NGANI JAKULIJIGANYA 29
NYIMBO NA. 121 Tukusosekwa Kuŵa Ŵakuligosa
Tuŵeje Ŵakoseka Kuŵambala Yakulingwa
“Mŵe mesope soni mpitilisye kupopela, kuti mkagwila mu kulinjidwa.”—MAT. 26:41.
CHAKULINGA CHA NGANIJI
Kutukumbusya kuti ndaŵi syosope tutendeje yampaka tukombole kuti tuŵambaleje kutenda ulemwa soni yindu yampaka yitutendekasye ulemwa.
1-2. (a) Ana Yesu jwakalamwisye ŵakulijiganya ŵakwe pangani japi? (b) Ligongo chichi ŵakulijiganya ŵa Yesu ŵalepele kutenda yakuŵajilwa? (Alole chiwulili.)
YESU jwasasile kuti, “Mtima uli wakusachilila, nambo chilu chili changali machili.”a (Mat. 26:41b) Pakuŵecheta maloŵe gelega, jwalakwe jwalosisye kuti akusapikanichisya kuti m’weji tuli ŵangali umlama soni kuti tukusalemwa. Nambo jwalakwe jwasasilesoni maloŵega pakusaka kutukalamusya kuti tuŵambaleje kulidalila mnope mwakuŵambala kuganisya kuti nganituŵa tulemwisye. Yesu mkanaŵechete maloŵega kwa ŵakulijganya ŵakwe, jemanjajo ŵaliji ali asasile kuti nganaŵa amlesile jika jwalakwejo. (Mat. 26:35) Ngatukukayichila kuti jemanjaji ŵasakaga kutenda yambone. Nambo ŵalepele kumanyilila kuti ali achingangene ni yakusawusya mpaka yaleme kukuya yaŵasasileyi ni kutenda yakulemwecheka. Ni ligongo lyakwe Yesu jwakalamwisye jemanjaji kuti, “Mŵe mesope soni mpitilisye kupopela, kuti mkagwila mu kulinjidwa.”—Mat. 26:41a.
2 Nambo chakutesya chanasa chaliji chakuti ŵakulijiganya ŵa Yesuwo ŵalepele kuŵa mesope. Mwamti Yesu pajwataŵidwaga jemanjajo ŵatisile. Ligongo lyakuti ŵalepele kuŵa ŵakoseka jemanjajo ŵatesile yindu yaŵasasile kuti nganaŵa ayitesile mwamti ŵamlesile Yesu jika.—Mat. 26:56.
Atamose kuti Yesu jwakalamwisye ŵakulijiganya ŵakwe kusosekwa kwakuŵa mesope ku yakulingwa, jemanjajo ŵamlesile jika (Alole ndime 1-2)
3. (a) Ligongo chichi tukusasosekwa kuŵambala kulidalila mnope kuti tupitilisye kuŵa ŵakulupichika kwa Yehofa? (b) Ana chitukambilane chichi munganiji?
3 M’wejisoni tukusosekwa kuŵambala ganisyaga kuti tuli ŵakulimba mwamti nganituŵa tutesile chakulemwa. Yisyene tukwete mtima wakusaka kutenda yindu yakumsangalasya Yehofa ndaŵi syosope. Nambope, tukumbuchileje kuti tulisoni ŵangali umlama, mwamti mpaka tulinjidwe ni kutenda yakusakala. (Alo. 5:12; 7:21-23) Myoyo, naga tukulepela kuŵa mesope, mpaka yisimanikwe kuti tutesile chakulemwa pandaŵi jele nganitujijembecheyega. Mwamti kuti tuŵepe ŵakulupichika kwa Yehofa soni kwa Mwanache jwakwe, tukusosekwa kukuya malangiso gajwapeleche Yesu mwakuŵa mesope ku yindu yampaka yitutendekasye ulemwa. Nganiji chijitukamuchisye mnope pambali jeleji. Chandanda, chitukambilane yakutendekwa yatukusasosekwa kuŵa mesope. Kaneko, chitulole yampaka tutende kuti tulichenjele ku yakulingwa soni kutenda ulemwa. Pambesi pakwe chitukambilane yampaka tutende kuti tupitilisye kuŵa mesope.
YAKUTENDEKWA YATUKUSASOSEKWA KUŴA MESOPE
4-5. Ligongo chichi tukusasosekwa kuŵa mesope atamose pa yakulemwa yamwanamwana?
4 Yisyene kuti yakulemwa yine yikusaŵa yamwana mnope pakuyilandanya ni yijakwe. Nambope, atamose yakulemwa yili yamwanamwana, mpaka yisokonasye unasi wetu ni Yehofa. Nambosoni mpaka yitulongolele kutenda yakulemwa yejinji yekulungwakulungwa.
5 Wosopewe tukusasimana ni yakulingwa yampaka yitutendekasye ulemwa. Nambo jwalijose akwete mbali jajikusamlema, mwamti pachingangene ni yindu yeleyo, mpaka alinjidwe kutenda ulemwa. Mwachisyasyo, mpaka yisimanikwe kuti mundu jwine akulingalinga kuti aŵambale kutenda chikululu. Jwine mpaka yisimanikwe kuti akusosekwa kulimbana mnope ni yindu yakusakala mpela kung’andila kuyalo kapena kulolela yakuŵagula. Nambosoni jwine mpaka yisimanikwe kuti akulimbana ni ndamo ja kutumbila mwachitema, kunyada, kapena kulepela kutenda yambone ligongo lyakwajogopa ŵandu. Yeleyitu yikukamulana ni yajwaŵechete Yakobo kuti, “jwalijose akusalinjidwa ni yakumbila ya mtima wakwe yele yikusamkopa ni kumlambusya.”—Yak. 1:14.
6. Ana tukusosekwa kuliwungunyaga mwakuwona mtima pambali japi?
6 Ana wawojo akusamanyilila yindu yakusalinjidwa nayo mnope? Mpaka yiŵe yakogoya mnope kulilambusyaga kuti pangali chilichose chachikusatulingaga soni kuganisyaga kuti tuli ŵakulimba mwausimu mwamti nganituŵa tutesile chakulemwa. (1 Yoh. 1:8) Pajatu Paulo jwasasile kuti atamose ŵandu ‘ŵele msimu weswela ukwalongolela’ mpaka agwile mu yakulingwa naga akulepela kuŵa mesope. (Agal. 6:1) Myoyo, ndaŵi syosope tukusasosekwa kuliwungunya mwakuwona mtima kuti tupate mbali jatukusosekwa kuputila ngondo.—2 Akoli. 13:5.
7. Ana tukusosekwa kusamala ni mbali japi? Asale chisyasyo.
7 Ana tukusosekwa kutenda chichi patumanyilile mbali jatukusosekwa kuputila ngondo? Tukusosekwa kutenda yakomboleka kuti tuŵeje ŵakoseka kulimbana ni chakulingwa champaka chitutendekasye ulemwa pambali jelejo. Kuti tupikanichisye yeleyi kwende tuganichisye ayi; Kalakala mundaŵi ja m’Baibulo, yipata ya msinda yaŵaga mbali jangasawusya kupitilamo adani. Myoyo, pakusaka kuwuchenjela msindawo ŵalolechesyaga kuti mu yipatayo aŵisilemo asilikali ŵajinji. Mwakulandana ni yeleyi, m’wejisoni patumanyilile mbali jatukusafowoka mwangasawusya, tukusosekwa kutenda yakomboleka kuti tuŵe ŵakulimba pambali jelejo.—1 Akoli. 9:27.
YAMPAKA TUTENDE KUTI TULICHENJELE KU YAKULINGWA
8-9. Ana mchanda jwakusamkolanga m’buku ja Misyungu chaputala 7 akaŵambele chamti uli kutenda ulemwa wekulungwa? (Misyungu 7:8, 9, 13, 14, 21)
8 Ana mpaka tutende yamti uli kuti tulichenjeleje ku yindu yakulingwa? Aganichisye yampaka tulijiganye kwa mchanda jwakusamkolanga m’buku ja Misyungu chaputala 7. Jwalakwe jwatesile chikululu ni jwamkongwe jwachigwagwa. Ndime 22 jikusatusalila kuti mwangajembecheya mchandaju jwatandite kumkuya jwamkongwejo. Nambo ndime sya munyuma mwakwe, sikusalosya kuti mchandaju jwatesile yindu yakupwambwana yayamtendekasisye kuti atende ulemwa.
9 Ana mchandaju jwatesile yindu yapi yayamtendekasisye kutenda ulemwa? Chandanda, cha mmagulo, mchandaju jwaliji “mkwenda mungulugulu msewo mwakuŵandikana ni malekano gakuja kumangwakwe jwamkongwe jwachikululujo.” Kaneko jwajendaga chiŵandika nyumba ja jwamkongwejo. (Aŵalanje Misyungu 7:8, 9.) Mwamti mchandajo nganatila pajwam’weni jwamkongwejo. Mmalomwakwe, jwakundile kuti jwamkongwejo amkumbatile soni kumpikanila pajwasalaga yakuti jwapite kukupeleka mbopesi sya mkamulano. Komboleka jwamkongweju jwasalaga yeleyi pakusaka kumtendekasya mchandajo ganisya kuti jwalakwe ali jwambonembonepe. (Aŵalanje Misyungu 7:13, 14, 21.) Yikaŵe kuti mchandaju jwaŵambele kutenda yakupwambwanayi, nikuti ngamkanatenda chakulemwachi.
10. Ana yindu yayamtendechele mchanda jula mpaka yimtendechele mundu chamti uli masiku agano?
10 Ngani jeleji jikwamba kulosya yindu yampaka yimtendechele jwakutumichila jwa Yehofa jwalijose. Mundu mpaka atende chakulemwa chekulungwa kaneko ni kuŵechetaga kuti nganajembecheyaga kuti mpaka yimtendechele yeleyo. Mwine nikwika kwene pakuŵecheta kuti, “Yigambile kutendekwa mwangosi.” Nambo chitamilecho yili mkuti ali aganichisye yayatendekwe, mpaka apate kuti jwatesile yindu yine yakwe mwakupwambwana yayatendekasisye kuti atende ulemwa wekulungwa. Mwine yindu yakwe mpaka yiŵe mpela kunguluka ni ŵandu ŵakusakala, kutenda yakusangalasya yakulemwecheka, kwinjila m’mawebusayiti gakulemwecheka kapena kusimanikwa mmalo gangaŵajilwa. Kombolekasoni kuti jwalakwe jwalesile kupopela, kuŵalanga Baibulo, kusongana kapena kulalichila. Mwamti mpela muyaŵelele ni mchanda jwakusamkolanga m’buku ja Misyungu jula, nganituŵa tusasile kuti mundu jweleju atesile chakulemwachi mwangosi.
11. Ana tukusosekwa kuŵambala chichi kuti tukagwila mu ulemwa?
11 Ana tukulijiganya chichi pelepa? Ngatukusosekwa kwamba kuŵambala kutenda chakulemwape iyayi, mmalomwakwe tuŵambalejesoni yindu yampaka yitutendekasye kutenda ulemwa. Mwamti yeleyi ni yaŵasasile Solomo panyuma pakulondesya yayamtendechele mchanda jula pampepe ni jwamkongwe jwachikululu jula. Pakwamba ya jwamkongwe jula, Solomo jwatite, mkakunda “kusokonechela pakuya matala gakwego.” (Mis. 7:25) Jwasasilesoni kuti, “Mtalikangane najo jwamkongwe jwamti myoyojo! Atamose kuŵandichila kwene ku mlango wa nyumba jakwe, mkasimŵandichila.” (Mis. 5:3, 8) Myoyo, kuti tukombole kulichenjela ku ulemwa, tukusasosekwa kuŵambala yindu yampaka yitutendekasye kutenda ulemwawo.b Yeleyitu yikugopolela kuti atamose yili mkuti kutenda yinduyo nganikuŵa kulemwa pajika, mpaka luŵe lunda kuŵambala kuyitenda naga tukumanyilila kuti mpaka yitulongolele kutenda chakulemwa.—Mat. 5:29, 30.
12. Ana Yobu jwatesile chilanga chamti uli? Ana yeleyi yamkamuchisye chamti uli kuŵa mesope ku yakulingwa yayikamtendekasisye ulemwa? (Yobu 31:1)
12 Kuti tukombole kuŵambala yakutendekwa yampaka yitutendekasye kutenda ulemwa, tukusasosekwa kuŵa ŵakusamala mnope pa chilichose. Yeleyi ni yajwatesile Yobu. Jwalakwe ‘jwatesile chilanga ni meso’ gakwe kuti akamlolechesyaga jwamkongwe mwakumkumbila. (Aŵalanje Yobu 31:1.) Kutenda yindu yajwalinganyisyeyi kwamkamuchisye Yobu kuti akatenda chikululu. Mpela muyaŵelele ni Yobu, m’wejisoni tukusosekwa kuŵambala chilichose champaka chitulinje kutenda ulemwa.
13. Ligongo chichi tukusosekwa kusichenjela nganisyo syetu? (Alole chiwulili.)
13 Tukusosekwasoni kusichenjela nganisyo syetu. (Eks. 20:17) Ŵane akusaganisya kuti kwamba ganichisyape yakusakala nganikuŵa kulemwa naga mundujo ngakuyitenda yinduyo. Nambotu kaganisye keleka kali kakulemwecheka. Tukuŵecheta yeleyi ligongo lyakuti mundu jwakusatamila kuganichisya yindu yakulemwecheka, mkupita kwandaŵi akusasachilila mnope kutenda yakusakala. Mwamti naga munduju ngakuleka kuganichisya yakusakalayo, yikusaŵa yakusawusya kuti alilekasye kutenda chakulemwa. Yisyene kuti ndaŵi sine munganisyo mwetu mpaka muyiche yindu yakusakala. Myoyo, naga situyichile nganisyo syakulemwecheka, chindu chakusosekwa kutenda chili kuleka kuganichisya yinduyo ndaŵi jijojo mwakutanda kuganichisya yambone. Patukulingalinga kutyosya nganisyo syakusakala mumtima mwetu, yichitukamuchisya kuti tuŵambale kutenda chakulemwa chekulungwa.—Afil. 4:8; Akolo. 3:2; Yak. 1:13-15.
Tukusosekwa kuŵambala chilichose champaka chitutendekasye kugwila mu yakulingwa (Alole ndime 13)
14. Ana ni chindu chine chapi champaka chitukamuchisye kuŵa mesope ku yakulingwa yampaka yitutendekasye ulemwa?
14 Ana chindu chine chapi champaka tutende kuti tulichenjele ku yindu yakulingwa? Ndaŵi syosope tukakayichilaga yakuti kupikanila malamusi ga Yehofa kukusatukamuchisya mnope. Yisyene kuti ndaŵi sine mpaka yiŵe yakusawusya kuti tuganisyeje mwakusasachila Yehofa. Nambo patukulingalinga kutenda yeleyo, tuchiŵa ŵakusangalala yisyesyene.
15. Ana kuganichisya yindu yambone mpaka kutukamuchisye chamti uli kuŵa mesope ku yakulingwa?
15 Tukusasosekwa kulingalinga kuganichisyaga yindu yambone. Patukulingalinga ‘kuchiŵenga chachili chakusakala, ni kunonyelaga yambone’ tuchikombola kutenda yambone soni kuŵambala yakutendekwa yampaka yitulongolele kutenda ulemwa. (Amo. 5:15) Kuganichisya yindu yambone ndaŵi syosope kuchitukamuchisya kuti tukombole kuŵambala yakulingwa yatusimene nayo mwangajembecheya.
16. Ana kutenda yindu yausimu mpaka kutukamuchisye chamti uli kuŵa mesope? (Alole chiwulili.)
16 Ana chichi champaka chitukamuchisye kuti tuganichisyeje yindu yambone? Ndaŵi syosope tukusosekwa kutendaga yindu yakutukamuchisya kuŵa paunasi wambone ni Yehofa. Yikusaŵa yakusawusya kulinjidwa kutenda yakusakala pandaŵi jatuli pamisongano ja mpingo soni patukulalichila. Mmalomwakwe, pandaŵi jeleji tukusaganichisya mnope yindu yakumsangalasya Yehofa. (Mat. 28:19, 20; Aheb. 10:24, 25) Patukuŵalanga Maloŵe ga Mlungu soni kugaganichisya, yikusatukamuchisya kuti tunonyeleje yindu yambone soni kuyiŵenga yakusakala. (Yos. 1:8; Sal. 1:2, 3; 119:97, 101) Pajatu Yesu ŵasalile ŵakulijiganya ŵakwe kuti, “Mpitilisye kupopela, kuti mkagwila mu kulinjidwa.” (Mat. 26:41) Myoyo, patukupopela kwa Atati ŵetu ŵakwinani, tukusaliwugulila upile wakuti jwalakwejo atukamuchisye kola mtima wakusachilila kutenda yindu yakumsangalasya.—Yak. 4:8.
Kutenda ndaŵi syosope yindu yausimu mpaka kutukamuchisye kuŵambala yakulingwa (Alole ndime 16)c
TUPITILISYE KUŴA MESOPE
17. Ana Petulo jwalasile kwandaŵi jelewu ni chakusawusya chapi?
17 Ndaŵi sine, mpaka tukombole kulimbana ni yakulepela yetu. Nambo mpaka yisimanikwe kuti yakulepela yetu yine tukulaga nayo kwandaŵi jelewu. Kwende tuganichisye yayamtendechele ndumetume Petulo. Ligongo lyakwajogopa ŵandu, Petulo jwamkanile Yesu kwa maulendo gatatu. (Mat. 26:69-75) Kaneko yawonekaga kuti Petulo jumalene ni woga ula pajwatendele umboni mwakulimba mtima pameso pa Luŵala Lwekulungwa lwa Ayuda. (Mase. 5:27-29) Nambo pali papitile yaka, Petulo jwalesile kulya pampepe ni Aklistu ŵa mitundu jine. Jwalakwe jwatesile yeleyi “ligongo lyakwajogopa [ŵandu] ŵawumbale.” (Agal. 2:11, 12) Ayitu yalosisye kuti woga wajwakwete pandanda ula wawujilesoni. Komboleka Petulo yamtendechele yeleyi ligongo lyakuti woga ula waliji uli usigalilepe mbali sine.
18. Ana ndaŵi sine mpaka chitendekwe chichi patukombwele kulimbana ni ndamo jinejakwe jakusakala?
18 Mpela muyaŵelele ni Petulo, kombolekasoni kuti ndaŵi sine mpaka tusosekwe kulimbana ni ndamo jinejakwe jakusakala jatwaganisyaga kuti twamalene najo. Mwachisyasyo, m’bale jwine jwasasile kuti, “Nalesile kulolela yakuŵagula kwa yaka 10, mwamti nayiwonaga kuti namalene ni ndamo jakusakalaji. Nambo pandaŵi sine nakumbilagasoni kulolela yakuŵagulayi.” Chakusangalasya chaliji chakuti m’baleju jwapitilisye kutenda yakomboleka kuti amalane ni ndamoji. Mwamti jwayiweni kuti kwandaŵi josope jali chijumi mchilambo chakusakalachi akusosekwa kutenda yakomboleka kuti lisiku lililyose alimbaneje ni ndamoji. Mwamti achakulungwa ŵa mumpingo soni ŵamkwakwe ŵamkamuchisye mnope m’baleju kuti akomboleje kuŵambala kulolela yakuŵagula.
19. Ana mpaka tumalane chamti uli ni ndamo jakusakala jatukusalaga najo ndaŵi syejinji?
19 Ana tukusosekwa kutenda chichi kuti ndamo jakusakala jatukulimbana najo jikatutendekasya ulemwa? Mpaka tukombole kutenda yeleyi mwakupikanila malangiso gajwapeleche Yesu pangani ja yakulingwa. Jwalakwe jwatite, “Mŵe mesope.” Myoyo, atamose pakuyiwona kuti ŵakombwele kumalana ni ndamo jinejakwe jakusakala, akusosekwa kupitilisya kuŵambala yakutendekwa yampaka yalinje kutenda chakulemwa. (1 Akoli. 10:12) Mpaka atende chenenesoni kupitilisya kutenda yindu yayakamuchisye kuti amalane ni ndamojo. Pa Misyungu 28:14 pakusati, “Jwana upile mundu jwakusaŵa jwakwajogopa AMBUJE ndaŵi josope.”—2 Pet. 3:14.
UMBONE WATUKUSAPATA PATUKULINGALINGA KUŴA MESOPE
20-21. (a) Ana tuchisangalala ni yindu yambone yapi naga tukupitilisya kuŵa mesope ku yakulingwa yampaka tusimane nayo? (b) Ana Yehofa chachitutendela chichi naga m’weji tukutenda mbali jetu? (2 Akolinto 4:7)
20 Kusala yisyene, tukusapata umbone wekulungwa patukulingalinga kuŵa mesope. Atamose mundu ali asangalele chamti uli ni ‘yindu yangatamilisya’ yaulemwa, kutenda yakusasaka Yehofa ni kwampaka kututendekasye kuŵa ŵakusangalala yisyesyene. (Aheb. 11:25; Sal. 19:8) Yili myoyo ligongo lyakuti Mlungu ŵatupanganyisye m’litala lyakuti tutendeje yakusasaka jwalakwe. (Gen. 1:27) Myoyo, patukutenda yindu yakumsangalasya Yehofa tukusakola chikumbumtima chambone mwamti yeleyi yichitukamuchisya kuti chitupate umi wangamala.—1 Tim. 6:12; 2 Tim. 1:3; Yud. 20, 21.
21 Yili yisyene kuti “chilu chili changali machili.” Nambotu yeleyi ngayikugopolela kuti nganitukola chitela chakamula. Yehofa ali jwakoseka kutupa machili gatukusosechela. (Aŵalanje 2 Akolinto 4:7.) Nambotu machili gakusapeleka Yehofa gakusaŵa gakupunda ga ŵandu. Nambo chandanda m’wejo tukusasosekwa kukamulichisya kaje masengo machili getu gachipago. Mwamti patutesile mbali jetu, tukusosekwa tukulupilileje kuti Yehofa chachitenda mbali jakwe mwakutupa machili gatukusosechela. (1 Akoli. 10:13) Kusala yisyene, ni chikamuchisyo cha Yehofa, mpaka tukombole kuŵa mesope ku yakulingwa yampaka yitendekasye ulemwa.
NYIMBO NA. 47 Mpopeleje kwa Yehofa Lisiku Lililyose
a NGOPOLELO JA MALOŴEGA: “Msimu” wakuwusala pa Mateyu 26:41 gali machili gatukusakola gagakusatutendekasya kutenda yindu m’litala linelyakwe. “Chilu” chikwimila yitendo yetu ya ulemwayi. Myoyo, mpaka tukole mtima wakusaka kutenda yambone, nambo naga ngasamala mpaka yisimanikwe kuti tutandite kumbila kutenda yindu yele Baibulo jikusasala kuti yili yakusakala.
b Mundu jwatesile chakulemwa chekulungwa mpaka apate mfundo syakamuchisya m’buku ja Asangalaleje Mpaka Kalakala, lijiganyo 57 mfundo 1-3 soni mu ngani ja mtwe wakuti “Mpopeleje kwa Yehofa Lisiku Lililyose” jajili mu Sanja ja Mlonda ja Nofemba 2020, pp. 27-29, ndime 12-17.
c KULONDESYA CHIWULILI : M’bale akuŵalanga lilemba lyesiku kundaŵi, pandaŵi jakupumula ku masengo musi akuŵalanga Baibulo, soni ligulo asimanikwe nawo pamsongano wa mkati mwa wiki.