Malifalensi ga Pologalamu ja Utumiki ni Umi Wetu Wachiklistu
© 2024 Watch Tower Bible and Tract Society of Pennsylvania
SEPETEMBA 2-8
CHIPANJE CHAKUSIMANIKWA M’MALOŴE GA MLUNGU MASALIMO 79-81
Alinonyeleje Lina Lyakuchimbichika lya Yehofa
Chiwombolo Chili ‘Mtuka Wamlama’ Wakutyochela kwa Atati
5 Ana mpaka tulosye chatuli kuti tukusalinonyela lina lya Mlungu? Mpaka tulosye yeleyi kupitila m’yitendo yetu. Yehofa akusasaka kuti tuŵeje ŵaswela. (Aŵalanje 1 Petulo 1:15, 16.) Yeleyi yikugopolela kuti tukusosekwa kumlambila Yehofa jika soni kumpikanila ni mtima wetu wosope. Atamose patukulagasidwa, tukusosekwa kulingalinga kutenda yindu mwakamulana ni malamusi gakulungama ga Yehofa. Patukutenda yindu yakuŵajilwa, tukusalosya lilanguka lyetu soni yeleyi yikusayikasya uchimbichimbi ku lina lya Yehofa. (Mat. 5:14-16) Mwatukusatendela yindu paumi wetu, tukusalosya kuti malamusi ga Mlungu gali gambone soni kuti yaŵasasile Satana yili yaunami. Patutesile yakulemwa, tukusapitikuka mtima ni kuleka yitendo yangamchimbichisya Yehofa.—Sal. 79:9.
ijwbv 3 ¶4-5
Aloma 10:13—“Jutalikolanje lina lya Ambuje”
M’Baibulo maloŵe gakuti mundu “jwakuŵilanga pa lina lya Yehofa” gakusagopelela yindu yejinji ngaŵa kwamba kulimanyilila lina lya Mlungu kapena kulikamulichisya masengo pakumlambila jwalakwe. (Salimo 116:12-14) Yikusapwatikapo kumkulupilila Mlungu soni kumdalila jwalakwe kuti chatukamuchisyeje.—Salimo 20:7; 99:6.
Yesu Klistu jwaliwonaga lina lya Mlungu kuŵa lyakusosekwa mnope. Mulipopelo lyakwe lya chisyasyo jwalakwe jwatandite ni maloŵe gakuti, “Atati ŵetu ŵakwinani, lina lyawo lichimbichikwe,” kapena kuti liŵe lyeswela. (Mateyu 6:9) Yesu jwalosisye kuti naga tukusaka kuti chitupate umi wangamala tukusosekwa kummanyilila, kumpikanila soni kumnonyela Yehofa.—Yohane 17:3, 6, 26.
Mfundo Syakamuchisya
it-2 111
Yosefe
Lina lya Yosefe Lyaliji Lyakumanyika. Paŵanache wosope ŵa Yakobo, Yosefe jwakwete udindo wakusosekwa mnope. Ligongo lya yeleyi, yili yangasimonjesya kuti ndaŵi sine Baibulo jikusakamulichisya masengo lina lya Yosefe pakusala ya mbumba syosope sya Aisalaeli (Sal 80:1) kapenasoni pakusala ya ŵandu ŵakutyochela ku Uchimwene wa kumpoto. (Sal 78:67; Am 5:6, 15, NWT.; 6:6) Lina lyakweli akusalikamulichisyasoni masengo pakusala yakulochesya ya m’Baibulo. Mesomkulola gaŵagaweni jwakulochesya Esekieli galosisye kuti chilambo chaŵapochele Yosefe chakwete maupande gaŵili (Ese 47:13), soni geti jimo ja msinda wakuti “AMBUJE ali Apano!” jakwete lina lyakuti Yosefe. (Ese 48:32, 35) Nambosoni pakusala yakwakamulanyasoni ŵandu ŵa Yehofa, Yosefe akusakolanjidwa kuti ali jwakulamulila mbali jine ja chilambo pele mbali jinejo jwakulamulila jwakwe ali Yuda. (Ese 37:15-26, NWT.) Yakulochesya ya Obadiya yalosisye kuti “lukosyo lwa Yosefe” luchijonajidwa pampepe ni “lukosyo lwa Esawu.” (Ob 18) Nambo yakulochesya ya Sakaliya yasasile kuti Yehofa chachakulupusya “ŵandu ŵa ku Isalaeli” kapena kuti nyumba ja Yosefe. (Sak 10:6) Mwakulekangana ni Efelayimu, lina lya Yosefe likusasimanikwa pa mbumba sya Yisalayeli jwausimu.—Chw 7:8.
Pakuŵapo lina lya Yosefe likusimanikwa pa Chiwunukuko 7:8, yeleyi yikulosya kuti yakulochesya yaŵasasile Yakobo ali asigele panandi kuwa yakwayagasoni Yisalayeli jwausimu. Yili yakusangalasya kumanyilila kuti Yehofa Mlungu jwali Jwamachili jwa Yakobo, ŵamsagwile Klistu Yesu kuŵa M’busa Jwambone. Mwamti Yesu jwapeleche umi wakwe ligongo lya “ngondolo.” (Yoh 10:11-16) Klistu Yesu ni jwali liganga lyapakona lya fendeshoni ja nyumba ja Mlungu. Mwamti Isalayeli jwausimu ataŵidwe pelepo. (Aef 2:20-22; 1Pe 2:4-6) M’busa jweleju jwalisoni Liganga ali yimpepe ni Mlungu Jwamachiligosope.—Yoh 1:1-3; Mas 7:56; Ahe 10:12; awanichisye ni Genesesi 49:24, 25.
SEPETEMBA 9-15
CHIPANJE CHAKUSIMANIKWA M’MALOŴE GA MLUNGU MASALIMO 82-84
Ayamichileje Upile Wakumtumichila Yehofa
Yatukulijiganya Kutyochela ku Yijuni
Ŵandu ŵaŵatamaga ku Yelusalemu ŵayimanyililaga chenene yiŵaleŵale. Yijuniyi yikusanonyela kutaŵa yisusi yakwe kusi kwa malata ga majumba. Yine yataŵile yisusi yakwe panyumba jakulambilila jaŵataŵile Solomoni. Yiŵaleŵale yayataŵaga yisusi yakwe panyumba jakulambililaji chaka chilichose yaŵaga pamalo gakuteteyeka. Ligongo lya yeleyi yakombolekaga kusosola ŵanache ni kula chenene.
Juŵalembile Salimo 84, jumo mwa ŵanache ŵa Kola, jwayiwonaga yisusiyi pa nyumba jakulambilila. Jwalakwe jwatumichilaga panyumba jakulambililaji chijuma chimo pa miyesi 6 jilijose. Ligongo lyakusachilila kuŵa pa nyumba ja Yehofa mpela muyatendelaga yiŵaleŵale yayakwete malo gakutamilichika pa nyumbajo, jwalakwe jwasasile mwakusangalala kuti, “Wawo Yehofa jwamakuga ga ngondo, une ngusanonyela nyumba jawo jakulambilila! Umi wangu ukusachilila kutama m’malo gawo Yehofa. Machili gamalile ligongo lyakusachilila kutama pa malo gawogo . . . Atamose yijuni yikusapata malo gakutama, nombe yiŵaleŵale yikusataŵa yisusi yakwe, ni kwagoneka ŵanache ŵakwe chiŵandika ni malo gakupelechela mbopesi, wawo Yehofa jwamakuga ga ngondo, Mwenye jwangu ni Mlungu jwangu!” (Salimo 84:1-3) Ana nombe m’weji, yimpepe ni ŵanache ŵetu, tukusasachilila kusongana ni ŵandu ŵa Mlungu ndaŵi syosope?—Salimo 26:8, 12.
w08 7/15 30 ¶3-4
Kuti Aŵeje Ŵakusangalala Akoleje Yakulinga Yampaka Ayikwanilisye
Ndaŵi sine mpaka tulepeleje kutenda yejinji pakumtumichila Yehofa ligongo lya uchekulu kapena kulwala. Naga wawojo ali nangolo soni akulela mwanache jwachinandipile nikuti mpaka apinduleje panandi pakutenda lijiganyo lya pajika kapena pali pa misongano ja Chiklistu. Yili myoyo ligongo lyakuti ndaŵi soni machili gawo gakusamalila pakumsamalila mwanachejo. Atamose yili myoyo akusosekwape kuganichisya yampaka atende kuti akomboleje kutenda yejinji pakumtumichila Yehofa.
Kalakala, Mlefi jwine jwakumbilaga yindu yakuti yaliji yangakomboleka kwa jwalakwejo. Jwalakwe jwakwete upile wakutumichila pa nyumba ja Mlungu kwa mawiki gaŵili pachaka. Nambope, jwasakaga kuti atumichileje pa nyumba ja Mlungu ndaŵi syosope chiŵandika ni malo gakupelechela mbopesi. (Sal. 84:1-3) Ana mundu jwakulupichikaju, jwatesile chichi kuti ajikutileje ni yindu yaŵakombolaga kutenda? Jwalakwe jwamanyilile kuti kusimanikwa pa nyumba ja Mlungu atamose lisiku limpepe waliji upile wekulungwa mnope. (Sal. 84:4, 5, 10) Mwakulandana ni yeleyi, tuŵambaleje kuganichisya yindu yele nganituŵa tukombwele. Mmalomwakwe, tuganichisyeje soni kuyamichila yindu yatukukombola kutenda apano pakumtumichila Yehofa.
Jemanja Ali Ŵakusosekwa Mnope kwa Yehofa Mlungu
12 Naga akulaga ni ulwele, akakayichilaga kuti Yehofa akumanyilila yakusimana nayo. Amŵendeje jwalakwe kuti ŵakamuchisye kuyiwona mwakuŵajilwa yakusawusya yakusimana nayo. Kaneko akusosekwa kukamulichisya masengo Baibulo kuti apate maloŵe gambone gaŵasunjile Yehofa kuti galimbikasye wawojo. Pakuŵalanga Baibulo aganichisyeje mnope ndime syasikulosya mwakusiŵawonela Yehofa ŵakutumichila ŵakwe kuŵa ŵakusosekwa. Mwakutenda yeleyi, chachiyiwona kuti Yehofa ali jwambone kwa ŵandu wosope ŵakusamtumichila jwalakwe mwakulupichika.—Sal. 84:11.
Mfundo Syakamuchisya
it-1 816
Mwanache Jwamasije
Yaliji yangasawusya kuti atande kwaliŵalila ŵanache ŵamasijeŵa ŵele nganakola jwalijose jwakuti ŵachenjeleje. Myoyo Yehofa ŵakamulichisye masengo maloŵe gakuti “ŵanache ŵamasije” pakusala ya kukulupichika kwa Aisalaeli kapena ungakulupichika wawo. Aisalayeli ŵasamalilaga chenene ŵanache ŵamasije pandaŵi jele chilambo chawo chaŵaga paunasi wambone ni Yehofa. Nambo jemanjaji patandite kutenda yindu yangali chilungamo soni palesile kumtumichila Yehofa, ŵanache ŵamasije ŵalagaga mnope. (Sal 82:3; 94:6; Yes 1:17, 23; Yel 7:5-7; 22:3; Ese 22:7; Sak 7:9-11; Mki 3:5) Yehofa jwasasile kuti jwakutembeleledwa ali mundu jwele juŵatendelaga ŵanache ŵamasije ngalwe. (De 27:19; Yes 10:1, 2) Jwasasilesoni kuti jwalakwe ali Jwakwakulupusya (Mis 23:10, 11), Jwakwakamuchisya (Sal 10:14), soni Mtati (Sal 68:5) jwa ŵanache ŵamasije. Jwalakwe ni jwakusiŵachenjela ŵanache ŵamasije (De 10:17, 18), kwalosya chanasa (Ho 14:3), kwakamuchisya (Sal 146:9), soni kwalela kapena kuti kwasunga ŵachijumi.—Yel 49:11.
Aklitu ŵasyesyene akusamanyikasoni ni chilonyelo chakusalosya kwa ŵandu ŵele ŵamkwawo kapena achinangolo ŵawo ŵawile. Jwakulijiganya Yakobo jwalembile kuti, “Kutumichila kwakuli kweswela soni kwakuŵajilwa pameso pa Mlungu jwetu jwalisoni Atati ŵetu ni aku: Kwasamalila ŵanache ŵamasije soni achakongwe ŵamasije pakusimana ni yakusawusya, soni kuliŵambasya ku yindu yangalumbana ya m’chilambochi.”—Yak 1:27.
SEPETEMBA 16-22
CHIPANJE CHAKUSIMANIKWA M’MALOŴE GA MLUNGU MASALIMO 85-87
Lipopelo Likusatukamuchisya Kuŵa Ŵakupilila
w12 5/15 25 ¶10
Ana Akusalosya Uchimbichimbi wa Yehofa?
10 Kuti tulosyeje uchimbichimbi wa Mlungu tukusasosekwa kuti ‘tukaleka kupopela.’ (Alo. 12:12) Tukusosekwa tumŵendeje Yehofa kuti atukamuchisyeje kumtumichila jwalakwe m’litala lyakusalijitichisya. Mpaka tumŵendejesoni kuti atupe msimu wakwe weswela, kuti tumkulupilileje mnope, atukamuchisyeje kukana yakulingwa, soni kuti tukomboleje “kugalondesya chenene maloŵe ga Mlungu.” (2 Tim. 2:15; Mat. 6:13; Luk. 11:13; 17:5) Mpela mwayikusaŵela kuti mwanache akusadalila mnope babagwe, m’wejisoni tukusosekwa kuti tumdalileje Yehofa jwali Mtati jwetu jwakwinani. Patumŵendile Yehofa kuti atukamuchisye kuti tumtumichileje mwakwanila, tukakayichilaga kuti mpaka atukamuchisye. Tukaganisyaga kuti tukumlagasya Yehofa ligongo lyakuti tukupopela kwa jwalakwe mwakuwilisyawilisya. Mmalomwakwe, patukupopela tukumbuchileje kumchimbichisya, kumyamichila, soni kumŵenda kuti atukamuchisyeje patukusimana ni yakulingwa. Nambosoni kuti atukamuchisye kuti yakutenda yetu yichimbichisyeje lina lyakwe lyalili lyeswela.—Sal. 86:12; Yak. 1:5-7.
Ana Yehofa Akusajanga Chamtuli Mapopelo Getu?
17 Aŵalanje Salimo 86:6, 7. Jwamasalimo Daudi jwaliji jwakusimichisya kuti Yehofa ŵapikene soni kwanga mapopelo gakwe. M’wejisoni mpaka tukole chikulupi chelechi. Yisyasyo yatukambilene munganiji yikutusimichisya kuti Yehofa akusatupa lunda soni machili gatukusosechela kuti tupilileje yakusawusya. Jwalakwe mpaka akamulichisye masengo abale ni alongo kapena ŵandu ŵangakusamtumichila jwalakwe kuti atukamuchisye.
18 Atamose kuti Yehofa nganaŵa ajanjile mapopelo getu mwatukuganichisya, nambope tukusamanyilila kuti chachijanga. Jwalakwe akusatukamuchisya mwakutupa yatukusosechela pandaŵi jakwe. Myoyo apitilisye kupopela ali mkukulupilila kuti Yehofa chiŵasamalileje apano nambosoni kuti chachipeleka yachikusaka “chachijumi chilichose” m’chilambo chasambano chatukwembecheya.—Sal. 145:16.
Mfundo Syakamuchisya
it-1 1058 ¶5
Mtima
Kumtumichila Mlungu ni “Mtima Wosope.” Kuti mtima wa mundu ukamuleje masengo chenene ukusasosekwa kuŵa wamtundu, nambo mtima wetu wakuwanichisya mpaka uŵe wagaŵikangana. Daudi jwapopesile kuti, “Ambe mtima wangagaŵikangana kuti nalijogope lina lyawo.” Mtima wa mundu mpaka uŵe wakugaŵikangana ligongo lya yindu yakusanonyela kapena kuyijogopa. (Sal 86:11, NWT.) Mundu jweleju akusaŵa ‘jwaunakunaku’ soni jwamtukuta panandipe pakumtumichila Yehofa. (Sal 119:113; Chw 3:16) Munduju akusatenda yindu ni “mtima umo” (maloŵe gane mtima wine ukusaŵa pa yindu yakutendayo pele wine ukusaŵa kwine). Mundu jwamti myiyi akusatumichila achambuje ŵaŵili, kapena akusasala yindu yine nambo mumtima ali mkuganichisya yindu yine. (1Mb 12:23-37; Sal 12:2) Yesu jwasasile mwangapita mumbali kuti ŵandu ŵamtiyi ali ŵachinyengo.—Mat 15:7, 8.
SEPETEMBA 23-29
CHIPANJE CHAKUSIMANIKWA M’MALOŴE GA MLUNGU MASALIMO 88-89
Ulamusi wa Yehofa Uli Wambone Mnope
Akamuchisyeje Ulamusi Wekulungwa wa Yehofa
5 Panasoni ligongo line lyakumtendekasya Yehofa kuŵa jwakuŵajilwa kulamulila. Jwalakwe akusalamulila mwachilungamo. Jwalakwe ŵasasile kuti, ‘Une ndili Yehofa, jwangusalosya chinonyelo changamala, kupeleka chamuko soni kutenda yachilungamo pachilambo chapasi, pakuŵa ngusasangalala ni yindu yeleyi.’ (Yer. 9:24) Yehofa ngakusajendela malamusi gaŵapanganyisye ŵandu kuti amanyilile yayili yakuŵajilwa. Jwalakwe ali msyene chilungamo, soni ligongo lya chilungamo chakwecho ŵapeleche malamusi gakulembedwa kwa ŵandu. “Chilungamo soni chamuko yili chilimbilimbi cha chitengu [chakwe] cha uchimwene,” m’yoyo mpaka tuŵe ŵakusimichisya kuti malamusi gakwe, soni yakusasagula yili yakuŵajilwa. (Sal. 89:14; 119:128) Mwakulekangana ni yeleyi, Satana, atamose kuti akusasisya kuti ulamusi wa Yehofa uli wakuŵajilwa, nambo alepele kutendekasya kuti pachilambopa paŵeje chilungamo ndaŵi syosope.
Akamuchisyeje Ulamusi Wekulungwa wa Yehofa
10 Ulamusi wa Yehofa nganiwuŵa wangalwe. Jwalakwe akusiŵapa ŵandu ufulu soni chisangalalo. (2 Akoli. 3:17) Daudi ŵasasile ya Yehofa kuti, “Lumbili ni uchimwene yili ni jwalakwe [Mlungu]. Machili soni chisangalalo yili pakutama pakwe.” (1 Mbi. 16:7, 27) Jwamalumbo Etani ŵalembilesoni kuti, “Ŵakusangalala ali ŵandu ŵakusagumila mwakusangalala. Akusajenda m’kuŵala kwa pameso pawo, wawo Yehofa. Akusasangalala m’lina lyawo lisiku lyosope, soni chilungamo chawo chikusakwesya.”—Sal. 89:15, 16.
11 Patukuganichisya ndaŵi ni katema ya umbone wa Yehofa, tukusasimichisya mnope kuti ulamusi wakwe uli wambone mnope. Tukusayikana pakupikana mumtima mpela muŵapikanile jwamalumbo juŵasasile kuti, “Kutama lisiku limo m’nyumba jawo kuli kwambone mnope kupunda kutama masiku 1,000 kulikose!” (Sal. 84:10) Ligongo chichi yili m’yoyo? Mpela Mkupanganya jwachinonyelo, Yehofa akusamanyilila yatukusasosechela kuti tuŵeje ŵakusangalala yisyesyene, soni akusatupa yatukusasosechelayo mwakoloŵa magasa. Yiliyose yakusatusalila Yehofa kuti tutende yikusaŵa yakutukamuchisya soni yikusatuyikachisya chisangalalalo, atamose yiŵe yakuti chitusosekwe kulijima yineyakwe.—Aŵalanje Yesaya 48:17.
w14 10/15 10 ¶14
Awukulupilileje Mnope Uchimwene wa Mlungu
14 Aganichisye ya chilanga cha Daudi chaŵatesile Yehofa ni Mwenye Daudi juŵalamulilaga ku Yisalayeli. (Aŵalanje 2 Samuele 7:12, 16.) Yehofa ŵatesile chilangachi pandaŵi jele Daudi jwalamulilaga ku Yelusalemu. Ŵamsalile kuti Mesiya chachityochela mumbumba jakwe.(Luk. 1:30-33) Yeleyi yalosisye kuti Yehofa ‘chachisagula’ mundu jwakutyochela m’liŵasa lya Daudi kuti aŵe Mwenye jwa Umesiya. (Esek. 21:25-27) Myoyo, kupitila mwa Yesu uchimwene wa Daudi “uchitamilichika mwamachili mpaka kalakala.” Sonitu “yisukulu yakwe tiyichilamulila kwa yaka yosope, ni chitengu chakwe cha uchimbichimbi tichichitama kwa yaka yosope” mpela lyuwa. (Sal. 89:34-37) Kusala yisyene Uchimwene wa Mesiya ngasiwutendaga yindu yachinyengo soni yindu yambone yakwika ligongo lya Uchimwenewu yichiŵapo mpaka kalakala.
Mfundo Syakamuchisya
‘Ŵalakwe Jika Ali Ŵakulupichika’
4 Maloŵe gakuti kulupichika gaŵagakamulichisye masengo m’Malemba ga Chihebeli, gakusagopolela umbone mtima wele mwachinonyelo ukusamtendekasya mundu kuŵa jwakamulana ni chindu chinechakwe soni jwangachileka mpaka chakulinga chakwe ku chinducho chili chikwanilichikwe. Mundu jwakulupichika akusaŵa jwachinonyelo. Chakusangalasya chili chakuti jwamasalimo jwawukolasile mwesi kuti jili mboni “jakulupichika kwinani” ligongo lyakuti wangalepela kuwonechela kwinani pa ndaŵi jakwe. (Salimo 89:37) Pelepa nikuti mwesi uli wakulupichika. Nambo nganituŵa tusasile kuti uli wakulupichika mpela mwakusatendela mundu. Ligongo chichi? Ligongo lyakuti kulupichika kwa mundu kukusalosya chinonyelo chakwete mundu, yele yindu yangali umi nganiyiŵa yikombwele kutenda.
5 Mwakamulana ni malemba, mundu jwakulupichika akusaŵa jwachinonyelo. Mundu pakuŵa jwakulupichika kwa mundu jwine pakusaŵagasoni kuti pana mkamulano wakulimba pasika pa ŵandu ŵaŵiliŵa. Kulupichikaku kwangachengachenga. Nganiyiŵa mpela matumbela ga panyasa gagakusachengachenga ligongo lya mbungo. Nambo mundu jwakulupichika akusaŵa jwakutamilichika nganisyo soni akusapilila yakusawusya.
KULIPELEKA MU UTUMIKI WA MUMGUNDA
Ngani
ijwbq 129
Ana Baibulo Ŵajichenjile Kapena Kujisokonasya?
Iyayi. Patukulandanya yayili m’mipukutu jakala ni yayili m’Baibulo masiku agano, yikulosya kuti Baibulo nganijichenga atamose kuti kwa yaka yejinji jiŵele jili mkulembedwa pa yindu yangakaŵa konasika.
Ana yeleyi yikulosya kuti ŵandu ŵaŵagopolelaga Baibulo nganalemwesya chilichose?
Ŵandu apatile mipukutu jakala jejinji ja Baibulo. Nambo yindu yine yayikusasimanikwa m’mipukutuji yikusaŵaga yakulekangana ni yayili m’mipukutu jine. Yeleyi yikulosya kuti ŵandu ŵaŵagopolelaga mipukutuji ŵalemwesyaga yine ni yine. Nambo yaŵalemwesyaga ŵakopelaŵa yili yamwanamwana, mwamti yangachengaga utengawo. Nambope mipukutu jine jajipatikene, jana yakulemwecheka yekulungwa. Yine mwayakulemwechekayi, yikulosya kuti ŵakopelawo ŵatendaga mele pakusaka kuti asokonasye utenga wa m’Baibulo. Kwende tulole yisyasyo yine.
Pa 1 Yohane 5:7, ma Baibulo gane gagagopoleledwe kala gakwete maloŵe aga, “Kwinani kwana Atati, Maloŵe, Msimu Weswela, soni ŵatatu ŵeleŵa ali jumo.” Nambope mipukutu jakudalilichika, jikusalosya kuti maloŵe gelega nganigapagwa mu mipukutu japandanda. Maloŵega ŵatesile kugajonjechesya. Myoyo ma Baibulo gejinji masiku agano gangali maloŵega.
Lina lisyesyene lya Mlungu likusasimanikwa mmalo gejinji mu mipukutu ja kala ja Baibulo. Nambo ŵagopolela ma Baibulo ŵane alityosisyemo linali ni aŵisile mena ga uchimbichimbi mpela gakuti “Ambuje” kapena “Mlungu.”
Ana mpaka tusimichisye chamtuli kuti m’Baibulo mwangali yakulemwecheka yejinji?
Masiku agano pana mipukutu jejinji jajisimanikwe. Yeleyi yikutendekasya kuti yikaŵaga yakusawusya kumanyilila yakulemwecheka ya m’Baibulo. Ana kujilandanya mipukutuji kukamuchisye chamtuli kumanyilila kuti Baibulo jalembedwe mwakulondola?
Pakuŵecheta yakwamba malemba ga Chihebeli (gele gakusamanyikwa kuti “Chilangano Chakala”), jwamlijiganye jwine lina lyakwe William H. Green jwatite, “Mpaka tuŵechete mwakusimichisya kuti pangalisoni yakulembedwa yine yakala yayalembedwe mwakulondola chamti myiyi.”
Pakwamba ya Malemba ga Chigiliki, kapena kuti “Chilangano Chasambano” jwamlijiganye jwine ya Baibulo lina lyakwe F. F Bruce jwalembile kuti, “Pana maumboni gejinji gakulosya kuti malemba ga Chilangano Chasambano gali gakulondola kupundasoni yakulemba yine ya ŵandu ŵakala, soni pangali mundu jwakusakayichila yakulembedwa ya ŵandu ŵakalayi.”
Namatetule jwine (Sir Frederic Kenyon) jwakumanyilila chenene ya mipukutu jakala ja Baibulo, jwasasile kuti mundu mpaka “ajigale Baibulo josope m’miyala mwakwe soni nikuŵecheta mwangali woga soni mwangakayika kuti ajigele Maloŵe ga Mlungu, gagatemi kutandila kalakala nambo mfundo syakusosekwa nganisisokonechela.”
Ana panasoni magongo gane gakututendekasya kuti tukulupilileje kuti Baibulo ŵajigopolele mwakulondola?
Ayuda nambosoni Aklistu ŵaŵakopelaga malemba, ŵakopilesoni ngani syakulosya yakulemwa yekulungwa yaŵayitesile ŵandu ŵa Mlungu. c (Numeli 20:12; 2 Samuele 11:2-4; Agalatiya 2:11-14) Konjechesya pelepa, jemanjaji ŵakopilesoni ngani syakwajamuka Ayuda ligongo lya ungapikanila wawo soni ligongo lyakukuya yijiganyo ya ŵandu. (Hoseya 4:2; Malaki 2:8, 9; Mateyu 23:8, 9; 1 Yohane 5:21) Yeleyi yikwamba kulosya kuti jemanjaji ŵaliji ŵandu ŵakudalilichika soni kuti ŵachimbichisyaga Maloŵe gakwe.
Pakuŵa Mlungu ni juŵasalilaga ŵandu yakuti alembe m’Baibulo, ana nganiyiŵa yakupikanika kuti jwalakwe mpaka alolechesyesoni kuti ŵakukopela akukopela yakulondola? d (Yesaya 40:8; 1 Petulo 1:24, 25) Konjechesya pelepa, chakulinga cha Mlungu chaliji chakuti Baibulo jiŵe jakamuchisya kwa ŵandu ŵaŵapali kalakala, nambosoni atamose m’weji masiku agano. (1 Akolinto 10:11) Sonitu mfundo jili jakuti, “yosope yiyalembedwe m’Malemba yalembedwe kuti yitujiganye uwe, kuti tukole chembecheyo kupitila mukukulupilila ni kulambikasidwa mtima kugakusatupa uwe Malemba.”—Aloma 15:4.
Yesu yalumo ni ŵakumkuya ŵakwe ŵakamulichisyaga masengo Malemba ga Chihebeli, soni jemanjajaji nganalosya kuti akudandawula kuti malembago nganigalembedwa mwakulondola.—Luka 4:16-21; Masengo 17:1-3.
SEPETEMBA 30–OKOTOBA 6
CHIPANJE CHAKUSIMANIKWA M’MALOŴE GA MLUNGU MASALIMO 90-91
Amdalileje Yehofa Kuti Akole Umi Wawulewu
wp19.3 5 ¶3-5
Kuwungunya Matala Gakulewuyila Umi
Ŵasayansi ŵajinji akusaŵecheta kuti atamose kuti pana mitela jakutendekasya kuti mundu akakalambalaga mwachitema, ŵandu nganaŵa akombwele kutama ni umi welewu mnope. Kutandila m’ma 1900, ŵasayansi aŵele mkulingalinga kulewuya umi wa ŵandu. Nambo yeleyi yiŵele mkukomboleka ligongo lyakuti ŵandu akulingalinga kuŵa ŵachasa, pana katemela jajikusakamuchisya ŵandu kuŵambala yilwele soni mitela jine jajikuposya yilwele yejinji. Ŵasayansi ŵane akusakulupilila kuti umi wa mundu ukwete malile.
Chiŵandika yaka 3,500 yipiteyo, jwakulemba Baibulo jwine line lyakwe Mose jwasasile kuti, “Yaka ya umi wetu yikusakwana makumi msano ni gaŵili kapena naga kola machili yaka makumi msano ni gatatu. Nambo ndaŵi josope jikwamba kuŵa ja yisawusyo ni kulaga; yakayo ngayikukaŵa kumala, ni tukuwa.” (Salimo 90:10) Atamose kuti mundu mpaka atende yiliyose yakomboleka pakusaka kulewuya umi, nambo umi wetu ukusaŵa ni malile mwakamulana ni yaŵaŵechete Mose.
Mwakulekangana ni umi wa ŵandu, pana yinyama yine ya m’mesi soni makonokono yayikusatama ni umi kwa yaka yakupunda 200 soni yitela yine (giant sequoia) yayikusatamasoni kwa yaka masausande gejinji. Patukuwulandanya umi wetu ni yindu mpela yeleyi soni yindu yine, komboleka kuliwusyaga kuti, ‘Ana umi ŵakola yaka 70 kapena 80 ni uwuwupewu basi?’
wp19.1 5, libokosi
Ana Mlungu Lina Lyakwe Ŵani?
Chelechi chili chiwusyo chakusaliwusya ŵandu ŵajinji. Komboleka kuti wawojo pakwete paliwusisye chiwusyochi. M’litala line, mpaka tuchiwusyesoni mwamti m’yi, naga yakupanganyikwa ya kwinani soni chilambo chapasi pana juŵayipanganyisye, nambi ana Mlungu jwatyochele kwapi?
Ndaŵi syejinji ŵasayansi akusajitichisya kuti yindu ya kwinani soni chilambo chapasi pana payatandile. Mwakamulana ni chiwundo chelechi, ndime jandanda m’Baibulo jikusati, “Pandanda Mlungu ŵapanganyisye kwinani ni chilambo chapasi.” (Maloŵega tugombelechesye m’weji.)—Genesesi 1:1.
Kwinani soni chilambo chapasi nganiyigamba kusimanikwa mwajikape. Chindu nganichiŵa chisimanikwe mwajikape. Pakaŵe pangali mkupanganya, wosopewe kupwatikapo yindu yine ngamkaniyipagwa. M’yoyo yosopeyi yikulosya kuti apali juŵayipanganyisye. Jwalakwe ali msimu wamachili mnope soni lina lyakwe ali Yehofa.—Yohane 4:24.
Pakusala ya Mlungu, Baibulo jikusati: “Mkanapanganye matumbi, atamose mkanachipanganye chilambo ni pakutama ŵandu, jwalakwe ali Mlungu kutandila kwa yaka mpaka yaka yosope.” (Maloŵega tugombelechesye m’weji.) (Salimo 90:2) Mlungu jwangali ndanda kapena mbesi. M’yoyo, “pandanda” jwalakwe ni juŵapanganyisye yindu yakwinani soni chilambo chapasi.—Chiwunukuko 4:11.
Chinonyelo cha Yehofa Chikusatukamuchisya Kuti Tukatendaga Woga
16 Satana akusamanyilila kuti tukusawunyadilaga umi wetu. Myoyo jwalakwe akusasala kuti mundu mpaka akunde kulusa yiliyose yakwete atamose unasi wakwe ni Yehofa kuti akulupusye umi wakwe. (Yob. 2:4, 5) Kusala yisyene yakusaŵecheta Satanayi yili yaunami. Nambo ligongo lyakuti jwalakwe ‘akwete machili ga chiwa,’ akusalingalinga kamulichisya masengo kogopa chiwa ni chakulinga chakuti tuleche kumtumichila Yehofa. (Aheb. 2:14, 15) Ndaŵi sine, ŵandu ŵakusiŵakamulichisya masengo Satana akusatujogoya kuti chatuwulaje naga ngatukuleka kumtumichila Yehofa. Soni ndaŵi sine Satana mpaka apate upile wakutusokonasya patulwasile. Madokotala kapena ŵachibale ŵetu ŵanganaŵa ŵa Mboni mpaka atukanganichisye kutajidwa miyasi yayili yakutindana ni malamusi ga Mlungu. Kapena mundu jwine mpaka atulimbikasye kuti tusagule chikamuchisyo chine cha mtela chakutindana ni mfundo sya m’Malemba.
17 Atamose kuti ngatukusasaka kuwa, tukusamanyilila kuti Yehofa chachipitilisya kutunonyela atamose patuwile. (Aŵalanje Aloma 8:37-39.) Ŵakutumichila ŵa Yehofa pawile, jwalakwe akusiŵakumbuchilape. Mwamti akusiŵawona mpela ali chijumi. (Luk. 20:37, 38) Jwalakwe akusasachilila kwapasoni umi. (Yob. 14:15) Yehofa jwapeleche mbopesi japenani mnope kuti ‘tukole umi wangamala.’ (Yoh. 3:16) Tukusamanyilila kuti Yehofa akusatunonyela mnope soni kutusamalila. Myoyo patulwasile mnope, mmalo mwakasa mfundo sya Yehofa, tukusosekwa kumdalila jwalakwe kuti atulimbikasye, atupe lunda nambosoni machili. Yeleyi ni yaŵatesile Mlongo Valérie ni ŵamkwakwe.—Sal. 41:3.
Mfundo Syakamuchisya
Ana Jwalijose Akwete Lilayika Lyalikusamkamuchisya?
Baibulo ngajikusajiganya kuti mundu jwalijose akwete lilayika lyakwe lyalikusamkamuchisya. Yili yisyene kuti Yesu ndaŵi jine ŵaŵechete kuti, “Asamale kuti akanyosya kamo mwa tuŵanachetu [ŵakulijiganya ŵa Klistu], pakuŵa ngwasalichisya kuti malayika gawo kwinani gakusalola ngope ja Atati ŵangu ŵakwinani ndaŵi syosope.” (Mateyu 18:10) Nambope Yesu pakuŵecheta yeleyi ngaŵa kuti ŵagopolelaga kuti mundu jwalijose akwete lilayika lyalikusamkamuchisya. Mmalo mwakwe jwalakwe jwagopolelaga kuti malayika gakusakola lung’wanu ni jwakulijiganya jwakwe jwalijose. M’yoyo ŵakulambila ŵasyesyene, nganaŵa aŵisile umi wawo pangosi mwamelepe pakuganisya kuti malayika ga Mlungu mpaka gakamuchisye.
Ana yeleyi yikugopolela kuti malayika ngaŵa mkwakamuchisya ŵandu? Iyayi. (Salimo 91:11) Ŵandu ŵane akusasimichisya ni mtima wosope kuti Mlungu ŵalongolele soni kwateteya pakamulichisya masengo malayika gakwe. Kenneth, jwatumkolasile mungani jandanda jula, ali jumo mwa ŵandu ŵakusalipikana chamti myoyo. Atamose kuti nganituŵa tumanyilile yosope yagakusatenda malayika pakwakamuchisya ŵandu, nambo komboleka kuti yakusayikupilila ŵanduyi yili yisyene. Ŵa Mboni sya Yehofa ndaŵi syejinji akusalola umboni wakulosya kuti malayika, gakusakamuchisya pakukamula masengo gawo gakulalichila. Nambope pakuŵa malayika ngaŵa mkugawona, nganituŵa tumanyilile yosope yagakusatenda pakutukamuchisya pa yindu yakulekanganalekangana. Atamose yili myoyo, nganikuŵa kulemwa kum’yamichila Mlungu Jwamachiligose pa chikamuchisyo chilichose chatupele.—Akolose 3:15; Yakobo 1:17, 18.
OKOTOBA 7-13
CHIPANJE CHAKUSIMANIKWA M’MALOŴE GA MLUNGU MASALIMO 92-95
Kutumichila Yehofa Chili Chindu Chambone Champaka Tutende
Ŵachinyamatamwe, Ana Mkwete Yakulinga Yausimu?
5 Ligongo lyandanda lyamkusosechela kola yakulinga yausimu lili kulosya kuyamichila chinonyelo chakusatulosya Yehofa soni yindu yatutendele. Jwamalumbo jwatite, “Kuli kwambone kwayamichila wawojo Yehofa . . . Pakuŵa andendekasisye kuŵa jwakusangalala, wawo Yehofa, ligongo lya yitendo yawo. Ligongo lya masengo ga makono gawo, ngusagumila mwakusangalala.” (Sal. 92:1, 4) Mpela jwachinyamata, mkusosekwa kuganichisya yindu yampele Yehofa. Yindu yakwe yili umi, upile wakummanyilila Yehofa ni lisosa lyakwe, Baibulo, mpingo, soni chembecheyo chambone cha msogolo.
Ana Ŵani Ŵakusagumba Nganisyo Syawo?
8 Yehofa, mpela nangolo jwambone, akusasaka kuti ŵanache ŵakwe akole umi wambone. (Yes. 48:17, 18) Myoyo, akusatusalila yiwundo ya m’Baibulo yakutukamuchisya kuti tukole ndamo syambone soni mwampaka tutendeleje yindu ni ŵane. Yehofa akusatulimbikasya kuti tuyiwoneje yindu mpela mwakusayiwonela jwalakwe soni kuti tutameje mwakamulana ni ndamo syakwe. Yeleyi nganiyiŵa yakusawusya. M’malomwakwe yikusatukamuchisya kuti tuganichisyeje yindu m’litala lyambone. (Sal. 92:5; Mis. 2:1-5; Yes. 55:9) Kutenda yeleyi, kuchitukamuchisya kuti tusaguleje yindu yampaka yitutendekasye kuŵa ŵakusangalala. (Sal. 1:2, 3) Kusala yisyene, kuyiwona yindu mpela mwakusayiwonela Yehofa, kuli kwakamuchisya.
Jemanja Ali Ŵakusosekwa Mnope kwa Yehofa Mlungu
18 Yehofa mpaka atupe masengo gakuti tukamuleje atamose kuti tukusile. (Sal. 92:12-15) Yesu jwasasile kuti atamose yili mkuwoneka kuti yatukusatendaga yili yangasosekwa mnope, nambo Yehofa akusayiwona kuti yili yakusosekwa. (Luk. 21:2-4) Myoyo aganichisyeje yindu yampaka akombole kutenda. Mwachisyasyo mpaka aŵecheteje yakwamba Yehofa, kwapopelela abale ŵawo soni kwalimbikasya ŵane kuti aŵepe ŵakulupichika. Yehofa akusiŵawona wawojo kuti ali jwamasengo mjakwe ngaŵa ligongo lyakuti akukwanisya kutenda yineyakwe, nambo ligongo lyakusachilila kwawo kumpikanila.—1 Akoli. 3:5-9.
Mfundo Syakamuchisya
“Lunda Lwa Mlungu Luli Lwakusokoka Mnope”
18 Ndumetume Paulo jwalondesisye lunda lwa Yehofa mwaluŵelele lwapajika. Jwalakwe jwatite, “Chipanje cha Mlungu chili chekulungwa nditu. Lunda ni umanyilisi wakwe yili yakusokoka mnope. Pangali ŵampaka alondesye nganisyo syakwe, pangali ŵampaka agapikanichisye matala gakwe.” (Aloma 11:33) Mu chiŵecheto chandanda, lilembali lyatandite ni chilembo chakulosya kukwayidwa mtima. Yeleyi yalosyaga muŵapikanile soni mwayamkwayile Paulo mumtima. Maloŵe ga Chigiliki gaŵagakamulichisye masengo gakuti “kusokoka” gali gakulandana ni maloŵe gagakusagopolela, “lisimbo lyesokoche mnope.” Myoyo, maloŵe gakwega gakusatupa chiwulili chakuwoneka chenene munganiso mwetu. Patukuganichisya ya lunda lwa Yehofa, yikusaŵa mpela tukulingulila mulisimbo lyangawoneka palipelele, lyakusokoka soni lyekulungwa mnope mwamti nganituŵa tumanyilile chenene ukulu wakwe soni nganituŵa tukombwele kulijambula. (Salimo 92:5) Ana yeleyi ngayikututendekasya kuŵa ŵakulinandiya?
OKOTOBA 14-20
CHIPANJE CHAKUSIMANIKWA M’MALOŴE GA MLUNGU MASALIMO 96-99
“Msalichisye” Ngani Syambone
w11 3/1 6 ¶1-2
Ana Ngani Syambone Sili Chichi?
Aklistu akusasosekwa kwalalichila ŵandu “ngani syambone sya Uchimwene.” Akusatenda yeleyi mwakwasalila kuti Uchimwenewu jili boma jajichilamulila mwachilungamo chilambo chosope chapasi. Nambope, m’Baibulo maloŵe gakuti “ngani syambone” akusagakamulichisyasoni masengo pakusala ya yindu yine. Mwachisyasyo, jikusasala ya ngani syambone sya “chikulupusyo” (Salimo 96:2); “ngani syambone sya Mlungu,” (Aloma 15:16); soni “ngani syambone syakwamba Yesu Klistu.”—Maliko 1:1.
Kusala mwakata mpaka tujile kuti ngani syambone sikusapwatikapo yindu yosope yaŵaŵechete Yesu soni yaŵalembile ŵakulijiganya ŵakwe. Yesu mkanajawule kwinani jwasalile ŵakumkuya ŵakwe kuti, “Myoyo, jemanja mjawule mkajiganye ŵandu ŵamitundu josope kuti aŵe ŵakulijiganya ŵangu, soni mkabatisyeje m’lina lya Atati, lya Mwanache soni lya msimu weswela. Mkajiganyeje kuti apikanileje yindu yosope yanamlamwile jemanja.” (Mateyu 28:19, 20) Myoyo masengo ga Aklistu ŵasyesyene nganigagamba kuŵa kwasalila ŵandu ya Uchimwene wa Mlungu. Nambo kwajiganya ŵandu kuti aŵe ŵakulijiganya ŵa Yesu.
w12 9/1 16 ¶1
Ana pa Lisiku Lyakulamula Pachitendekwa Chichi?
Mpela mwatukuyiwonela pachiwulili chachili kumkono wamlyochi, ŵandu ŵajinji akusaganisya kuti pa Lisiku Lyakulamula ŵandu wosope chachijima pameso pa chitengu cha Mlungu kuti jwalakwejo ŵaŵelusye. Akusaganisya kuti ŵandu ŵane chachalamula kuti akatameje kwinani pele ŵane chachaponya ku moto wangamala. Nambope Baibulo jikusalosya kuti chakulinga cha Lisiku Lyakulamula chili kwakulupusya ŵandu ku yindu yangali chilungamo. (Salimo 96:13) Mlungu amsagwile Yesu kuti aŵe jwakulamula mwamti chachitendekasya kuti pachilambopa paŵe chilungamo.—Aŵalanje Yesaya 11:1-5; Masengo 17:31.
w12 9/15 12 ¶18-19
Mtendele Usyesyene Wawuchitanda mu Ulamusi wa Yaka 1000
18 Mkamulano welewu wasokonechele pandaŵi jele Satana jwatendekasisye ŵandu kuti ajimuchile ulamusi wa Yehofa. Nambo kutandila mu 1914, Uchimwene wa Mesiya uŵele uli mkutenda yakomboleka kuti uwuchisyesoni mkamulanowu. (Aef. 1:9, 10) Mu yaka 1000 yeleyi, yindu yakusangalasya yele pandanda yaliji “yangawoneka” tuchiyiwona yili mkutendekwa. Nambo ana ‘chakumbesi’ kwa Ulamusi wa Klistu wa Yaka 1000 kuchitendekwa chichi? Atamose kuti Mlungu ŵampele Yesu ‘ulamusi . . . wosope kwinani soni pachilambo chapasi,’ nambope jwalakwe ali jwakulinandiya. Yesu nganakola nganisyo syakusaka kusumula udindo wa Yehofa. Mwakulinandiya jwalakwe “chachipeleka Uchimwene kwa Mlungu jwakwe, jwalisoni Atati ŵakwe.” Yesu chachikamulichisya masengo udindo wakwe “ni chakulinga chakuti Mlungu . . . achimbichikwe.”—Mat. 28:18; Afil. 2:9-11.
19 Pandaŵiji, ŵandu ŵachachiŵa kumbali ja Uchimwenewu chachiŵa kuti ali ŵamlama. Jemanjaji chachikuya chisyasyo cha Yesu chakuŵa ŵakulinandiya soni chachiŵa ŵakusachilila kuwukamuchisya Uchimwene wa Yehofa. Yeleyitu yichiwonechela chenene pachachipunda pakulinjidwa kwakumalisya. (Chiw. 20:7-10) Pambesi pakwe, ŵandu soni malayika gakwimuchila gachiwulajidwa. Kusala yisyene jelejitu jichiŵa ndaŵi jakusangalasya mnope. Pandaŵiji, ŵandu wosope soni malayika chachiŵa ŵakusangalala mnope kumlambila Yehofa jwele ‘chachiŵa yindu yosope kwa jwalijose.’—Aŵalanje Salimo 99:1-3.
Mfundo Syakamuchisya
it-2 994
Nyimbo
Maloŵe gakuti “nyimbo jasambano” gakusasimanikwa m’buku ja Masalimo nambosoni mu yakulemba ya Yesaya ni ndumetume Yohane. (Sal 33:3; 40:3; 96:1; 98:1; 144:9; 149:1; Yes 42:10; Chw 5:9; 14:3) Kuŵalanga mafesi gosope mpaka pa fesi jajikusala ya “nyimbo jasambano” yikusalosya kuti nyimboji ŵajimbaga pandaŵi jele Yehofa atesile yindu yine yasambano yakulosya kuti jwalakwe ali jwakuŵajilwa kulamulila chilambo chosope. Pa Salimo 96:10 pana maloŵe ga nyimbo gakusangalasya mnope gakuti, “AMBUJE ali mwenye.” Ngani jekulungwa ja “nyimbo jasambano” jeleji, jaliji kusala yindu yasambano yaŵatesile Yehofa pakulosya kuti jwalakwe ali jwakulamulila kwinani soni chilambo chapasi.—Sal 96:11-13; 98:9; Yes 42:10, 13.
OKOTOBA 21-27
CHIPANJE CHAKUSIMANIKWA M’MALOŴE GA MLUNGU MASALIMO 100-102
Ayamichileje Chinonyelo Changamala cha Yehofa
Yampaka Atende Kuti Abatisidwe
18 Kumnonyela Yehofa chili chindu chambone mnope chakusosekwa kutenda. (Aŵalanje Misyungu 3:3-6.) Kumnonyela mnope Mlungu mpaka kwakamuchisye kuti akombole kumalana ni yakusawusya yakusimana nayo. Ndaŵi syejinji Baibulo jikusasala ya chinonyelo changamala chakwete Yehofa kwa ŵakutumichila ŵakwe. Yeleyi yikugopolela kuti Yehofa ngasiŵajasa kapena kuleka kwanonyela ŵakutumichila ŵakwe. (Sal. 100:5) Wawojo ŵapanganyidwe m’chiwanichisyo cha Mlungu. (Gen. 1:26) Myoyo ana mpaka asyasye chamtuli chinonyelo chakwete Yehofa?
19 Atandeje ni kuyamichila. (1 Ates. 5:18) Lisiku lililyose aliwusyeje kuti, ‘Ana Yehofa alosisye chamtuli kuti akusanonyela?’ Kaneko amyamichileje mwakumsalila yindu yisyesyene yaŵatendele. Ayiwoneje kuti Yehofa akusiŵanonyela wawojo pajika mpela muŵayiwonelaga ndumetume Paulo. (Aŵalanje Agalatiya 2:20.) Aliwusye kuti, ‘Ana ngusasaka kumlosya Yehofa kuti unesoni ngusamnonyela?’ Kumnonyela kwawo Yehofa kuchakamuchisya kuti akombole kupilila yakulingwa soni yakusawusya yampaka asimane nayo. Kuchakamuchisyasoni kuti amtumichileje Yehofa ndaŵi syosope. Yeleyi yichilosya kuti akusamnonyelaga jwalakwe lisiku lililyose.
“Mŵeje Ŵaganisya Chenene, Soni Mŵeje Mesope”
10 Yindu yine yakogoya yatukusosekwa kuyiŵambala yili kukopana, kumwa mnope, kulya mnope, kuŵecheta yindu yampaka yawulasye ŵane, kulolela yakusangalasya yachiwawa, kulolela yakuŵagula soni yine. (Sal. 101:3) Ndaŵi syosope mdani jwetu jwali Satana, akusapatilapo upile pa yindu yeleyi kuti asokonasye unasi wetu ni Yehofa. (1 Pet. 5:8) Naga ngatukuŵa mesope Satana mpaka apande mbeju syakusakala m’mitima soni munganisyo mwetu. Mbeju syakwe sili ungali chilungamo, kutunduka, uŵengani, kunyada soni kutumbila. (Agal. 5:19-21) Pandanda ndamosi mpaka siwonecheje mpela syangajogoya. Nambo naga ngatukutenda yampaka tukombole kuti tumalane nasyo mpaka sikuleje kwika pakuŵa mpela yakumela yapoyisoni soni mpaka sitandikasye yakusawusya.—Yak. 1:14, 15.
w11 7/15 16 ¶7-8
Ana Akupikanila Yakwakalamusya Yehofa?
7 Ana mpaka twaŵambale chamti uli ŵakulochesya ŵaunami? Ngatukusosekwa kwapochela mnyumba syetu kapena kwapa moni. Tukaŵalangaga mabuku gawo, kulolela mapologalamu gawo ga pa TV, kuŵalanga ngani pa mawebusayiti gawo kapenasoni kuŵichila ndemanga pangani syakusaŵecheta. Ligongo chichi tukusasosekwa kutenda yeleyi? Lili ligongo lyakuti tukusamnonyela Mlungu ‘jwakulupichika’ kapena kuti jwakusaŵecheta yakuwona. Myoyo ngatukusasaka amta panandi kupikanila yijiganyo yaunami yayikusasisyana ni Maloŵe gakuwona. (Sal. 31:5; Yoh. 17:17) Ligongo linesoni lili lyakuti tukusajinonyela mnope gulu ja Yehofa. Guluji jitujiganyisye yijiganyo yisyesyene mpela kulimanyilila lina lya Mlungu lyakuti Yehofa soni yalikusagopolela, chakulinga cha Mlungu pakupanganya chilambo, chachikusatendekwa mundu pawile, soni chembecheyo chakuti ŵawe chachijimuka. Ana wawojo akukumbuchila mwaŵapikanile pandaŵi jaŵamanyilile yijiganyo yakusosekwa mnopeyi? Kusala yisyene mpaka luŵe lunda kuleka kukunguluka ni jwalijose jwampaka ŵatendekasye kuti aleche kukulupilila yijingayo yisyesyene yaŵalijiganyisyeyi.—Yoh. 6:66-69.
8 Nganituŵa tukulupilile amta panandi yakusajiganya ŵakulochesya ŵaunami. Yakusajiganya jemanjaji yili mpela chisima chejumilile mwamti nganiyiŵa yakamuchisye nambo mpaka yigambe kwatendekasya kuti alagasicheje nganisyo. Mmalomwakwe, tuŵeje ŵakulupichika kwa Yehofa soni ku gulu jakwe. Yili myoyo ligongo lyakuti kwa yaka yejinji jiŵele jili mkukamulichisya masengo Maloŵe ga Mlungu pakutujiganya yijiganyo yisyesyene. Maloŵega gali mpela mesi gakumasya njota soni gakututamika mtima pasi.—Yes. 55:1-3; Mat. 24:45-47.
Mfundo Syakamuchisya
w14 15/03 16 ¶21
Yampaka Atende Kuti Apitilisye Kuŵa Ŵakusangalala
21 Lilemba lya Salimo 102 likusalosyasoni yampaka atende kuti aŵeje ŵakusangalala. Kuti jwamasalimoju aŵeje jwakusangalala jwatandite kuganichisya ya unasi wakwe ni Yehofa. (Sal. 102:12, 27) Mtima wakwe watemi mmalo paŵamanyilile kuti Yehofa akusaŵa chiŵandika ni ŵandu ŵakwe pakusimana ni yakusawusya. Naga ayiweni kuti ngakusangalala ligongo lya yindu yakutenda pakumtumichila Yehofa, amŵende jwalakwe kuti ŵakamuchisye. Pakupopela amŵendeje Mlungu kuti ŵakamuchisye kumalana ni kulagasika nganisyo soni kuti ‘ŵandu alalichile lina lya AMBUJE.’—Sal. 102:20, 21.
KULIPELEKA MU UTUMIKI WA MUMGUNDA
Ngani
ijwbq 181
Ana Ŵandu Ŵajichenjile Baibulo?
Iyayi nganajichenga. Ŵalijiganye ŵakombwele kulandanya Baibulo jakalakala jaŵakopele ŵandu payala ni jatukwete masiku agano. Jemanjaji ŵapatile kuti utenga wa m’Baibulo nganiwuchenga amta panandi. Yeleyitu yili yakupikanika ligongo Mlungu akusasaka kuti ŵandu aŵalanjeje maloŵe gakwe soni kugapikanichisya. Myoyo nganaŵa akundile kuti ŵandu achenje yayili m’Baibulo.—Yesaya 40:8.
OKOTOBA 28–NOFEMBA 3
CHIPANJE CHAKUSIMANIKWA M’MALOŴE GA MLUNGU MASALIMO 103-104
“Akusakumbuchila Kuti Uwe Tuli Luwundu”
Tumsyasyeje Yehofa Mwakupikana ya Ŵane
5 Ligongo lyakuti Yehofa ali jwakulinandiya soni jwachanasa, yikusamtendekasya jwalakwe kupikana ya ŵane. Mwachisyasyo, Yehofa jwalosisye kuti ali jwakulinandiya pajwasigele panandi kwajonanga ŵandu ŵakusakala ŵaŵatamaga mumsinda wa Sodomu. Yehofa ŵalitumile lilayika lyakwe kuti likamsalile mundu jwakulupichika Loti kuti atilile kumadela ga kumatumbi. Nambo Loti jwajogopaga kutilila kumatumbiko. Mwamti jwaŵendile kuti amkunde jwalakwejo ni liŵasa lyakwe kutilila ku Sowali kakaliji katawuni kamwana kele Yehofa jwalinganyisyesoni yakukajonanga. Apatu Yehofa akakomboleche kumkanganichisya Loti kuti agambe kutenda yasalilidwe. Nambo Yehofa ŵamkundile Loti kutilila ku Sowali atamose kuti jwasosekwaga kuchenga nganisyo syakwe syakukajonanga katawunika. (Gen. 19:18-22) Pali papitile yaka yejinji, Yehofa jwatendele chanasa ŵandu ŵa mumsinda wa Ninefe. Jwalakwe ŵamtumisye jwakulochesya Yona kuti akamanyisye ŵandu kuti msindawo yimpepe ni ŵanduwo chajonanjidwe. Nambo ŵandu ŵa ku Ninefe paŵagalawiche mitima jawo, Yehofa ŵakululuchile mwamti nganawujonanga msindawo.—Yon. 3:1, 10; 4:10, 11.
Tumdalileje Yehofa Mpela Muŵatendele Samusoni
16 Atamose kuti Samusoni jwasimene ni yakupweteka ligongo lyakuti jwasagwile yindu mwakulemwecheka, nambope jwalakwe nganaleka kumtumichila Yehofa. Myoyo naga tutesile yakulemwecheka yayitendekasisye kuti atujamuche kapena kutujimika utumiki watwatendaga, ngatukusosekwa kuwujila munyuma. Tukumbuchileje kuti Yehofa ali jwakoseka kutukululuchila. (Sal. 103:8-10) Mwangasamala kandu ni yakulemwa yetu, Yehofa mpaka apitilisyepe kutukamulichisya masengo mpela muŵatendele ni Samusoni.
17 Aganichisye ya chisyasyo cha m’bale jwine jwachinyamata lina lyakwe Michael. Jwalakwe jwakwete yakutenda yejinji paŵamtumichilaga Yehofa. Jwaliji jwakutumichila jwakamuchisya soni mpayiniya jwakutamilichika. Nambo chakutesya chanasa chili chakuti jwalakwe jwatesile chakulemwa chachatendekasisye kuti akaŵajilwasoni kutumichila pa maudindoga. Jwalakwe jwasasile kuti, “Natanganidwaga kumtumichila Yehofa mpaka payatendekwaga yeleyi. Nambo mwangajembecheya, yasimanikwe kuti ngangutenda chilichose pakumtumichila Yehofa. Nganinganisyaga kuti Yehofa mpaka andeche, nambo nakayichilaga naga unasi wangu ni jwalakwe chiwuŵepe chiŵela mpela muyaŵelele pandanda. Nakayichilagasoni naga chinjitendaga yejinji pakutumichila mumpingo mpela munatendelaga pandanda.”
18 Chakusangalasya chili chakuti Michael nganawujila munyuma. Jwalakwe jwasasile kuti, “Natendaga yindu yakungamuchisya kuŵasoni paunasi wambone ni Yehofa. Natendaga yeleyi mwakupopela, kulijiganya Maloŵe gakwe, soni kuganichisya mwakusokoka yanalijiganyagayo.” Kaneko, Michael jwawujilesoni pa maudindo gakwe gala. Mwamti apano akutumichila mpela jwamkulungwa jwa mumpingo soni mpayiniya jwakutamilichika. M’baleju jwasasile kuti, “Yaŵatendaga abale ni alongo pakunimbikasya mnopemnope achakulungwa ŵa mumpingo, yangamuchisye kumanyilila kuti Yehofa akunonyelape. Mwamti apano ngutumichila mumpingo ndili ngwete chikumbumtima chambone. Yayandendecheleyi yanjiganyisye kuti Yehofa akusamkululuchila jwalijose jwapitikwiche mtima yisyesyene.” Yayamtendechele m’baleju, yikutusimichisya kuti Yehofa chachitukamulichisya masengo soni kutupa upile patutesile yakulemwa naga tukutenda yampaka tukombole pakulinganya yatulemwisyeyo soni kupitilisya kumdalila jwalakwe.—Sal. 86:5; Mis. 28:13.
Mpaka Akwanilisye Yakulinga Yawo Yausimu
2 Naga pachangakaŵapa ŵakwete chakulinga nambo nganaŵepe kuchikwanilisya, ngakusosekwa kutenguka. Kuti akwanilisye yakulinga atamose yamwanamwana yikusasaka ndaŵi soni kulimbichila. Kulingalinga kwawo kuti akwanilisye yakulinga yawo kukusalosya kuti akusayamichila unasi wawo ni Yehofa soni kuti akusasaka kumpa jwalakwejo yindu yambone mnope. Mwamti Yehofa akusayamichila mnope kulimbichila kwawo. Yisyene kuti jwalakwe jwangajembecheyaga kuti chitutendeje yindu yejinji kupunda yampaka tukombole kutenda. (Sal. 103:14; Mik. 6:8) Myoyo pakukola chakulinga alolechesyeje kuti mpaka achikwanilisye. Panyuma pakuti akwete chakulinga, ana mpaka atende yamtuli kuti achikwanilisye? Kwende tukambilane yindu yine yampaka yitukamuchisye.
Mfundo Syakamuchisya
Machili Gakupanganya Yindu ga Mkupanganya jwa “Kwinani ni Chilambo Chapasi”
18 Ana tukusalijiganya chichi pa mwakusakamulichisya masengo Yehofa machili gakwe gakupanganya? Tukusatenda lung’wanu ni yakupanganyikwa yakwe yakulekanganalekangana. Jwamasalimo jwine jwatite, “Ŵalakwe Ambuje, masengo gawo gali gamajinji, . . . chilambo chapasi chigumbele ni yindu yiŵayipanganyisye.” (Salimo 104:24) Yeleyitu yili yisyene. Ŵasayansi akusaŵecheta kuti pachilambo chapasi pana mitundu ja yaumi jakupunda 1 miliyoni. Nambo yakuŵecheta yawoyi yikusalekangana. Ŵane akusati jipali 10 miliyoni, pele ŵane akusati 30 miliyoni kapena kupunda pelepa. Ŵandu ŵa yakwambulajambula ndaŵi sine akusasoŵa chakwambula. Mwakulekangana ni jemanjaji, lunda lya Yehofa soni machili gakwe gakupanganya yindu yasambano gangamalaga.