Ana mpaka tusagule chenene yindu pakujigalila mwatukuyiwonela yinduyo?
Yakusakuya Ŵandu Pakusagula Yakutenda
Chiŵandika jwalijose akusamanyilila kuti ndamo sine sili syambone pele sine sili syakusakala. Ŵajinji akusamanyilila kuti kuwulaga mundu, kukamulila, soni kwagona ŵanache yili yindu yakusakala. Mwamti jemanjaji akusiŵayamichila ŵandu ŵakusalosya ndamo mpela chilungamo, umbone mtima, soni chanasa. Nambi uli pangani jakusagula mundu jwampaka agone najo, kuŵecheta yisyesyene kapena yampaka atende pakulela ŵanache. Ŵajinji akusayiwona kuti pangani syelesi pangali chindu chambone soni chakulemwecheka. Akusayiwona kuti mpaka atende chindu chilichose. Ndaŵi syejinji ŵandu akusasagula yindu pakujigalila mwakuyiwonela yinduyo jemanjajo soni ŵandu ŵane. Nambo ana kusagula yindu pakamulichisya masengo litala lyeleli kuli kwakamuchisya?
MWATUKUSAYIWONELA YINDU
Ndaŵi syejinji tukusasagula yatukusaka kutenda pakujigalila mwatukupikanila mumtima mwamti tukusakombola kumanyilila yindu yambone ni yakusakala. (Aloma 2:14, 15) Atamose ŵanache ŵachinondipile akusamanyilila payitendekwe yindu yangali chilungamo, mwamti palemwisye akusadandawula. Patukukula tukusalijiganya kulekanganya yindu yambone ni yakusakala kutyochela kwa ŵandu ŵamwiŵasa mwetu, achimjetu, achitichala ŵetu, ŵandu ŵa mmusi mwetu, ŵandu ŵa ku chalichi kwetu soni ndamo jatukulile. Patukusagula yakutenda, mtima wetu mpaka utujitichisye kapena kutusisya kuti yatusagwileyo yili yambone kapena yakusakala.
Patumanyilile kulekanganya yindu yambone ni yakusakala, yikusatutendekasya kuti twatendeleje ŵane chanasa, twayamichileje, soni twatendeleje yindu mwachilungamo. Mpaka yitukamuchisyesoni kuti tuŵambale kutenda yindu yampaka adandawule nayo ŵandu ŵatukusitwanonyela, yampaka yitutendekasye sooni kapena kulijimba nayo magambo.
Ana kusagula yindu pakujigalila mwatukuyiwonela m’wejo kukusaŵa kwakamuchisya ndaŵi syosope? Jwachinyamata jwine lina lyakwe Garrick jwasasile kuti, “Nasagwile kuti ngambeje kutenda chilichose changusaka.” Kaneko, jwalakwe jwayiweni kuti kutenda yindu yaŵaganisyaga kuti yili yambone kwatendekasisye kuti asimaneje ni yakusawusya. Yindu yaŵatendaga yamtendekasyaga kuti akasangalalaga. Jwalakwe jwasasile kuti, “Nagambaga kutenda chikululu, kumwa mitela jakusokonasya mtwe, kukolelwa, soni kutenda yachiwawa.”
MWAKUSAYIWONELA YINDU ŴANDU ŴANE
Konjechesya mwatukusayiwonela yindu m’weji, tukusasagulasoni yindu pakujigalila muchayiwonele ŵandu ŵane yakusagula yetu. Yindu yasimene nayo jemanjaji paumi wawo soni lunda lwawo mpaka yitukamuchisye kuti tusagule chenene yakutenda. Ŵandu ŵamwiŵasa mwetu, achimjetu, soni ŵandu ŵa mmusi mwetu pane mpaka atusalile yindu yakuyiwona jemanjajo kuti yili yambone. Naga tutesile yatusalileyo, mpaka atande kutuchimbichisya.
Ana kusagula yindu pakujigalila mwakuyiwonela ŵandu ŵane kuli kwakamuchisya ndaŵi syosope? Msikana jwine lina lyakwe Priscila jwagambaga kutenda yindu yaŵatendaga achimjakwe. Yeleyi yatendekasisye kuti atande kutenda chikululu ali jwachinandipile. Kaneko jwayiweni kuti kutenda yindu yaŵayiwonaga ŵane kuti yili yambone kwamtendekasyaga kuti akasangalalaga. Jwalakwe jwasasile kuti, “Panatendaga yindu yaŵayinonyelaga achimjangu nganisangalalaga ata panandi. Mwamti kaneko natesile yindu mwangali lunda soni ngawile nayo kwene.”
ANA YILI YAKOMBOLEKA KUSAGULA YINDU MWALUNDA?
Ndaŵi syejinji tukusasagula yindu yambone kapena yakusakala pakujigalila mwatukuyiwonela m’weji yinduyo soni ŵandu ŵane. Nambope kusagula yakutenda pakamulichisya masengo litala lyeleli ndaŵi syejinji ngakukusakamuchisya. Yili myoyo ligongo lyakuti tukusalepela kulola yakuyichisya ya yindu yatusagwileyo mwamti pambesi pakwe mpaka tudandawule nayo kapena kwatumbilikasya ŵandu ŵane. (Misyungu 14:12) Yindu yatusagwile mpaka yikole yakuyichisya yakusakala soni mpaka yichenje mkupita kwandaŵi. Yeleyitu mpaka yitendekwe atamose m’weji soni achimjetu tukuyiwona kuti yatusagwileyo yili yambone. Nambosonitu ndamo syele ŵandu kalakala ŵasiwonaga kuti sili syakusakala apano akusasiwona kuti sili syambone. Pele ndamo siŵaganisyaga kuti sili syambone apano akusasiwona kuti sili syakusakala.
Ana kusagula yindu pakujigalila yakutenda ŵane kukusaŵa kwakamuchisya ndaŵi syosope?
Ana pana champaka chitukamuchisye kuti tukomboleje kulekanganya yindu yambone ni yakusakala? Ana ni malangiso gapi ga ndamo syambone gatukusosekwa kukuya kuti tukole sogolo jambone?
Chakusangalasya chili chakuti pana malangiso ga ndamo syambone gagali gangachenga soni gakudalilichika mnope mwamti mpaka gamkamuchisye jwalijose pachilambopa. Ngani jakuyichisya chijisale kwampaka tupate malangiso gampaka gatukamuchisye kuti tulekanganyeje yindu yambone ni yakusakala.