Malifalensi ga Pologalamu ja Utumiki ni Umi Wetu Wachiklistu
© 2023 Watch Tower Bible and Tract Society of Pennsylvania
MEYI 1-7
CHIPANJE CHAKUSIMANIKWA M’MALOŴE GA MLUNGU | 2 MBILI 17-19
“Twawoneje Ŵane Mpela Mwakusiŵawonela Yehofa”
Ana Chayikamulichisye Masengo Yindu Yayalembedwe?
7 Nambi wuli pakwamba ya Yehosafati mwanache jwa Asa? Jwalakwe ŵakwete ndamo syambone syejinji. Nambosoni ŵakombwele kutenda yindu yejinji yambone ligongo lyakuti ŵamjegamilaga Yehofa. Nambope, jwalakwe jwasagwile yindu yine mwangali lunda. Mwambone, jwakundile kuti ŵanache ŵakwe ŵachalume alombaneje ni ŵanache ŵachakongwe ŵa mwenye jwakusakala Ahabu jwa ku uchimwene wakumpoto wa Isalayeli. Soni mwangasamala ya chikalamusyo chakutyochela kwa jwakulochesya Mikaya, Yehosafati ŵajawile yimpepe ni Ahabu kukumenyana ni Asilikali ŵa Siliya. Kungondoko, Yehosafati ŵakulupuchile mkamwa mwa mbusi. (2 Mbi. 18:1-32) Kaneko paŵawujilile ku Yelusalemu, jwakulochesya Yehu ŵam’wusisye kuti, ‘Ana ali ŵakusakala ŵamkusosekwa kwakamuchisya, soni ana mkusosekwa kwanonyela ŵandu ŵakuŵengana ni Yehofa?’—Aŵalanje 2 Mbili 19:1-3.
w15 8/15 11-12 ¶8-9
Tuganichisyeje Mwakusokoka ya Chinonyelo cha Yehofa
8 Yehofa akusaka kuti tumanyilileje kuti akusatunonyela soni kuti akusalola yindu yambone yatukusatenda. (2 Mbi. 16:9) Mwambone, Yehofa ŵalolite yindu yambone yaŵatesile Mwenye Yehosafati jwa ku Yuda. Ndaŵi jine, Yehosafati ŵatesile yindu mwangali lunda pakunda kamulana ni Mwenye Ahabu jwa ku Yisalayeli. Jemanjaji ŵakamulene yakuputa ngondo ni Asiliya kuti ŵasumule msinda wa Lamoti-giliyadi. Atamose kuti ŵakulochesya ŵaunami 400 ŵamsalile mwenye jwakusakala Ahabu kuti chakapunde ngondojo, jwakulochesya jwakuwona jwa Yehofa, Mikaya ŵasasile kuti jemanjaji chachigomekwa. Ahabu ŵawilile kungondoko nambo Yehosafati ŵakulupwiche mwaupile. Paŵawujile ku Yelusalemu, ŵamjamwiche ligongo lyakamulana ni Ahabu. Atamose kuti Yehosafati ŵatesile yeleyi, Yehu mwanache jwa Hanani, ŵamsalile Yehosafati kuti, “Pana yindu yambone yayisimanikwe mwa wawojo.”—2 Mbi. 18:4, 5, 18-22, 33, 34; 19:1-3.
9 Yehosafati ali agambile kutanda kulamulila, ŵalamwile nduna, Alefi soni ŵambopesi kuti ajende m’misinda josope ja ku Yuda kuti ŵajiganyeje ŵandu Chilamusi cha Yehofa. Yeleyi yakamuchisye mnope ligongo ŵandu ŵamitundu jine ŵatanditesoni kogopa Yehofa. (2 Mbi. 17:3-10) Atamose kuti Yehosafati ŵatesile yindu mwakuloŵela Yehofa ŵalolite yindu yambone yaŵatesile. Nganiji jikulosya kuti atamose kuti tukusatenda yindu yakulemwecheka, Yehofa akusatunonyelape naga tukusasachilila kutenda yakumsangalasya jwalakwejo.
Mfundo Syakamuchisya
Atumichileje Yehofa ni Mtima Wosope!
10 Yehosafati ‘ŵajendelechele kwenda m’litala lya Asa, babagwe.’ (2 Mbi. 20:31, 32) Ana ŵatesile yeleyi mwatuli? Yehosafati ŵalimbikasisye ŵandu kuti amsosesose Yehofa mpela muŵatendele babagwe. Jwalakwe ŵalinganyisye yakwajiganya ŵandu pakamulichisya masengo ‘buku ja Chilamusi cha Yehofa.’ (2 Mbi. 17:7-10) Ŵayikene pakwawula ku uchimwene wakumpoto wa Yisalayeli, ku mkuli wa matumbi wa Efulaimu ‘kukwakamuchisya kuti awujile kwa Yehofa.’ (2 Mbi. 19:4) Kusala yisyene, Mwenye Yehosafati ‘ŵamsosilesolile Yehofa ni mtima wakwe wosope.’—2 Mbi. 22:9.
11 Wosopewe mpaka tujigale nawo mbali pa masengo gekulungwa gakwajiganya ŵandu yakwamba Yehofa. Ana chili chakulinga chawo kuti ŵajiganyeje ŵane Maloŵe ga Mlungu mwesi wuliwose, soni kwakamuchisya kuti atande kumtumichila Mlungu? Ligongo lya mtawu wawo soni chikamuchisyo chakutyochela kwa Mlungu, yili yakomboleka kutandisya lijiganyo lya Baibulo. Ana chelechi ni chakulinga chakusachipopelela? Ana ali ŵakusachilila kuti alijiganyeje Baibulo ni mundu jwine, atamose pandaŵi jawo jakupumula? Soni mpela muŵatendele Yehosafati pakwawula ku mkuli wa Efulaimu kukwakamuchisya ŵandu kuti atandesoni kulambila kusyesyene, m’wejisoni mpaka twakamuchisye ŵane ŵaŵalesile kutenda yindu yausimu. Konjechesya pelepa, achakulungwa ŵa mumpingo akusalinganya yakwajendela ni kwakamuchisya ŵandu ŵaŵatyosyegwe mumpingo nambo ŵaŵalesile kutenda yakulemwa.
MEYI 8-14
CHIPANJE CHAKUSIMANIKWA M’MALOŴE GA MLUNGU | 2 MBILI 20-21
“Amkulupilileje Yehofa Mlungu Jwawo”
w14 12/15 23 ¶8
Tukamulaneje Mnope Mbesi ja Chilambochi Pajikuŵandichila
8 Mundaŵi ja Mwenye Yehosafati, ŵandu ŵa Mlungu ŵajimuchilidwe ni “likuga lyekulungwa lya asilikali” ŵakutyochela m’yilambo yayasyungulile. (2 Mbi. 20:1, 2) Nambo chakusangalasya chili chakuti ŵandu ŵa Mlunguŵa, nganalidalila pakulimbana ni adaniŵa. Mmalomwakwe, ŵamdalile Yehofa kuti ŵakamuchisye. (Aŵalanje 2 Mbili 20:3, 4.) Jemanjaji nganatendaga yindu jwalijose pajikapajika. Baibulo jikusatusalila kuti: “Pandaŵi jeleji achalume wosope ŵa ku Yuda, pamo ni achiŵamkwawo ni ŵanache ŵaliji ali ajimi ku Nyumba ja AMBUJE.” (2 Mbi. 20:13) Ŵandu wosope chinga ŵachinyamata kapena ŵachikulile, ŵaliji pampepe kuti apikanile malangiso ga Yehofa. Sonitu Yehofa jwachenjele jemanjaji myala mwa adani ŵawo. (2 Mbi. 20:20-27) Nombewe tuŵeje ŵakamulana mnope ni Aklistu achimjetu patukusimana ni yindu yakulinga chikulupi chetu.
Ŵandu Ŵagambile Kulombana Kwene Alipelecheje Mnope Pakumtumichila Yehofa
7 Yehofa ŵaŵechete ni Yehosafati kupitila mwa m’Lefi jwine lina lyakwe Yahasiyele. Yehofa jwatite, “Mgambe kwima mmalo mwenu, nipo timkawone AMBUJE ali kumpundisya jemanja.” (2 Mbi. 20:13-17) Yeleyi yaliji yakulekangana ni yaŵatendaga ŵandu pakuputa ngondo. Nambope, malangiso gelega nganigaŵa gakutyochela kwa mundu nambo gatyochele kwa Yehofa. Ligongo lyakuti ŵamdalilaga mnope Mlungu jwakwe, Yehosafati jwatesile yaŵamsalileyo. Pajwapite kukusimana ni achimmagongo ŵakweŵa, jwalakwe nganiŵaŵika kusogolo asilikali ŵakumanyilila kuputa ngondo, nambo ŵaŵisile ŵandu ŵakwamba kumanyilila kwimba basi. Yehofa nganamleka Yehosafati, mwamti jwalakwe jwagomeche achimmagongowo.—2 Mbi. 20:18-23.
Mfundo Syakamuchisya
it-1 1271 ¶1-2
Yeholamu
Yeholamu nganajigalila chisyasyo chambone cha babagwe ŵaŵaliji Yehosafati. Jwalakwe jwatendaga yindu yakusakala ligongo lya ŵamkwakwe ŵaŵaliji Ataliya. (2Ay 8:18) Yeholamu jwawuleje achapwakwe ŵakwana 6 pampepe ni nduna sine sya ku Yuda. Konjechesya pelepa, jwalakwe jwalesile kumlambila Yehofa ni jwatandite kulambila milungu ja unami. (2Mb 21:1-6, 11-14) Ndaŵi josope jaŵalamulilaga Yeholamu yindu nganiyijendaga chenene amta panandi. Chandanda, Aedomu ŵamjimuchile. Kaneko ŵandu ŵa ku Libina ŵayiche kukuputa ngondo ni misinda ja ku Yuda. (2Ay 8:20-22) Jwakulochesya Eliya jwamlembele chikalata Yeholamu. Jwalakwe jwamkalamwisye kuti, “AMBUJE tachipeleka chilango kwa ŵandu ŵenu, kwa ŵanagwenu, kwa achiŵamkwenu, nipo tachijonanga katundu jwenu.” Eliya ŵamsalilesoni Mwenye Yeholamu kuti, “M’mwejo mwasyene timchilwala ulwele ŵakogoya wa m’matumbo wele tiwuchikulilakulilape lyuŵa ni lyuŵa.”—2Mb 21:12-15.
Yosope yaŵasasile Yehofa yatendekwe. Jwalakwe jwakundile kuti Aluya soni Afilisiti amjimuchile Yeholamu, mwamti ŵajigele achiŵamkwakwe soni ŵanache ŵakwe kuti akaŵe achikapolo. Nambope Yehofa jwalolechesye kuti Yehowahasi (jwakusamanyikasoni kuti Ahasiya) juŵaliji mwanache jwamnondi jwa Yeholamu akajigalidwa nawo ukapolo. Jwatesile yeleyi ligongo lya chilanga cha Uchimwene chaŵatesile ni Daudi. “Panyuma pa yosopeyi, AMBUJE ŵampele [Yeholamu] ulwele wakogoya wa m’matumbo. Piyamasile yaka yiŵili ulwelewo wapelengenye nipo pambesi pakwe ŵawile.” “Paliji pangali mundu jwalijose juŵamtendele chanasa” mwenye jwakusakalaju. Ŵandu ŵamsichile Yeholamu mu “Msinda wa Daudi, nambo ngaŵaga m’malembe ga ayimwene.” Kaneko mwanache jwakwe Ahasiya jwaŵele mwenye.—2Mb 21:7, 16-20; 22:1; 1Mb 3:10, 11.
MEYI 15-21
CHIPANJE CHAKUSIMANIKWA M’MALOŴE GA MLUNGU | 2 MBILI 22-24
“Yehofa Akusiŵapa Upile Ŵandu Ŵakusatenda Yindu Mwakulimba Mtima”
w09 4/1 24 ¶1-2
Yowashi Jwalesile Kumtumichila Yehofa Ligongo Lyakunguluka ni Ŵandu Ŵakusakala
JALIJI ndaŵi jakusawusya mnope ku Yelusalemu. Nyumba ja Mlungu jaliji mu msinda welewu. Mwenye Ahasiya ŵaliji ali agambile kuwulajidwa kwene. Yaliji yakusawusya kupikanichisya kulola yaŵatesile Ataliya, ŵaŵaliji mamagwe Ahasiya. Jwalakwe jwawuleje ŵanache ŵachalume ŵa Ahasiya ŵaŵaliji yisukulu yakwe. Ana mkumanyilila ligongo lyakwe ŵatesile yeleyi? Jwalakwe jwatesile yeleyi ni chakulinga chakuti alamulileje mmalo mwa yisukulu yakweyo.
Nambope Yowashi, jwele pandaŵiji jwaliji likandi jwakulupwiche, soni angangagweŵa nganamanyililaga yeleyi. Ana mkusaka kumanyilila muyaŵelele? Mwanacheju jwakwete mamagwe ŵanandi lina lyawo Yehosheba ŵaŵamsisile m’nyumba ja Mlungu. Ŵakombwele kumsisa m’nyumba ja Mlunguji ligongo lyakuti ŵamkwakwe lina lyawo Yehoyada ŵaliji Jwamkulungwa jwa Ŵakutaga Mbopesi. Myoyo jemanjaji ŵalolechesye kuti mwanacheju ali pamalo gachiteteyo.
w09 4/1 24 ¶3-5
Yowashi Jwalesile Kumtumichila Yehofa Ligongo Lyakunguluka ni Ŵandu Ŵakusakala
Yowashi ŵamsisile m’nyumba ja Mlungu kwa yaka 6. Kweleku ŵamjiganyisye yakwamba Yehofa Mlungu soni malamusi gakwe. Kaneko paŵakwanisye yaka 7, Yehoyada ŵatesile yakomboleka kuti mwanacheju aŵe mwenye. Ana mkusaka kumanyilila muŵatendele yeleyi nambosoni yayatendechele angangagweŵa ŵaŵaliji mwenye jwakusakala?
Yehoyada ŵaŵilasile asilikali ŵaŵalondelaga mamwenye ga ku Yelusalemu pa ndaŵijo. Jwalakwe jwasalile jemanjaji yaŵatesile yimpepe ni ŵamkwakwe pakumkulupusya Yowashi, mwanache jwa Mwenye Ahasiya. Kaneko, Yehoyada ŵamjigele Yowashi ni kumlosya kwa asilikaliwo, mwamti jemanjaji ŵayiweni kuti jwalakwe ni jwakusosekwa kuŵa mwenye. Myoyo ŵalinganyisye litala lyakuti mwanacheju aŵe mwenye.
Yehoyada ŵamkopwesye kusa Yowashi, ni ŵamŵisile jwalakwe kuŵa mwenye. Payatendekwe yeleyi “ŵandu ŵamgombele m’myala ali mkugumila kuti, ‘Akole umi wawulewu mwenye!’” Asilikali ŵakulondela mwenye ŵala ŵamsyungulile jwalakwe pakusaka kumchenjela. Ataliya paŵapikene ŵandu ali mkusangalala, jwawutuchile kukoko kuti akalekasye. Nambo Yehoyada jwalamwile kuti Ataliya awulajidwe, mwamti asilikaliwo ŵamwuleje.—2 Ayimwene 11:1-16.
it-1 379 ¶5
Malembe
Jwamkulungwa Jwaŵakutaga Mbopesi Yehoyada ‘ŵamsichile ku malembe ga ayimwene mu msinda wa Daudi.’ Jwalakwe jwaliji mundu jwakulupichika. Ali Yehoyadape juŵapochele uchimbichimbi wakusichidwa ku malembe ga achayimwene atamose kuti nganaŵa jwakutyochela ku liŵasa lya mwenye.—2Mb 24:15, 16.
Mfundo Syakamuchisya
it-2 1223 ¶13
Sekaliya
12. Sekaliya jwaliji mwanache jwa Jwamkulungwa jwa Ŵakutaga Mbopesi Yehoyada. Nambo Yehoyada paŵawile, Mwenye Yowashi jwalesile kumtumichila Yehofa. Jwalakwe jwatandite kupikanila malangiso gakulemwecheka mmalo mwakwapikanila ŵakulochesya ŵa Yehofa. Sekaliya jwaŵaliji msuwani jwa Yowashi (2Mbi 22:11), jwaŵele ali mkwajamuka ŵandu payindu yeleyi. Nambo mmalo mwakupitikuka mtima, jemanjaji ŵamponyisye maganga paŵaliji mluŵala lwa m’nyumba ja Mlungu. Maloŵe gakumalisya gaŵaŵechete Sekaliya paŵawaga galiji gakuti, “AMBUJE alole yeleyi, nipo ampe jemanja chilango.” Maloŵe gakulochesyaga gakwanilichikwe ligongo Asiliya ŵajonasile chilambo cha Yuda. Nambosoni ŵamasengo ŵaŵili ŵa Yowashi ŵamwuleje jwalakwe ‘ligongo lyakuti nombenawo ŵamwuleje mwanache jwa Yehoyada.’ Baibulo ja Greek Septuagint soni ja Latin Vulgate jasasile kuti Yowashi jwawulajidwe pakusaka kuwuchisya yaŵatesile jwalakwe pakumwulaga “mwanache” jwa Yehoyada. Nambope yakulemba ya Amasoleti soni Baibulo ja Syriac Peshitta, jakamulichisye masengo maloŵe gakuti “ŵanache.” Komboleka kuti ŵalembile myoyo pakusaka kumchimbichisya Sekaliya mwanache jwa Yehoyada, juŵaliji jwambopesi soni jwakulochesya.—2Mb 24:17-22, 25.
MEYI 22-28
CHIPANJE CHAKUSIMANIKWA M’MALOŴE GA MLUNGU | 2 MBILI 25-27
“AMBUJE Komboleka Kumpa M’mwejo Yejinji Kupunda Yeleyo!”
it-1 1266 ¶6
Yowashi
Yowashi jwalembile ganyu asilikali ŵa mwenye jwa ku Yuda ŵakwana 100,000 kuti akamenyane ni asilikali ŵa ku Edomu. Nambope, “jwakulochesya” jwa Mlungu jwasasile kuti asilikaliŵa akajawula nawo ku ngondo. Myoyo ŵasalile asilikaliwo kuti awujile kumangwawo atamose kuti ŵaliji ali apeleche kala makilogalamu 3,400 ga silifa ($ 660,600.) Asilikaliŵa ŵatumbile mnope, komboleka ligongo lyakuti ŵasachililaga mnope kuti akagaŵane nawo katundu juchakasumule ku ngondoko. Myoyo jemanjaji paŵawujaga ŵajonasile misinda ja uchimwene wa kummwela, kutandila ku Samaliya (komboleka kuti ni kwaŵatandile konanga) mpaka ku Beti Holani.—2Mb 25:6-10, 13.
‘Alinje’ Kuti Alole Umbone wa Yehofa
16 Alipelecheje kwa Yehofa. Ngatukusosekwa kuleka yindu yosope yatukusasangalala nayo ni chakulinga chakuti tumsangalasye Yehofa. (Jwak. 5:19, 20) Nambope naga tukuyinonyela mnope yindu yatukusasangalala nayo mpaka kwika pakulepela kutenda yejinji pakumtumichila Yehofa, nikuti tuchilandana ni mundu juŵamkolasile Yesu. Jwalakweju jwasosaga mnope yindu yakuchilu nambo nganayikosyaga ya Mlungu. (Aŵalanje Luka 12:16-21.) M’bale Christian, jwa ku France, jwatite, “Pandanda nganingamulichisyaga masengo machili soni ndaŵi jangu jejinji pakumtumichila Yehofa soni kulikamuchisya liŵasa lyangu.” Kaneko m’baleju ni ŵamkwakwe ŵaganisisye yakuti atande upayiniya. Nambo kuti yeleyi yikomboleche, ŵasosekwaga kuleka masengo gawo. Jemanjaji ŵatandite kukamula masengo gakuswejesya soni ŵalijiganyisye kuti ajikutileje ni mbiya syakwete. Ana jemanjaji ali ŵakusangalala ligongo lya yaŵasagwile kutendayi? M’baleju jwatite, “Apano ni patukusangalala mnope ni utumiki watukutenda, mnopemnope patukwawona ŵakulijiganya Baibulo ŵetu ali mkulijiganya yakwamba Yehofa.”
Mfundo Syakamuchisya
w07 12/15 10 ¶1-2
Ana Akwete Pungu pa Yindu Yausimu?
USIYA jwaŵele mwenye jwa uchimwene wakummwela kwa Yuda ali ni yaka 16 basi. Jwalakwe jwalamulile kwa yaka yakupunda 50, kutandila mu 829 B.C.E mpaka 778 B.C.E. Kutandila ali mwanache, Usiya “ŵatesile yakulungama pameso pa AMBUJE.” Ana chichi chachamkamuchisye kutenda yindu mwakuŵajilwa? Baibulo jikusatusalila kuti, “Sakaliya piŵaliji pungu jwa [Usiya], ŵamjigenye jwalakwejo kuti ampikanileje Mlungu. Myoyo Sakaliya piŵaliji chijumi, Usiya ŵatumichilaga AMBUJE mwakulupichika, nipo AMBUJE ŵajaliwasisye ŵelewo.”—2 Mbili 26:1, 4, 5.
Ni malo gelegape m’Baibulo papakusasala ngani jakwamba Sekaliya, juŵaliji pungu jwa mwenye. Sekaliya jwamkamuchisye Usiya juŵaliji mwenye jwachinandipile kuti “ampikanileje Mlungu.” Buku jine jakulondesya Baibulo (The Expositor’s Bible) jasasile kuti yili yangakayikasya kuti Sekaliya, “ŵaliji mundu jwakumanyilila chenene malemba, jwakulimba mwausimu, nambosoni jwakombola kwiganya.” Jwamlijiganye jwine jwayikene pakusala kuti, “Sekaliya jwamanyililaga chenene yakulochesya soni. . .jwaliji jwalunda, jwakulipeleka, mundu jwambone, nambosoni yikuwoneka kuti jwalakweju ŵamkamuchisye Usiya.”
MEYI 29–JUNI 4
CHIPANJE CHAKUSIMANIKWA M’MALOŴE GA MLUNGU | 2 MBILI 28-29
“Mpaka Amtumichile Yehofa Atamose Kuti Achinangolo Ŵawo Nganaŵa Yisyasyo Yambone”
Twasyasyeje Achimjakwe Ŵapamtima ŵa Yehofa
8 Mwakulekangana ni Lute, Hesekiya ŵapagwile mumtundu wawaliji wakulipeleka kwa Yehofa. Nambope Ayisalayeli ŵane nganaŵa ŵakulupichika. Mwambone, Mwenye Ahasi juŵaliji babagwe Hesekiya ŵaliji mundu jwakusakala mnope. Mwenye jwakusakalaju ŵatendekasisye Ayisalayeli ŵajinji kutanda kulambila milungu jakupanganyikwa ni ŵandu soni ŵasakesye nyumba ja Mlungu ja ku Yelusalemu. Ahasi ŵayikene pakupeleka mbopesi ŵane mwa achabalegwe ŵa Hesekiya. Kusala yisyene, jeleji jaliji ndaŵi jakusawusya mnope kwa Hesekiya.—2 Ayi. 16:2-4, 10-17; 2 Mbi. 28:1-3.
Twasyasyeje Achimjakwe Ŵapamtima ŵa Yehofa
9 Chisyasyo chakusakala cha Ahasi chikamtendekasisye Hesekiya kumtumbilila Yehofa. Moŵa agano, ŵandu ŵane ŵasimene ni yakusawusya yakulandanila ni ya Hesekiya akusaliwona kuti akwete magongo gakupikanika gakumtumbilila Yehofa soni likuga lyakwe. (Mis. 19:3) Ŵane akusakulupilila kuti ndamo jakusakala ja achinangolo ŵawo jatendekasisye kuti aŵesoni ŵakusakala. (Esek. 18:2, 3) Ana yeleyi yili yisyene?
10 Chisyasyo cha Hesekiya chikulosya kuti yeleyi nganiyiŵa yisyene. Pangali ligongo lyakuti tumtumbilileje Yehofa ligongo jwalakwe ngakusiŵatendekasya ŵandu kuti asimaneje ni yakusawusya. (Yob. 34:10) Yili yisyene kuti achinangolo akusiŵajiganya ŵanache ŵawo yindu yambone kapena yakusakala. (Mis. 22:6; Akolo. 3:21) Nambo yeleyi ngayikulosya kuti mwayiŵelele yindu mwiŵasa mwetu mpaka yitutendekasye kuŵa ŵakusakala kapena ŵambone. Ligongo chichi? Ligongo lyakuti Yehofa ŵampele mundu jwalijose upile wakusagula kutenda yambone kapena yakusakala. (Deut. 30:19) Ana Hesekiya ŵawukamulichisye masengo chatuli upilewu?
11 Atamose kuti babagwe Hesekiya ŵaliji mundu jwakusakala mnope, nambo Hesekiya ŵaliji mundu jwambone mnope. (Aŵalanje 2 Ayimwene 18:5, 6.) Hesekiya nganasagula kuya chisyasyo cha babagwe. M’malomwakwe, ŵapikanilaga ŵakulochesya ŵa Yehofa, mpela Yesaya, Mika soni Hoseya. Mwenye Hesekiya ŵapikanilaga yamuko yaŵapelekaga Yehofa kupitila mwa ŵakulochesya ŵakweŵa. Yeleyi yamkamuchisye kuti alinganye yakusakala yaŵatesile babagwe. Jwalakwe ŵaswejesye nyumba ja Mlungu, ŵam’ŵendile Mlungu kuti ŵakululuchile ŵandu, soni ŵajonasile milungu jakupanganyikwa jajaliji m’chilambomo. (2 Mbi. 29:1-11, 18-24; 31:1) Pandaŵi jele Senakelibu, mwenye jwa Asiliya ŵasakaga kwimuchila msinda wa Yelusalemu, Mwenye Hesekiya ŵalosisye kulimba mtima soni chikulupi. Jwalakwe ŵajegamile kwa Yehofa kuti ŵakulupusye soni ŵalimbikasisye ŵandu ŵakwe. (2 Mbi. 32:7, 8) Mkupita kwa ndaŵi Hesekiya ŵalosisye mtima wakulikwesya, nambo Yehofa paŵamjamwiche, jwalakwe ŵalinandiye. (2 Mbi. 32:24-26) Kusala yisyene, Hesekiya nganakunda kuti muyaŵelele yindu m’liŵasa lyaŵapagwile yisokonasye umi wakwe. Jwalakwe ŵalosisye kuti ŵaliji mjakwe jwa Yehofa. Kwende wosope tukuye chisyasyo chakwe chambonechi.
Mfundo Syakamuchisya
w12 2/15 24-25
Natani Jwaliji Jwakulipeleka pa Kulambila Kweswela
Natani jwamtumichilaga Yehofa mwakulupichika. Jwalakwe jwakamulene ni nganisyo sya Daudi syakuti ataŵe nyumba jandanda ja Mlungu pa chilambo chapasi. Nambope, pandaŵiji, Natani jwagambile kusala ya munganisyo mwakwe mmalo mwakumwusya kaje Yehofa. Nambo chilo cha lisiku lyeleli, Mlungu ŵamsalile Natani kuti akamsalile Daudi kuti ngataŵa nyumba ja Yehofa. Nambo mundu jutachitaŵa nyumbaji chachiŵa jumo mwa ŵanache ŵakwe ŵachalume. Nambope Natani jwasasile kuti Mlungu ŵatesile chilanga ni Daudi chakuti uchimwene wakwe “tiwuchiŵa wa yaka yosope.”—2 Sam. 7:4-16.
Nganisyo sya Mlungu syaliji syakulekangana ni yaŵasasile Natani pangani jakutaŵa nyumba ja Mlungu. Payatendekwe yeleyi, jwakulochesya jwakulinandiyaju nganadandawula, mmalomwakwe jwakamulene ni chakulinga cha Yehofa. Pelepatu jwapeleche chisyasyo chambone mnope kwa m’weji naga Mlungu akutujongolela pa ngani jine jakwe. Natani jwapitilisyepe kukamula masengo gakwe mpela jwakulochesya yayikulosya kuti Mlungu ŵamnonyelagape jwalakwe. Nambosoni yikuwoneka kuti Yehofa ŵamsalile Natani soni Gadi kuti akamlimbikasye Daudi kuti asagule ŵandu ŵakwana 4,000 ŵakuti akamjimbileje Yehofa pa nyumba jakwe.—1 Mbi. 23:1-5; 2 Mbi. 29:25.
JUNI 5-11
CHIPANJE CHAKUSIMANIKWA M’MALOŴE GA MLUNGU | 2 MBILI 30-31
“Kusongana Pampepe Kuli Kwambone kwa Wosopewe”
it-1 1103 ¶2
Hesekiya
Jwalipeleche pakulambila kweswela. Hesekiya jwatandite kulamulila ali ni yaka 25. Pandaŵiji jwatesile yindu mwakulipeleka mnope pakulambila kweswela. Mwamti chindu chandanda chaŵatesile jwalakwe chaliji kuwugula soni kulinganya nyumba ja Mlungu. Kaneko jwalakwe jwaŵilasile ŵakutaga mbopesi soni Alefi, ni ŵasalile kuti, “Sambano une nganisisye kuti ndende chilanga ni AMBUJE, Mlungu juŵamlambilaga Aisalaeli.” Chilanga chaŵatesilechi chaliji chakuti chachiŵa jwakulupichika kwa Mlungu,atamose kuti chilanga cha Chilamusi chaliji chili mkukamulape masengo, nambo a Yuda nganakuyaga yachasalaga Chilamusicho. Jwalakwe jwatesile yindu mwakulipeleka mnope. Jwapitilisye kwawuchisya a Lefi pa utumiki wawo, soni jwatesile yakuti papagwesoni yida yakwimbila nyimbo ni chakulinga chakuti amjimbeleje Yehofa. Ŵaliji mwesi ŵa Nisani, pandaŵi jele ŵasangalalilaga pasaka, nambo nyumba ja Mlungu jaliji jakuti nganaŵe kujiswejesya nombenawo Alefi ni ŵambopesi ŵalijisoni mkanaŵe kuliswejesya. Pa Nisani 16, ŵamalisisye kuswejesya nyumba ja Mlungu soni yindu yakamulichisya masengo mnyumbaji ŵayiŵisilesoni pamalo gakwe. Soni kaneko ŵalinganyisye yakuti papelechedwe mbopesi jakululuchila ulemwa Aisalaeli wosope. Chandanda, achakulungwakulungwa ŵamumsinda ŵayiche ni mbopesi, mbopesi syakukululuchila ulemwa uchimwene wosopewo, mbopesi jakuti aswejesye nyumba ja Mlungu, soni jakwaswejesya ŵandu wosope. Pambesi pakwe ŵapeleche mbopesi syakutinisya syejinji syaŵayiche nasyo ŵandu.—2Mb 29:1-36.
it-1 1103 ¶3
Hesekiya
Ligongo lyakuti ungaliswejesya wa ŵanduwo watendekasyaga kuti akatenda nawo Pasaka pandaŵi jakwe, Hesekiya jwakamulichisye masengo lilamusi lyalyakundaga ŵandu ŵele nganaliswejesya kutenda Pasaka mmwesi wakuyichisya. Jwalakwe jwaŵilanjile Ayuda soni Aisalaeli pakamulichisya masengo yikalata yaŵayitumisye chilambo chosopecho kutandila ku Belesheba mpaka ku Dani. Nambo ŵandu ŵajinji ŵasekaga ŵamitengaŵa. Nambope ŵandu ŵa mu mbumba ja Asha, Manase, soni Sebuloni ŵaliji ŵakusachilila kwika. Nambosoni ŵane ŵakutyochela mu mbumba ja Efelemu soni Isakala ŵayiche ku Pasaka. Konjechesya pelepa, ŵandu ŵajinji ŵanganaŵa Aislaeli ŵayichesoni kumwambowu. Nambo yaliji yakusawusya kwa ŵandu ŵa uchimwene wa kumpoto ŵaŵanonyelaga kulambila kweswela kuti akasimanikwe ku mwambowu. Yaliji myoyo ligongo lyakuti ŵasisyaga soni kwatendela yachipongwe mpela muyaŵelele ni ŵamitenga ŵala. Nambosoni uchimwene wa kumpotowu waliji uli usokonechele ni kulambila kwawunami soni Asiliya ŵalagasyaga.—2 Mb 30:1-20; Nu 9:10-13.
it-1 1103 ¶4-5
Hesekiya
Ali amalisisye kutenda Pasaka, ŵatesilesoni chindimba cha Mikate jangali Chakusasaŵilisya kwa masiku 7. Nambo ligongo lyakuti ŵanduŵa ŵasangalele mnope ŵaganisisye yakuti ajonjechesye masiku ganesoni 7. Atamose kuti yindu nganiyiŵa chenene pandaŵiji nambo Yehofa ŵapitilisye kwatendela yambone mwamti, “Ŵandu ŵa mu msinda wa Yelusalemu ŵaliji ŵa lukondwa, ligongo yindu mpela yeleyi yaliji mkaniyitendekweje kutandilila mu ndaŵi ja Mwenye Solomoni, mwanache jwa Daudi.”—2Mb 30:21-27.
Yaŵatesile ŵanduŵa yalosisye kuti ali ŵakusimichisya kutandilasoni kulambila kweswela. Yeleyi yawonechele ni yayatendekwe panyuma pakwe. Paŵamalisisye kutenda Pasaka ŵapite kukukasa yipilala yamaganga, ŵagwisisye milungu jachilendo soni ŵajonasile malo gakupelechela mbopesi nambosoni malo gakujilambilila milugu jawunami mchilambo chosope cha Yuda soni Benjamini mpaka ku Efelemu ni Manase. (2Mb 31:1) Hesekiya jwalongolele pamasengaga mwamti jwakasenyesoni lijoka lya bulosi lyaŵapanganyisye Mose. Jwatesile yeleyi ligongo lyakuti Aisalaeli ŵapelekaga mbopesi syakutinisya ku lijokali soni ŵaliwonaga kuti lili mlungu jwawo. (2Ay 18:4) Ali amalisisye kutenda Pasakaju Hesekiya jwalolechesye kuti kulambila kweswela kukasokonechelasoni. Jwalakwe jwaŵisilesoni ŵambopesi mmagulu gawo soni jwatesile yakuti ŵandu ŵakamuchisyeje jemanjaji pautumiki wawo ŵa panyumba ja Mlungu. Jwalimbikasisyesoni ŵanduŵa kuti apelecheje kwa Alefi soni ŵambopesi cha likumi chayindu yawo soni yisogosi yandanda kukomala. Ŵanduwo ŵapeleche yinduyo ni mtima wosope.—2Mb 31:2-12.
Mfundo Syakamuchisya
“Naga Akumanyilila Yindu Yeleyi, Ali Ŵakusangalala Naga Akuyitenda”
14 Litala line lili kuŵa ŵakupikanila jwine pakuŵecheta. Pa Yakobo 1:19 pakusati tukusosekwa ‘tuŵeje ŵachitema pakupikana.’ Yehofa ali chisyasyo chambone mnope pa ngani jeleji. (Gen. 18:32; Yos. 10:14) Alole kukambilana kukwapali kutyochela pa Ekisodo 32:11-14. (Aŵalanje.) Atamose kuti Yehofa nganasosekwaga chikamuchisyo cha Mose, nambo jwalakwe jwakundile kuti Mose aŵechete nganisyo syakwe. Ana mpaka apikanile nganisyo sya mundu jwakusanonyela kutenda yakulemwecheka? Nambo Yehofa akusapikanila mwakulitimalika kwa ŵandu ŵakusapopela kwa jwalakwe mwakulupichika.
15 Jwalijose mpaka atende chenene kuliwusya kuti, ‘Naga Yehofa akusayikana pakulitulusya pakutenda yindu ni ŵandu soni kwapikanila mpela muŵatendele ni Abulahamu, Lakele, Mose, Yoswa, Manowa, Eliya soni Hesekiya, ana ngangusosekwa kwachimbichisya abale ni alongo, kupikanila nganisyo syawo atamose kukamulichisya masengo nganisyo syawo syambone?’ Ana mumpingo mwangu soni m’liŵasa lyangu pana ŵakusosechela chikamuchisyo changu? Naga yili m’yoyo, ana ngusosekwa kutenda chichi?—Gen. 30:6; Ŵak. 13:9; 1 Ayi. 17:22; 2 Mbi. 30:20.
JUNI 12-18
CHIPANJE CHAKUSIMANIKWA M’MALOŴE GA MLUNGU | 2 MBILI 32-33
“Ŵalimbikasyeje Aklistu Amchijawo Pasimene ni Yakusawusya”
it-1 204 ¶5
Asiliya
Senakelubi. Senakelubi, mwanache jwa Saligoni II, jwayiche kukuputa ngondo ni uchimwene wa ku Yuda mu chaka cha 14 cha ulamusi wa Hesekiya (732 B.C.E.) (2Ay 18:13; Yes 36:1) Ahasi ŵaŵaliji babagwe Hesekiya ŵamtumichilaga mwenye jwa ku Asiliya. Nambo Hesekiya jwakanile kutenda yeleyi. (2Ay 18:7) Yeleyi yamtumbilikasisye Senakelubi mwamti jwaputile ngondo ku Yuda ni kusumula misinda 46 (awanichisye ni Yes 36:1, 2.) Soni paŵaliji ku Lakishi, jwalakwe jwamlamwile Hesekiya kuti apeleche makilogalamu 1,000 ga golide ($ 11,560,000) soni 10,000 ga silifa ($ 1,982,000.) (2Ay 18:14-16; 2Mb 32:1; awanichisye ni Yes 8:5-8.) Hesekiya jwapeleche mbiyasi. Atamose yaliji myoyo Senakelubi jwamtumichisye utenga wakuti agambe kwimika makono. (2Ay 18:17–19:34; 2Mb 32:2-20) Nambo chilo chimo Yehofa ŵaŵuleje asilikali ŵakwana 185,000 ŵa ku Asiliya. Yeleyi yatendekasisye kuti Senakelubi awujileje ku Nenefe. (2Ay 19:35, 36) Ali kweleko ŵanache ŵakwe ŵaŵili ŵamwuleje, soni mwanache jwakwe jwine lina lyakwe Esalahadoni ŵaŵele mwenye. (2Ay 19:37; 2Mb 32:21, 22; Yes 37:36-38) Yakutendekwa yeleyi, nambosoni yakuwulajidwa kwa asilikalia ŵa ku Asiliya, yikusimanikwa payindu yaŵalembile yakwamba Senakelubi soni Esalahadoni.—YIWULILI, Vol. 1, p. 957.
w13 11/15 19 ¶12
Ana Ŵakuchinga 7 Soni Achimlongola 8 Akwimila Ŵani Masiku Agano?
12 Yehofa ali jwakoseka kutukamuchisya kutenda yindu yele nganituŵa tukombwele kutenda mwajika jetu. Hesekiya pampepe ni achalume ŵakwe ŵamachili soni “nduna syakwe ŵaganisisye yakuti akawugale nduluko syamesi sisyaliji kusa kwa msindawo . . . Kaneko Mwenye Hesekiya ŵalimbisye chitetelo cha msindawo pakulinganya soni lipupa, ni sanja penani pa lipupalyo, ŵataŵile soni lipupa lya kusa. . . Ŵapanganyisye soni mipamba ni yakuchijila yejinji.” (2 Mbi. 32:3-5) Pandaŵiji Yehofa ŵakamulichisye masengo achalume ŵakulimba mtima kuti ŵachenjele soni kwalongolela ŵandu ŵakwe. Achalumeŵa ŵaliji Hesekiya, nduna syakwe, soni ŵakulochesya ŵakulimba mnope mwawusimu.
w13 11/15 19 ¶13
Ana Ŵakuchinga 7 Soni Achimlongola 8 Akwimila Ŵani Masiku Agano?
13 Yisyene kuti Hesekiya ŵawugele nduluko syamesi soni kutaŵa mapupa ga msindawu. Nambope yaŵatesile panyuma pa yeleyi yaliji yakusosekwa mnope. Hesekiya jwaliji mkuchinga jwaganichisya mnope ŵandu ŵakwe mwamti jwasongangenye pampepe ni kwalimbikasya ni maloŵe gakuti, “Mkasimwajogopa mwenye ŵa ku Asiliya . . . , pakuti uwe tupali ŵamachili kwapunda jemanjajo. Ŵelewo akwete likuga lya ngondo lya ŵandu, nambo uwe tuli ni AMBUJE, Mlungu jwetu jwakutukamusya, soni ni jwakutuputila ngondo syetu.” Maloŵegatu galiji gakulimbikasya mnope soni gakumbwisye ŵanduwo kuti Yehofa chachaputila ngondojo. Ayudaŵa paŵapikene yeleyi, “ŵakulupilile maloŵe ga Hesekiya mwenye jwa ku Yuda.” Akumbuchileje kuti “maloŵe ga Hesekiya” ni gagakamuchisye ŵanduŵa kulimba mtima. Mwenyeju, nduna syakwe, achalume ŵakwe ŵamachili, nambosoni jwakulochesya Mika soni Yesaya ŵaliji ŵakuchinga ŵambone mpela mwaŵawechetele kalaYehofa kupitila mwa jwakulochesya jwakwe.—2 Mbi. 32:7, 8; aŵalanje Mika 5:5, 6.
Mfundo Syakamuchisya
Ana Kupitikuka Mtima Kusyesyene Kukusagopolela Chichi?
11 Yehofa jwajanjile mapopelo ga Manase pandaŵi jakwe. Pakujigalila yaŵaŵendile Manase, Yehofa jwayiweni kuti apitikwiche mtima yisyesyene. Jwalakwe ŵapikanile yaŵaŵendile Manase soni ŵamkundile kuti awujile ku uchimwene wakwe. Manase ŵawuweni welewu kuŵa upile wakulosya kuti apitikwiche mtima yisyesyene. Mwakulekangana ni Ahabu, Manase jwachenjile ndamo syakwe syakusakala, kumasya kulambila kwaunami ni kutanda kulimbikasya kulambila kusyesyene. (Aŵalanje 2 Mbili 33:15, 16.) Manase jwasosekwe kulimba mtima soni chikulupi kuti akombole kutenda yosopeyi. Yaliji myiyi ligongo lyakuti kwa yaka yejinji jwalakwe nganaŵa chisyasyo chambone kwa ŵamwiŵasa mwakwe soni kwa ŵandu ŵaŵaliji pasi pa ulamusi wakwe. Nambo chakumbesi kwa umi wakwe jwalinganyisye unasi wakwe ni Yehofa. Kupwatika pelepa, jwalakwe ŵaŵele chisyasyo chambone kwa chisukulu chakwe Yosiya, jwele panyuma pakwe jwaŵele mwenye jwambone mnope.—2 Ayi. 22:1, 2.
12 Ana tukulijiganya chichi pa yajwatesile Manase? Jwalakwe jwalinandiye soni jwamŵendile Mlungu kuti amtendele chanasa. Kupwatika pelepa, jwachenjile ndamo syakwe syakusakala. Jwalinganyisyesoni yindu yiŵajonasile soni jwatandite kumlambila Yehofa. Yaŵatesile Manase yikusakamuchisyasoni ŵandu ŵane ŵatesile yindu yakusakala mnope. Yiyamtendechele Manase yikulosya kuti Yehofa ali ‘jwambone ni jwakululuchila.’ (Sal. 86:5) Yehofa ali jwakoseka kwakululuchila ŵandu ŵapitikwiche mtima yisyesyene.
JUNI 19-25
CHIPANJE CHAKUSIMANIKWA M’MALOŴE GA MLUNGU | 2 MBILI 34-36
“Atende Yakuti Maloŵe ga Mlungu Gakamuchisyeje Mnope”
it-1 1157 ¶4
Hulida
Hilikiya jwamkulungwa jwa ŵakutaga mbopesi jwasimene “buku ja Malamusi” paŵalinganyagasoni nyumba ja Mlungu. Yosiya paŵagambile kupikana maloŵe ga m’bukuji, jwatumisye ŵandu kuti akawusye lunda kwa Yuhofa. Ŵanduŵa ŵapite kwa Hulida, juŵasalile maloŵe gakutyochela kwa Yehofa. Jwalakwe jwasalile kuti yakusawusya yosope yayalembedwe mu ‘bukuji’ chachisimana nayo ligongo lya kumkana kwawo Mlungu. Hulida jwasasilesoni kuti, ligongo lyakuti Yosiya jwalosisye mtima wakulinandiya ngasasimana ni yakusawusyayi mpakana pandaŵi jitachiwa nikuŵichidwa m’malembe mwamtendele.—2Ay 22:8-20; 2Mb 34:14-28.
w09 6/15 10 ¶20
Alipelecheje Mnope pa Nyumba ja Yehofa
20 Mwenye Yosiya ŵasalile ŵandu kuti alinganyesoni nyumba ja Mlungu. Pamasengo gelega Jwamkulungwa jwa Ŵakutaga Mbopesi Hilikiya “ŵasimene buku ja Malamusi giŵapeleche AMBUJE, Mlungu kwa Mose.” Jwalakwe jwapeleche bukujo kwa Shafani juŵaliji mlembela soni Shafanijo jwamŵalanjile Yosiya bukujo. (Aŵalanje 2 Mbili 34:14-18.) Ana mwenyeju jwatesile yamtuli paŵapikene yeleyi? Ndaŵi jijojo jwalakwe jwapapwile yakuwala yakwe ligongo lyachanasa soni jwasalile ŵandu kuti apopele kwa Yehofa. Kupitila mwa jwakulochesya jwamkongwe, lina lyakwe Hulida, Mlungu ŵapeleche utenga wakwamuka yijiganyo ya dini yayaliji mkutendekwa ku Yuda. Yehofa ŵam’weni soni ŵamyamichile mnope Yosiya ligongo lyakulimba mtima kwakwe pakutyosya kulambila kwawunami. Atamose kuti Yehofa ŵaliji ali asasile kala yayakusawusya yawuchisimana nawo mtunduwu. (2 Mbi. 34:19-28) Ana tukulijiganyapo chichi pelepa? Kusala yisyene tukusosekwa kukola mtima mpela waŵakwete Yosiya. Naga tupikene malangiso gakutyochela kwa Yehofa tukusosekwa tugakuyeje mwachitema. Tukusosekwasoni tukumbuchileje yampaka yitendekwe naga mwapanandipanandi tukutanda kutenda yampatuko kapena yakusakala. Naga tukutenda yeleyi, ngasitukayichila amta panandi kuti Yehofa akuyiwona soni akuyamichila kulingalinga kwetu kwatukulosya pa kulambila kusyesyene, mpela mwaŵatendele ni Yosiya.
Mfundo Syakamuchisya
Ana Chayikamulichisye Masengo Yindu Yayalembedwe?
15 Pakumalisya, ana mpaka tulijiganye yatuli kutyochela kwa Yosiya? Atamose kuti Yosiya jwaliji mwenye jwambone, nambo jwalakwe ŵatesile chindu chakulemwecheka, soni yakuyichisya yakwe jwawile. (Aŵalanje 2 Mbili 35:20-22.) Yosiya jwapite kumenyana ngondo ni Mwenye Neko jwa Iguputo. Nambo Mwenye Neko ŵamsalile kuti ngakusaka kulimbana ni jwalakwe. Baibulo jikusasala kuti maloŵe gaŵaŵechete Neko galiji ‘gakutyochela kwa Mlungu.’ Nambi ligongo chichi Yosiya ŵapite kumenyana ngondo ni Neko? Baibulo jangasala chilichose.
16 Ana Yosiya akamanyilile chatuli kuti maloŵe ga Neko galiji gakutyochela kwa Yehofa? Jwalakwe ŵasosekwaga kum’wusya jwakulochesya jwakulupichika Yelemiya. (2 Mbi. 35:23, 25) Nambo pangali chachikusalosya kuti jwatesile yeleyi. Neko ŵajawulaga ku Kalikemesi kuputana ngondo ni mtundu wine ngaŵaga wa ku Yelusalemu. Konjechesya pelepa, Neko nganatenda chilichose chakunyosya lina lya Yehofa atamosesoni ŵandu ŵakwe. M’yoyo, Yosiya ŵatesile yangali lunda pakwawula kukulimbana najo. Ana tukulijiganya chilichose pa yaŵatesileyi? Patukusosekwa kusagula yakutenda pa ngani jinejakwe, kuli chenene kuganichisya kuti Yehofa akujiwona mwatuli nganijo.
17 Patukusosekwa kusagula yakutenda, tukusosekwa kuganichisya kaje malamusi ga m’Baibulo gampaka tugakamulichisye masengo. Mu yakutendekwa yine, tukusosekwa kuwungunya m’mabuku getu kapena kwawusya achakulungwa ŵa mumpingo kuti atukamuchisye. Achakulungwawo mpaka atusalile songa sine sya m’Baibulo syatukusosekwa kusiganichisya. Aganichisye ya mlongo jwine juŵalombene ni jwamlume jwangakulupilila. Mlongojo akumanyilila kuti akwete ukumu wakulalichila ngani syambone. (Mase. 4:20) Lisiku line palinganyisye yakwinjila mu undumetume, ŵamkwakwe ŵangakulupililawo akumsalila kuti akajawula mu undumetumemo. Mlongojo akumanyilila ya lilamusi lyakupanganya ŵakulijiganya soni lyakumpikanila Mlungu. (Mat. 28:19, 20; Mase. 5:29) Nambope, mpaka asosekwesoni kulola kusosekwa kwakwapikanila ŵamkwakwe mpela mtwe wa liŵasa, soni kuŵa jwaganisya chenene. (Aef. 5:22-24; Afi. 4:5) Ana chakulinga cha ŵamkwakwewo chili kumlekasya kulalichila, kapena akwete yakuti atendele yalumo mpela liŵasa kwa lisiku limopelyo? Mpela ŵakutumichila ŵa Yehofa tukusosekwa kuganichisyaga patukusagula yakutenda yampaka yimlumbe Mlungu.
JUNI 26–JULAYI 2
CHIPANJE CHAKUSIMANIKWA M’MALOŴE GA MLUNGU | ESALA 1-3
“Akundeje Kuti Yehofa Ŵakamulichisyeje Masengo”
Ana Akusayiwona Yindu Yaŵayiweni Sakaliya?
AYUDA ŵasangalele mnope. Yehofa Mlungu “ŵaŵisile nganisyo mu mtima mwa Sailasi” mwenye jwa Pelesiya kuti ŵagopole Aisalaeli ŵaŵaliji achikapolo ku Babiloni kwa yaka yejinji. Mwenyeju jwasalile Ayuda kuti awujile kumangwawo kuti “akataŵe nyumba ja AMBUJE, Mlungu jwa Aisalaeli.” (Esa. 1:1, 3) Yeleyitu yaliji yakusangalasya mnope. Yeleyi yagopolelaga kuti kulambila Mlungu jwakuwona kuchitandilasoni m’chilambo chaŵapele Mlungu ŵandu ŵakwe.
Magaleta Soni Chisoti cha Uchimwene Yikusatuchenjela
2 Sekaliya jwayimanyi kuti Ayuda ŵaŵawujile ku Yelusalemu ŵaliji achalume ni achakongwe ŵakulupichika. Jemanjaji ŵaliji ŵandu “ŵele Mlungu jwakuwona ŵalimbikasisye mitima jawo” kuti aleche nyumba ni yipanje yawo. ( Esa. 1:2, 3, 5) Ŵalesilesoni chilambo chaŵachisyoŵelele ni kuja kutama m’chilambo chachaliji chachilendo kwa ŵajinji mwa jemanjajo. Yikaŵe kuti masengo gakutaŵasoni nyumba jakulambilila Yehofa galiji gangasosekwa, nikuti jemanjajo ngamkanawutanda ulendo wa makilomita 1,600 wakupita m’malo gakusawusya.
Mfundo Syakamuchisya
w06 1/15 19 ¶1
Mfundo Syekulungwakulungwa sya M’buku ja Esala
1:3-6. Mpela mwayaŵelele ni Aisalaeli ŵane ŵaŵasigalile ku Babulo, masiku aganosoni ŵa Mboni sya Yehofa ŵane nganaŵa akombwele kutenda utumiki wa ndaŵi syosope kapena kwawula kukutumichila kudela jakusosekwa ŵakulalichila ŵajinji. Atamose yili myoyo, jemanjaji akusiŵalimbikasya ŵampaka akombole kutenda utumikiwu. Nambosoni akusapeleka mbiya syakuti sikamuchisyeje pa masengo ga Uchimwene.