Yakusosekwa Kusagula
Yatukusakuya pangani jakusagula yambone ni yakusakala ni yampaka yitutendekasye kuti tuŵeje ŵakusangalala kapena iyayi. Yehofa akusamanyililasoni yeleyi. Ni ligongo lyakwe akusasaka kuti tukuyeje malamusi gakwe.
Yehofa akusasaka kuti tuŵeje pamtendele soni tusangalaleje ni umi.
“AMBUJE mkulupusyo jwenu, Ŵaswela ŵala wa Isalaeli, akuŵecheta kuti, “Une ndili AMBUJE, Mlungu jwenu, jungusinamjiganya, kuti yindu yimjendele chenene. Ngusinamlongolela litala lyakwenela kulikuya Mkambikanile malamusi gangu, Mtendele wenu ukamyichilile mpela mesi ga mu lusulo, chilungamo chikaliji kumwunichila ndaŵi syosope, mpela matumbela ga pa nyasa.”—Yesaya 48:17, 18.
Ligongo lyakuti Mlungu ni juŵatupanganyisye akusasaka kuti yindu yitujendeleje chenene. Jwalakwe akusasaka kuti tukuyeje malamusi gakwe ligongo lyakuti mpaka gatukamuchisye. Patukukuya malamusi ga Mlungu ngatukusasosekwa kukayichila kuti yindu yatusagwileyo chiyijende chenene. Naga ndaŵi syosope tukutenda yeleyi tuchisagulaga yindu yambone yampaka yitukamuchisye kuti tuŵeje pamtendele soni ŵakusangalala.
Yehofa jwangatuŵenda kutenda yindu yanganituŵa tukombwele.
“Lilamusi lingumpa lelo jinoli nganiliŵa lyakusawusya kulipikanichisya soni nganiliŵa lyakunonopa.”—Detulonomo 30:11.
Kuti tukombole kukuya malamusi ga ndamo syambone gakusatupa Mlungu, tukusosekwa kuchenga mwatukusaganichisya soni mwatukusatendela yindu. Nambope, Yehofa jwangatuŵenda kutenda yindu yakuti nganituŵa tukombwele. Pakuŵapo jwalakwe ni juŵatupanganyisye, akusamanyilila yampaka tukombole kutenda. Patutandite kummanyilila chenene Yehofa, tuchipikanichisya kuti “malamusi gakwe nganigaŵa gakusitopesya.”—1 Yohane 5:3.
Yehofa jwasasile kala kuti chachakamuchisya ŵandu ŵakusakuya malamusi gakwe ga ndamo syambone.
“Pakuti, Une, AMBUJE Mlungu jwenu, ngumlimbisya ni kumsalila kuti, ‘Mkatenda woga; tinjimkamuchisya.’”—Yesaya 41:13.
Yili yakomboleka kukuya malamusi ga Yehofa. Jwalakwe mpaka atukamuchisye kuti tutendeje yeleyi. Mpaka atulimbikasye soni kutupa chembecheyo chambone pakamulichisya masengo Maloŵe gakwe.
Ŵandu ŵajinji pachilambopa, ayiweni kuti umi wawo ukwenda chenene ligongo lyakuti ŵatandite kukuya yajikusasala Baibulo. Nambi uli wawojo? Uli ngalinga kulijiganya maloŵe galunda gagakusasimanikwa m’Baibulo. Mpaka atende yeleyi mwakulijiganya kabuku kakuti Asangalaleje Mpaka Kalakala. Kabukuka kali kalulele soni kakusimanikwa pa jw.org mwamti kakwete mitwe aji:
Ana Baibulo Mpaka Jakamuchisye Chamtuli?
Baibulo Jikusatukamuchisya Kukola Sogolo Jambone
Ana Akusajikulupilila Baibulo?
Pakulijiganya Baibulo chachimanyilila kuti nganijiŵa jachikala nambo jili jakudalilichika soni ‘jichitamilichika mpaka yaka yosope.’ (Salimo 111:8) Kuti yindu yitujendeleje chenene paumi wetu, tukusosekwa tukuyeje yajikusasala Baibulo pakwamba ndamo syambone. Nambope Mlungu jwangatukanganichisya kuti tukuyeje malamusi gakwe. (Detulonomo 30:19, 20; Yoswa 24:15) Jwalijose akusasosekwa kusagula jika kumpikanila Mlungu kapena iyayi.