Wosope Tukusasosekwa Kusagula Yakutenda
Ana mpaka atende chichi pakusaka kwawula kumalo kwakuti ngakukumanyilila? Komboleka mwine:
1. Mpaka ajendeje mumsewu wakuganisya kuti chiwukayikasye kwakwawulako.
2. Mpaka ŵakuyeje ŵane pakuganisya kuti jemanjajo akwawula kwakusaka wawojo.
3. Mpaka akamulichisye masengo yindu yakudalilichika mpela GPS, mapu, kapena kumwusya mjawo jwakukumanyilila chenene kumaloko.
Naga akukuya matala gaŵili gandandaga nikuti mpaka asokonechele. Nambo naga akukuya litala lyatatu, mwangakayichila mpaka akayiche kwakwawula.
Yatukusatenda paumi wetu, mpaka tuyilandanye ni mundu jwali paulendo. Mwamtitu patusagwile kutenda yineyakwe, tukusajembecheya kuti chiyitukamuchisye kukola sogolo jambone. Nambo kuti tukole sogolo jambone, yikusadalila kwatukusajigala malangiso gatukusakamulichisya masengo paumi wetu.
Ndaŵi sine tukusasagula kutenda yindu yayili yangasosekwa mnope. Nambo pane tukusasosekwa kusagula kutenda yindu yakusosekwa mnope. Chinga yatusagwile yili yamwana kapena yekulungwa, tukusosekwa kumanyilila kuti yatusagwileyo yikusalosya mwatukusajiwonela ngani jakulekanganya yindu yambone ni yakusakala. Myoyo yakusagula yetu mpaka yikwaye mnope umi wetu kapena wa achalongo achimjetu. Yindu yine yatukusasosekwa kusagula kutenda yili yakwayana ni:
Kugonana soni ulombela
Kutenda yindu mwachilungamo, kukamula masengo, soni ngani sya mbiya
Yampaka tutende pakwalela ŵanache
Yampaka tutende kuti twawoneje mwakuŵajilwa ŵandu ŵane
Ana mpaka atende chichi kuti yindu yakusaka kusagula pangani syelesi yiŵe yakwakamuchisya wawojo soni liŵasa lyawo kukola sogolo jambone?
Chiwusyo chatukusosekwa kuliwusya chili chakuti: “Ana ni chichi champaka chingamuchisye kuti ngomboleje kusagula yindu mwalunda pangani jakulekanganya yambone ni yakusakala?”
Magasini ajino, chijilondesye ligongo lyakwe tukusosekwa kukulupilila yajikusasala Baibulo pangani ja yindu yambone soni yakusakala. Chayiwonesoni kuti yindu yeleyi mpaka yakamuchisye mnope wawojo.