Malifalensi ga Pologalamu ja Utumiki ni Umi Wetu Wachiklistu
JANUWALE 2-8
CHIPANJE CHAKUSIMANIKWA M’MALOŴE GA MLUNGU | 2 AYIMWENE 22-23
“Ligongo Chichi Tukusosekwa Kuŵa Ŵakulinandiya?”
w00 9/15 29-30
Yehofa Jwamnonyele Yosiya Ligongo Lyakuti Jwaliji Jwakulinandiya
Ŵandu ŵaŵalinganyaga nyumba ja Mlungu ŵakamulaga masengo mwakulipeleka lisiku lililyose. Mwangakayichila Yosiya jwamyamichilaga Yehofa, ligongo lyakuti ŵamasengoŵa ŵalinganyagasoni nyumba ja Mlungu. Nyumbaji jajonanjidwe ni achinangolo ŵa Yosiya ŵaŵapali jwalakwe mkanatande kulamulila. Masengoga gali mkati, Shafani jwapite kukumsalila Yosiya utenga. Paŵajawulaga ŵaliji ali ajigele mpukutu. Ana utengawu ŵaliji ŵamtuli? Jwalakwe jwatite Hilikiya juŵaliji jwamkulungwa jwa ŵakutaga mbopesi “ŵasimene buku ja Malamusi giŵapeleche AMBUJE, Mlungu kwa Mose.” (2 Mbili 34:12-18) Mwangakayichila bukuji jaliji jisyesyene jajalembedwe ni Mose.
Yosiya jwapikanilaga mwakusamala bukuji pajaŵalanjidwaga. Shafani pajwaŵalangaga bukuji mwenyeju jwaganichisyaga mwalikumkwayila lilamusi lililyose jwalakwejo soni ŵandu ŵaŵalamulilaga. Yayamkwayiye mnope yaliji yakuti bukuji jagombelechesyaga kusosekwa kwa kulambila kusyesyene soni chilango chachachipochela ŵandu naga akulambila milungu ja unami. Yosiya jwapwapwile yakuwala yakwe paŵamanyilile kuti ŵandu ŵakwe nganakuyaga malamusi gosope ga Mlungu. Kaneko ŵamsalile Hilikiya, Shafani soni ŵandu ŵane kuti: ‘AMBUJE akwenela kuti andumbilile une ni ŵandu ŵangu wosope ŵa chilambo cha Yuda, ligongo lyakuti achinangolo ŵetu nganagapikanila malamusi gagalembedwe m’buku aji. Mjawule mkawusye AMBUJE yakusosa kuti uweji tuyitende.’—2 Ayimwene 22:11-13; 2 Mbili 34:19-21.
w00 9/15 30 ¶2
Yehofa Jwamnonyele Yosiya Ligongo Lyakuti Jwaliji Jwakulinandiya
Ŵandu ŵaŵatumile Yosiyaŵa ŵajawile kwa jwakulochesya jwamkongwe jwa ku Yelusalemu lina lyakwe Hulida. Ŵanduŵa ŵamsalile Yosiya yindu yaŵasasile jwakulochesyaju. Hulida jwasasile kuti maloŵe ga Yehofa gagasimanikwe m’buku ja chilamusichi, gakusala kuti mtundu ŵakwimuchilawu uchipochela chilango, gachitendekwa nditu. Nambo ŵandu ngasapochela chilangochi mundaŵi ja ulamusi wa Yosiya. Yili myoyo ligongo lyakuti jwalakwe jwalinandiye pameso pa Yehofa Mlungu. Jwalakwe chachiwa ni kuŵichidwa m’malembe mwamtendele soni chachigona ni achinangolo ŵakwe.—2 Ayimwene 22:14-20; 2 Mbili 34:22-28.
Mfundo Syakamuchisya
w01 4/15 26 ¶3-4
Yindu Mpaka Yajendele Chenene Atamose Kuti Ŵasimanaga ni Yakusawusya Paŵaliji Mwanache
Atamose kuti Yosiya jwasimanaga ni yakusawusya paŵaliji mwanache nambope jwalakwe jwapitilisye kutenda yindu yakumsangalasya Yehofa. Mwamti mu uchimwene wakwe yindu yamjendelaga chenene, ni ligongo lyakwe Baibulo jikusati, “Paliji pangali mchimwene jwine juŵajinjile uchimwene kala soni kapena juŵajinjile uchimwene panyuma pa Yosiya, jwele juŵapitikuchile kwa AMBUJE ni mtima wakwe wosope, ni umi wakwe wosope, soni ni machili gakwe gosope, pakugakuya Malamusi ga Mose.”—2 Ayimwene 23:19-25.
Yosiya ali chisyasyo chambone kwa ŵandu ŵaŵasimene ni yakusawusya ali ŵanache. Ana tukulijiganya chichi kutyochela kwa Yosiya? Ana ni yindu yapi yayamkamuchisye Yosiya kuti apitilisye kutenda yindu yambone?
JANUWALE 9-15
CHIPANJE CHAKUSIMANIKWA M’MALOŴE GA MLUNGU | 2 AYIMWENE 24-25
“Aŵeje Mesope ni Ndaŵi Jatuliji”
w01 2/15 12 ¶2
Lisiku lya Kulamula lya Yehofa Liŵandichile
2 Maloŵe gakulochesya gaŵaŵechete Sefaniya komboleka kuti gamlimbikasisye Yosiya kuti amasye kulambila kwa unami mu Yuda. Nambo yaŵatesile Yosiya pakumasya kulambila kwa unami nganiyityosya yakusakala yosope kapena ulemwa ŵaŵatesile anganga ŵakwe, ŵaŵaliji Mwenye Manase. Anganga ŵakweŵa ‘ŵawuleje ŵandu ŵajinji ŵangalemwa.’ (2 Ayimwene 24:3, 4; 2 Mbili 34:3) Ligongo lya yeleyi yaliji yakuti lisiku lya Yehofa lyakuti apeleche chilango lichiyika nditu.
w07 3/15 11 ¶10
Mfundo Syekulungwakulungwa sya M’buku ja Yelemiya
Pachayikaga chaka cha 607 B.C.E. Sedekiya jwaliji ali alamulile kwa yaka 11. Pandaŵiji Mwenye Nebukadinesa jwa ku Babulo jwaliji ali asyungulile msinda wa Yelusalemu kwa miyesi 18. Lisiku lya msano ni kaŵili lya mwesi wa msano m’chaka cha 19 cha ulamusi wa Nebukadinesa, Nebusaladani nduna jakwe soni juŵaliji jwamkulungwa jwa asilikali ŵangondo “ŵajinjile mu msinda ŵa Yelusalemu.” (2 Ayimwene 25:8) Komboleka kuti paŵaliji ku masakasaka gawo kusa kwa msindawu, Nebusaladani jwalolaga mwayiŵelele yindu soni jwaganisyaga yampaka atende kuti awugomeche msindawu. Pali pagambile kumala masiku gatatu, palisiku lyatatu lya mwesiwu, jwalakwe ‘jwajinjile mu msinda wa Yelusalemu.’ Kaneko ŵawuchomile msindawu ni moto.—Yelemiya 52:12, 13.
Mfundo Syakamuchisya
w05 8/1 12 ¶1
Mfundo Syekulungwakulungwa sya M’buku ja 2 Ayimwene
24:3, 4. Yehofa nganiŵakululuchila Ayuda ligongo lyakuti Manase ‘jwawuleje ŵandu ŵajinji ŵangalemwa.’ Mlungu akusakuwona kuwulajidwa kwa mundu jwangalemwa kuŵa ngani jekulungwa. Myoyo tukakayichilaga kuti Yehofa chachajonanga wosope ŵaŵawuleje ŵandu ŵangalemwa.—Salimo 37:9-11; 145:20.
JANUWALE 16-22
CHIPANJE CHAKUSIMANIKWA M’MALOŴE GA MLUNGU | 1 MBILI 1-3
“Baibulo Jili Buku Jajikusasala Yisyesyene Ngaŵaga Yagamba Ganisya”
w09 9/1 14 ¶1
Ana Adamu ni Hawa Ŵaliji Ŵandu Ŵasyesyene?
Mwachisyasyo, aganichisye ya mena ga achinangolo ŵa Chiyuda gakusagasala m’buku ja 1 Mbili chaputala 1 mpaka 9 soni m’buku ja Luka chaputala 3. Buku ja 1 Mbili jikusasala ya achinangolo 48 pele buku ja Luka jikusasala ya achinangolo 75. Buku ja Luka jikusasala msele wa achinangolo ŵa Yesu Klistu. Pele buku ja Mbili jikusasala msele wa achayimwene soni wa ŵambopesi ŵa mtundu ŵa Aisalaeli. Mabuku gaŵiliga gakusasala mena ga ŵandu ŵakumanyika chenene mpela Solomoni, Daudi, Yakobo, Isaki, Abulahamu, Nowa, soni Adamu. Mena gosopega gakusasala ya ŵandu ŵasyesyene soni pakusala menaga yikusalosya kuti Adamu ali mundu jwandanda soni jwaliji jusyesyene.
w08 6/1 3 ¶4
Ngani ja Nowa Soni Chigumula Jili Jisyesyene
Ngani siŵili sya m’Baibulo syakusala ya misele ja achinangolo sikusalosya kuti Nowa jwaliji mundu jusyesyene. (1 Mbili 1:4; Luka 3:36) Esala soni Luka ŵaŵasasile ya misele ja achinangoloji, ŵawungunyaga yindu mwakusamala. Luka ŵasasile ya msele wa achinangolo ŵa Yesu mpaka kuja kwika kwa Nowa.
w09 9/1 14-15
Ana Adamu ni Hawa Ŵaliji Ŵandu Ŵasyesyene?
Mwachisyasyo, aganichisye chijiganyo cha m’Baibulo chakuti Yesu jwatuwombwele. Ŵadini ŵajinji akusachinonyela chijiganyochi. Mwakamulana ni chijiganyochi, Yesu Klistu jwapeleche umi wakwe wamlama pakusaka kwawombola ŵandu ŵajinji ku ulemwa wawo. (Mateyu 20:28; Yohane 3:16) Mpela mwatukumanyilila kuwombola kuli kupeleka yindu yakulandana ndendende ni yindu yamjonasile kapena yamlemwisye. Ni ligongo lyakwe Baibulo jikusati Yesu jwapeleche mbopesi “jakwanila kwawombola ŵandu.” (1 Timoteyo 2:6) Nambo mwine mpaka tuliwusye kuti, ‘Ana mbopesiji jaliji jakwanila chamtuli?’ Baibulo jikusajanga kuti, “Mpela mwayiŵelele kuti ŵandu wosope akuwa ligongo lya Adamu, myoyosoni wosope chachikola umi ligongo lya Klistu.” (1 Akolinto 15:22) Umi wamlama waŵapeleche Yesu pakwawombola ŵandu ŵakupikanila, uli wakwanila ndendende umi wamlama waŵajasile Adamu mu mgunda ŵa Edeni. (Aloma 5:12) Kusala mwangapita mumbali yikaŵe kuti Adamu nganaŵa mundu jusyesyene nikuti mbopesi jiŵapeleche Klistu jikaliji jangali mate.
Mfundo Syakamuchisya
it-1 911 ¶3-4
Msela wa Achinangolo
Mena ga Achakongwe. Pakusala msele wa achinangolo akusasala mena ga achakongwe naga pana magongo gakutendela yeleyo. Pa Genesesi 11:29, 30, akusasala ya Salayi (Sala) pakusaka kulosya kuti mbeju jaŵajisasile Mlungu jichipagwa kutyochela mwa Salayi ngaŵa mwa jwamkongwe jwine jwa Abulahamu. Nganiji jikusasalasoni ya Milika, ŵaŵaliji anganga ŵawo ŵakongwe ŵa Labeka, ŵamkwakwe Isaki. Milika jwakolanjidwe munganiji pakusaka kulosya kuti Labeka jwaliji mwanache jwa jwachibale jwa Abulahamu, ligongotu Isaki nganasosekwaga kulombela jwamkongwe jwakutyochela ku mitundu jine. (Gen 22:20-23; 24:2-4) Pa Genesesi 25:1, pakusasala ya Ketula juŵaliji ŵamkwakwe Abulahamu. Yeleyi yikulosya kuti Sala ali awile Abulahamu jwalombelesoni. Yikulosyasoni kuti machili gakuŵeleka gaŵampele Yehofa, galiji chiŵele atamose kuti paliji pali pamasile ya yakupunda 40. (Alo 4:19; Gen 24:67; 25:20) Kukolanjidwa kwa Ketula kukusalosyasoni ulongo uwapali pasikati pa Aisalaeli ni Amidiyani soni mbumba sine sya Aluya.
Baibulo jikusasala ya Leya, Lakelo soni mena ga achakongwe ŵa pambali ŵa Yakobo yimpepe ni mena ga ŵanache ŵawo. (Gen 35:21-26) Yeleyi yikusatukamuchisya kupikanichisya muŵatendelaga yindu Mlungu ni ŵanacheŵa. Pamagongo ga kulandana ni gelega, Baibulo jikusasalasoni mena ga achakongwe ŵane pakusala ya misele ja achinangolo. Naga achakongwe ni ŵapochele chipanje cha baba ŵawo mena gawo gakusasalidwa. (Nu 26:33) Yili yisyene kuti ngani ja Tamala, Lahabu, soni Lute jili jakutesya lung’wanu. Pana yindu yine yakusangalasya yaŵatesile achakongweŵa yayatendekasisye kuti asimanikwe mu msele wa ŵapagwile Mesiya, jwali Yesu Klistu. (Gen 38; Lut 1:3-5; 4:13-15; Mat 1:1-5) Malemba gane gagakusasala mena ga achakongwe pakusala msela ŵa achinangolo gali 1 Mbili 2:35, 48, 49; 3:1-3, 5.
JANUWALE 23-29
CHIPANJE CHAKUSIMANIKWA M’MALOŴE GA MLUNGU | 1 MBILI 4-6
“Ana Mapopelo Gangu Gakusalosya Kuti Ndili Mundu Jwamtuli?”
w10 10/1 23 ¶3-7
“Jwakupikana Lipopelo”
Yabesi jwanonyelaga kupopela. Jwatandite lipopelo lyakwe mwakumŵenda Mlungu kuti ampe upile. Kaneko jwaŵendile yindu yitatu. Yaŵaŵendileyi yalosisye kuti akwete chikulupi.
Chandanda, Yabesi jwamŵendile Mlungu kuti ampe “chilambo chachikulungwa.” (Ndime 10) Mundu jwakuchimbichikwaju nganasumulaga malo gachimsyene kapena kukumbila yindu yachimsyene. Komboleka kuti yaŵaŵendileyi yasalaga mnopemnope ya ŵandu ngaŵaga malo. Komboleka kuti paŵaŵendaga kuti chilambo chakwe chikule jwagopolelaga kuti paŵe ŵandu ŵajinji ŵakulambila Mlungu jwakuwona.
Chaŵili, Yabesi jwaŵendile kuti “mkono, NWT.” wa Mlungu uŵe ni jwalakwejo. Mkono wa Mlungu wakuwanichisyawu gali machili gakwe, gakusagakamulichisya masengo pakwakamuchisya ŵandu ŵakusamtumichila. (1 Mbili 29:12) Kuti yaŵaŵendileyi yikomboleche, Yabesi jwamdalilaga Mlungu. Jwalakwe jwamanyililaga kuti mkono wa Mlungu nganiwuŵa wejipi kuti mpaka ulepele kwakamuchisya ŵandu ŵali ŵakulupichika kwa jwalakwe.—Yesaya 59:1.
Chatatu, Yabesi jwaŵendile kuti, ‘Anjinjilichisye une ku yindu yosope yakusakala yele yampaka yitandisye yipwetesi kwa une.’ Maloŵega ngagakugopolela kuti Yabesi jwaŵendaga kuti akasimana ni yakusawusya, nambo jwaŵendaga kuti amkamuchisye kuti yakusawusyayo yikamtengusya.
Lipopelo lya Yabesi lyalosisye kuti jwaganichisyaga mnope ya kulambila kusyesyene, jwamkulupililaga soni kumdalila Mlungu jwali jwakupikana mapopelo. Ana Yehofa jwajanjile lipopeloli? Kangani kejipika kakusamala ni maloŵe gakuti, “Mlungu ŵampele yele yiŵaŵendileyo.”
Mfundo Syakamuchisya
w05 10/1 9 ¶7
Mfundo Syekulungwakulungwa sya M’buku ja 1 Mbili
5:10, 18-22. Mundaŵi ja Mwenye Sauli, mbumba syasyaliji kungopokolyuŵa kwa Yolodani syagomeche Ahagili atamose kuti ŵaliji ŵajinji. Jemanjaji ŵakombwele kwagomeka Ahagili ligongo lyakuti ŵamdalilaga mnope Yehofa. Kwende wosope tumdalileje mnope Yehofa patukuputa ngondo ja usimu jakulimbana ni misimu jakusakala.—Aefeso 6:10-17.
JANUWALE 30–FEBULUWALE 5
CHIPANJE CHAKUSIMANIKWA M’MALOŴE GA MLUNGU | 1 MBILI 7-9
“Yehofa Mpaka Ŵakamuchisye Kutenda Utumiki Wakusawusya”
w05 10/1 9 ¶8
Mfundo Syekulungwakulungwa sya M’buku ja 1 Mbili
9:26, 27. Alefi ŵaŵalondelaga payipata ŵasosekwaga kuŵa ŵakulupichika mnope. Jemanjaji ŵapaga makiyi gakwinjilila malo geswela ga m’nyumba jakulambilila. Jemanjaji ŵaliji ŵakudalilichika ligongo ŵawugulaga yipata lisiku lililyose. M’weji atupele masengo gakwalalichila ŵandu ŵamudela jetu soni kwakamuchisya kuti aŵe ŵakutumichila ŵa Yehofa. M’wejisoni tuŵeje ŵakulupichika soni ŵakudalilichika mpela muŵatendelaga Alefi ŵaŵalondelaga payipata.
w11 9/15 32 ¶7
Pakusimana ni Yakusawusya Atendeje Yindu Mpela Finihasi
Finihasi jwakwete udindo wekulungwa mundaŵi ja Aisalaeli jwakala. Jwalakwe jwakombolaga kumalana ni yakusawusya yaŵasimanaga nayo ligongo lyakuti jwaliji jwakulimba mtima, jwalunda, soni jwamdalilaga Yehofa. Yehofa jwamnonyelaga mnope Finihasi ligongo lyakuti jwawusamalilaga chenene mpingo wa Mlungu. Mwamti panyuma pa yaka 1,000, Esala jwasalilidwe kulemba kuti, “Finihasi mwanache jwa Eliyesa ni ŵaliji mkwalamulila ligongo AMBUJE ŵaliji ni jwalakwejo.” (1 Mbi. 9:20) Yeleyi ni yakusosekwa kutendasoni ŵakusalongolela ŵandu ŵa Mlungu masiku agano. Nambosoni Aklistu wosope ŵakusamtumichila Yehofa mwakulupichika akusosekwa kumsyasya Finihasi.
Mfundo Syakamuchisya
w10 12/15 21 ¶6
Amjimbileje Yehofa
6 Kupitila mwa ŵakulochesya Yehofa jwalongolelaga ŵakutumichila ŵakwe kuti amlumbeje kupitila munyimbo. Wakwimbaŵa ŵaliji Alefi ŵasosekwaga kuŵa ŵambopesi. Nambo jemanjaji nganakamulaga masengo gaŵakamulaga Alefi ŵane. Ŵatendaga yeleyi kuti amalileje ndaŵi jejinji ali mkulemba nyimbo soni kukosechela kwimba nyimbosi.—1 Mbi. 9:33.
FEBUWALE 6-12
CHIPANJE CHAKUSIMANIKWA M’MALOŴE GA MLUNGU | 1 MBILI 10-12
“Atendeje Yakusasaka Mlungu”
w12 11/15 6 ¶12-13
“Anjiganye Kuyitenda Yakusaka Ŵalakwe”
12 Tumsyasyeje Daudi. Jwalakwe jwaganonyelaga Malamusi ga Mlungu. Soni jwatendaga yagasalaga Malamusigo. Aganichisye yayatendekwe Daudi pajwasasile kuti akusaka kumwa “mesi gakutyochela ku chisima chele chili chiŵandika ni chipata ku Betelehemu.” Achalume ŵatatu ŵa Daudi ŵajawile kukuteka mesiga. Pandaŵiji Afilisiti ŵaliji ali asyungulile msindawu. Nambo “Daudi nganamwa mesigo, m’malo mwakwe ŵagambile kugajitila pasi kugapeleka kwa AMBUJE.” Ligongo chichi jwatesile yeleyi? Daudi jwatite, “Une ngaŵa mkumwa mesi gelega, ligongo tikuŵe mpela kumwa miasi ja ŵandu ŵele ŵapeleche umi wawo pakwawula kukuteka mesiga.”—1 Mbi. 11:15-19.
13 Daudi jwamanyililaga kuti Chilamusi chasalaga kuti ngatukusosekwa kulya miasi nambo tukusosekwa kujipeleka kwa Yehofa mwakujijitila pasi. Jwalakwe jwamanyililagasoni ligongo lyakwe Chilamusi chasalaga yeleyi. Daudi jwamanyililaga kuti “umi wa chindu chilichose chana umi uli m’miasi.” Nambo agatu galiji mesi ngaŵa miasi. Sano ligongo chichi jwakanile kumwa mesiga? Apatu Daudi jwakuyaga mfundo jakwayana ni lilamusili. Daudi jwagawonaga mesiga kuŵa gakusosekwa mnope mpela mwajaŵelele miasi ja achalume ŵatatuŵa. Myoyo Daudi ŵakuweni kuti jwaliji kulemwa kumwa mesiga. Mmalo mwakumwa mesiga ŵayiweni kuti mpaka luŵe lunda kugajitila pasi.—Lef. 17:11; Det. 12:23, 24.
Tuchigumbeje Chikumbumtima Chetu ni Yiwundo Soni Malamusi ga Mlungu
5 Kuti malamusi ga Mlungu gatukamuchisyeje, tukusosekwa kwendelechela kuganonyela soni kugachimbichisya, ngaŵa kwamba kugaŵalanga soni kugamanyilila chenene. Baibulo jikusati, “Achiŵenjeje chachili chakusakala ni achinonyeleje chachili chambone.” (Amosi 5:15) Nambo ana mpaka tutende chamtuli yeleyi? Tuyiwoneje yindu mpela mwakusayiwonela Yehofa. Tuwanichisye kuti wawojo akulepela kugona lugono ni adokotala akwasalila yindu yakamuchisya mpela, kulya yakulya yambone, kutenda mang’asi gakulimbisya chilu, soni kuchenga yindu yine pa umi wawo. Pakulinga kutenda yeleyi akuyiwona kuti chilu chawo chikwenda chenene, ana mpaka apikane uli? Kusala yisyene, mpaka am’yamichile dokotalajo.
6 Mwakulandana ni yeleyi, Mkupanganya jwetu atupele malamusi gakutukamuchisya kuti tukatendaga yindu yakulemwecheka, soni kuti yindu yitujendeleje chenene paumi wetu. Kuganichisya malamusi ga m’Baibulo mpaka kutukamuchisye kuŵambala yindu mpela unami, wiyi, yamsese, yachinyengo, yachiwawa soni kutenda yamisimu. (Aŵalanje Misyungu 6:16-19; Chw. 21:8) Patukusimana ni yindu yambone ligongo lyakutenda yindu yakusasaka Yehofa, chinonyelo chetu pa Yehofa soni malamusi gakwe yikusakula.
Mfundo Syakamuchisya
it-1 1058 ¶5-6
Mtima
Kumtumichila Mlungu ni “Mtima Wosope.” Kuti mtima wa mundu ukamuleje masengo chenene ukusasosekwa kuŵa wamtundu, nambo mtima wetu wakuwanichisya mpaka uŵe wagaŵikangana. Daudi jwapopesile kuti, “Ambe mtima wangagaŵikangana kuti nalijogope lina lyawo.” Mtima wa mundu mpaka uŵe wakugaŵikangana ligongo lya yindu yakusanonyela kapena kuyijogopa. (Sal 86:11, NWT.) Mundu jweleju akusaŵa ‘jwaunakunaku’ soni jwamtukuta panandipe pakumtumichila Yehofa. (Sal 119:113; Chw 3:16) Munduju akusatenda yindu ni “mtima umo” (maloŵe gane mtima wine ukusaŵa pa yindu yakutendayo pele wine ukusaŵa kwine). Mundu jwamti myiyi akusatumichila achambuje ŵaŵili, kapena akusasala yindu yine nambo mumtima ali mkuganichisya yindu yine. (1Mb 12:23-37; Sal 12:2) Yesu jwasasile mwangapita mumbali kuti ŵandu ŵamtiyi ali ŵachinyengo.—Mat 15:7, 8.
Mundu jwakusasaka kumsangalasya Mlungu ngakusosekwa kola mtima wegaŵikangane kapena kutendaga yindu ni mtima umo. Nambo akusasosekwa kumtumichilaga Mlungu ni mtima wosope. (1Mb 28:9) Kuti yeleyi yikomboleche tukusasosekwa kulimbichila ligongotu mtima ukusasachilila kutenda yindu yakusakala. (Yel 17:9, 10; Gen 8:21) Yindu yampaka yitukamuchisye kuti tupitilisye kumtumichila Yehofa ni mtima wosope yili kupopela kutyochela pasi pa mtima (Sal 119:145; Mlo 3:41), kuŵalanga Maloŵe ga Mlungu mwakutamichika, (Esa 7:10; Mis 15:28), kukamula mwakulimbichila masengo gakulalichila ngani syambone (awanichisye ni Yel 20:9), soni kungulukaga ni ŵandu ŵakusamtumichila Yehofa ni mtima wosope.—Awanichisye ni 2Ay 10:15, 16.
FEBULUWALE 13-19
CHIPANJE CHAKUSIMANIKWA M’MALOŴE GA MLUNGU | 1 MBILI 13-16
“Yindu Yikusatujendela Chenene Patukupikanila Malangiso”
w03 5/1 10-11
Awusyeje Kuti, “Ana AMBUJE Ali Kwapi?”
12 Libokosi lya chilanga lili liwujile ku Yisalayeli, soni lili litemi kwa yaka yejinji ku Kiliyati Yelimu, Mwenye Daudi jwaganichisye yakulisamichisya libokosili ku Yelusalemu. Jwalakwe jwawusisye lunda kwa achimlongola ŵa asilikali ‘naga jemanjajo akwitichisya soni naga lili lisosa lya AMBUJE’ kuti asamisye Libokosili. Nambo jwalakwe nganawungunya mwakwanila kuti amanyilile nganisyo sya Yehofa panganiji. Yikaŵe kuti ŵawungunyisye mwakwanila nikuti ngamkananyakula pangolo Libokosili. Mpela muŵalamulile Yehofa, Alefi ŵa m’liŵasa lya Kohati ni ŵaŵasosekwaga kunyakula libokosili pekoyo. Ndaŵi syejinji, Daudi jwanonyelaga kuŵenda lunda kwa Yehofa, nambo pandaŵi aji nganakamulichisya masengo litala lyambone lyakuwungunyila. Mwamti jwasimene ni yakogoya. Kaneko Daudi jwatite, “AMBUJE Mlungu jwetu ŵatupele chilango, ligongo nganitukuya msyungu wakwe.”—1 Mbili 13:1-3; 15:11-13; Numeli 4:4-6, 15; 7:1-9.
w03 5/1 11 ¶13
Awusyeje Kuti, “Ana AMBUJE Ali Kwapi?”
13 Pandaŵi jele Alefi ŵanyakwile libokosi lya chilanga kulityosya ku nyumba ja Obedi Edomu kulijawusya ku Yelusalemu, ŵandu ŵajimbile nyimbo jiŵalembile Daudi. Nyimboji jamasile ni maloŵe gakulimbikasya gakuti: “Mjawuleje kwa AMBUJE kuti, amkamuchisyeje, soni mwalumbeje ŵalakwewo mwangalechesya. . . . Mkumbuchileje masengo gakumasya lunda ga AMBUJE ni mwele muŵalamulilaga ŵandu.”—1 Mbili 16:11-13.
Mfundo Syakamuchisya
w14 1/15 10 ¶14
Amlambileje Yehofa Jwali Mwenye Mpaka Kalakala
14 Daudi jwajawisye libokosi lya chilanga ku Yelusalemu. Pandaŵi jakusangalasyaji Alefi ŵajimbile nyimbo jakumlumba Mlungu. Nyimboji jakwete maloŵe gakusosekwa mnope. Maloŵega gakusasimanikwa pa 1 Mbili 16:31. Soni galiji gakuti, ‘Myijenesye kwa ŵandu wosope kuti AMBUJE aŵele mwenye.’ Nambo ŵane mpaka asimonje kuti, ‘Pakuŵa Yehofa ali mwenye mpaka kalakala, yakomboleche uli kuŵa mwenye pandaŵi aji?’ Yehofa akusaŵa mwenye pandaŵi jakulosya kuti jwalakwejo ali jwakulamulila kapena pamsagwile jwinejwakwe kuti amjimile payakutendekwa yineyakwe kapena pakusaka kumalana ni yakutendekwa yineyakwe. Ulamusi wa Yehofawu uli wapenani mnope. Daudi mkanaŵe Yehofa ŵamsimichisye kuti uchimwene wakwe uchitama mpaka kalakala. Yehofa jwatite, ‘Jumo jwa ŵanache jwakuŵeleka m’mwejo, tinjimjinjisya uchimwene, kwinjila m’malo mwenu. Ni tinjiwulimbisya uchimwene wakwe.’ (2 Sam. 7:12, 13) Mwanache jwa Daudiju jwawonechele pali papite yaka yakupunda 1,000. Ana mwanache jweleju jwaliji ŵani, soni jwaŵele mwenye chakachi?
FEBULUWALE 20-26
CHIPANJE CHAKUSIMANIKWA M’MALOŴE GA MLUNGU | 1 MBILI 17-19
“Aŵeje Ŵakusangalala Atamose Pakusimana ni Yakutengusya”
w06 7/15 19 ¶1
Aganichisyeje Yindu Yambone Yajikutenda Gulu ja Yehofa
DAUDI juŵatamaga ku Yisalayeli jwakala ali jumo mwa ŵandu ŵakumanyika mnope ŵakusakolanjidwa m’Malemba ga Chihebeli. Daudi jwaliji mkuchinga, jwakwimba nyimbo, jwakulochesya, nambosoni mwenye. Jwalakwe jwamdalilaga mnope Yehofa Mlungu. Ligongo lyakuti Daudi jwamnonyelaga mnope Yehofa, jwasakaga kutaŵa nyumba jakulambilila. Nyumba jeleji jikaŵele malo gekulungwa gakulambilila Mlungu ku Yisalayeli kosope. Daudi jwamanyililaga kuti kutaŵa nyumba jakulambilila kuchakamuchisya ŵandu kuŵa ŵakusangalala soni kuti Mlungu chachapaga upile. Daudi jwajimbile kuti, “Jwana upile mundu jwamsagwile ŵalakwe [Yehofa] ni kwika najo kutama mu nganya jawo. Tuchijikuta ni yindu yambone ya m’Nyumba jawo Nyumba jawo jajiswela.”—Salimo 65:4.
Asangalaleje ni Yakukombola Kutenda Pakumtumichila Yehofa
11 Nombe m’we mpaka tuŵe ŵakusangalala mnope naga tukamula mwakulipeleka utumiki uliwose watupochele m’gulu ja Yehofaji. ‘Apelecheje ndaŵi jawo josope’ pakukamula masengo gakulalichila soni kukamuchisya ni mtima wawo wosope pa yakutendekwa ya pampingo. (Mase. 18:5; Aheb. 10:24, 25) Akosecheleje chenene misongano soni kuja kupeleka ndemanga syakulimbikasya. Naga apochele mbali sya ŵakulijiganya pa misongano ja mkati mwa wiki, akatendaga mpela akwakanganichisya. Soni naga ŵaŵendile kuti akamuchisye nawo pa masengo gane gakwe mumpingo, ayicheje pandaŵi jakwe soni akamuleje masengogo mwakulipeleka. Papochele masengo ganegakwe kuti atende akagambaga kuyiwona mpela kuti yigamba kwamalila ndaŵi jawo. Atendeje yakomboleka kuti agamanyilile chenene masengogo. (Mis. 22:29) Pakukamula mwakulimbichila utumiki uliwose wapochele yikusakamuchisya kuti aŵe paunasi wambone ni Yehofa soni kuŵa ŵakusangalala. (Agal. 6:4) Yeleyi yichakamuchisyasoni kuŵa ŵakusangalala pandaŵi jele ŵane apochele udindo waŵawusakaga wawojo.—Alo. 12:15; Agal. 5:26.
Mfundo Syakamuchisya
w20.02 12, libokosi
Tukusiŵanonyela Mnope Atati Ŵetu Yehofa
Ana Yehofa Akusamanyilila Chenene Uneji?
Ana pakwete paliwusisye kuti, ‘Mwatupile ŵandu pachilambopa, ana mpaka yikomboleche chamtuli kuti Yehofa amanyilileje une chenene?’ Naga yili myoyo nikuti nganaŵa jika ŵakusaliwusya chiwusyo mpela chelechi. Mwenye Daudi jwalembile kuti, ‘Ana mundu nduni kuti amkumbuchileje ŵalakwe Ambuje? Mwanache jwa mundu nduni kuti amganichisyeje?’ (Sal. 144:3) Daudi jwakulupililaga kuti Yehofa akusammanyilila chenene. (1 Mbi. 17:16-18) Yehofa akusatusimichisya kuti akusamanyilila ya chinonyelo chatwalosisye kwa jwalakwe kupitila m’Maloŵe gakwe soni gulu jakwe. Aganichisye yagakuŵecheta Maloŵe ga Mlungu pakusimichisya yeleyi:
• Yehofa ŵamanyilile wawojo atamose mkanaŵe kupagwa.—Sal. 139:16.
• Yehofa akusamanyilila yayili mumtima mwawo nambosoni yakusaganisyaga.—1 Mbi. 28:9.
• Yehofa akusapikana mwapajika lipopelo lililyose.—Sal. 65:2.
• Yitendo yawo yikusakwayaga mwakusapikanila Yehofa mumtima.—Mis. 27:11.
• Yehofa ni juŵawutile wawojo kuti aŵe najo paunasi wambone.—Yoh. 6:44.
• Naga wawojo akuwa, Yehofa chachajimusya ligongo lyakuti jwalakwe akwamanyilila chenene. Yehofa chachapa wawojo chilu chasambano soni nganisyo mpelaga syaŵakwete pandanda. Konjechesya pelepa, umundu wawo uchiwujila soni chachikumbuchila mwayaŵelele yindu pandanda.—Yoh. 11:21-26, 39-44; Mase. 24:15.
FEBULUWALE 27–MALICHI 5
CHIPANJE CHAKUSIMANIKWA M’MALOŴE GA MLUNGU | 1 MBILI 20-22
“Twakamuchisyeje Ŵachinyamata Kuti Yindu Yajendeleje Chenene”
“[Yindu] Yeleyi Mwajiganyeje Achalume Ŵakulupichika”
8 Aŵalanje 1 Mbiri 22:5. Daudi akaganisisye kuti Solomo ngakuŵajilwa kulolela masengo gakusosekwa mnopega. Sonitu nyumba ja Mlungujo jaliji jakuti tijiŵe ‘jakusalala mnope,’ nambo pandaŵiji Solomo ŵaliji ‘mwanache soni nganamanyililaga yejinji’. Nambope, Daudi ŵayimanyi kuti Yehofa chamkamuchisye Solomo kuti agakombole masengogo. Myoyo jwalakwe ŵatesile yaŵakombwele kuti amkamuchisye Solomo pakosechela masengogo.
“[Yindu] Yeleyi Mwajiganyeje Achalume Ŵakulupichika”
7 Daudi nganatenguka pakulola kuti upile wakutaŵa nyumba ja Mlungujo upite kwa jwine. M’malo mwakwe jwalakwe ŵakamuchisye mnope pamasengogo. Jwalakwe nganadandawula kuti nyumbajo jichimanyikwaga ni lina lya mundu jwine. Sonitu pajataŵidwe nyumbajo jamanyikwaga ni lina lya Solomo ngaŵaga lya Daudi. Daudi ŵapatile ŵandu ŵakukamula masengogo ni kwaŵika m’makuga. Ŵasongenyesoni yisyano, kopa, silifa, golidi, soni matabwa ga mkungusa. Konjechesya pelepa, jwalakwe ŵamlimbikasisye Solomo kuti, “Sambano, mwanangu, Yehofa aŵe ni m’mwejo, soni yindu yimjendele chenene ni kutaŵa nyumba ja Yehofa Mlungu jwenu, mpela mwasalile jwalakwe pakwamba ya m’mwejo.”—1 Mbiri 22:11, 14-16.
Ana Achinangolo Mkumkamuchisya Mwanache Jwenu Kuti Aŵajilwe Kubatiswa?
14 Mpela ŵakuchinga ŵausimu, achakulungwa ŵa mumpingo mpaka ŵalimbikasye achinangolo mwakwasalila umbone wa yakulinga yausimu. Jwamkongwe jwine jwatumichile kwa yaka 70 ali mpayiniya, jwakumbuchile maloŵe gamachili gaŵatagulilene ni M’bale Charles T. Russell pa msongano wine. Pa ndaŵiji mlongoju jwakwete yaka 6. Jwalakwe jwatite, “Twatemi kwa maminisi 15 tuli mkutagulilana yakulinga yangu yausimu.” Yisyene, maloŵe gambone soni gakulimbikasya mpaka gatame kwangamala. (Miy. 25:11) Achakulungwa ŵa mumpingo komboleka kwaŵilanjila achinangolo ni ŵanache ŵawo ku masengo ga pa Nyumba ja Uchimwene. Ŵanachewo komboleka kwapaga masengo gakamulana ni msingu soni machili gawo.
15 Ŵandu ŵa mumpingo mpaka ŵakamuchisye ŵanache mwakwalosya lung’wanu. Yeleyi mpaka yipwatichepo kwalongolela ku yakulinga yausimu. Mpaka aliwusye kuti, ana jwachinyamata akusalipeleka ni mtima wosope pakujigala nawo mbali pa misongano ja mkati mwa chijuma? Ana akusayiwona kuŵa yakusawusya kapena akusawuwona kuŵa upile wakutendela umboni usyesyene pali ku sukulu? Aŵe ŵachitema pakuyamichila mwakutyochela pasi pamtima. Ana mpaka tulosye kuti tukwete lung’wanu naga tukusapata ndaŵi jakuŵechetana ni jwachinandipile, mkanitutande kapena panyuma pa misongano? Kamulichisya masengo matala gelega soni gane, ŵachinandipile chachimanyilila kuti ali jumo mwa ŵandu ŵali mu “mpingo wekulungwa.”—Sal. 35:18.
Mfundo Syakamuchisya
w05 10/1 11 ¶6
Mfundo Syekulungwakulungwa sya M’buku ja 1 Mbili
21:13-15. Yehofa jwalilamwile lilayikalyo kuti limasye ulwelewo ligongo jwakuweni kulagasika kwa ŵandu ŵakwe. Yisyene Yehofa “ali ŵachanasa chachikulungwa.”