Rogon ni Ma Ayuwegdad Jehovah ni Ngad Athamgilgad

1. Mang fan nib t’uf ni ngad athamgilgad, ma mini’ e ra ayuwegdad? (1 Peter 5:10)

BA T’UF ni nge athamgil e girdi’ rok Jehovah e ngiyal’ ney ko tin tomuren e rran ni ke mo’maw’ e par. Bay boch i yad ni ke n’uw nap’an ni be par nib m’ar. Ma boch i yad e ke yim’ be’ nib t’uf rok. Ku bay boch i yad ni be togopuluw girdien e tabinaw rorad ngorad ara girdien e am. (Matt. 10:​18, 36, 37) Machane rayog ni nge pagan’um ngay ndemtrug e re miti magawon ni ga be mada’nag, ma rayog ni nge ayuwegem Jehovah ni ngam athamgil u fithik’.​—Mu beeg e 1 Peter 5:10.

2. Uw e ma yib gelngidad riy ni ngad athamgilgad ni gadad boch e Kristiano?

² Ra ngad athamgilgad ma be yip’ fan ni ngad pared ni gad ba yul’yul’ ngak Jehovah ma gad pigpig ngak u fithik’ e felfelan’ ngki mada’ ko ngiyal’ ni kad mada’naged e magawon, ara yibe gafgownagdad, ara kan waliydad ni ngad denengad. Kub t’uf ni nge mich u wan’dad nra chuw e pi n’ey boch nga m’on. Athamgil ni gad ma tay e piin Kristiano e gathi ban’en ni gad ma rin’ u gelngidad, ya Jehovah ni ir e en nrayog ni nge pi’ fare ‘gelngin ni ir e ba th’abi gel’ ngodad e ir e ma ayuwegdad ni ngad athamgilgad. (2 Kor. 4:7) Re article ney e gad ra weliy riy aningeg ban’en ni ke pi’ Jehovah ngodad nra ayuwegdad ni ngad athamgilgad. Ku gad ra weliy rogon nrayog ni nge yib angin e pi n’ey ngodad.

MEYBIL

3. Mang fan nrayog ni nga dogned ni meybil e aram reb e maang’ang?

³ Ke pi’ Jehovah ban’en ngodad u daken e maang’ang nrayog ni nge ayuwegdad ni ngad athamgilgad. Ke bing e kanawo’ nrayog ni ngad nonad ngak ni yugu aram rogon ni ka gad bogi tadenen. (Heb. 4:16) Am lemnag e re n’ey: Demtrug e ngiyal’ nrayog ni ngad meybilgad ngak Jehovah, maku demtrug e n’en nrayog ni ngad weliyed ngak. Yugu demtrug e re thin ni gad be non riy ara gin gad bay riy ni kub muun ngay e ngiyal’ ni yigoo gadad ara gad bay u kalbus, ma rayog ni nge rung’ag lamdad. (Jonah 2:​1, 2; Acts 16:​25, 26) Mus ni faanra ri be magafan’dad nib gel nda kud nanged rogon ni ngad weliyed lanin’dad, ma ka rayog ni nge nang Jehovah e n’en gad baadag ni nga dogned. (Rom. 8:​26, 27) Riyul’ ni meybil e aram reb e maang’ang!

4. Mang fan nrayog ni nga dogned ni meybil ni gad ma tay ngak Jehovah ni nge ayuwegdad ni ngad athamgilgad e ba puluw ko n’en nib m’agan’ ngay?

⁴ Ke micheg Jehovah ngodad u lan e Thin rok “nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14) Ere rayog ni nga dogned ngak ni nge ayuwegdad ni ngad athamgilgad, fa? Arrogon! Re n’ey e ba puluw ko n’en nib m’agan’ ngay. Uw rogon ni kad nanged e re n’ey? Nap’an ni gad ra athamgil u fithik’ e pi magawon ni gad ma mada’nag, ma aram e gad be ayuweg Jehovah ni nge pi’ e fulweg ngak Satan ni Moonyan’ ni ir e en ma gathibthibnag. (Prov. 27:11) Bin riyul’ riy e be yog e Bible nri baadag Jehovah ni “nge pi’ gelngin e piin yad ba yul’yul’ ngak u gum’ircha’rad.” (2 Kron. 16:​9, BT) Ere rayog ni nge pagan’dad ngay ni bay gelngin maku baadag ni nge ayuwegdad ni ngad athamgilgad.​—Isa. 30:18; 41:10; Luke 11:13.

5. Uw rogon nrayog ni nge ayuwegdad e meybil ni nge gapas lanin’dad? (Isaiah 26:3)

⁵ Be yog e Bible ni faanra ud yibilayed murung’agen e pi magafan’ rodad, ma ‘gapas rok Got ndabi chuchugur ni nge nang e girdi’ fan e ra yororiy gum’ircha’dad nge tafinay rodad.’ (Fil. 4:7) Ri gad ba felfelan’ ko re n’ey, ya piin ndarur pigpiggad ngak Jehovah e ku yad ma mada’nag e magawon, ma boor i yad e ma guy rogon ni nge rin’ boch ban’en nib thilthil ya nge yag ni gapas laniyan’. Bod ni bay boch i yad ni ma guy rogon ni nge chuweg gubin ban’en u laniyan’ ya nge yag ni thamiy e gapas. Nap’an nra rin’ be’ e pi n’ey ni aram e gathi ka ir e be gagiyegnag e lem rok, ma rayog ni nge mang pi moonyan’ e ra gagiyegnaged. Ma re n’ey e bay riy’en. (Mu taarebrogonnag ko Matthew 12:​43-45.) Machane gapas ni ma pi’ Jehovah ngodad u nap’an ni gad ra meybil e kab gel e fel’ riy ko gapas nrayog ni nge thamiy be’ u nap’an ni be rin’ e pi n’ey. Nap’an ni gad ra meybil ngak Jehovah, ma aram e gad be dag nri be pagan’dad ngak ma ra i pi’ e “gapas” ngodad. (Mu beeg e Isaiah 26:​3, BT.) Reb e kanawo’ ni ma rin’ Jehovah e re n’ey riy e aram e ma ayuwegdad ni nge yib ngan’dad boch e thin nu Bible nra fal’eg lanin’dad. Pi thin ney e ma gapaseg lanin’dad nge gum’ircha’dad ni bochan e gad manang ni ma lemnagdad Jehovah ma baadag ni nge ayuwegdad.​—Ps. 62:​1, 2. 

6. Mang boch ban’en nrayog ni ngam uneg ko meybil rom? (Kum guy e sasing.)

⁶ N’en nrayog ni ngam rin’. Nap’an ni ga be athamgil u fithik’ reb e magawon ni be skengnag e michan’ rom, mag “pi’ e gilab rom ngak Somol” mag meybil ni nge pi’ e gapas rok ngom. (Ps. 55:​22, BT) Kum yibilay e gonop ya nge yag nim nang e n’en ngam rin’ ko pi magawon ni ga be mada’nag. (Prov. 2:​10, 11) Ma nap’an ni ga be meybil ni ngan ayuwegem ni ngam athamgil, maku dab mu pagtalin ni ngkum pining e magar. (Fil. 4:6) Mu lemnag boch e kanawo’ ni be ayuwegem Jehovah u nap’an ni ga be mada’nag reb e magawon, mag pining e magar riy ngak. Dab mu pag e magawon ni ga be mada’nag ni nge k’aringem ni nge dab kum guy e pi tow’ath ni ke pi’ Got ngom.​—Ps. 16:​5, 6.

THIN ROK GOT

7. Faanra ud filed e Bible, ma uw rogon nrayog ni nge ayuwegdad ni ngad athamgilgad?

⁷ Ke pi’ Jehovah e Thin rok ni nge ayuwegdad ni ngad athamgilgad. Boor e thin nu Bible ni be micheg ngodad ni ma ayuwegdad Jehovah. Am lemnag reb riy. Be gaar e Matthew 6:8: “Got ni Chitamangimed e manang e n’en nthingari yog ngomed u m’on ndawor mu ninged ngak.” Jesus e yog e pi thin ney. Dariy be’ ni manang Jehovah nib fel’ rogon nge migid Jesus. Ere aram fan nrayog ni ngari pagan’dad ngay nnap’an ni gad be gafgow ma manang Jehovah e n’en nib t’uf rodad ma ra ayuwegdad. Ku boor ban’en ni be weliy e Bible nrayog ni nge pi’ gelngidad ni ngad athamgilgad.​—Ps. 94:19.

8. (a) Mog reb i kenggin e motochiyel u Bible nrayog ni nge ayuwegdad ni ngad athamgilgad. (b) Mang e ra ayuwegdad ni nge yib ngan’dad boch i kenggin e motochiyel u Bible u nap’an nra t’uf rodad?

⁸ Rayog ni nge ayuwegdad e pi kenggin e motochiyel u Bible ni ngad athamgilgad. Bin riyul’ riy e pi kenggin e motochiyel ney e bay e gonop riy nrayog ni nge ayuwegdad ni ngad dugliyed boch ban’en nib fel’ rogon. (Prov. 2:​6, 7) Bod ni be yog e Bible ngodad ndab ki magafan’dad ko n’en nrayog ni nge buch boch nga m’on, ya ngad taga’gad ngak Jehovah ni gubin e rran. (Matt. 6:34) Faanra ba mecham ngodad ni ngaud beeged e Bible ma gad be fal’eg i lemnag, ma dabisiy nra yib ngan’dad boch i kenggin e motochiyel u Bible u nap’an nra t’uf rodad.

9. Uw rogon ni ma gelnag boch e thin nu Bible e pagan’ rodad nra ayuwegdad Jehovah?

⁹ Ku bay murung’agen e girdi’ u Bible ni i pagan’rad ngak Jehovah me ayuwegrad. (Heb. 11:​32-34; Jas. 5:17) Nap’an ni gad ra lemnag e pi n’ey, ma aram e rra pagan’dad ngay ni Jehovah e “ir e manaf rodad me ir gelngidad, gubin ngiyal’ ni ke fal’eg rogon ke par ni ra yib e gafgow ngodad me ayuwegdad.” (Ps. 46:1) Ma nap’an ni gad ra lemnag rogon e yul’yul’ ni i tay e pi tapigpig rok Jehovah kakrom, ma ra k’aringdad ni ngad folwokgad ko michan’ rorad nge rogon ni ur athamgilgad.​—Jas. 5:​10, 11.

10. Uw rogon nrayog ni ngam fanay e Bible ko bin th’abi fel’ e kanawo’?

¹⁰ N’en nrayog ni ngam rin’. Um beeg e Bible ni gubin e rran, mag yoloy boch e thin riy nga but’ ni ma ayuwegem. Boor e walag ni yad ma beeg e thin nu Bible ni fan ko yu rran ni kakadbul. Re n’ey e ma ayuwegrad ni ngar lemnaged ban’en nra pi’ e athamgil nga lanin’rad ko re rran nem. I guy reb e walag nib pin ni ka nog Mariea ngak nriyul’ e re n’ey u nap’an nni pirieg ni ke cancer e gallabthir rok ni yow l’agruw. Ere mang e ayuweg ni nge athamgil u nap’an ni be ayuwegrow u lan e pi pul u m’on ni ngar m’ow? I yog ni gaar: “Gubin e kadbul nug ma beeg e thin nu Bible nge thin ni bay ko fare ke babyor ni Examining the Scriptures Daily mug fal’eg i lemnag. Re n’ey nug ma rin’ e ayuwegeg ni nggu par nug be lemnag reb e thin nu Bible nra ayuwegeg ni nggu lemnag ban’en ni kab ga’ fan ngog nge magawon nug be mada’nag.”​—Ps. 61:2.

PI WALAG

11. Uw rogon e lem rodad u nap’an ni gad ra lemnag rogon ni be athamgil e pi walagdad u fithik’ e pi magawon ni yad be mada’nag?

¹¹ Ke pi’ Jehovah e pi walag ni Kristiano ni ngar ayuweged gadad ni ngad athamgilgad. Bochan ni kad nanged ni ‘piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngodad e ku ir e be yib ngorad,’ ma be micheg nga lanin’dad ni gathi kemus ni yigoo gadad e be buch e pi n’ey rodad. (1 Pet. 5:9) Rayog ni nge pagan’dad ngay ndemtrug e re miti magawon ni gad ra mada’nag, maku bay boch e walag ni kkur mada’naged ma kur athamgilgad u fithik’. Ere ku rayog ni ngad athamgilgad!​—Acts 14:22.

12. Uw rogon nrayog ni nge ayuwegdad e pi walag, ma mang e rayog ni ngad rin’ed ni fan ngorad? (2 Korinth 1:​3, 4)

¹² Rayog ni nge pi’ e pi walag e athamgil nga lanin’dad u nap’an ni gad be athamgil u fithik’ e pi magawon ni gad be mada’nag. I nang apostal Paul nriyul’ e re n’ey. Ba ga’ ni i pining e magar ko piin ur ayuweged u nap’an ni immoy u reb e naun nib kalbus ma i yog fithingrad. Pi walag ney e ur fal’eged laniyan’ Paul, ma yad be pi’ e athamgil ngak, maku yad be ayuweg u boch ban’en nib t’uf rok. (Fil. 2:​25, 29, 30; Kol. 4:​10, 11) Ku rayog ni nge buch ban’en rodad ni aray rogon e ngiyal’ ney. Nap’an nra t’uf ni ngan ayuwegdad ni ngad athamgilgad ma bay e pi walag ni ngar ayuweged gadad, ma nap’an nra t’uf e ayuw rorad ma gad bay ni ngad ayuweged yad.​—Mu beeg e 2 Korinth 1:​3, 4. 

13. Mang e ayuweg reb e walag nib pin ni ka nog Maya ngak ni nge athamgil?

¹³ Rib gel e athamgil ni pi’ e pi walag ngak reb e walag nib pin u Russia ni ka nog Maya ngak. Nap’an e duw ni 2020 me yib e polis nga tafen nga ranod u fithik’ e chugum rok, min fek nga tagil’ e puf oloboch ngan pufthinnag ni bochan e be weliy e michan’ rok ko girdi’. I yog ni gaar: “I taw nga ba ngiyal’ mi ri aw parwog, me magafan’ug, miki kireban’ug. Machane ma callnageg e pi walag, ma yad ma yol ngog, ma rogned ngog ni gub t’uf rorad. Kab kafram i yib ni gu manang ni gub t’uf rok e pi walag ma gamad girdien taab tabinaw. Machane ka nap’an e duw ni 2020, mfin aram e ngiyal’ ni kari tamilang e re n’ey u wan’ug.”

14. Uw rogon nrayog ni nge yib angin e ayuw ni ma pi’ e pi walag ngodad u nap’an ni gad be athamgil u fithik’ e pi magawon rodad? (Kum guy e sasing.)

¹⁴ N’en nrayog ni ngam rin’. Nap’an ni ga be athamgil u fithik’ reb e magawon ni ga be mada’nag, mag guy rogon ni ngam par ni gab chugur ko pi walag. Dab mu magagawon ni ngam ning e ayuw ko piin piilal. Rayog ni ngar manged “ba manaf ni ngan naf ngay ko nifeng nge yoko’.” (Isa. 32:2) Ku dab mu pagtalin ni pi walagem e ku yad be athamgil u fithik’ boch e magawon ni yad be mada’nag. Ga ra rin’ ban’en nib fel’ ni fan ngak be’ ni ke t’uf e ayuw rok ma ga ra felfelan’, ma re n’ey e ra ayuwegem ni ngam athamgil u fithik’ e magawon rom.​—Acts 20:35.

ATHAP RODAD

15. Mang e ke yag ni nge rin’ boch e girdi’ ni yad ba yul’yul’ ni bochan e athap rorad ni kub muun Jesus ngay? (Hebrews 12:2)

¹⁵ Ke pi’ Jehovah e athap ngodad nib mudugil nra ayuwegdad ni ngad athamgilgad. (Rom. 15:13) Am lemnag rogon ni yag ni nge athamgil Jesus u nap’an e bin th’abi mo’maw’ e rran ko par rok u roy u fayleng ni bochan e athap rok. (Mu beeg e Hebrews 12:2.) Manang ni yul’yul’ nra tay e ku ra thothupnag fithingan Jehovah. Ki athapeg e ngiyal’ nra sul ngak e Chitamangin nge ngiyal’ ni yad ra gagiyeg pi walagen u Gil’ilungun Got u tharmiy. Ere ku arrogodad ni athap rodad ni ngad pared ni manemus u lan e bin nib beech e fayleng rok Got e ma ayuwegdad ni ngad athamgilgad u fithik’ e pi magawon ni ma fek e re fayleng rok Satan ney i yib ngodad.

16. Uw rogon ni yag ni nge athamgil reb e walag nib pin ni bochan e athap rok? Mang e ga be fil ko n’en ni yog?

¹⁶ Am lemnag rogon ni yag ni nge athamgil reb e walag nib pin u Russia ni ka nog Alla ngak ni bochan e athap rok. Ni kol e pumoon rok ngan kalbusnag u nap’an ni be sonnag e ngiyal’ ni ngan pufthinnag riy. Nap’an ni buch e re n’ey, me yog Alla ni gaar: “Bochan nug ma yibilay murung’agen e athap rodad boch nga m’on ma gu ma fal’eg i lemnag, ma aram e n’en ni ayuwegeg ndabi mulan’ug nib pag rogon. Gu manang ni ka bay boch ban’en nib fel’ nra buch boch nga m’on. Ra gel Jehovah, maku arrogodad.”

17. Uw rogon nrayog ni ngad daged nib ga’ fan u wan’dad e athap rodad boch nga m’on? (Kum guy e sasing.)

¹⁷ N’en nrayog ni ngam rin’. Mu tay e tayim ni ngaum lemnag e pi n’en nib manigil nra pi’ Jehovah ngodad boch nga m’on. Mu susunnagem ni ga bay u lan e bin nib beech e fayleng mag lemnag e pi tow’ath nra yag ngodad. Faan ga ra rin’ e re n’ey, ma ga ra guy ni pi magawon ni gad be mada’nag e chiney e ‘ba achig ma dabi n’uw nap’an.’ (2 Kor. 4:17) Kum rin’ e tin nrayog rom ni ngam weliy e michan’ rom ngak yugu boch e girdi’. Am lemnag gelngin feni mo’maw’ ngorad ni ngar athamgilgad u fithik’ e pi magawon ni yad be mada’nag u lan e re fayleng rok Satan ney ndar nanged e n’en nib m’agan’ Got ngay ni fan ngodad boch nga m’on. Rayog ni ngam k’aringrad ni ngar adaged ni ngar nanged boch ban’en u murung’agen e athap rodad u tan Gil’ilungun Got ni yugu aram rogon ni buchuuw ban’en ni ga ra yog ngorad.

18. Mang fan nrayog ni nge pagan’dad ko pi n’en ke micheg Jehovah?

¹⁸ Tomuren ni athamgil Job u fithik’ boor e magawon ni yib ngak, me gaar ngak Jehovah: “Gu manang ni gubin ma rayog rom; ni gubin e tin ni ga ra finey ma rayog rom ni ngam rin’.” (Job 42:2) I nang Job ndariy ban’en nrayog ni nge taleg Jehovah ndabi lebguy e n’en nib m’agan’ ngay. Re n’ey e rayog ni nge pi’ gelngidad u nap’an ni gad be athamgil. Baaray rogon nrayog ni ngan susunnag. Mu lemnag reb e ppin nib m’ar ni ke mulan’ ni bochan e boor e togta ni ke yan ngorad ma de yag ni ngar tafalaynaged nge fel’ rogon. Machane nap’an ni pirieg reb e togta nib salap ma yima pagan’uy ngak e m’ar rok me weliy ngak rogon nra tafalaynag, ma aram me gapas laniyan’ ni yugu aram rogon ni manang nib n’uw nap’an mfini gol. Chiney e rayog ni nge athamgil ya manang ni bay e athap rok nra gol ko m’ar rok. Ere ku arrogodad ni faanra ba mich u wan’dad e Paradis ni gad be athapeg boch nga m’on, ma ra ayuwegdad ni ngad athamgilgad.

19. Mang e ba t’uf rodad ya nge yag nda athamgilgad?

¹⁹ Kad filed ni ma ayuwegdad Jehovah u daken e meybil, nge Thin rok, nge pi walag, nge athap rodad ni ngad athamgilgad u fithik’ e pi magawon ni gad ma mada’nag. Faan gad ra fanay e pi n’ey ni ke pi’ Jehovah, ma aram e ra ayuwegdad u fithik’ urngin e magawon ni gad ra mada’nag u lan e re fayleng rok Satan ney nge mada’ ko ngiyal’ ni ke chuw.