“Klistu Ali Mtwe wa Jwamlume Jwalijose”

1. Ana achalume ŵalombele, akusajigalila kwapi mwakusatendela yindu ni achiŵamkwawo soni ŵanache ŵawo?

ANA wawojo papikene maloŵe gakuti kulongolela akusaganisyaga ya chichi? Achalume ŵane akusatenda yindu ni achiŵamkwawo soni ŵanache ŵawo pakujigalila ndamo ja kwaŵakulile soni yaŵatite pakaleledwe. Alole yajwaŵechete Mlongo Yanita jwakusatama ku Europe. Jwalakwe jwatite, “Kwangusatamaga, ŵandu akusakulupilila mnope kuti achakongwe ali ŵakutuluka pakwalandanya ni achalume. Kupwatika pelepa, akusiŵawonaga achakongwewo mpela achikapolo.” Apikanesoni yajwaŵechete M’bale Luke jwakusatama ku United States. Jwalakwe jwatite, “Achatati ŵane akusiŵasalilaga ŵanache ŵawo ŵachalume kuti, “Agambeje kwalola achakongwe akapikanilaga. Soni yampaka aŵechete nganiyiŵa yikamuchisye.” Nambope nganisyo syelesi sili syakulekangana ni yakusasakaga Yehofa kuti atendeje achalume ŵalombele. (Alole Maliko 7:13) Sano, ana jwamlume mpaka alijiganye chamtuli kuŵa mtwe wa liŵasa wambone?

2. Ana achalume ŵalombele akusosekwa kumanyilila chichi? Ligongo chichi akusosekwa kumanyilila yeleyi?

² Kuti jwamlume aŵe mtwe wa liŵasa wambone, chandanda akusosekwa kumanyilila yakusasaka Yehofa kuti achalume ŵalombele atendeje. Akusasosekwa kumanyililasoni ligongo lyakwe Yehofa ŵaŵisile ŵakulongolela, soni yampaka atende kuti asyasyeje mwakusatendela yindu Yehofa soni Yesu. Ligongo chichi kumanyilila yeleyi kuli kwakusosekwa mnope kwa jwamlume? Ligongo lyakwe lili lyakuti, Yehofa apeleche udindo kwa mitwe ja maŵasa. Soni jwalakwe akusajembecheyaga kuti jemanjaji chawukamulichisyeje masengo udindowu mwalunda.—Luk. 12:48b.

ANA KULONGOLELA KUKUSAGOPOLELA CHICHI?

3. Ana tukulijiganya chichi pa 1 Akolinto 11:3?

³ Aŵalanje 1 Akolinto 11:3. Lilembali, likusalosya yaŵatite Yehofa pakulinganya liŵasa lyakwe lyakwinani soni lya pachilambo chapasi. Ligongo lyakuti jwalakwe ali jwakulongolela akwete udindo wekulungwa mnope. Kupwatika pelepa, ŵapele ŵane udindo wakuŵa ŵakulongolela. Nambo jemanjaji chachijanga kwa Yehofa pa yosope yakusatendaga pakwalongolela ŵane. (Alo. 14:10; Aef. 3:14, 15) Yehofa ŵampele Yesu udindo wakulongolela mpingo. Nambope akusalolaga mwakusatendelaga yindu Yesujo ni m’weji. (1 Akoli. 15:27) Yehofa apelechesoni udindo kwa jwamlume jwamlombele wakwalongolela ŵamkwakwe soni ŵanache ŵakwe. Nambope akusasosekwa kwanga kwa Yehofa soni kwa Yesu pakwamba ya mwakusatendela yindu pakulilongolela liŵasa lyakwe.—1 Pet. 3:7.

4. Ana Yehofa ni Yesu akwete udindo wakutenda chichi?

⁴ Pakuŵa Yehofa akusayilongolela yindu yosope yajwayipanganyisye, jwalakwe akwete udindo wakutamilikasya malamusi kwa ŵanache ŵakwe wosope, soni kulolechesya kuti jemanjajo akugapikanila malamusigo. (Yes. 33:22) Nombe Yesu jwali mtwe wa mpingo wa Chiklistu, akwete udindo wakutamilikasya malamusi soni kulolechesya kuti ŵandu akugapikanila malamusigo.—Agal. 6:2; Akolo. 1:18-20.

5. Ana mtwe wa liŵasa lya Chiklistu, ukwete udindo wamtuli? Ana udindo wakwewo ukwete malile gapi?

⁵ Mpela mwayiŵelele ni Yehofa soni Yesu. Nombe mtwe wa liŵasa lya Chiklistu ukwete udindo wakusagula yakutenda m’liŵasa lyakwe. (Alo. 7:2; Aef. 6:4) Nambope udindo wakusakola jwamlume ukwete malile. Mwachisyasyo, malamusi gosope gakusatamilikasya jwamlume gakusasosekwa gakamulaneje ni malamusi ga Mlungu. (Mis. 3:5, 6) Kupwatika pelepa, mtwe wa liŵasa nganiwukola udindo wakutamilikasya malamusi kwa ŵandu ŵanganaŵa ŵa mwiŵasa mwakwe. (Alo. 14:4) Nambosoni, naga ŵanache akusile ni kutyoka pamlangopo, akusasosekwa kupitilisya kwachimbichisya baba ŵawo. Nambo ŵanachewo akusaŵa kuti nganaŵa pasi pa ulamusi wa baba ŵawo.—Mat. 19:5.

LIGONGO CHICHI YEHOFA ŴASAGWILE ŴANDU ŴANE KUTI AŴE ŴAKULONGOLELA?

6. Ligongo chichi Yehofa ŵalinganyisye kuti paŵe ŵakulongolela?

⁶ Yehofa ŵasagwile kuti ŵandu ŵane aŵe ŵakulongolela ligongo lyakuti jwalakwe akusalinonyela mnope liŵasa lyakwe. Udindowu uli mtuka wakusapeleka jwalakwe. Ŵakulolengolela akusakamuchisya kuti yindu m’gulu ja Yehofa yitendekweje mwamtendele soni mwadongosolo. (1 Akoli. 14:33, 40) Yikaŵe kuti pangali ŵakulongolela, yindu yikatendekwaga mwangali dongosolo m’gulu ja Yehofa, soni ŵandu ngamkanasangalalaga. Mwachisyasyo, yikaŵe kuti pangali ŵakulongolela nikuti ŵandu akagambaga kutenda yindu mwachisawawa soni pangali jwakamanyililaga yakutenda.

7. Ana lilemba lya Aefeso 5:25, 28, likulosya kuti Yehofa akusasaka kuti achalume ŵalombele ŵatendeleje yamtuli achiŵamkwawo?

⁷ Yili yambone mnope kuti achalume akole udindo wakulolela maŵasa gawo. Nambo ana ligongo chichi achakongwe ŵajinji akusatendeledwa yindu yangali chilungamo ni achiŵamkwawo? Yili myoyo ligongo lyakuti achalume ŵajinji ŵangakuyaga malamusi gakwamba ya liŵasa. Mmalo mwakwe, jemanjaji akusakuya ndamo sya achinangolo. Ndaŵi sine, akusiŵalagasyaga achiŵamkwawo pakwamba kusaka kulisangalasya basi. Mwachisyasyo, ŵalume mpaka ŵatendeleje ngasa ŵamkwawo pakusaka kwakanganichisya kuti ŵapikanileje basi kapena pakusaka kulilosya kuti ali jwamlume jusyesyene. Jwalakwe mpaka aganisyeje kuti nganaŵa ŵakanganichisye ŵamkwakwe kuti amnonyeleje, nambo mpaka ŵatendekasye ŵamkwakwewo kuti amjogopeje. Achalumeŵa akusaganisya kuti, naga achiŵamkwawo akwajogopa nikuti chatendeje yiliyose yakusaka.b Nganisyo syelesi sili syakulemwecheka soni sili syakulekangana mnope ni yakusasaka Yehofa. Pajatu akusasaka kuti achalume ŵalombele ŵanonyeleje soni kwachimbichisya achiŵamkwawo.—Aŵalanje Aefeso 5:25, 28.

YAMPAKA ATENDE JWAMLUME KUTI ALONGOLELEJE CHENENE LIŴASA LYAKWE

8. Ana jwamlume mpaka atende chichi kuti alilongoleleje chenene liŵasa lyakwe?

⁸ Kuti jwamlume akomboleje kulilongolela chenene liŵasa lyakwe, akusosekwa kutendaga yindu mpela mwakusatendela Yehofa soni Yesu. Kwende tukambilane ndamo siŵili syakwete Yehofa soni Yesu. Chitulolesoni kuti ana achalume ŵalombele mpaka ajigalile chamtuli chisyasyo cha Yehofa soni Yesu pakutenda yindu ni maŵasa gawo?

9. Ana Yehofa akusalosya chamtuli kuti ali jwakulinandiya?

⁹ Kulinandiya. Yehofa ali jwalunda mnope kumpunda jwalijose. Nambope, akusapikanila nganisyo sya ŵakutumichila ŵakwe. (Gen. 18:23, 24, 32) Yehofa akusakundasoni kamulichisya masengo nganisyo sya ŵakutumichila ŵakwewo. (1 Ayi. 22:19-22) Yehofa ali jwamlama, nambo jwangajembecheyaga kuti tutendeje yindu mwangalemwesya kalikose. Mmalo mwakwe, akusiŵakamuchisyaga ŵandu ŵali ŵangali umlama kuti akombole kumtumichila. (Sal. 113:6, 7) Mwamti Baibulo, jikusamkolanga Yehofa kuti ali “jwakutukamuchisya.” (Sal. 27:9; Aheb. 13:6) Mwenye Daudi jwamanyililaga kuti ŵakombolaga kamula masengo gaŵapochele ligongo lyakuti Yehofa ŵamkamuchisyaga.—2 Sam. 22:36.

10. Ana Yesu jwalosisye chamtuli kuti jwaliji jwakulinandiya?

¹⁰ Aganichisye ya chisyasyo cha Yesu. Atamose kuti jwaliji Ambuje soni kuti jwalongolelaga ŵakumkuya ŵakwe, ndaŵi jine jwayikene pakojesya syajo sya ŵakulijiganya ŵakwewo. Ligongo chichi Yehofa ŵajisunjile nganiji m’Baibulo? Mwangakayichila, jwatesile yeleyi pakusaka kwakamuchisya achalume ŵalombele soni ŵandu ŵane ŵakwete maudindo kuti ajigalileje chisyasyo chakwe. Yesu msyenejo jwatite, “Une napele jemanja chisyasyo kuti nombe nawo chachitendasoni mpela yinatendele une.” (Yoh. 13:12-17) Atamose kuti Yesu jwakwete udindo wekulungwa, nganajembecheyaga kuti ŵakumkuya ŵakwe amtumichileje. Mmalo mwakwe, jwalakwejo ni juŵatumichilaga ŵane.—Mat. 20:28.

11. Ana jwamlume jwamlombele, mpaka alijiganye chichi kutyochela kwa Yehofa soni Yesu pangani ja kulinandiya?

¹¹ Yatukulijiganya. Jwamlume jwamlombele, mpaka alosye kulinandiya mmatala gejinji. Mwachisyasyo, akusamanyilila kuti ŵamkwakwe soni ŵanache ŵakwe ali ŵangali umlama. Kupwatika pelepa, jwamlumeju akusakamulana ni nganisyo sya ŵandu ŵa mliŵasa lyakwe atamose yili mkuti jemanjajo ngakukamulana ni nganisyo syakwe. Mlongo Marley jwakusatama ku United States jwatite, “Ndaŵi sine une ni ŵamkwangu tukusalekangana nganisyo. Nambo ngusayiwona kuti ŵamkwangu akusayamichila soni kuchimbichisya nganisyo syangu. Ligongo akusambusyaga yanguganisya mkanasagule yakutenda.” Jwamlume jwakulinandiya, akusakamulaga masengo ga pamlango. Akusatenda yeleyi atamose yili mkuti kudela jakusatamagako ŵandu akusagawona masengo gelego kuti gali ga ŵakongwe. Ligongo chichi kutenda yeleyi mpaka kuŵe kwakusawusya? Mlongo jwine lina lyakwe Rachel jwatite, “Kudela ja kumangwetu, naga jwamlume akwakamuchisya ŵamkwakwe kuchapa mbale, kapena kuswejesya pamlango, ŵachibale soni ŵandu ŵakuŵandikana nawo, akusamwona kupwambwana jwamlumejo. Jemanjaji akusaganisya kuti jwamlumejo akulepela kwalamulila ŵamkwakwe.” Naga yeleyi ni yayikusatendekwa kudela ja kumangwawoko, akumbuchileje kuti Yesu ŵajojesye sajo sya ŵakulijiganya ŵakwe. Jwatesile yeleyi atamose kuti ŵandu ŵagawonaga masengogo kuti gasosekwaga kamulidwa ni achikapolo. Jwamlume jwambone, jwangagamba kutamila ganichisya yakulisangalasya msyene. Nambo akusaganichisyaga yampaka atende kuti ŵamkwakwe soni ŵanache ŵakwe aŵe ŵakusangalala. Ana jwamlume jwambone, akusosekwa kola ndamo jine japi kupwatika pa kulinandiya?

12. Ana chinonyelo chamtendekasisye Yehofa soni Yesu kutenda yindu yapi?

¹² Chinonyelo. Chilichose chakusatenda Yehofa akusachitenda mwachinonyelo. (1 Yoh. 4:7, 8) Yehofa akusalosya kuti akusatunonyela soni kutusamalila kupitila m’Maloŵe gakwe Baibulo soni m’gulu jakwe. Akusalolechesya kuti tuŵeje ŵakusangalala mwakutusimichisya kuti akusatunonyela. Nambi wuli pakwamba yakusosechela yetu ya kuchilu? Yehofa ‘akusatupa yosope yene mwakoloŵa magasa kuti tusangalaleje nayo.’ (1 Tim. 6:17) Naga tulemwisye, akusatujamukaga nambo jwangaleka kutunonyela. Soni ligongo lyakuti akusatunonyela mnope jwalinganyisye yakutuwombola. Mwamti Yesu jwayikene pakupeleka umi wakwe kuti atuwombole m’weji ligongo lyakuti akusatunonyela mnope. (Yoh. 3:16; 15:13) Pangali chindu champaka chimlepelekasye Yehofa soni Yesu kwanonyela ŵandu ŵali ŵakulupichika kwa jemanjaji.—Yoh. 13:1; Alo. 8:35, 38, 39.

13. Ligongo chichi achalume akusosekwa kwanonyela ŵandu ŵa mwiŵasa mwawo? (Alole libokosi lyakuti “Ana Jwamlume Jwagambile Kulombela Kwene Mpaka Atende Chichi Kuti Ŵamkwakwe Amchimbichisyeje?”)

¹³ Yatukulijiganya. Achalume ŵalombele, akusosekwa atendeje yindu yakulosya kuti akusiŵanonyela ŵandu ŵa mliŵasa lyawo. Ligongo chichi yeleyi yili yakusosekwa? Ndumetume Yohane jwapeleche kwanga kwakwe pajwatite, “Mundu jwangakumnonyela mjakwe jwakumwona, [kapena ŵandu ŵa mwiŵasa mwakwe] ngaŵa mkomboleka kumnonyela Mlungu jwangakumwona.” (1 Yoh. 4:11, 20) Jwamlume jwakusalinonyela liŵasa lyakwe soni jwakusasaka kumsyasya Yehofa soni Yesu akusalikamuchisya liŵasa lyakwe kuti liŵe paunasi wambone ni Yehofa. Akusalichenjela liŵasa lyakwe soni kulipatila yakusosechela yakuchilu. (1 Tim. 5:8) Jwalakwe akusiŵajiganya soni kwajamuka ŵanache ŵakwe. Kupwatika pelepa, ndaŵi syosope akusalijiganya yindu kuti akombole kumchimbichisya Yehofa soni yampaka yikamuchisye liŵasa lyakwe. Kwende tulole yindu yakusasosekwa kutenda jemanjaji soni tulole yampaka atende kuti akombole kumsyasya Yehofa soni Yesu.

YAKUSOSEKWA KUTENDA ACHALUME ŴALOMBELE

14. Ana achalume mpaka alikamuchisye chamtuli liŵasa lyawo kuti liŵe paunasi wambone ni Yehofa?

¹⁴ Kwakamuchisya ŵandu ŵa mliŵasa lyakwe kuti aŵe paunasi wambone ni Yehofa. Yesu ŵatendaga yindu mpela mwakusatendela Yehofa. Ŵakamuchisyaga ŵakulijiganya ŵakwe kuti aŵe paunasi wambone ni Atati ŵakwe. (Mat. 5:3, 6; Maliko. 6:34) Mwakulandana ni yeleyi, udindo wekulungwa wakwete achalume, uli kulikamuchisya liŵasa lyawo kuti liŵe paunasi wambone ni Yehofa. (Det. 6:6-9) Mpaka atende yeleyi mwakulolechesya kuti wosope mwiŵasa akuŵalanga soni kulijiganya Maloŵe ga Mlungu, akusimanikwa pa misongano, akulalichila, soni akulimbisya unasi wawo ni Yehofa.

15. Ana jwamlume mpaka alosye chamtuli kuti akusalichenjela liŵasa lyakwe?

¹⁵ Akusalichenjela liŵasa lyakwe. Yehofa ŵasalilaga ŵandu ŵane kuti akusamnonyela Yesu. (Mat. 3:17) Yesu ŵanonyelaga mnope ŵakulijiganya ŵakwe. Jwalosisye yeleyi, kupitila mu yindu yajwatendaga soni kuŵecheta. Nombenawo ŵakulijiganya ŵakwe, ŵamnonyelaga mnope Yesu. (Yoh. 15:9, 12, 13; 21:16) Jwamlume mpaka alosye kuti akusiŵanonyela ŵamkwakwe soni ŵanache ŵakwe, kupitila mu yindu yakusatenda kwa jemanjaji. Mwachisyasyo, akusasosekwa alipikaneje kuti ali mbali ja jemanjajo. Jwalakwe akusasosekwasoni kwasalila jemanjajo kuti akusiŵanonyela soni kuti ali ŵakusosekwa mnope. Mpaka atende yeleyi atamose pameso pa ŵandu.—Mis. 31:28, 29.

16. Ana jwamlume jwamlombele akusosekwa kutenda yindu yapi? Ana jwalakwe akusosekwa kuŵambala yindu yapi?

¹⁶ Kulipatila liŵasa yakusosechela ya paumi. Yehofa ŵapaga Aisalaeli yakusosechela yawo ya paumi, atamose pandaŵi jele ŵajamukaga ligongo lya ungapikanila. (Det. 2:7; 29:5) Masiku aganosoni, Yehofa akusatupa yakusosechela ya paumi. (Mat. 6:31-33; 7:11) Nombe najo Yesu ŵapaga yakulya ŵakulijiganya ŵakwe. (Mat. 14:17-20) Jwalakwe ŵaposyagasoni ŵakulwala. (Mat. 4:24) Pakusaka kumsangalasya Yehofa, jwamlume akusasosekwa alipatileje liŵasa lyakwe yakulya. Nambope pana yindu yine yakusosekwa kuyiŵambala. Akusosekwa kusamala kuti masengo gakukamula gakamlepelekasya kulichenjela liŵasa lyakwe soni kulikamuchisya kuti liŵe paunasi wambone ni Yehofa.

17. Ana Yehofa soni Yesu akusatujiganya soni kutujamuka chamtuli?

¹⁷ Ŵajiganyeje ŵandu ŵa mwiŵasa mwawo. Yehofa akusatujiganya soni kutujamuka, ligongo akusasaka kuti yitujendeleje. (Aheb. 12:7-9) Yesu akusiŵajiganya mwachinonyelo ŵandu ŵakusiŵalolelaga. (Yoh. 15:14, 15) Naga ŵane alemwisye, akusiŵajamukaga. Nambo akusatenda yeleyi mwachinonyelo (Mat. 26:41) Akusamanyililaga kuti mpaka tulemwisye yindu yine yakwe ligongo lyakuti twapali ŵakulemwa.—Mat. 26:41.

18. Ana jwamlume jwali mtwe wa liŵasa akusasosekwa akumbuchileje chichi?

¹⁸ Jwamlume jwakusatenda yindu pakumsyasya Yehofa soni Yesu, akusakumbuchila kuti ŵandu ŵa mwiŵasa mwakwe ali ŵangali umlama. Jwalakwe ‘ŵangatendelaga’ ngalwe ŵamkwakwe soni ŵanache ŵakwe. (Akolo. 3:19) Mmalo mwakwe, akusakuya maloŵe gagali pa Agalatiya 6:1. Jwalakwe akusalinga kwakamuchisya jemanjajo ni “mtima wakulisinga.” Kwineko ali mkukumbuchila kuti nombe najo ali jwangali umlama. Mpela Yesu, jwalakwe akusamanyilila kuti mpaka ŵajiganye chenene ŵandu ŵa mliŵasa lyakwe kupitila mu yindu yakusatendaga.—1 Pet. 2:21.

19-20. Ana jwamlume jwali mtwe wa liŵasa mpaka amsyasye chamtuli Yehofa soni Yesu pakusagula yindu?

¹⁹ Akaliganichisyaga jikape. Yehofa akusasagula kutenda yindu yampaka yakamuchisyesoni ŵandu ŵane. Mwachisyasyo, jwalakwe jwapanganyisye umi. Jwatesile yeleyi ngaŵa ligongo lyakuti agambe kulisangalasya msyene. Nambo jwasachilesoni kuti tusangalaleje ni umi. Pangali jwalijose jwakamkanganichisye Yehofa kuti apeleche mwanache jwakwe kuti atuwombole m’weji. Nambo jwatesile yeleyi pakusaka kutukamuchisya. Nombenajo Yesu jwatendaga yindu yayakamuchisyaga ŵandu ŵane. (Alo. 15:3) Mwachisyasyo, atamose kuti jwalakwe pandaŵi jine jwapesile, nambope jwapitilisye kwajiganya ŵandu.—Maliko. 6:31-34.

²⁰ Mtwe wa liŵasa ukusasosekwa kumanyilila kuti chindu chakusawusya champaka asosekwe kutenda chili kusagula yindu yampaka yikamuchisye liŵasa lyakwe. Jwalakwe akusaŵambala kutenda yindu pali pangali magongo gakupikanika soni mkanaŵe ganisya chenene. Mmalo mwakwe, jwalakwe akusakunda kuti Yehofa ampeje lunda.c (Mis. 2:6, 7) Yeleyi mpaka yimkamuchisye kuti asaguleje yindu yampaka yakamuchisye ŵandu ŵane.—Afil. 2:4.

21. Ana mungani jakuyichisya tuchikambilana chichi?

²¹ Yehofa apeleche udindo wekulungwa mnope kwa mitwe ja maŵasa. Jwalakwe akusajembecheyaga kuti jemanjaji akwanilisyeje udindo wawowo. Jwamlume mpaka akombole kulilongolela chenene liŵasa lyakwe, naga akusatenda yindu mpela mwakusatendela Yehofa soni Yesu. Nombe jwamkongwe mwiŵasa pakulingalinga kutenda mbali jakwe, akusakamuchisya kuti liŵasalyo liŵe lyakusangalala. Ana achakongwe akusasosekwa awuwoneje chamtuli udindo wa ŵamkwawo? Ana jemanjaji akusasimana ni yakusawusya yamtuli? Mungani jakuyichisya tuchipata kwanga kwa yiwusyo yeleyi.