MTWE 12

Likuga Lyalikutumicila “Mlungu Jwamtendele”

CAKULINGA CA MTWEWU

Yehofa akwendelecela kwalongolela ŵandu ŵakwe

1, 2. Ana m’magasini ja Zion’s Watch Tower ja January 1895, mwapali kucenga kwamtuli soni ana abale ŵatesile uli ni kucengaku?

JWAKULIJIGANYA Baibulo jwakulipeleka mnope John A. Bohnet, jwasangalele pajwapocele magasini ja Zion’s Watch Tower ja January 1895. Jwasangalele mnope m’yiyi ligongo magasiniji jakwete cikuto casambano. Pacikutopa ŵajambwile sanja jekulungwa jijataŵidwe pasikati pa nyasa jili mkutenda mbungo jekulungwa mnope. Sanjaji jakwete lilanguka penani pakwe lilyaŵalaga kusyungulila malo gosopego. M’magasiniji mwapali cimanyisyo cakusala kawonece kasambano ka magasini cakuti “Kawonece Kasambano ka Magasini.”

² Ligongo lyakusangalala ni yeleyi, M’bale Bohnet jwamlembele cikalata M’bale Russell. Jwalakwe jwatite, “Sangalele mnope ligongo lya kawonece kasambano ka magasini, jikuwoneka cenene.” Jwakulijiganya Baibulo jwine, lina lyakwe John H. Brown, pakusala ya cikutoci jwalembile kuti, “Yili yakutesya lung’wanu kuti atamose kuti matumbela soni cimbungo yikuputa pa Sanjaji nambo jikuwoneka kuti jikwete yilimbililimbi yakulimba.” Cikuto casambanoci, kwaliji kucenga kwandanda kuŵakuweni abale mu cakaci, nambo nganikuŵa kwakumalisya ligongo kucenga kwine kwekulungwa kwatendekwe mu November. Yaliji yakutesya lung’wanu kuti kucenga kwa pacikutoci kwalosisyesoni cimbungo camacili ca panyasa.

3, 4. Ana ni yakusawusya yapi yaŵayisasile mu magasini ja Watch Tower ja November 15, 1895, soni ana ni kucenga kwekulungwa kwapi kuŵakusasile m’magasiniji?

³ Ngani jijakopwece mu Sanja ja Mlonda ja November 15, 1895, jasasile ya cakusawusya cicaliji pasikati pa abale. Cakusawusyaci caliji mpela matumbela ga cimbungo camacili cicasokonasyaga mtendele pasikati pa abale, kapena kuti likuga lya Ŵakulijiganya Baibulo. Abale ŵakanganaga pa ngani ja jucaŵe jwakulongolela mpingo. Pakwakamucisya kumanyilila yaŵasosekwaga kutenda pakumasya msimu wawungakamulanawu, nganiji jalilandenye likuga ni sitima. Nganiji jasasile mwangapita mumbali kuti abale ŵaŵalongolelagaŵa ŵalepele kulikamucisya likuga lyalyaliji mpela sitima ku cimbungo camacili. Ana pasosekwaga cici?

⁴ Nganiji jasasile kuti jwakwendesya sitima jwakumanyilila cenene masengo gakwe akusalolecesya kuti ajigele yida yosope yakusosekwa pakukulupusya umi wa ŵandu. Akusakosecelesyasoni ŵandu ŵakukamula masengogo ku cimbungo camacili campaka asimane naco. Mwakulandana ni yeleyi, ŵakwete udindo wakulongolela mu likuga lya Mlungu akusosekwa kulolecesya kuti mipingo josope jili jakoseka kulimbana ni yakusawusya yayili mpela cimbungo camacili. Kuti ŵakulongolelaŵa akombole kutenda yeleyi, nganiji jasasile ya kucenga kwekulungwa. Jasasile mwangapita mumbali kuti, “Mumpingo wuliwose mukusosekwa kusagulidwa acakulungwa ŵa mumpingo” kuti “‘aŵe ŵakulolela’ ngondolo.”—Mase. 20:28.

5. (a) Ana ligongo cici dongosolo jakuŵika acakulungwa ŵa mumpingo jaliji ja pandaŵi jakwe? (b) Ana citukambilane ciwusyo capi?

⁵ Dongosolo jakusagulidwa kwa acakulungwa ŵa mumpingoji jatendekwe pandaŵi jakwe soni jakamucisye mipingo kosecela yamsogolo. Dongosoloji jaliji jakuti cijakamucisye abale ŵetu kumalana ni yakusawusya yayaliji mkwika mpela matumbela pa ngondo jandanda ja pacilambo cosope. Mu yaka yakuyicisya, mu likuga mwatendekwesoni kucenga kukwakamucisye ŵandu ŵa Mlungu kuŵa ŵakoseka kumtumicila Yehofa. Ana ni cakulocesya capi ca m’Baibulo cicasasile yakucengaku? Ana ni kucenga kwa m’likuga kwapi kwakuweni kuli mkutendekwa? Ana kucengaku kwakamucisye camtuli wawojo?

“Cinjiŵika Mtendele Kuŵa Mpela Ŵakumlolela”

6, 7. (a) Ana lilemba lya Yesaya 60:17 likusagopolela cici? (b) Ana “ŵakumlolela” soni “ŵakumpa masengo” yayikolanjidwe mu lilembali yikulosya cici?

⁶ Mpela mutulijiganyicisye mu mtwe 9, Yesaya jwasasile mkanipaŵe kuti Yehofa cacajaliwa ŵandu ŵakwe mwakwatendekasya kuŵa ŵajinji. (Yes. 60:22) Nambope, Yehofa jwasasile kuti cacitenda yejinji kupunda pelepa. Mu cakulocesya cicici, jwalakwe jwatite, “Cinjimpa golidi m’malo mwa kopa, m’malo mwa cisyano cinjimpa silifa, kopa m’malo mwa citela, cisyano m’malo mwa maganga, cinjiŵika mtendele kuŵa mpela ŵakumlolela soni cilungamo kuŵa ŵakumpa masengo.” (Yes. 60:17, NW) Ana cakulocesyaci cikugopolela cici? Soni ana cikutukwaya camtuli m’weji masiku agano?

Kucengaku ngakukuŵa kutyoka pa cakusakala kwawula pa cambone, nambo kuli kutyoka pa cambone kwawula pa cambone mnope

⁷ Cakulocesya ca Yesayaci cikulondesya kuti cindu cine cikwinjila m’malo mwacijakwe. Nambo cayiwone kuti kucengaku ngakukuŵa kutyoka pa cakusakala kwawula pa cambone, nambo kuli kutyoka pa cambone kwawula pa cambone mnope. Kuŵika golidi m’malo mwa kopa mpela yine yosope yayisalidwe mu cakulocesyaci yikulosya kwawula pasogolo kwa yindu. M’yoyo, yeleyi yikulosya kuti Yehofa ŵasasile mkanipaŵe kuti ŵandu ŵakwe cacijongolelaga katende ka yindu mwapanandipanandi. Ana yakulocesyayi yikusala ya kucenga kwapi? Piŵasalaga kuti “ŵakumlolela” soni “ŵakumlamulila,” Yehofa ŵalosisye kuti cacakamucisya ŵandu ŵakwe kongolela mwapanandipanandi kasamalile soni kajendesye ka likuga lyakwe.

8. (a) Ana ŵani ŵaŵatendekasisye kucenga kuŵakusasile mu yakulocesya ya Yesaya? (b) Ana kucengaku kutukamucisye camtuli? (Alolesoni libokosi lyakuti “Ŵapocele Camuko Mwakulinandiya.”)

⁸ Ana ŵani ŵakutendekasya likugali kwawula pasogolo? Yehofa akuti, “Cinjimpa golidi,. . . cinjimpa silifa,. . . soni cinjiŵika mtendele.” Yeleyi yikulosya kuti kwawula pasogolo kwa mpingo soni likuga lyosope kukutendekwa ngaŵa ni macili ga mundu nambo ni Yehofa msyene. Kutandila pandaŵi jiŵaŵicidwe Yesu kuŵa Mwenye, Yehofa aŵele ali mkumkamulicisya masengo Mwanace jwakwe kwawusya pasogolo likuga lyakwe. Ana kucenga kweleku kukutukamucisya camtuli? Lilemba lilili likusala kuti kucengaku ni kwakucitendekasya kuti cipapagwe “mtendele” soni “cilungamo.” Naga tukumkunda Mlungu kuti atulongoleleje soni naga tukongolela katende ketu ka yindu, nikuti mtendele uciŵa pasikati petu. Soni naga tukusanonyela cilungamo, yicitukamucisya kuti tumtumicileje Yehofa, jwele ndumetume Paulo jwamkolasile kuti “Mlungu jwa mtendele.”—Afil. 4:9, NW.

9. Ana cici cacikusakamucisya kuti mumpingo ŵandu aŵe ŵadongosolo soni ŵakamulana, soni ligongo cici akwanga m’yoyo?

⁹ Pakwamba ya Yehofa, Paulo jwalembile kuti, ‘Mlungu nganaŵa Mlungu jwacisokonasyo nambo jwamtendele.’ (1 Akoli. 14:33) Cayiwone kuti Paulo palilembali nganalekanganya cisokonasyo ni dongosolo, nambo jwalekangenye cisokonasyo ni mtendele. Ligongo cici? Tukusosekwa kumanyilila kuti dongosolo pajikape nganijiŵa jiyikasisye mtendele. Mwacisyasyo, asilikali mpaka ajime mwadongosolo, nambo kajime kawo ka dongosoloka yakuyicisya yakwe yikusaŵaga ngondo ngaŵa mtendele. M’yoyo, mpela Aklistu, tukusosekwa kumanyililaga kuti likuga lililyose lya ŵandu lyalikusatenda yindu mwadongosolo nambo pali pangali mtendele, patalice uli, licimala. Mwakulekangana ni yeleyi, mtendele wa Mlungu ukusayikasya dongosolo jangamala. M’yoyo, tuli ŵakuyamicila kuti likuga lyetu likulongoleledwa soni kuswejesyedwa ni “Mlungu jwakusapeleka mtendele.” (Alo. 15:33) Mtendele wa Mlungu utendekasisye kuti papagwe dongosolo jakamucisya nambosoni kuti ŵandu aŵe ŵakamulana m’mipingo josope yayikututendekasya kuŵa ŵakusangalala soni ŵakuyamicila.—Sal. 29:11.

10. (a) Ana ni kucenga kwamtuli kukwatendekwe mu likuga mundaŵi ja Ŵakulijiganya Baibulo? (Alole libokosi lyakuti “Kucenga kwa Kajendesye ka Mpingo Kwakutendekwe M’likuga.”) (b) Ana sambano citukambilane ciwusyo capi?

¹⁰ Libokosi lyakuti “Kucenga kwa Kajendesye ka Mpingo Kwakutendekwe M’likuga,” likusasala mwakata umbone uwapali ligongo lya kucenga kukwatendekwe m’likugali mundaŵi ja Ŵakulijiganya Baibulo. Nambo sambano, ana ni kucenga kwapi kwatesile Yehofa mwapacangakaŵapa kupitila mwa Mwenye jwetu, kwakuli mpela ‘kopa m’malo mwa golidi’? Nambi kucengaku kukamucisye camtuli kuti mipingo jiŵe pamtendele soni jakamulana pacilambo cosope? Ana kucengaku kwakamucisye camtuli wawojo pajika kuti akomboleje kumtumicila “Mlungu jwa mtendele”?

Yakutenda Klistu Pakulongolela Mpingo

11. (a) Ana masengo gekulungwa gakulijiganya Baibulo galikamucisye Likuga Lyakulongolela kupikanicisya cici? (b) Ana abale ŵa m’likuga lyakulongolela ŵasimicisye kutenda cici?

¹¹ Kutyocela mu 1964 mpaka 1971, likuga lyakulongolela lyalongolele masengo gekulungwa gakulijiganya Baibulo. Cakulinga ca masengoga caliji kuwungunya muwakamulilaga masengo mpingo wa mu yaka 100 yandanda.a Pakwamba yakajendesyedwe ka mpingo, yaŵawungunyisyeyi yalosisye kuti mpingo mu yaka 100 yandanda walongoleledwaga ni likuga lya acakulungwa ŵa mumpingo ngaŵa jwamkulungwa jumo jwa mumpingo kapena jwakulolela jumo. (Afil. 1:1, NW; Aŵalanje 1 Timoteo 4:14) Likuga lyakulongolela pilyapikanicisye yeleyi, lyamanyilile kuti Yesu jwali Mwenye, akwalongolela kuti ajongolele kajendesye ka mpingo wa ŵandu ŵa Mlungu. Abale ŵa likuga lyakulongolelaŵa, ŵakuyiye dongosoloji. Mwangacelewa, ŵakamulicisye masengo ciwundo ca m’Malembaci pa kuŵika acakulungwa ŵa mumpingo mu likuga lya Mlungu. Ana ni kucenga kwamtuli kukwatendekwe ca m’ma 1970?

ŴAPOCELE CAMUKO MWAKULINANDIYA

MU Sanja ja Mlonda ja April 1, 1916, ja ciŵeceto ca Cifinishi mwapali cikalata cakutyocela kwa M’bale Russell ciŵalembele abale ŵakuŵalanjika kupwatikapo M’bale Kaarlo Harteva jwa ku Scandinavia. M’bale Russell jwasalile kuti, “Tukwalimbikasya jemanja abale ŵetu ŵakunonyelwa m’cikulupi kuti awujile mu usyesyene soni ku masengo getu gagakutendekwa m’masiku agano.” Ana ligongo cici M’bale Russell jwaŵendile abaleŵa kutenda yeleyi?

Kaarlo Harteva

M’bale Harteva, jwapali mu 1882, soni jwaliji jumo mwa Ŵakulijiganya Baibulo ŵandanda m’cilambo ca Finland. Jwalakwe jwabatiswe mu April, 1910. Kaneko m’caka ca 1912, M’bale Russell ŵamjiticisye m’baleju kuti alembeje Sanja ja Mlonda m’ciŵeceto ca Cifinishi. Masengoga gajendaga cenene mpaka mundaŵi jele Ngondo Jandanda Japacilambo Cosope jatandite. Mu December 1, 1914, M’bale Harteva jwalembile ngani mu Sanja ja Mlonda kuti, “Ligongo lya kusoŵa kwa mbiya, . . . caka acino, ngatukombola kukoposya mwakutamalicika Sanja ja Mlonda jakola mapeji gosope.” Pakusaka kupata mbiya, mu 1915, M’bale Harteva soni abale ŵane ŵatamilikasisye ciwanja cakolanjidwa kuti Ararat. Ciwanjaci catandite kuwandisya magasini gagamanyikaga ni lina lya ciwanjaci.

M’bale Harteva ali aŵisile nganisyo syakwe syosope pa ciwanja ni magasini gasambano, m’bale jwine jwatandite kutumicila pa masengo gakulemba Sanja ja Mlonda ja Cifinishi. Magasini ga Ararat gasalaga ngani sya m’Baibulo soni ngani syakwayana ni matala gakuposya yilwele pangakamulicisya masengo mitela ja kucipatala. Magasiniji jasalagasoni ngani syakwaya ciŵeceto cicagambile kutanda kwene ca Esperanto. Mkupita kwandaŵi, magasiniji jatandite kwasokonasya abale ligongo ŵatandite kukayicila yijiganyo yakupikanika ya usyesyene. Ligongo lya yeleyi, M’bale Russell, pakuganicisya ya usimu wa abale, jwamkamucisye M’bale Harteva soni abale ŵane kuti “awujile mu usyesyene.”

Ana M’bale Harteva jwatesile cici ni cikamucisyoci? Jwalakwe jwawandisye cikalataci yalumo ni yaŵajanjile m’magasini ja Ararat. M’bale Harteva jwapepesye yaŵatesileyi. Jwalakwe jwatite, “Naga ngongolela nganiji, cinjitenda yiliyose yampaka ndende kuti ngawilisyasoni.” Mwangapita ndaŵi, ngani jakumalisya m’magasini ja Ararat, M’bale Harteva jwapepesyesoni kaŵili ligongo lyakwasokonasya abale. Jwalakwe jwalembile kuti, “Cilolecesyeje kuti ndili jwakusamala kuti nguyeje ciwundo cilicose ca usyesyene cacigambile kopoka kwene.” Mwakulekangana ni acakulungwa ŵakupoka ŵaŵapali mu ndaŵi jakwe, Kaarlo Harteva jwapocele camuko mwakulinandiya.

Kaneko M’bale Harteva jwasagulidwesoni kuti agopoleleje Sanja ja Mlonda m’ciŵeceto ca Cifinishi soni kuŵa jwakulolela nyambi. M’baleju jwapitilisye kwalolela abale ŵa maudindo mpaka mu 1950. Jwamalisisye undumetume wakwe wa pacilambo capasi mu 1957 ali jwakulupicika kwa Yehofa soni ku usyesyene. Kusala yisyene, mundu jwakusapocela camuko mwakulinandiya kutyocela kwa Mwenye, Yesu, akusaswejesyedwa soni kupata majali kutyocela kwa Yehofa.

12. (a) Ana kucenga kwamtuli kukwatendekwe mu likuga lyakulongolela? (b) Alondesye mwaliŵelele Likuga Lyakulongolela masiku agano? (Alole libokosi lyakuti “Yalikutenda Likuga Lyakulongolela Pakusamalila Yindu ya Ucimwene,” peji 130.)

¹² Kucenga kwandanda kwatendekwe mu likuga lyakulongolela. Mu ndaŵiji, likuga lyakulongolelali lyapanganyidwe ni abale ŵasagulwe 7, ŵaŵalongolelaga Watch Tower Bible and Tract Society of Pennsylvania. Nambope, mu 1971, ciŵalanjilo ca abaleŵa catyosile pa 7 kwika pa 11, soni nganamanyikaga kuti acimlongola. Abaleŵa, ŵatandite wosope kuliwona kuŵa ŵakulandana, soni ŵacenganaga uceyamani caka cilicose.

13. (a) Ana ni dongosolo japi jakajendesye ka mpingo jajiŵele mkukamula masengo kwa yaka 40? (b) Ana Likuga Lyakulongolela lyatesile cici mu 1972?

¹³ Kucenga kwine kukwatendekwe, kwakwayiye mpingo uliwose. Camtuli? Kutyocela mu 1932 mpaka mu 1972, m’bale jumo ni jujwalongolelaga mpingo. M’baleju jwamanyikaga kuti jwakulongolela undumetume mpaka mu 1936. Kaneko, linali lyacenjile ni kuŵa mtumiki jwampingo. Mkupita kwa ndaŵi lyacenjilesoni kuŵa jwakulolela mpingo. Abale ŵa maudindoŵa ŵalipelekaga mnope pakusisamalila ngondolo sya Mlungu mwausimu. M’bale jwakulolela mpingoju nganiŵawusyaga ŵakutumicila ŵane pakutenda yisagula yakwaya mpingo. Nambope, mu 1972, Likuga Lyakulongolela lyalinganyisye kucenga kwekulungwa. Ana kucengaku kwapwatice cici?

14. (a) Ana ni dongosolo jasambano japi jijatandite kukamula masengo pa October 1, 1972? (b) Ana ŵakulondesya masengo ga acakulungwa ŵa mu mpingo ŵakamulicisye masengo camtuli camuko cakusimanikwa pa Afilipi 2:3?

¹⁴ M’malo mwakola m’bale jumo kuti atumicileje mpela jwakulolela mpingo mumpingo uliwose, abale ŵane ŵasagulidwaga mwakamulana ni Malemba kuti atumicile mpela acakulungwa ŵa Ciklistu. Abaleŵa ŵapanganyaga likuga lya acakulungwa lilyalolelaga mpingo. Kucenga kweleku kwatandite kukamula masengo pa October 1, 1972. Masiku agano, jwakulondesya masengo ga acakulungwa ngakusalipikana kuti ali jwakusosekwa mnope mulikugali, nambo kuti “ali jwamnondi.” (Luk. 9:48) Kusala yisyene, abale ŵakulinondiyaŵa ali ŵakusosekwa mnope mu likuga lya Mlungu.—Afil. 2:3.

Kusala yisyene, Mwenye jwetu apelece ŵakucinga kwa ŵakumkuya ŵakwe pandaŵi jakwe

15. (a) Ana dongosolo jakuŵa ni likuga lya acakulungwa ŵa mumpingo jiŵele ni yakuyicisya yambone yamtuli? (b) Ana ni cici cacikulosya kuti Mwenye jwetu akulilongolela likugali?

¹⁵ Dongosolo jakugaŵana yakutenda mumpingo pasikati pa likuga lya acakulungwa jikamucisye mnope mpingo. Aganicisye yindu yitatu yakamucisya ayi: Candanda soni cakusosekwa mnope cili cakuti dongosoloji jikwakamucisya acakulungwa wosope ŵa mumpingo kumanyilila kuti Yesu ni jwali mtwe wa mpingo mwangasamala kandu kuti acakulungwawo akwete udindo wamtuli. (Aef. 5:23) Caŵili cili cacikusimanikwa pa Misyungu 15:22, papakusala kuti, “pati atupile apungu, yakuyiganicisya kuyitenda yikusakomboleka kusyene.” Acakulungwa ŵa mumpingo pakukambilana ngani sya mumpingo mwakupikanganana, yikusiyakamucisya kusagula yindu yakamulana ni Baibulo yayikusakamucisya mpingo wosope. (Mis. 27:17) Yehofa akusajaliwa yakusagulayi, yayikusatendekasya kuti yindu yijendeje cenene. Catatu, cili cakuti kukola acakulungwa ŵa mumpingoŵa, yikamucisye kuti likuga likombole kulolela soni kucinga ŵakutumicila ŵa Mlungu mipingo pajikutupilatupila. (Yes. 60:3-5) Agambe ganisya mwacikwelele ciŵalanjilo ca mipingo kutyoka pa 27,000 mu 1971 kwika pa 113,000 mu 2013. Kusala yisyene, Mwenye jwetu apelece ŵakucinga kwa ŵakumkuya ŵakwe pandaŵi jakwe.—Mik. 5:5.

KUCENGA KWA KAJENDESYE KA MPINGO KWAKUTENDEKWE M’LIKUGA

1881—Pakusaka kuti Ŵakulijiganya Baibulo ŵakutama mu mkuli umo amanyiganeje, M’bale Russell ŵaŵendile abale ni alongo ŵaŵatendaga misongano mwakutamilicika kuti ajimanyisye ofesi ja Watch Tower ya malo gakutendela misongano.
1895—Mipingo josope jasalilidwe kuti jisagule pasikati pawo abale ŵampaka atumicileje mpela acakulungwa ŵa mumpingo.
1919—Mwakamulana ni Malemba, ofesi ja nyambi jasagwile jwakulongolela undumetume mumpingo uliwose. Masengo gakwe gapwatikagapo kulongolela pa masengo gakulalicila soni kwalimbikasya abale ni alongo kuti alalicileje. Nambo acakulungwa ŵa mumpingo ŵane nganakamulanaga ni yeleyi.
1932—Dongosolo jakuti mpingo wusaguleje acakulungwa ŵa mumpingo ŵajimasisye. M’malo mwakwe, mpingo wasagulaga komiti ja undumetume jakupanganyidwa ni abale ŵaŵalimbicilaga pa masengo gakulalicila soni ŵaŵatendaga yindu mwakamulana ni lina lyasambano lyakuti Mboni sya Yehofa. Jumo mwa abaleŵa jwasagulidwaga ni ofesi ja nyambi kuti aŵe jwakulongolela undumetume.
1937—Abale ŵali mbali ja likuga lya ŵandu ŵangaŵalanjika ŵatandite kutumicila m’makomiti ga undumetume yalumo ni abale ŵasagulwe.
1938—Mipingo jatandite kuya yakuti abale ŵa maudindo ŵasaguleje mwakamulana ni Malemba. Jeleji jaliji mbesijakuti ŵandu ŵa mumpingo alisagulileje acakulungwa ŵa mumpingo.

Kuti amanyilile yejinji pakwamba ya mbili ja kajendesye ka yindu m’likuga alole buku jakuti Jehovah’s Witnesses—Proclaimers of God’s Kingdom, peji 204-235.

“Pakusagula acakulungwa ŵa mumpingo twajimikaga mkono wamlyo kaneko m’bale jwine jwajigalaga ciŵalanjilo ca ŵandu ŵajimice makono.”—Mlongo Rose Swingle jwa ku Chicago, mu upande wa Illinois, m’cilambo ca United States.

“Mlosyeje Cisyasyo Cambone kwa Ngondolosyo”

16. (a) Ana acakulungwa ŵa mumpingo akwete ukumu wamtuli? (b) Ana Ŵakulijiganya Baibulo ŵalosisye camtuli kupikanila maloŵe ga Yesu gakuti ‘msamalile ngondolo’?

¹⁶ Acakulungwa ŵa mumpingo mundaŵi jakundanda kwa Ŵakulijiganya Baibulo, ŵamanyilile kuti ŵakwete udindo wakwakamucisya ŵakulupilila acimjawo kuti apitilisye kumtumicila Mlungu. (Aŵalanje Agalatiya 6:10.) Mu 1908, ngani jijakopwece mu Sanja ja Mlonda jine jalondesisye maloŵe ga Yesu gakuti, “Msamalile ŵanace ŵangondolo ŵangu.” (Yoh. 21:15-17) Nganiji jasalile acakulungwa ŵa mumpingo kuti, “Naga tukuganicisya mnope ya maloŵe gaŵalamwile Ambuje, gakuti tusicimbicisyeje ngondolo, nikuti tuciwuwona kuti uli upile wetu wekulungwa wakulisya soni kwasamalila ŵakumkuya ŵa Klistu.” Mu 1925, Sanja ja Mlonda jine jagombelecesyesoni kusosekwa kwakutumicila mpela abusa. Nsanjaji jakumbwisye acakulungwa ŵa mumpingo kuti, “Mpingo uli wa Mlungu, . . . m’yoyo Mlungu cacajimba magambo ŵakwete udindo payakuti kasamalile ŵandu ŵakwe.”

17. Ana Yehofa ŵakamucisye camtuli ŵakulolela kuŵa ŵakucinga ŵambone mnope?

¹⁷ Ana likuga lya Yehofa lyakamucisye camtuli acakulungwa ŵa mumpingo kucenga pakakamule ka masengo gawo ga ubusa, yayili mpela kuŵika ‘silifa m’malo mwacisyano’? Mwakupeleka majiganyo. Sukulu ja Undumetume wa Mlungu jandanda ja ŵakulolela jatendekwe mu 1959. Mbali jine ja majiganyoga jakwete ngani jakuti “Akoleje Lung’wanu ni Mundu Jwalijose Pajika.” Abale ŵa maudindowo ŵalimbikasidwe “yakulinganya ndandanda jakwajendela ŵakulalicila m’majumba gawo.” Mbaliji jasasile matala gakulekanganalekangana gakutendela maulendo ga ubusa gakamula mtima. Mu 1966, Sukulu ja Undumetume wa Mlungu jijakwete yindu yine yasambano jatandite kutendekwa. Jakwete ngani jakuti “Kusosekwa kwa Masengo ga Ubusa.” Ana cakulinga cekulungwa ca mbali jasambanoji caliji cici? Caliji kwakamucisya ŵa maudindo kuti “akamusyanganeje kusisamalila mwacinonyelo ngondolo sya Mlungu, ni cakulinga cakuti akombolejesoni kusamalila maŵasa gawo soni kulalicila.” Mu yaka yapacangakaŵapa, paŵele mkutendekwa masukulu gejinji ga acakulungwa ŵa mumpingo. Ana paŵele yakuyicisya yamtuli ni majiganyo galiŵele mkupeleka likuga lya Yehofa? Masiku agano mumpingo wa Ciklistu mwana abale ŵajinji ŵakuŵajilwa, ŵakutumicila mpela ŵakucinga ŵausimu.

Sukulu ja Undumetume wa Mlungu, m’cilambo ca Philippines, mu 1966

18. (a) Ana acakulungwa ŵa mumpingo apegwile masengo gekulungwa gapi? (b) Ana ligongo cici Yehofa ni Yesu akusiŵanonyelaga acakulungwa ŵakulimbicila masengo gawo?

¹⁸ Yehofa ni jwalinganyisye yakuŵika acakulungwa ŵa Ciklistu kupitila mwa Mwenye jwetu Yesu. Atesile yeleyi kuti acakulungwaŵa akamuleje masengo gakusosekwa mnope. Ana masengo gakwe gali gapi? Gali gakusilongolela ngondolo sya Mlungu mu ndaŵi jakusawusya mnope ja masiku gambesi gano. (Aef. 4:11, 12; 2 Tim. 3:1) Yehofa ni Yesu akusiŵanonyela mnope acakulungwa ŵa mumpingo ŵakulipeleka ligongo abaleŵa akusaŵa ali mkupikanila maloŵe ga m’Baibulo gakuti “Mlanjeje likuga lya ngondolo lya Mlungu liŵampele jemanja kuti mlimsamalileje . . . mwalisosa lya jemanja . . . , ni mtima wakusaka kutumicila. . . , mlosyeje cisyasyo cambone kwa ngondolosyo. (1 Pet. 5:2, 3) Kwende tulole matala gaŵili gakusalocesya cisyasyo abusa ŵaciklistu kungondolo, soni gagakusakamucisya mpingo kuŵa pamtendele soni kuŵa wakusangalala.

“TWASIMONJILE MNOPE”

LIŴASA line lyalyatendaga umishonale ku Asia, lyatumicilaga mumpingo wine wele kwa yaka yejinji ciŵalanjilo ca ŵakulalicila nganicijawulaga pasogolo. Jemanjaji ŵayiweni kuti abale ŵa mumpingowu ŵakwete cinonyelo nambo yalemaga kuya kajendesye ka yindu mulikuga. Amishonaleŵa ali atesile unasi wambone ni ŵakulalicila ŵa mumpingowu, mwapanandipanandi ŵalinganyisye yakuwukamucisya mpingowo kuti ukuyeje yakusatenda ŵandu ŵa Yehofa pacilambo cosope. Ana papali yakuyicisya yamtuli? Pali pamasile yaka yiŵili, ciŵalanjilo ca ŵakusimanikwa pamisongano jampingo catupile kuwilisya kaŵili, ŵakulalicila ŵasambano ŵakamulaga nawo masengo gakulalicila soni ŵakulalicila ŵakupunda 20 ŵabatiswe. Liŵasalyo lyatite, “Twasimonjile mnope. Yehofa atupele majali gamajinji kwabasi. Mpingo wosope uli wakusangalala ligongo lyakukuya yalikusasala likuga lya Mlungu.”

Yakutenda Acakulungwa ŵa Mumpingo Pakusamalila Ngondolo sya Mlungu Masiku Agano

19. Ana tukusapikana uli ni acakulungwa ŵatukusajenda nawo mu undumetume?

¹⁹ Candanda, acakulungwaŵa akusakamula masengo yalumo ni mpingo. Luka, jwasasile pakwamba ya Yesu kuti, “Yesu ŵapitile m’misinda ni m’misi acilalicilaga ni kwasalila ŵandu Ngani Syambone syakwamba ya Ucimwene wa Mlungu. Pa ulendowo Yesu ŵaliji ni ŵakulijiganya ŵakwe likumi ni ŵaŵili ŵala.” (Luk. 8:1) Mpela mwayaŵelele kuti Yesu jwalalicilaga yalumo ni ŵakulijiganya ŵakwe, masiku aganosoni acakulungwa ŵacisyasyo cambone akusakamula masengo gakulalicila yalumo ni ŵakulupilila acimjawo. Jemanjaji akusatenda yeleyi ligongo akusamanyilila kuti kutenda yeleyi kukusakamucisya mpingo kuti uŵe wakamulana. Ana ŵandu ŵane mumpingo akusapikana wuli ligongo lyakola acakulungwa mpela ŵeleŵa? Mlongo jwine line lyakwe Jeannine, jwa yaka ya m’ma 80 jwatite, “Pandaŵi jinjesile mu undumetume ni jwamkulungwa jwa mumpingo, ngusawuwona kuŵa upile wa kukunguluka najo soni kum’manyilila cenene.” Steven jwa yaka ya m’ma 30 jwatite, “Pangulalicila ni jwamkulungwa jwa mumpingo ku nyumba ni nyumba, ngusayiwonaga kuti akusaka kungamucisya. M’yoyo kupocela cikamucisyo cakwe kukusandendekasya kuŵa jwakusangalala.”

Mkucinga ajipatile ngondolo jesokonecele cilo jili mkunya wula jambungo — Mwakulandana ni mwakusatendela m’busa pakusosasosa ngondolo jajisokonecele, m’yoyosoni acakulungwa ŵa mumpingo akusalipeleka mnope pakwasosasosa ŵandu ŵalesile kutenda yindu ni mpingo

20, 21. Ana acakulungwa mpaka ajigalile camtuli cisyasyo ca m’busa jwa m’citagu ca Yesu? Apelece cisyasyo. (Alolesoni libokosi lyakuti “Maulendo ga Ubusa Gakamucisya.”)

²⁰ Litala lyaŵili, lili lyakuti likuga lya Yehofa lyajiganyisye acakulungwa mwampaka atendele pakwakamucisya ŵandu ŵalesile kutendela yindu ni mpingo. (Aheb. 12:12) Ligongo cici acakulungwa akusosekwa kwakamucisya ŵandu ŵawujile munyuma mwausimu, soni ana mpaka atende yeleyi camtuli? Citagu ca Yesu ca mkucinga soni ngondolo jesokonecele cikusajanga cenene yiwusyoyi. (Aŵalanje Luka 15:4-7.) Mkucinga kapena kuti m’busa jwa m’citaguci pajwamanyilile kuti ngondolo jimo jisoŵile, jwatandite kujisosasosa mpela kuti jwakwete ngondolo jimopejo. Ana acakulungwa ŵa Ciklistu masiku agano mpaka asyasye camtuli cisyasyo ca m’busaju? Mpela mwayiŵelele kuti ngondolo jesokonecele jila jikusaŵape jakusosekwa kwa m’busa, nombesoni acakulungwa ŵa mumpingo akusam’wonaga mundu jwalesile kutendela yindu yalumo ni ŵandu ŵa Mlungu kuŵa jwakusosekwa. Acakulungwaŵa akumsawonaga mundu jwawujile panyuma mwausimu kuti ali mpela ngondolo jajisokonecele soni pakumkamucisya mundujo ngakusayiwona mpela kuti akwamba kwasa ndaŵi. Mpela mwayiŵelele ni mbusa jula kuti “akusajisosa [ngondolo] jesokonecele jila mpaka ali ajisimene,” nombenawo acakulungwa ŵa mumpingo akusalingalinga kwasosa soni kwakamucisya ŵandu ŵawujile panyuma mwausimu.

²¹ Ana m’busa jwakumsala m’citaguci akutenda cici pajipatile ngondolo jila? Akusajinyakula mwakusamala mnope ni “akusajitwicila pa makoyo” kaneko akusajijawusya kwasili sine. Mwakulandana ni yeleyi, acakulungwa ŵa mumpingo pakuŵeceta maloŵe gacinonyelo pakumkamucisya mundu, yikusaŵa mpela akum’nyakula mwakusamala mundujo yayikusamkamucisya kuti awujile mumpingo. Yeleyi ni yayamtendecele m’bale jwine jwa ku Africa lina lyakwe Victor, juŵalesile kusongana ni mpingo. Jwalakwe jwatite, “Kwa yaka 8 yosope yanaliji ndili ngangusongana, acakulungwa ŵa mumpingo ŵapitilisye kungamucisya.” Ana cici cacamkwayiye mnope Victor? Jwalakwe jwatite, “Lisiku line John, jwali jwamkulungwa jwa mumpingo jwanajinjile najo yalumo mu Sukulu ja Undumetume wa Upayiniya ŵanjendele ali ajigele yiwulili yatwajambulisye ku sukulu. Yiwuliliyi yangumbwisye yindu yakusangalasya yejinji, mwamti natandite ganicisya ya cisangalalo canakwete pandaŵi janamtumicilaga Yehofa.” Mwangacelewa, Victor jwatanditesoni kusongana panyuma pakumjendelaku, mwamti apano akutumicila mpela mpayiniya. Kusala yisyene, acakulungwa ŵa Ciklistu ŵakusasamala cenene ngondolo akusatukamucisya kuti tuŵeje ŵakusangalala.—2 Akol. 1:24.b

MAULENDO GA UBUSA GAKAMUCISYA

PAKUSAKA kusikamucisya ngondolo syasisokonecele, acakulungwa ŵa mumpingo ku United States ŵaganisisye yampaka atende pakusaka kwakamucisya ŵandu ŵalekangane ni likuga. Jemanjaji ŵamanyilile kuti ciŵandika ŵandu 30 ŵaŵalesile kutumicila Yehofa yaka yamunyuma ŵaliji ciŵela m’mikuli ja mipingo jawo. Ŵajinji mwa jemanjaji ŵaliji ŵacikulile.

Jumo mwa acakulungwa ŵa mumpingo, lina lyakwe Alfredo, ŵamanyililaga ŵanduŵa ni jwatandite kwajendela. Jwalakwe jwatite, “Lyamsano lililyose kundaŵi najendelaga ŵandu ŵawujile panyumaŵa.” Pasimene ni ŵanduŵa panyumba, M’bale Alfredo jwatendega yakuti mundujo aŵe jwagopoka pakukambilana najo. M’baleju jwalosyagasoni kutyocela mumtima kuti yayikumtendecela mundujo yikumkwaya mnope jwalakwe. Jwalakwe jwasalilaga ŵawujile panyuma kuti mpingo nganiwuliŵalila masengo gambone gatesileje pakwawusya pasogolo Ucimwene wa Yehofa. Alfredo jwatite, “Ndili namsalile m’bale jwine jwacikulile ya maawala gaŵalalicile soni winji wa magasini gaŵagaŵile m’mwesi wakwe wakumalisya m’caka ca 1976, m’balejo jwagwisisye misosi.” M’bale Alfredo ŵaŵalanjilaga ŵaŵujile panyuma lilemba lya Luka 15:4-7, 10, soni ŵawusyaga kuti, “Ana cici cacikusatendekwa ngondolo jesokonecele pajiwujile mumpingo? Amanyilile kuti Yehofa, Yesu, soni malayika gakusasangalala mnope.”

Kwa yaka yiŵili, M’bale Alfredo ŵaŵele ali mkwajendela ŵandu ŵawujile panyuma. Ana yakuyicisya yakwe yaliji yamtuli? Jwalakwe jwaliji jwakusangalala kuti ŵakamucisye abale ŵaŵili kutandasoni kusongana ni mpingo. Abaleŵa akusayikaga mwakutamilicika pamisongano ja Lyamlungu. M’bale Alfredo mwakusangalala ŵaŵecete kuti, “ndaŵi jilijose payice ku Nyumba ja Ucimwene unesoni nagwisyaga misosi.” Jwalakwe jwasasilesoni kuti, “Atamose kuti ŵandu ŵawujile panyumaŵa ŵatandite kusimanikwa pamisongano, Lyamsano lililyose ngusinajendelape, ligongo lyakuti jemanjaji akusasala kuti maulendoga gakusigalimbikasya. Unesoni yikusalimbikasya.”

Kucenga pa Kajendesye ka Mpingo Kutendekasisye Ŵandu ŵa Mlungu Kuŵa Ŵakamulana

22. Ana cilungamo soni mtendele yikamucisye camtuli mkamulano wa mpingo wa Ciklistu? (Alolesoni libokosi lyakuti “Twasimonjile mnope.”)

²² Mpela mwatuyiwonele kundanda kwa mtwewu, Yehofa ŵasasile mkanipaŵe kuti cilungamo soni mtendele ucitupa pasikati pa ŵandu ŵa Mlungu. (Yes. 60:17) Ndamo siŵilisi nisyasikusakamucisya mpingo kuti uŵe wakamulana. Mwamtuli? Pakwamba ya cilungamo, Baibulo jikusasalaga kuti, “Ambuje Mlungu jwetu ali Mlungu jumope basi.” (Det. 6:4) Yehofa akusalosyaga ndamo syakwe sya cilungamo mwakulandana m’mipingo josope ja pacilambo capasi. Yiwundo ya Yehofa yakwamba cambone soni cakusakala yangacengaga soni yikusaŵaga yakulandana ‘m’mipingo josope ja ŵandu ŵa Mlungu.’ (1 Akoli. 14:33) Mpingo ukusapitilisya kukula naga ukukamulicisya masengo yiwundo ya Mlungu. Pakwamba ya mtendele, Mwenye jwetu akusasakaga kuti tusangalaleje ni mtendele wawukusimanikwa mumpingo nambosoni kuti tuŵeje ŵandu “ŵakwikasya mtendele.” (Mat. 5:9) Camti m’yoyo, tukusatenda yakomboleka ‘kusosasosa yindu yampaka yikamucisye kuti paŵe pana mtendele.’ Naga pasikati petu pana kutindana nganisyo, tukusalingalinga kumasya kutindana nganisyoko. (Alo. 14:19) Kutenda yeleyi kukusakamucisya kuti mumpingo muŵeje mwana mtendele soni mkamulano.—Yes. 60:18.

23. Mpela ŵakutumicila ŵa Yehofa, ana masiku agano tukusasangalala ni cici?

²³ Mu November 1895, Sanja ja Mlonda jine pajagambile kusala kuti mumpingo mupagweje acakulungwa, abale ŵa maudindo ŵayamicile yeleyi. Ana yakwayiye mwamtuli? Jemanjaji ŵalosisye kuti ŵasacililaga kuti yeleyi yitendekwe soni ŵapopelaga kuti kucenga kwasambanoku kukamucisye kuti ŵandu ŵa Mlungu “aŵeje ŵakamulana m’cikulupi.” Patukuganicisya yayitendekwe munyumamu, tukusasangalala kumanyilila kuti kucenga kwakutendekwe mwapanandipanandi pa kajendesye kampingo, kutendekwe ni Yehofa kupitila mwa Mwenye jwetu Yesu. Yeleyi yilimbikasisye mkamulano wetu pa kulambila. (Sal. 99:4) Yakuyicisya yakwe, masiku agano ŵandu ŵa Yehofa pacilambo cosope capasi, akusajenda ni “mtima umo,” kukuya “litala limo” soni kutumicila Mlungu jwamtendele ‘wosope ŵene mwakumpikanila.’—2 Akoli. 12:18; aŵalanje Sefaniya 3:9.

a Yakuyicisya ya kuwungunyaku yikusimanikwa m’malifalesi ga buku jakuti Aid to Bible Understanding.

b Alole ngani ja mtwe wakuti, “Akulu Achikhristu Ndi Antchito Anzathu Otipatsa Chimwemwe,” mu Sanja ja Mlonda ja January 15, 2013, mapeji 27-31.

YALIKUTENDA LIKUGA LYAKULONGOLELA PAKUSAMALILA YINDU YA UCIMWENE

Likuga Lyakulongolela lya Mboni sya Yehofa lipanganyidwe ni abale ŵasagulwe ŵali ŵakutumicila ŵa Yehofa Mlungu. Jemanjaji mpela likuga akupanganya “kapolo jwakulupicika ni jwalunda.” Jemanjaji akwete udindo wakupeleka cakulya causimu, wakusala yakuŵajilwa kutenda mu likuga soni kulongolela pa masengo gakulalicila pacilambo cosope.—Mat. 24:14, 45-47.

Misongano ja Likuga Lyakulongolela jikusatendekwa lyatatu wiki jilicose. Misonganoji jikusakamucisya abaleŵa kuti akamuleje masengo gawo cenene. (Sal. 133:1) Abale ŵa m’Likuga Lyakulongolela akusatumicilasoni m’makomiti gakulekanganalekangana. Komiti jilijose jikwete mbali jajikusalolela pakusaka kwawusya pasogolo masengo ga ya Ucimwene. Makomitiga soni masengo gagakwete ni aga:

Komiti ja Ŵakulondesya Masengo

Abale ŵakusatumicila m’komitiji, akusasamalila ngani syakwayana ni magambo soni kuŵecetana ni acimlokota ngani naga yili yakusosecela kuti ŵasalile yisyesyene yatukusakulupilila. Akusasamalilasoni ngani syakwayana ni ngosi sya m’cipago kapena kuti sya m’cilengedwe, kulagasidwa, soni yakutendekwa yine yayikusakwaya abale ni alongo ŵetu kulikose pacilamboci.
Komiti Jakulola ya Ŵakutumicila pa Beteli

Komitiji jikwete udindo wakwakamucisya nambosoni kwasamalila mwausimu ni mwakucilu abale ni alongo ŵakusatumicila pa Beteli pacilambo cosope. Komitiji jikwetesoni udindo wakusagula soni kuŵilanga ŵandu kuti atande kutumicila pa Beteli. Konjecesya pelepa akusasamalilasoni yiwusyo yakutyocela kwa ŵandu wakusatenda undumetume wa pa Beteli
Komiti Jakulolela Masengo Gakuwandisya Mabuku

Komitiji jikusalolela masengo gakupulinta soni kuwandisya mabuku gakusala ya Baibulo pacilambo cosope. Komitiji jikusalolela malo gakupulintila mabuku soni yida yakulekanganalekangana yalikusakamulicisya masengo likuga lya Mboni sya Yehofa. Jikusalolelasoni masengo ga yakutaŵataŵa pacilambo cosope, kupwatikapo masengo gakutaŵa Nyumba sya Ucimwene. Jikusalolecesya kuti mbiya syakusapeleka ŵandu pakwawusya pasogolo masengo ga Ucimwene sikukamula masengo gakwe.
Komiti ja Undumetume

Abale ŵa m’komitiji akusalolela mbali syosope sya masengo gakulalicila ni ngani syakwayana ni mipingo, ŵakulalicila, apayiniya, acakulungwa ŵa mumpingo, ŵakulolela mikuli, soni amishonale. Mwa yindu yine yejinji yakusalolela, yili masengo ga Makomiti Gakuŵecetana ni Ŵacipatala.
Komiti Jakwiganya

Komitiji jikusalolela misongano jamkuli, jaupande, soni ja pampingo. Jikusalolelasoni Sukulu ja Gileadi, Sukulu ja Ŵakulalicila ya Ucimwene, Sukulu ja Undumetume wa Upayiniya, soni ni masukulu gane. Konjecesya pelepa, komitiji jikusalolelasoni masengo gakulinganya msongano wa Undumetume ni Umi Wetu wa Ciklistu, yindu yakwamba kupikanila soni mafidiyo.
Komiti Jakulemba

Abale ŵa m’komitiji, akusalolela masengo gakulinganya cakulya causimu ca abale ni alongo soni ca ŵandu ŵane kupitila m’mabuku soni pa Intaneti. Abaleŵa akusasamalilasoni webusayiti ja likuga soni kulolela masengo ga kugopolela mabuku gagakutendekwa pacilambo cosope. Konjecesya pa yeleyi, komitiji jikusajanga yiwusyo yawusisye ŵandu kutyocela pa lilemba line lyakwe soni yiwusyo yine yakutyocela pa ngani syaŵalasile m’mabuku getu.