵapelece Mlungu lyakulupucisya ŵandu. Baibulo jikusasala kuti: “Pangali jwine jwalijose jwele mpaka akombole kulupusya ŵandu, pakuti pa cilambo cosope capasi pangali lina line lyele Mlungu liŵapelece kwa ŵandu kuti tukulupuce nalyo.” (Masengo 4:12) Mu Mtwe 5, twalijiganyisye kuti Yesu ŵapelece umi wakwe mpela ciwombolo ca ŵandu ŵakulupicika. (Matayo 20:28) Konjecesya pelepa, Mlungu ŵamsagwile Yesu kuŵa Mwenye jwa Ucimwene wakwinani jucacilamulila cilambo cosope capasi. Mlungu akusasaka kuti tumpikanileje Yesu, soni tukamulicisyeje masengo yijiganyo yakwe naga tukusaka umi wangamala. Ni ligongo lyakwe Baibulo jikusasala kuti: “Jwalijose jwakukulupilila mwa Mwanace akwete umi wangamala, jwalijose jwangampikanila Mwanace ngasakola umi.”​—Yohane 3:36.

12. Ana ungaŵa mbali ja cilambo capasi ukusagopolela cici?

¹² Ŵakulambila Mlungu ŵasyesyene nganaŵa mbali ja cilambo capasi. Ali kumjimba magambo pameso pa jwakulamulila jwa Ciloma, Pilato, Yesu ŵatite: “Ucimwene wangu nganiwuŵa kose wa cilambo capasi pano.” (Yohane 18:36) Atamose kuti ŵakumkuya ŵasyesyene ŵa Yesu akusatyocela m’yilambo yakulekanganalekangana, jemanjaji ali pasi pa Ucimwene wakwe wakwinani, soni ngakusajigala nawo mbali mu ngani sya ndale. Ngakusajigalasoni mbali jilijose pa ukangani wa pacilambo. Nambope, ŵakulambila Yehofa ŵangalekasya ŵandu kwinjila m’cipani candale, soni ŵakusaka kwimila cipani pacisagula kapenasoni kusagula nawo ŵakulamulila. Atamose kuti ŵakulambila ŵasyesyene ŵa Mlungu ngakusajigala nawo mbali mu yandale, jemanjaji akusapikanila malamusi ga cilambo. Ligongo cici? Ligongo Maloŵe ga Mlungu gakusalamula kuti ‘apikanileje acakulungwa ŵakulamulila’ boma. (Aloma 13:1) Nambo naga pana kutindana pasikati pa yakusasaka Mlungu ni yakusasaka ŵakulamulila ŵacilambo, ŵakulambila ŵasyesyene akusakuyaga cisyasyo ca ŵandumetume, ŵaŵatite: “Tukwenela kumpikanila Mlungu kupunda kupikanila mundu.”​—Masengo 5:29; Maliko 12:17.

13. Ana ŵakumkuya Yesu ŵasyesyene akusawuwona catuli Ucimwene wa Mlungu, soni akusatendaga cici?

¹³ Ŵakumkuya Yesu ŵasyesyene akusalalicila kuti Ucimwene wa Mlungu jika ni wawucakamucisya ŵandu. Yesu ŵasasile mkanipaŵe kuti: “Ngani Syambonesi syakwamba ya Ucimwene wa Mlungu tisicilalicidwa pacilambo cosope capasi, kuti ŵandu ŵamitundu josope asipikane, kaneko mbesi ni tijiciyika.” (Matayo 24:14) Mmalo mwakwalimbikasya ŵandu kwembeceya kuti ŵandu ŵakulamulila camasye yakusawusya yawo, ŵakumkuya ŵasyesyene ŵa Yesu Klistu akusalalicila kuti uli Ucimwene wa Mlungu wa kwinanipe wawucimasya yakusawusya yosope. (Salimo 146:3) Yesu ŵatujigenye kuti tupopeleleje ucimwenewu paŵatite: “Ucimwene wawo uyice; kusosa kwawo kutendecekwe, pacilambo capasi mpela kwinani.” (Matayo 6:10) Maloŵe ga Mlungu galocesye kuti Ucimwene wakwinaniwu “ciwucikasa ni kugamala maucimwene gawo gosope [gagapaliga]. Nipo ciwucitama kwandaŵi josope.”​—Daniel 2:44.

14. Ana akuganisya kuti dini japi jajikusatenda yakamulana ni kulambila kusyesyene?

¹⁴ Mwakamulana ni yatugambile kulijiganyayi, aliwusye jika kuti: ‘Ana dini japi jajikusajigala yijiganyo yakwe m’Baibulo, soni jajikusamanyikasya lina lya Yehofa? Ana likuga lyapi lyalikusalosya cinonyelo cisyesyene, lyalikusakulupilila Yesu, lyanganiliŵa mbali ja cilamboci, soni lyalikusalalicila kuti Ucimwene wa Mlungu jika ni wawucimasya yakusawusya yosope ya ŵandu? Pa dini syosope syasili pacilambopa, ana dini japi jajikusatendaga yeleyi?’ Maumboni gakulosya kuti jili dini ja Mboni sya Yehofa.​—Yesaya 43:10-12.

ANA WAWOJO CACITENDA CICI?

15. Ana Mlungu akusasaka cici kupwatika pa kukulupilila kuti apali?

¹⁵ Kwamba kukulupilila Mlungu nganikuŵa kwakwanila kuti amsangalasye. Pakuŵa Baibulo jikusasala kuti atamose misimu jakusakala jikusakulupilila kuti Mlungu apali. (Yakobo 2:19) Atamose yili m’yoyo, misimuji ngajikusatenda lisosa lya Mlungu, soni Mlungu jwangajijiticisya. Kuti Mlungu atujiticisye, ngatukusosekwa kwamba kulupilila kuti jwalakwe apali, nambo tukusosekwa kutenda lisosa lyakwe. Tukusosekwasoni kulilekanganya ni dini jawunami ni kutanda kulambila kusyesyene.

16. Ana tukusosekwa kutenda cici pakwamba ya kujigala nawo mbali mu dini jawunami?

¹⁶ Ndumetume Paulo ŵalosisye kuti ngatukusosekwa kujigala nawo mbali pakulambila kwawunami. Jwalakwe ŵalembile kuti: “‘Mwalece jemanjajo, soni m’ŵe pajika. Kasimkwaya kandu kangaswejela, ni pelepo une tinjimpocela.’” (2 Akolinto 6:17; Yesaya 52:11) M’yoyo, Aklistu ŵasyesyene akusaŵambala cilicose cakamulana ni dini jawunami.

17, 18. Ana “Babiloni Jwamkulungwa” ali cici, soni ligongo cici kukopokamo kukusosekwa kutendekwa mwacitema?

¹⁷ Baibulo jikusalosya kuti dini syosope syawunami sili kumbali ja “Babiloni Jwamkulungwa.”a (Ciunukuko 17:5) Lina lyakuti Babiloni Jwamkulungwa likusatukumbusya ya msinda wakala wa Babiloni, kukwatandile dini jawunami panyuma pa Cikumba ca m’moŵa ga Nowa. Yijiganyo, soni yitendo yayiwandile m’dini syawunami yatandile kalakala ku Babiloni. Mwambone, ŵandu ŵa mumsinda wa Babiloni ŵalambilaga utatu [kuti mwa mlungu jumo mwana milungu jitatu]. Moŵa agano, dini syejinji sikusajiganya ya Utatu. Nambo Baibulo jikusajiganya kuti pana Mlungu jusyesyene jumope jwali Yehofa, soni kuti Yesu Klistu ali Mwanagwe. (Yohane 17:3) Ŵandu ŵa mumsinda wa Babiloni ŵakulupililagasoni kuti ŵandu akwete msimu wawukusakulupuka pa ciwa, soni kuti msimuwo komboleka kulagasika kumalo gakulagacisya ŵandu. Moŵa agano, dini syejinji sikusajiganya kuti msimu wangawa, soni msimuwo komboleka kulagasika ku moto wa helo.

¹⁸ Ligongo lyakuti kulambila kwa ŵandu ŵa mumsinda wa Babiloni kwawandile pacilambo cosope, Babiloni Jwamkulungwa jwa moŵa agano ali dini syosope syawunami. Soni Mlungu alocesye kuti dini syosope syawunamisi sicimala mwakusisimucisya. (Ciunukuko 18:8) Ana akuliwona ligongo lyakwe kuli kwakusosekwa kulilekanganya ni mbali jilijose ja Babiloni Jwamkulungwaju? Yehofa Mlungu akusaka kuti “mkopoce mu msindamo” mwacitema ndaŵi mkanijimale.​—Ciunukuko 18:4.

19. Ana cacipata cici ligongo lyakutumicila Yehofa?

¹⁹ Pacalece kutenda yindu yakamulana ni dini syawunami, ŵane mpaka asagule kuleka kunguluka nawo. Nambo pakutumicila Yehofa yimpepe ni ŵandu ŵakwe, cacipata yejinji kupunda yosope yampaka ajase. Mpela ŵakulijiganya ŵa Yesu ŵandanda ŵaŵalesile yindu yawo ni kumkuya, nombe m’weji tucipata acalongo acimjetu ŵajinji ŵausimu naga tukumkuya Yesu. Tuciŵa mbali ja liŵasa lyekulungwa lya pacilambo cosope lya Aklistu ŵasyesyene, ŵakusalosyaga cinonyelo cisyesyene. Soni cacikola cembeceyo cambone mnope ca umi wangamala ‘m’sogolo.’ (Maliko 10:28-30) Mwine mkupita kwa ndaŵi, mpaka yikombolece kuti ŵandu ŵaŵalesile kunguluka nawo ligongo lya cikulupi cawo, cacilijiganya yajikusajiganya Baibulo ni kuŵa ŵakulambila ŵa Yehofa.

20. Ana ŵali mu dini jisyesyene akwembeceya m’bujo mwatuli?

²⁰ Baibulo jikusajiganya kuti pacangakaŵa Mlungu camasye yakutendekwa yakusakala ya m’cilamboci ni cayikasye cilambo casambano ca cilungamo pasi pa ulamusi wa Ucimwene wakwe. (2 Petulo 3:9, 13) Nambo ni ciciŵa cilambo cakusangalasya uli! Soni m’cilambo casambano cacilungamoco muciŵa dini jimo, soni kalambile kamo. Ana nganuluŵa lunda kutenda yakomboleka kuti atande kusongana ni ŵakulambila ŵasyesyene sambano jino?