N’umngin Nap’an e Yafos Romow ni Ke Skulnagmow e Bin Th’abi Fel’ e Sensey Rodad

KANAWO’ NIB MANIGIL NI DAG E GALLABTHIR ROG

Tomuren e duw ni 1950, me chuw e gallabthir rog u Italy nga ranow ra parew nga Kindersley ni bay u Saskatchewan u Canada. De n’uw nap’an nga tomuren mar filew e tin riyul’ mi ri ga’ fan u wan’row. Ka be yib ngan’ug nnap’an ni ku gub bitir ma gamad ma machib nib n’uw nap’an, ere bay yu ngiyal’ nug ma yog ni ug un ko “pioneer ni ayuw” u nap’an ni ka fini gaman meruk e duw rog!

Yugu aram rogon nib gafgow e gallabthir rog, machane ba manigil e kanawo’ nra dagew u rogon ni ur pagew farow ni fan ngak Jehovah. Bod nnap’an e duw ni 1963, ma boor e chugum rorow nra piew ni chuway’ ya nge yag nra unew ko fare international convention nni tay u Pasadena u California ni bay u Meriken. Nap’an e duw ni 1972 mug milekaggad u lan sogonap’an 620 e mayel nggu warod gu pared nga Trail u British Columbia ni bay u Canada, ya nggu machibnaged e girdi’ u rom ni yad ma non ko thin ni Italian. Chitamag e ma klin. I siyeg boch e maruwel nib tolang ni un ognag ngak ya nge yag ni m’oneg u wan’ e pigpig rok ngak Jehovah.

Ba ga’ fan u wan’ug e kanawo’ nib manigil ni dag e gallabthir rog nrayog ni nggu folwokgad pi walageg riy. Kanawo’ nra dagew e aram bang ko n’en nsom’on nug fil u nap’an e pigpig rog ngak Jehovah. Bay ban’en nra filew ngog ndawor gu pagtalin, ni aram e faan gu ra m’oneg Gil’ilungun Got u lan e yafos rog, ma ra pi’ Jehovah e tin nib t’uf rog.​—Matt. 6:33.

NAP’AN NUG TABABGOW KO PIGPIG U POLO’ E TAYIM

Nap’an e duw ni 1980, mug leay Debbie nreb e walag nib pin nib pidorang ni ma m’oneg u wan’ e pigpig rok ngak Jehovah. Gamow baadag ni nggu unew ko pigpig u polo’ e tayim romow, ere dalip e pul nga tomuren nug mabgolgow ma aram me tabab Debbie ko pioneer. Reb e duw nga tomuren nug mabgolgow, mug warow gu unew nga reb e ulung nib achig nib t’uf e ayuw riy ma aram mug un ngak ko pioneer.

Boch nga tomuren, me mulan’mow ma gamow dugliy ni nggu chuwgow u rom. Machane som’on e gu nonow ngak e en ma lekag e ulung. Ere gaar ngomow: “Gimew e gimew be munnag daken e magawon romew. Yigoo magawon romew e gimew be sap ngay. Machane gimew ra gay fel’ngin boch ban’en ma gimew ra guy.” Rib t’uf e re fonow nem romow. (Ps. 141:5) Ka chingiyal’ nem ma gamow fol riy, ma de n’uw nap’an nga tomuren ma gamow nang nriyul’ ni boor fel’ngin e pigpig romow u rom. Bay in e walag ko re ulung nem ni yad baadag ni ngar yoornaged e tin yad be rin’ ni fan ngak Jehovah, nib muun ngay e piin fel’ yangaren nge boch e walag nder ma un e en mabgol rorad ko tin riyul’. Aram ban’en nug filew nrib ga’ fan. Gu filew rogon ni ngaug sapgow nga fel’ngin ban’en ma gamow sonnag Jehovah ni nge yal’uweg reb e magawon ni gamow be mada’nag ni gamow be lemnag nib mo’maw’. (Mik. 7:7) Bochan e re n’ey me yag ni nggu felfelan’gow me mon’og boch e par romow.

Piin ur pied e bin som’on e skul ko pioneer nug unew ngay e ka ur pigpiggad u yugu boch e nam. Nap’an ni ur daged boch e sasing ma yad be weliy murung’agen e pi magawon ni ur mada’naged nge pi tow’ath ni i yag ngorad u nap’an ni yad be pigpig ko pi nam nem, ma aram e n’en ni k’aringmow ni nggu adagew ni nggu mangew l’agruw e missionary. Ere gu dugliyew ni nggu namegew e re n’ey.

Nap’an e duw ni 1984, ma gamow yan gu parew nga Quebec ko gin yima non riy ni thin ni French nib pag 2,485 e mayel palogin u British Columbia ya nge yag ni nggu rin’ew e n’en ni gamow be nameg. Nap’an nug warow ngaram mab t’uf ni nggu mechamgow nga reb e yalen nib thil mu kug filew yugu reb e thin. Ku reb e magawon ni ug mada’nagew e aram e ba ga’ nder ma gaman e salpiy romow. Bay ba ngiyal’ ni yan i taw ngay ma yigoo kamot ni ke magey u milay’ rok reb e tamilay’ e ir e gamow ma kay. Boor rogon ni i ngongliy Debbie e kamot ngaug wew! Yugu aram rogon e magawon ni ug mada’nagew, machane ug athamgilgow u rogon nrayog romow ni nggu parew ni gamow ba felfelan’. Maku reb e kug guyew ni be ayuwegmow Jehovah.​—Ps. 64:10.

Yan i reb e rran min callnagmow ni yibe piningmow ni nggu warow gu pigpiggow ko Bethel u Canada. Kug ngongliyew e babyor romow ni nggu unew ko fare Skul u Gilead, ere be yoyooran’mow ko re n’ey. Yugu aram rogon me m’agan’mow ngay ni nggu warow nga Bethel. Nap’an nug tawgow ngaram ma gamow fith Brother Kenneth Little nreb i girdien e Branch Committee ni lungumow, “Uw rogon e babyor romow ni kug piew ni fan ko fare skul u Gilead?” Me fulweg ni gaar, “Bay fin nni piningmew ni ngam marow mfin nda lemnaged e n’en ngad rin’ed.”

Reb e wik nga tomuren, me taw e thin ngomow Debbie ni nggu warow nga Gilead. Ere bay ban’en nib t’uf ni nggu dugliyew. I gaar Brother Little ngomow: “Demtrug e n’en gimew ra dugliy ni ngam rin’ew, ma bay ba ngiyal’ nra taw ngay ma rayog ni ngam lemnagew ni faan gomanga ba thil e n’en nim mel’egew mab fel’. Dariy reb nib fel’ nga reb, ya l’agruw nra tow’athnagmew Jehovah riy.” Ere m’agan’mow ngay ni nggu warow nga Gilead, ma kug guyew nriyul’ e fonow ni pi’ Brother Little ngomow u lan e pi duw ni ke yan. Ba ga’ ni ka gamow ma yog e pi thin ney ngak boch e walag nib t’uf ni ngar mel’eged reb e maruwel ni fan ko pigpig rorad.

NAP’AN NI GAMOW L’AGRUW E MISSIONARY

Gu felfelan’gow ni gamow ba muun ko fa 24 i walag nra uned ko fa bin 83 e class ko fare skul u Gilead nni tay u Brooklyn u New York ko April ko duw ni 1987. Ba ga’ ni Brother Ulysses Glass nge Brother Jack Redford e ur piew e re skul ney. Ba papey ni yan e re lal i pul nem ma nap’an e September 6, 1987 ma gamow mu’nag e re skul nem. Ni pi’mad John nge Marie Goode nga Haiti.

Ka nap’an e duw ni 1962 u nap’an nni chuweg e tin tomur e missionary u rom ndawor ni pi’ boch e missionary ngaram ni kar mu’naged fare skul u Gilead. Dalip e wik nga tomuren nug mu’nagew e re skul ney, ma gamow tabab ko pigpig u bochi ulung nib achig u Haiti ni 35 e publisher riy ni bay u daken e burey. Ngiyal’ nem e ka gamow bbitir ma boor ban’en ndawor gu nangew ma yigoo gamow ni gamow ma par u tafen e missionary. Rib gel e gafgow ko girdi’ u rom, ma yooren i yad e de nang e beeg babyor. Nap’an ni gamow be par u rom me tabab e girdi’ u rom ko cham ni bochan boch e magawon ko am, ma bay boch e girdi’ nra guyed rogon ni ngar taleged e binem e am ni be gagiyeg, maku bay boch e girdi’ ni ur togopuluwgad ko am, maku bay boch e yoko’ ni i yib.

Boor ban’en nug filew ko pi walag u Haiti nra pared ni yad ba mudugil ma yad ba felfelan’. Boor i yad e ba mo’maw’ e par rok, machane ba t’uf Jehovah rorad mab m’on e machib u wan’rad. Bay reb e walag nib pin ni ke pilibthir nde nang e beeg babyor, machane sogonap’an 150 e thin nu Bible ni ke mit ngak. Bochan e pi magawon ni i buch ni gubin e rran, ma aram e n’en ni k’aringmow ni nggu ululgow i machibnag ni yigoo Gil’ilungun Got e aram e n’en nra pithig e magawon ko girdi’. Kub gel e felfelan’ nug tew u nap’an nug guyew boch e girdi’ ni ug filew e Bible ngorad ko som’on nra manged boch e regular pioneer, nge special pioneer, nge piilal.

Nap’an ni ug moyew u Haiti mug mada’nag Trevor ni be’ nib pagel ni ir reb e missionary ko Mormon, ma immoy in yay ni ug weliyew e Bible u taabang. Boch e duw nga tomuren me yol ngog ni gaar: “Yira taufenageg ko bin migid e assembly! Gu baadag ni nggu sul nga Haiti ni nggu mang special pioneer ko gin’en ni baaram ni ug moy riy ni gag reb e missionary ko Mormon.” Aram e n’en nrin’ew leengin u lan boor e duw.

GU WAROW NGA EUROPE NGEMU’ MUG WAROW NGA AFRICA

Ni pi’mow ni nggu pigpiggow u bang u Europe ni ke mom boch e machib riy. Nap’an e duw ni 1992 ma gamow yan nga Ljubljana ni bay u Slovenia nib chugur ko gin ni ilal e gallabthir rog riy u m’on ni nga ranow nga Italy. Ngiyal’ nem e ka yibe mahl u Yugoslavia. Pi walag u Vienna u Austria, nge Zagreb u Croatia, nge Belgrade u Serbia e yad be yaliy rogon e maruwel u rom. Machane chiney e ra reb e pi binaw nem ma ngan ngongliy reb e Bethel ngorad.

Ere ba t’uf ni nggu filew yugu reb e thin nib thil ma gamow mecham nga yugu reb e yalen. Girdi’ u rom e ba ga’ ni ma lungurad, “Jezik je težek,” ni fan e re thin ney e “Ba mo’maw’ e thin u roy.” Ma riyul’ e re n’ey! Gu ngatgow nga rogon e yul’yul’ ko pi walag nib m’agan’rad ngay ni ngar folgad ko pi n’en be thilyeg e ulung ma gamow guy rogon ni tow’athnagrad Jehovah. Ku ireray bayay nug guyew rogon ni ma yal’uweg Jehovah boch ban’en u fithik’ e t’ufeg, ma kub puluw e ngiyal’ ni ma rin’ riy. Boor ban’en nug filew u m’on riy ni yag ni nggu maruwelgow ngay u nap’an ni ug moyew u Slovenia, maku boor ban’en nib beech nug filew u rom.

Machane ku boor ban’en ni thil ko par romow boch nga tomuren. Nap’an e duw ni 2000 min pi’mow nga Côte d’Ivoire ni bay u West Africa. Ma nap’an e November ko duw ni 2002, ma gamow chuw nggu warow nga Sierra Leone ni bochan e cham ni ke sum u thilin yu ulung i girdi’ u rom. Ka fini tal e cham ni i tay yu ulung i girdi’ u rom u lan 11 e duw. Ba mo’maw’ ni nggu chuwgow u Côte d’Ivoire nib tomgin. Machane pi n’en kug filew e ayuwegmow ni nggu parew ni gamow ba felfelan’.

Gu m’onegew u wan’mow e machib, ya boor e girdi’ u rom ni baadag ni nge fil e tin riyul’ nge pi walag ni boor e duw ni kar athamgilgad u fithik’ e mahl ni ka un tay. Yugu aram rogon nib gafgow e pi walag, machane yad baadag ni ngar pied e tin bay rorad. Bay reb e walag nib pin ni pi’ boch e mad ngak Debbie, ma nap’an ni siyeg ni nge fek me gaar ngak: “Nap’an ni yibe mahl, ma i ayuwegmad e pi walag u boch e nam. Ma chiney e gamad e nggu pied e ayuw.” Ere gu namegew ni nggu folwokgow rorad.

Munmun ma gamow sul nga Côte d’Ivoire, machane miki tabab e cham bayay ni bochan e magawon ko am. Ere nap’an e November ko duw ni 2004, min fekmow u helicopter ngan chuwegmow u rom nra bagamow ma kemus ni taareb e kabang ni ke fek ni 22 e pawn tomalngin. Rofen nem nnep’ e gu molow u but’ u lan reb e tagil’ e salthaw rok yu France, me yan i bin migid e rran ngay min fekmow u skoki nga Switzerland. Nap’an nug tawgow ngaram u bang ko lukngun e nep’, ma bay girdien e Branch Committee nge pi walag ni pumoon ni yad ma pi’ fare Ministerial Training School nge ppin rorad ni yad be sonnagmow, mar bad ra gumuchmuchgad ngomow, mar pied e ggan ni nggu wew, mu kur pied e chocolate ngomow. Gguyew nriyul’ nri gamow ba t’uf rorad.

Ni pi’mow nga Ghana u lan bochi ngiyal’, ngemu’ min pi’mow bayay nga Côte d’Ivoire u tomuren ni ke war boch e cham ni yibe tay u rom. Gol ni dag e pi walag ngomow e ayuwegmow u nap’an ni gamow be yan u bang nga bang ngu nap’an ni gamow be rin’ boch e maruwel u lan bochi ngiyal’. Gamow manang Debbie ni yugu aram rogon ni ka ban’en ni ma rin’ e ulung rok Jehovah ni ngaur daged e t’ufeg ni aray rogon, machane dariy ba ngiyal’ ni nggu dagew ndariy fan u wan’mow e t’ufeg ni yad be dag. Bin riyul’ riy e pi gafgow nem ni ug warow u fithik’ e ku aram boch ban’en nug filew ni kub ga’ fan.

GU WAROW NGA MIDDLE EAST

Nap’an e duw ni 2006 me taw bang e babyor ngomow ni ke yib ko tochuch rodad ni yibe yog ni ngan pi’mow nga Middle East. Ku aram bayay ni ki buch boch ban’en nib beech romow, mu kug mada’nagew boch e magawon nib beech, mu kug filew reb e thin nib beech, mu kug mechamgow nga yugu reb e yalen. Boor ban’en nib t’uf ni nggu filew ko re nam ney nib gel lungun e am nge teliw riy. Gamow baadag nib thilthil e thin ko pi walag ko pi ulung u rom mu kug guyew nrayog ni nge taareban’uy ni faan yira fol ko yaram ni be yib ko ulung rok Jehovah. Gu ngatgow ko pi walag u rom ni bochan e yooren i yad e da ur rusgad ni ngar athamgilgad u fithik’ e togopuluw ni i tay chon e tabinaw rorad ngorad, nge piin yad nga skul, nge maruwel, nge pi buguli yoror rorad.

Gu unew ko fare special convention nni tay u Tel Aviv u Israel ko duw ni 2012. Ireray e yay nsom’on ni muulung e girdi’ rok Jehovah ni aram urngin nga taabang u rom ni ka nap’an e Pentekost ko duw ni 33 C.E. Ireray ban’en ni buch ndag pagew talin!

Nap’an e pi duw nem ma un pi’mow ni nggu warow gguyew e pi walag u reb e nam ni kan taleg boch ban’en ko maruwel rodad riy. Gu fekew boch e babyor rodad ngaram, mu ug unew ko machib, nge boch e assembly ni un tay ni buchuuw e girdi’ riy. Gubin yang ni yira yan ngay ma bay e salthaw riy ni yad be fek talin e cham ni yad be yaliy e girdi’ ni yad be yan ko yungi n’em ma yad be yan u fithik’ e chugum rorad, machane ba pagan’mad e in i walag ni baaram ni yad ma par u rom u nap’an ni gamad be yan u bang nga bang.

KUG SULOW NGA AFRICA

Nap’an e duw ni 2013 min pi’ reb e maruwel ni yugu ba thil ngomow ni aram e nggu pigpiggow ko branch u Kinshasa ni bay u Congo nreb e nam nib ga’ ma rib fel’ yaan, machane rib gafgow e girdi’ riy ma kub gel e mahl ni yibe tay riy. Som’on e lungumow, “Gamow manang rarogon yu Africa; kug fal’egew rogomow ni nggu warow ngaram.” Machane ka boor ban’en nib t’uf ni nggu filew, nib ga’ nu nap’an ni t’uf ni nggu milekaggow ko yungi n’en ndariy e kanawo’ nge wethal riy. Gu piriegew ni boor ban’en nib manigil nrayog ni nge ga’ fan u wan’mow, nib muun ngay e athamgil nge felfelan’ ni i tay e pi walag ni yugu aram rogon ni yad be magawon ko salpiy, nge rogon nib ga’ fan e machib u wan’rad, nge athamgil ni ur ted ya nge yag nra uned ko pi muulung nge assembly. Gguyew rogon ni mon’og fare maruwel ni machib ni bochan e be ayuweg Jehovah ma be tow’athnag. Boor ban’en nrib ga’ fan nug filew u lan e pi duw nug pigpiggow u Congo u polo’ e tayim romow, maku boor e fager ni yag ngomow u rom.

Tungun e duw ni 2017 mu kun pi’ reb e maruwel ngomow u South Africa. Ireray e re branch nth’abi ga’ ni kug pigpiggow riy, ma mus ko pi maruwel ni kan pi’ ni nggu rin’ew u Bethel ni kub beech ngomow. Ku aram bayay ni boor ban’en nib t’uf ni nggu filew, machane ki ayuwegmow e pi n’en kug filew u m’on riy. Rib t’uf romow e pi walag ni ke yan boor e duw ni yad be athamgil. Ma ri kub manigil ni gamow be guy ni be maruwel e pi walag u Bethel nib taareban’rad ni yugu aram rogon nib thilthil ramaen dowrad nge yalen rorad. Ba mom ni ngan guy ni be pi’ Jehovah e gapas ko girdi’ rok ni bochan e yad be yon’ nga dakenrad e bin nib beech i yad ma yad be fol ko pi kenggin e motochiyel u Bible.

Boor e maruwel nib manigil ni kan pi’ ngomow Debbie u lan e pi duw ni ke yan, ma kki t’uf ni nggu mechamgow nga boch e yalen nib thil, ma gamow fil boch e thin nib beech. Gathi gubin ngiyal’ nib mom e re n’ey, machane gubin ngiyal’ ni gamow be guy ni be fanay Jehovah e ulung rok nge pi walag ni nge dag e t’ufeg u fithik’ e yul’yul’ ngomow. (Ps. 144:2) Ba pagan’mow ngay ni pi n’en ni kug filew u nap’an e pigpig ni kug tew u polo’ e tayim romow e ke ayuwegmow ni nggu mon’oggow ko pigpig romow ngak Jehovah.

Gu be pining e magar ko gallabthir rog nga rogon e chugol nra tew ngog, nge ayuw ni ma pi’ Debbie ngog, nge kanawo’ nib manigil ni ma dag e pi walag u ga’ngin yang e fayleng. Chiney ni gad be yan i yan nga m’on e kug dugliyew u wan’mow ni nggu ululgow i fil e pi n’en be fil e Bin Th’abi Fel’ e Sensey rodad ngomow.