LIJIGANYO 01
Ana Baibulo Mpaka Jakamuchisye Chamtuli?
Ŵandu ŵajinji akusasaka ali amanyilile yakwamba umi, kulaga, chiwa soni sogolo jawo. Nambosoni tukusalaga nganisyo ni yampaka tutende kuti tupate yakusosechela ya paumi soni kola liŵasa lyakusangalala. Ŵandu ŵajinji amanyilile kuti Baibulo jangagamba kwanga yiwusyo yakusosekwa mnope yakwamba umi, nambo jikusakamuchisyasoni kukola umi wambone. Ana akuganisya kuti Baibulo mpaka jimkamuchisye mundu jwalijose pajika?
1. Ana Baibulo jikusajanga yiwusyo yapi?
Baibulo jikusajanga yiwusyo yakusosekwa mnope ayi: Ana umi watandite chamtuli? Ana chakulinga cha umi chili chichi? Ligongo chichi ŵandu akusimana ni yakusawusya? Ana ni chichi chachikusatendekwa mundu pawile? Naga jwalijose akusasaka mtendele, ligongo chichi ngondo sikusatendekwa? Ana chilambochi chichimala? Baibulo jikusatulimbikasya kupata kwanga kwa yiwusyoyi soni ŵandu ŵajinji apatile kwanga kwakwe.
2. Ana Baibulo mpaka jitukamuchisye chamtuli kuŵa ŵakusangalala?
Baibulo mpaka jitulongolele chenene paumi. Mwachisyasyo, jikusakamuchisya ŵalombane kuti asangalaleje yisyesyene. Jikusatusalila yampaka tutende kuti tumalane ni kulagasika nganisyo soni yampaka tutende kuti tusangalaleje ni masengo getu. Patukupitilisya kulijiganya bukuji, chamanyilile kuti “Malemba gosope [maloŵe galigose gagali m’Baibulo] . . . gakusakamuchisya.”—2 Timoteo 3:16.
Kabukuka ngakakwinjila m’malo mwa Baibulo. M’malo mwakwe kakwalimbikasya wawojo kuti alijiganyeje Baibulo pajika. Myoyo tukwalimbikasya kuti aŵalanjeje malemba ga mu lijiganyo lililyose soni aloleje kamulana kwakwe ni yakulijiganya.
KULIJIGANYA YEJINJI
Chitulole yajitite Baibulo pakwakamuchisya ŵandu, yampaka tutende kuti tusangalaleje patukujiŵalanga soni ligongo lyakwe tukusosekwa kwaŵenda ŵane kuti atukamuchisyeje kujipikanichisya.
3. Baibulo mpaka jitukamuchisye
Baibulo jili mpela kuŵala kwa machili mnope. Mpaka jitukamuchisye kusagula chenene yindu soni kumanyilila yayichitendekwa msogolo.
Aŵalanje Salimo 119:105, kaneko akambilane yiwusyo ayi:
Ana juŵalembile Salimoji ŵajiwonaga wuli Baibulo?
Ana wawojo akusajiwona wuli Baibulo?
4. Ana Baibulo mpaka jijanje yiwusyo yetu?
Baibulo jamkamuchisye jwamkongwe jwine kupata kwanga kwa yiwusyo yaŵakwete. Alolele FIDIYO, kaneko akambilane yiwusyo ayi.
Mwakamulana ni fidiyoji, ana jwamkongweju jwakwete yiwusyo yapi?
Ana kulijiganya Baibulo kwamkamuchisye wuli?
Baibulo jikusatulimbikasya kuti tuwusyeje yiwusyo. Aŵalanje Mateyu 7:7, kaneko akambilane chiwusyo achi:
Ana akwete yiwusyo yapi yakusasaka kuti Baibulo jajanje?
5. Yampaka atende kuti kuŵalanga Baibulo kuŵeje kwakusangalasya
Kuŵalanga Baibulo kukusikwasangalasya ŵandu ŵajinji soni kukwakamuchisya. Alolele FIDIYO, kaneko akambilane yiwusyo ayi.
Mwakamulana ni fidiyoji, ana ŵachinyamata akusakuwona uli kuŵalanga?
Atamose kuti ŵachinyamataŵa ŵanganonyela yakuŵalanga, ligongo chichi akusaŵalangaga Baibulo?
Yajikusasala Baibulo mpaka yitulimbikasye soni kutupa chembecheyo. Aŵalanje Aloma 15:4, kaneko akambilane chiwusyo achi:
Ana akusangalala ni yatuŵalasile palilembali pakwamba yatukwembecheya msogolo?
6. Ŵane mpaka atukamuchisye kujipikanichisya Baibulo
Kupwatika pakulijiganya pajika, ŵandu ŵajinji ayiweni kuti yili yakamuchisya kulijiganya Baibulo ni ŵane. Aŵalanje Masengo 8:26-31, kaneko akambilane chiwusyo achi:
Ana Baibulo mpaka tujipikanichisye chamtuli?—Alole vesi 30 ni 31.
Jwamlume jwa ku Itiyopiya jwasosekwaga chikamuchisyo kuti agapikanichisye Malemba. Ŵandu ŵajinji akuweni kusosekwa kwakulijiganya Baibulo ni ŵane
YAKUSAŴECHETA ŴANDU ŴANE: “Kulijiganya Baibulo kuli kwasa ndaŵi.”
Nambi wawojo akuganisya uli? Ligongo chichi akwanga myoyo?
YALIJIGANYISYE
Baibulo jili jakamuchisya, jikusajanga yiwusyo yakusosekwa mnope, jikusijalimbikasya ŵandu soni kwakamuchisya kola sogolo jambone.
Yiwusyo Yakuwilisya
Ana m’Baibulo mpaka tupate malangiso gamtuli?
Ana Baibulo jikusajanga yiwusyo yine yapi?
Ana akusaka kulijiganya yindu yapi m’Baibulo?
YAKULINGA YINESONI
Alole yajikuti kwakamuchisya ŵandu Baibulo.
“Baibulo Jikusajiganya Yakamucisya Ndaŵi Syosope” (Sanja ja Mlonda Na. 1 2018)
Alole yajatite Baibulo pakumkamuchisya jwamlume juŵalagasikaga nganisyo.
Awungunye yajikusasala Baibulo yampaka yikamuchisye maŵasa.
“Yindu 12 Yakamucisya Maŵasa Kuŵa Gakusangalala” (Ajimuche! Na. 2 2018)
Alijiganye yajikusasala Baibulo pakwamba jwakulamulila chilambochi.
Ligongo Cici Tukusosekwa Kulijiganya Baibulo?—Fidiyo Josope (3:14)