Mtendele Ana Mpaka Tutende Cici Kuti Tuwupate?

LIGONGO lyakuti tukutama m’cilambo cakusakala, tukusosekwa kulingalinga kuti tupate mtendele. Atamose tuli tuwupatile, nambope ndaŵi syejinji yikusatusawusya kuwusunga. Maloŵe ga Mlungu gakusasala yampaka tutende kuti tuwupate mtendele usyesyene soni wangamala, nambosoni yampaka tutende pakwakamucisya ŵane kuti aŵe pamtendelewu.

YATUKUSOSEKWA KUTENDA KUTI TUPATE MTENDELE USYESYENE

Naga mundu ngakulaga nganisyo kapena kogopa yineyakwe nikuti akwete mtendele usyesyene. Kuti yeleyi yikombolece, tukusosekwa kola acimjetu wambone. Kupunda yosope, tukusosekwa kuŵa paunasi wakulimba mnope ni Mlungu. Ana mpaka tutende camtuli yeleyi?

Yine mwa yindu yampaka mundu alajeje nayo nganisyo yili kulipila ngongole nambosoni naga jwakunonyelwa jwakwe akulwala — Kusoŵa kwa mbiya, yilwele ni yakusawusya yine yikwatendekasya ŵandu ŵajinji kuti akaŵa pamtendele

Patukupikanila malamusi gakulungama ga Yehofa, tukusalosya kuti tukusamkulupilila jwalakwe soni kuti tukusaka kuŵa najo pa unasi wambone. (Yer. 17:7, 8; Yak. 2:22, 23) Yakuyicisya yakwe, jwalakwe akusatuŵandicila mnope soni kutupa mtendele wamumtima. Lilemba lya Yesaya 32:17 likusati, “Yakuyicisya ya cilungamo cisyesyene yiciŵa mtendele, soni yisogosi ya cilungamo cisyesyene yiciŵa bata ni mtendele mpaka kalakala.” M’yoyo mpaka tupate mtendele usyesyene wamumtima naga tukusampikanila Yehofa kutyocela pasi pamtima.—Yes. 48:18, 19.

Cindu cine campaka citukamucisye kola mtendele cili msimu weswela. Msimuwu uli mtuka wambone wakutyocela kwa Atati ŵetu ŵakwinani.—Mase. 9:31.

MSIMU WA MLUNGU UKUSATUKAMUCISYA KUTI TUKOLE MTENDELE

Ndumetume Paulo ŵakolasile mtendele mpela ndamo jatatu pa “ndamo syawukusakoposya msimu weswela.” (Aga. 5:22, 23) Ligongo lyakuti msimu weswela ukusatukamucisya kola mtendele, tukusosekwa kuwukunda kuti utulongoleleje. Kwende tulole matala gaŵili gampaka msimu wa Mlungu utukamucisye kupata mtendele.

Candanda, patukuŵalanga mwakutamilicika Maloŵe gakusalilidwa ga Mlungu, msimu weswela ukusatukamucisya kola mtendele. (Sal. 1:2, 3) Patukuganicisya mwakusokoka ngani sya m’Baibulo, msimu wa Mlungu ukusatukamucisya kupikanicisya nganisyo sya Yehofa pa ngani syakulekanganalekangana. Mwambone, tukusayiwona yakusatenda Yehofa pakusaka kuŵa pamtendele ni ŵane, soni tukusamanyilila ligongo lyakwe mtendele uli wakusosekwa mnope kwa jwalakwe. Naga tukusakuya yatukulijiganya kutyocela m’Maloŵe ga Mlungu, tukusakola mtendele wejinji paumi wetu.—Miy. 3:1, 2.

Caŵili, tumŵendeje Mlungu kuti atupe msimu weswela. (Luk. 11:13) Yehofa jwatulagwisye kuti naga tukuŵenda cikamucisyo cakwe, “mtendele wa Mlungu wawukusapunda kuganisya mwakusokoka kulikose, ucicenjela mitima [jetu] soni nganisyo [syetu] mwa Klistu Yesu.” (Afi. 4:6, 7) Naga tukumŵenda Yehofa msimu wakwe, cacitukamucisya kola mtendele wamumtima wakusakola ŵandu ŵali paunasi wambone ni jwalakwe.—Alo. 15:13.

Pakamulicisya masengo songa sya m’Baibulosi, ŵandu ŵane acenjile umi wawo. Apano akwete mtendele wamumtima, ali pa mtendele ni Yehofa nambosoni ni acimjawo. Ana akombwele camtuli yeleyi?

MUŴAPATILE MTENDELE USYESYENE

Masiku agano, mumpingo wa Ciklistu mwana abale ni alongo ŵaŵaliji ‘ŵangacelewa kutumbila.’ Nambo apano ali ŵacanasa, ŵakulitimalika, soni akusatenda yindu mwamtendele ni acimjawo.a (Miy. 29:22) Kwende tulole yaŵatesile m’bale ni mlongo jwine kuti amasye kupya mtima ni kutanda kutama mwamtendele ni ŵane.

Kukuya yiwundo ya m’Baibulo soni kupopela kwa Yehofa kukusakamucisya kuti liŵasa liŵe lya mtendele — Kukamulicisya masengo yiwundo ya m’Baibulo soni kuŵenda msimu wa Mlungu mpaka yitukamucisye kola mtendele

David mkanaŵe Jwamboni, jwakwete ndamo syakusakala. Ligongo lya yeleyi, nganiŵacimbicisyaga acinangologwe nambosoni acabale ŵakwe pakuŵeceta. Nambo kaneko David jwacenjile ni kuŵa mundu jwamtendele. Ana yakombolece camtuli? Jwalakwe jwatite, “Natandite kukuya yajikusajiganya Baibulo. Pambesi pakwe, natandite kwacimbicisya acinangolo ŵangu soni ŵacibale ŵangu.”

Nombe najo Rachel pandanda nganakola ndamo syambone. Jwalakwe jwatite, “Mwiŵasa mwetu, jwalijose jwaliji jwaukali. Apano, atamose kuti nalijiganyisye usyesyene, nambo ngulimbanape ni mtima welewu.” Ana Rachel jwatesile cici kuti atande kutama mwamtendele ni ŵane? Jwalakwe jwatite, “Ndaŵi syosope namŵendaga Yehofa kuti angamucisye.”

David ni Rachel ali yisyasyo yamnono mwa ŵandu ŵajinji ŵakwete mtendele. Jemanjaji akusawupata ligongo lyakamulicisya masengo yiwundo ya m’Malemba nambosoni kwegamila msimu wa Mlungu. Atamose kuti tuli m’cilambo cakusakala, nambope mpaka tukombole kola mtendele wamumtima. Yakuyicisya yakwe, mpaka tutameje mwamtendele ni ŵamwiŵasa mwetu nambosoni Aklistu acimjetu. Konjecesya pelepa, Yehofa akusatulimbikasya kuti ‘tuŵeje pamtendele ni ŵandu wosope.’ (Alo. 12:18) Nambo ana yeleyi yili yakomboleka? Ana pana umbone wuliwose naga tukutama mwamtendele ni ŵandu wosope?

YAMPAKA ATENDE KUTI ATAMEJE MWAMTENDELE NI ŴANE

Patukulalicila, tukusaŵa tuli mkwakamucisya ŵandu kola mtendele. (Yes. 9:6, 7; Mat. 24:14) Yili yakusangalasya kuti ŵajinji akusakunda kwalalicila. Yakuyicisya yakwe, akusaleka kudandawula mnope kapena kutumbila ni mwayikwendela yindu m’cilamboci. Akusakolasoni cembeceyo cakuti yindu ciyicenje pacangakaŵapa. Ligongo lya yeleyi ‘akusasosasosa mtendele ni kuwusunga.’—Sal. 34:14.

Nambope, ndaŵi sine patukulalicila, ŵane ŵangajiticisya usyesyene. (Yoh. 3:19) Atamose yili m’yoyo, msimu wa Mlungu ukusatukamucisya kuti twasalile Maloŵe ga Mlungu mwamtendele soni mwakwacimbicisya. Yeleyi yili yakamulana ni maloŵe ga Yesu ga pa Matayo 10:11-13. Yesu jwatite, “Pajinjile m’nyumba, apeleceje moni ku liŵasa lyosope. Naga nyumbajo jili jakwenelela, mtendele wawo uŵe panyumbajo. Nambo naga nganijiŵa jakwenelela, mtendele wawo uwujile kwa jemanja.” Kukuya maloŵe ga Yesuga mpaka kutukamucisye kutyoka panyumbapo mwamtendele, yampaka yikamucisye kuti lisiku line capikanile.

Tukusakolasoni mtendele ligongo lyakwacimbicisya acakulungwakulungwa ŵa boma. Tukusalinjilila kutenda yeleyi atamose ali mkutusisya. Mwambone, m’cilambo cine ku Africa, boma jakanaga kwiticisya masengo gakutaŵa Nyumba sya Ucimwene ligongo lyakuti ŵandu ŵajinji ŵaŵenganaga ni Ŵamboni. Kuti yosope yijende mwamtendele, Likuga Lyakulongolela lyamtumisye m’bale jwine kuti akaŵecetane ni jwakwimila cilambo ca ku Africa cila mumsinda wa London, ku England. M’balejo jwaliji m’mishonale pandanda m’cilambo ca ku Africa cila. Cakulinga ca ulendowu caliji kuja kumsalila jwakwimila cilambojo kuti Ŵamboni sya Yehofa akusatenda yindu mwamtendele. Ana yamasile wuli paulendowu?

M’balejo jwatite, “Panagambile kwika, nasimene ni jwamkongwe jwine jwakupocela acalendo. Yaŵawete munduju yandendekasisye kumanyilila kuti ali jwa ciŵeceto canalijiganyisye une ku umishonale. M’yoyo, namkomasisye m’ciŵeceto cakwe. Jwalakwe jwasimonjile mnope, kaneko jwatite, ‘Twapocele, asale cayicile kuti twakamucisye.’ Namsalile mwakumcimbicisya kuti ngusaka kuwonegana ni jwakwimila cilambo cakwe. Ŵamjimbile foni jwakwimila cilambojo. Pajwakopocele, jwangomasisye mu ciŵeceto cakumangwakwe, kaneko natandite kumsalila masengo ga Ŵamboni. Jwalakwe jwapikanicisye yosope yanamsalile.”

Ligongo lyakuti m’bale jula jwaŵecete mwakucimbicisya, yamkamucisye jwakwimila cilambojo kupikanicisya cenene masengo ga Ŵamboni. Pali papite ndaŵi jamnono, boma ja cilambo ca ku Africa cila jatujiticisye yakutaŵa Nyumba sya Ucimwene. Abale ŵasangalele mnope! Kusala yisyene, kwacimbicisya ŵane kukusayikasya mtendele.

ASANGALALEJE NI MTENDELE MPAKA KALAKALA

Masiku agano, ŵandu ŵa Yehofa akusasangalala ni paladaiso jwausimu. Jemanjaji akusatama mwamtendele ni Aklistu acimjawo. Wawojo pakulingalinga kutenda yindu mwamtendele paumi wawo, akusaŵa ali mkonjecesya kusalala kwa paladaisoju. Soni cakusosekwa mnope ni cakuti, Yehofa cacanonyela mnope nambosoni cacitama m’cilambo casambano camtendele mpaka kalakala.—2 Pet. 3:13, 14.

a Ndamo ja canasa tucijitagulila mu ngani jine jakutagulila ya ndamo syawukusakoposya msimu weswela wa Mlungu.