Kulinganyasoni Unasi Wawo ni Yehofa

CHAKA chilichose abale ni alongo ŵajinji akusawujila mumpingo wa Chiklistu. Agambe ganisya “lukondwa” lwalukusapagwa kwinani ŵandu ŵeleŵa pakuwujila mumpingo. (Luk. 15:7, 10) Naga wawojo ŵawuchisye mumpingo ngakusosekwa kayichila yakuti Yesu, malayika soni Yehofa ali ŵakusangalala pakwawona kuti awujilesoni mumpingo. Nambope pakulinganya unasi wawo ni Yehofa mpaka asimaneje ni yakusawusya. Ana yine mwa yakusawusyayi mpaka yiŵe yapi, soni ni chichi champaka chakamuchisye?

YAKUSAWUSYA YAMPAKA ASIMANEJE NAYO

Abale ni alongo ŵajinji akusalagasikape nganisyo atamose pawujile mumpingo. Komboleka mpaka tupikanichisye muŵapikanilaga mumtima Mwenye Daudi. Atamose kuti ŵamkululuchile yakulemwa yakwe, nambope jwatite, “Yakulemwa yangu yisyungulile.” (Sal. 40:12; 65:3) Mundu pawujile kwa Yehofa mpaka alijimbeje magambo soni kutenda sooni kwa yaka yejinji. Mlongo jwine jwatugambile kumkolanga kuti Isabelle, ŵatemi kusa kwa gulu kwa yaka yakupunda 20.a Jwalakwe jwatite, “Yalemagape kwitichisya kuti Yehofa mpaka angululuchile yakulemwa yangu.” Naga akutenguka ligongo lya yindu yatesile nikuti mpaka yiŵe yakusawusya kuti aŵe paunasi wambone ni Yehofa. (Mis. 24:10) Akakunda kuti yeleyi yatendechele.

Ŵandu ŵane akusayiwona kuti kakusaŵa kaganyu kuti alinganye unasi wawo ni Yehofa. M’bale Antoine juŵawujile mumpingo jwatite, “Nayiwonaga kuti ndiŵalile yosope yanatendaga mkanaŵe kundyosya mumpingo.” Ligongo lya yeleyi, ŵane yikusalema kuti alipelecheje mnope pakumtumichila Yehofa.

Kuti tuyipikanichisye yeleyi, tuwanichisye kuti nyumba ja mundu jwine jijonasiche ni chimbungo chamachili. Jwalakwe mpaka yimgwisye ulesi kuti alinganyesoni nyumbajo, mnopemnope pakuganichisya winji wa masengo gampaka gapagwe kuti yosope yikomboleche. Mwakulandana ni yeleyi, unasi wawo ni Yehofa pawusokonechele ligongo lyakutenda ulemwa wekulungwa, mpaka ayiwoneje kuti gali masengo nditu kuti awulinganyesoni unasiwo. Nambope pana yindu yampaka yakamuchisye.

Yehofa akutuŵilanga kuti, “Sambano jemanja myiche tukambilane, kuti mjilanesoni ni une.” (Yes. 1:18, NWT.) Atesile kala yakomboleka kuti ‘ajilanesoni’ ni Yehofa. Jwalakwe akwanonyela wawojo ligongo lyakulimbichila kuti aŵe najo paunasi. Agambe ganisya, kuwujila kwawo kwa Yehofa kuli chisyasyo chambone chakulosya kuti yakusaŵecheta Satana yili yaunami.—Mis. 27:11.

Ligongo lyakuti awujile kwa Yehofa, jwalakwe ali jwakoseka kuŵa paunasi ni wawojo. (Yak. 4:8) Atamose kuti ŵandu akusasangalala wawojo pawujile mumpingo, nambope pana chakusosekwa kutenda kupunda pelepa. Chindu chakwe chili kumnonyela Yehofa jwali Mtati soni Mjawo. Ana mpaka atende chamtuli yeleyi?

AKOLEJE YAKULINGA YAMPAKA AYIKWANILISYE PAKULINGANYA UNASI WAWO NI YEHOFA

Akoleje yakulinga yampaka ayikwanilisye. Mwangakayichila, akusaŵa ali mkukumbuchila yindu yiŵalijiganyisye kandanda yakwamba Yehofa soni yiŵasasile jwalakwe kuti chachitenda kusogolo. Nambope akusosekwa kutenda yejinji kuti awujile muŵaŵelele pandanda. Yindu yakwe yili mpela kulalichila ngani syambone soni kutenda yindu ni abale ni alongo ndaŵi syosope. Yindu yakuyichisyayi mpaka yakamuchisye kuŵa paunasi wambone ni Yehofa.

Aŵechetaneje ni Yehofa ndaŵi syosope. Yehofa akusamanyilila kuti kulijimba mnope magambo mpaka kumtendekasye mundu kulepela kupopela kwa jwalakwe. (Alo. 8:26) Nambope atamose yili myoyo, ‘apopeleje ndaŵi syosope.’ Amsalileje kuti ali ŵakusachilila kuŵa najo paunasi. (Alo. 12:12) Andrej jwatite, “Nalijimbaga mnope magambo soni kutenda sooni. Nambo pambopesile, yosope yatyokaga soni nakolaga mtendele.’ Naga ngakumanyilila yampaka amŵende Yehofa mwipopelo, mpaka alole mapopelo ga Mwenye Daudi gagakusasimanikwa mu Salimo 51 soni 65.

Alijiganyeje Baibulo mwakutamilichika. Kutenda yeleyi mpaka kwakamuchisye kuti akole chikulupi chakulimba soni kuti amnonyeleje mnope Yehofa. (Sal. 19:7-11) Felipe jwatite, “Ligongo lyakuti nalepelaga kulijiganya Baibulo ndaŵi syosope, yeleyi ni yiyandendekasisye kuti mbujile panyuma soni kuti namkuŵasye Yehofa. Naganisisye yakuti nalijiganyeje pajika ndaŵi syosope ni chakulinga chakuti ngawilisyasoni ulemwa wanatesile pandanda.” Wawojosoni mpaka atende yeleyi. Naga akusaka kuti mundu jwine ŵakamuchisye kupata ngani syampaka alijiganyeje pajika, mpaka amŵende mjawo jwali paunasi wambone ni Yehofa kuti ŵakamuchisye.

Alinganyejesoni unasi wawo ni abale ni alongo. Ŵandu ŵane ŵawujile mumpingo akusadandawulaga kuti mwine achimjawo chiŵawoneje kuti ali ŵakusokonasya. Larissa jwajitichisye yeleyi. Jwalakwe jwatite, “Natendaga mnope sooni. Nalipikanaga kuti nawutesisye sooni mpingo, mwamti nganisyo syelesi syandagasisye kwandaŵi jelewu.” Nambo akusosekwa kumanyilila kuti achakulungwa ŵamumpingo ni abale ni alongo ŵakomangale mwausimu ali ŵakusachilila kwakamuchisya wawojo kuti alinganye unasi wawo ni Yehofa. (Alole libokosi lyakuti “Yampaka Atende Achakulungwa Ŵamumpingo.”) Jemanjaji akusasangalala mnope kuti wawojo ŵawujile mumpingo soni akusasaka kuti yindu yajendeleje chenene.—Mis. 17:17.

Ana chichi champaka chakamuchisye kuti aŵe paunasi ni abale ni alongo? Atendeje yindu yimpepe ni abale ni alongo. Yindu yakwe mpela kusongana soni kulalichila ndaŵi syosope. Ana yeleyi mpaka yakamuchisye chamtuli? Felix jwatite, “Abale ni alongo ŵajembecheyaga kuti mbujile mumpingo, soni panawujile nayiweni kuti jemanjaji akusambalanjila. Jemanjaji ŵangamuchisye kulipikana kuti mbujile mumpingo, kulipikana kuti Yehofa angululuchile soni kuti mbitilisye kumtumichila chenene jwalakwe.”—Alole libokosi lyakuti “Yampaka Atende.”

AKAWUJILA MUNYUMA

Satana chapitilisyepe kwatendekasya kusimana ni yakusawusya pakulinganya unasi wawo ni Yehofa. (Luk. 4:13) Apanopano jili ndaŵi jambone jakuti alimbisye unasi wawo ni Yehofa.

Yehofa pakusala ya ngondolo syakwe akusati, “Tinjisisosasosa sisyajasiche, syakusokonechela tinjisiwusya, sisyawulele tinjisitaŵa maŵanga gakwe, syakulepetala tinjisilimbanganya.” (Esek. 34:16) Yehofa ŵakamuchisye ŵandu ŵajinji kuti alinganye unasi wawo ni jwalakwe. Myoyo akusosekwa kumanyilila kuti Yehofa ali jwakusachilila kwakamuchisya wawojo kuti aŵe paunasi wakulimba mnope ni jwalakwe.

Yampaka Atende Achakulungwa ŵa Mumpingo

Achakulungwa ŵa mumpingo akusatenda yejinji pakwakamuchisya ŵandu ŵawujile mumpingo ni chakulinga chakuti aŵesoni paunasi wambone ni Yehofa. Alole yampaka atende jemanjaji pakwakamuchisya ŵandu ŵawujile mumpingo.

Ŵalimbikasyeje. Ndumetume Paulo jwamanyililaga kuti mundu jwakulemwa jwapitikwiche mtima mpaka ‘adandawulisyeje mnope kwika pakwasa mtima.’ (2 Akoli. 2:7) Jwalakwe mpaka alijimbeje magambo soni kutenda sooni. Paulo ŵawulimbikasisye mpingo kuti amkululuchileje ni kumlimbikasya mtima mundu jwawujile mumpingo. Ŵandu ŵawujile mumpingo akusosekwa kwalimbikasya kuti Yehofa soni abale ni alongo akusiŵanonyela mnope jemanjaji. Achakulungwa ŵamumpingo pakwakamuchisya soni kwalimbikasya jemanjaji, yichakamuchisya kuti akatamilaga kudandawula.

Apopeleje nawo yimpepe. “Lipopelo lya mundu jwakulungama likusaŵa lya machili, nipo lyangapita pachabe.” (Yak. 5:16) Mlongo Larissa jwatite, “Nasalilaga achakulungwa ŵa mumpingo, yindu yayandendekasyaga kulikayichila soni woga. Achakulungwaŵa ŵapopelaga ni une soni ŵasalaga yakusawusya yangu mwipopelomo. Yeleyi yangamuchisyaga kuyiwona kuti achakulungwa ŵa mumpingoŵa nganandumbilila. Jemanjaji ŵasakaga kungamuchisya kulinganya unasi wangu ni Yehofa.” Nombe Theo jwasasile kuti, “Mapopelo ga achakulungwaŵa gangamuchisyaga kuyiwona kuti Yehofa akusanonyela yisyesyene soni akusalola yambone mwa une, ngaŵa yakusakala yanatesileyo.”

Aŵeje paujakwe ni jemanjaji. Ŵandu ŵawujile mumpingo akusasaka kola achimjawo ŵasyesyene. Jwamkulungwa jwa mumpingo jwine lina lyakwe Justin jwatite, “Tukusosekwa kwawula kukulalichila yimpepe ni ŵandu ŵawujile mumpingo soni kwajendela kumangwawo. Yeleyi mpaka yikamuchisye kuti tuŵe paujakwe ni jemanjajo.” Jwamkulungwa jwa mumpingo jwine lina lyakwe Henry jwatite, “Ŵandu ŵane mumpingo pakwawona achakulungwa ali mkukunguluka ni ŵandu ŵawujile kwene mumpingo, yikusakamuchisyasoni jemanjajo kuti atendeje myoyo.”

Ŵakamuchisyeje kuti alijiganyeje pajika. Mundu jwali paunasi ni Yehofa mpaka amkamuchisye mundu jwawujile mumpingo, kuti alijiganyeje mwakutamilichika. Jwamkulungwa jwa mumpingo jwine lina lyakwe Darko jwatite, “Ngusinasalila jemanjaji mfundo syakamuchisya simbatile pakulijiganya pajika soni umbone wa kulijiganya Baibulo. Nambosoni ngusatenda yakuti tulijiganye yindu yine yalumo.” Jwamkulungwa jwa mumpingo jwine lina lyakwe Clayton jwatite, “Ngusinalimbikasya jemanjaji kuti apate m’Baibulo ngani jajikulandana ni yindu yaŵele ali mkusimana nayo.”

Atendeje maulendo ga ubusa kwa jemanjaji. Ŵandu ŵawujile mumpingo akusaŵa kuti ŵaweni achakulungwa ali mkuwelusya. Nambo sambano pawujilepa, akusasosekwa kwawona achakulungwaŵa mpela achibusa ŵawo ŵakuti ŵasamalileje. (Yel. 23:4) Achakulungwa ŵa mumpingo aŵeje ŵachitema pakwapikanila soni kwalimbikasya ŵandu ŵawujile mumpingo. Apateje ndaŵi jakunguluka ni jemanjaji. Alole yakusatenda jwamkulungwa jwa mumpingo jwine lina lyakwe Marcus pamjendele mundu kuti akamlimbikasye. Jwalakwe jwatite, “Tukusakambilana ni jemanjaji mfundo syakutyochela m’Malemba soni kwayamichila. Tukusasimichisyasoni jemanjaji kuti Yehofa soni uweji tuli ŵakusangalala ligongo lya kulingalinga kwawo kuti awujile mumpingo. Paulendo uliwose watumjendele mundu tukusamsalila ya lisiku lyatuchiyikasoni paulendo wakuyichisya.”

a Mena gane munganiji tugachenjile.