Rayog Ngom “Gum’ercha’en e Layon”

YU ngiyal’ ma ra weliy e Bible u morngaagen e layon ma ra yip’ fan e der rus nge mudugilan’. Yima weliy morngaagen e pi pumoon ndarur ma rusgad ni bod rogon ni bay “gum’ercha’en e layon” rorad, ma piin nib mat’aw e yima yog ni yad bod pi “fak e layon nib mudugilan’.” (2 Samuel 17:10; Proverbs 28:1) Faan ni k’aring e cham ngak e layon, ma ra micheg e thin ni yima yog u morngaagen ni ir e “bin th’abi gel u fithik’ urngin e gamanman.”​—Proverbs 30:30.

Jehovah e ir bod e layon nder rus ni nge ayuweg e girdi’ rok. Be gaar Isaiah 31:4, 5: “Bod bogi tagafaliy e saf ndabiyog rorad ni ngar tulufed ba layon rok ba gamanman ni ke li’, ndemtrug ga’ngin i lamrad ni yad be tolul ma dabi chuw, e aram rogon ndariy ban’en nrayog ni nge tiyeg u urel, i gag Jehovah ni Gubin ma Rayog Rog, ni nge dab kug yoror rok e burey ni Zion . . . bay gu yoror rok yu Jerusalem ngug ayuweg rok e toogor.” Ere be micheg Jehovah nra ayuweg e pi tapigpig rok ni ri aram rogon ni yira gafgownagrad.

Be taarebnag e Bible e bin th’abi ga’ e toogor rok e girdi’ ni Satan ni Moonyan’ nga reb e layon ni be tolul. Ra ngad siyeged ni dabi koldad ma be weliy e Thin nu Bible ni gaar: “Mu tedan’med mi gimed ayuwegmed!” (1 Peter 5:8) Reb e kanawo’ ni ngad rin’ed e ngad siyeged e chuchuw ko tirok Got ban’en. Ke weliy Jesus ni gaar: “Mu ayuwgad, ma dab mpaged gimed nguum pired ni baga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang.” (Luke 21:34-36) Arrogon, ra ngad pired ni gad ba od ko tirok Got ban’en ko “tin tomren e rran” ney ma rayog ni ngad pired ni bod rogon ni bay “gum’ercha’en e layon” rodad, ya gad ra par nib mudugil ma pagan’dad ku Jehovah.​—2 Timothy 3:1; Psalm 112:7, 8.