Yampaka Atende Kuti Aŵe Ŵakupilila

ANA KUPILILA KULI KUTENDA CICI?

Mundu jwakupilila ngakusawujila munyuma pasimene ni yindu yakusawusya. Ndamoji jikusawonecela mundu payimtendecele yineyakwe. Mwanace pakulijiganya kwenda, ndaŵi sine akusagwa. Mwakulandana ni yeleyi, ŵanace ŵetu akusosekwa kumanyilila kuti ngaŵa kuti mpaka yindu yigambeje kwenda cenene ngasimana ni yakusawusya.

LIGONGO CICI KUPILILA KULI KWAKUSOSEKWA?

Ŵanace ŵane akusatenguka naga alepele kutenda cinecakwe, pasimene ni yakusawusya soni ŵandu ŵane pakusala yakulepela ya ŵanacewo. Ŵanace ŵane akusayikana pakuwujila munyuma. Nambope, jemanjaji akusosekwa kumanyilila yindu yakuyicisyayi:

• Ndaŵi sine mpaka tulepeleje kutenda yindu yine.—Yakobo 3:2.

• Jwalijose akusasimana ni yakusawusya paumi.—Jwakulalicila 9:11.

• Kumjamuka mwanace kucimkamucisya kuŵambala kutenda yindu yakulemweceka.—Misyungu 9:9.

Kupilila kucimkamucisya mwanace jwetu kola cikulupi cakuti mpaka amalane ni yakusawusya.

ANA MPAKA TUMJIGANYE CAMTULI MWANACE KUŴA JWAKUPILILA?

Mwanace jwetu pajulemwisye.

CIWUNDO CA M’BAIBULO: “Mundu jwambone akusagwa kasano ni kaŵili ni akusajimuka soni.”—Misyungu 24:16.

Tumjiganyeje mwanace jwetu kumanyilila naga yakusawusya yasimene nayo yili yekulungwa kapena yamwana. Mwacisyasyo, ana mwanace jwetu mpaka jutende cici pajulepele mayeso kusukulu? Komboleka kuti mpaka jutenguce, ni kuŵecetaga kuti, “Nganimba ngombwele kutenda cilicose cambone.”

Kuti aŵe jwakupilila, tumkamucisyeje mwanace jwetu kuganicisya mbali jakusosekwa kongolela kuti ndaŵi jine catende cenene. Kutenda yeleyi kucimkamucisya kulingalinga kumalana ni yakusawusya soni jucileka kudandawula.

Tuŵambaje kumsalila mwanace yampaka atende kuti amalane ni yakusawusya. M’malo mwakwe tumkamucisyeje kuti jupateje msyene litala lyakumacisya yakusawusyayo. Mpaka tum’wusye kuti, “Ana mkusosekwa kutenda cici kuti mpikanicisye cenene yamkulijiganyayi?”

Payitendekwe yakusawusya.

CIWUNDO CA M’BAIBULO: “Jemanja ya malaŵi ngamkuyimanyilila.”—Yakobo 4:14.

Yindu yikusacenga mwangajembeceya paumi. Mundu jwali jwakusicila lelo malaŵi mpaka aŵe jwakulaga, mundu jwali cenene lelo malaŵi mpaka alwale. Baibulo jikusasala kuti, “Ŵakusawutuka mnope pampikisano wakuwutuka ŵangakangala kupunda pampikisanowo soni ŵakulimba mitima ŵangakangala kupunda pangondo . . . . Wosope ŵenewo upile [“yakutendekwa yangayijembecela,” NW] ukusagambaga kwagwila mundaŵi jakwe.—Jwakulalicila 9:11.

Mpela nangolo tukusatenda yampaka tukombole pakwacenjela ŵanace ŵetu ku yindu yakogoya. Nambope yili yangakomboleka kumcenjela mwanace jwetu ku yindu yakusawusya yosope yasimene nayo.

Mwanace jwetu pajusimene ni yindu yakusawusya, mpela patandene ni mjakwe kapena pajasice mundu jwine mwiŵasa, tumsalileje yampaka atende kuti amalane ni yakusawusya mpela yeleyi. Patukutenda yeleyi tukusaŵa tuli kumjiganya mwanace jwetu yacacitenda pacacisimana ni yakusawusya, mpela pagacimmalila masengo kapena pacacisimana ni yakusawusya yakwayana ni kusoŵa kwa mbiya.a

Mwanace jwetu pasalilidwe kuti ajongolele yine yakwe.

CIWUNDO CA M’BAIBULO: “Mpikanileje msyungu . . . kuti timŵe ŵalunda pasogolo pakwe.”—Misyungu 19:20.

Naga mundu jwine akumsalila mwanace jwetu kuti ajongolele yineyakwe, ngaŵa kuti akusamŵenga mwanacejo, nambo agamba kusaka kumkamucisya kuti ajongolele ndamo jakwe.

Patukumjiganya mwanace jwetu kupocela msyungu, yikusaŵa yakamucisya kwa wosopewe. Mtati jwine lina lyakwe John, jwatite, “Naga ŵanace ŵetu ngakongolela yakulepela yawo, yikusaŵa yakusawusya kuti alijiganye yindu. Ŵanaceŵa akusalijonjecesya yakusawusya paumi wawo, soni nangolo akusaŵa ni masengo gakulinganya yakusawusya yatendekasisye ŵanacewo. Yeleyi yikusatendekasya kuti umi uŵe wakusawusya mnope kwa acinangolo soni kwa mwanace.”

Ana mpaka tumkamucisye camtuli mwanace jwetu kuti awuwoneje umbone wakongolela yine yakwe? Ŵane pamsalile mwanace jwetu kuti ajongolele yineyakwe cinga kusukulu kapena kwine kulikose, ngatukusosekwa kumŵicila kunyuma. M’malo mwakwe tum’wusyeje kuti,

• “Ligongo cici amsalile kuti mjongolele?”

• “Ana mpaka mtende cici kuti mjongolele?”

• “Ana cimcitenda cici ndaŵi jine pamtesile yakulandana ni yeleyi?”

Tukumbucileje kuti kumjongolela mwanace jwetu mpaka kumkamucisye apano soni patacikulapo.