Nge Mich u Wan’um ni Gab T’uf rok Jehovah

1. Mang fan nim ognagem ngak Jehovah? (Kum guy e sasing.)

KA BE yib ngan’um e ngiyal’ nim ognagem ngak Jehovah, fa? Kam rin’ e re n’ey ni bochan e kam nang Jehovah ma ke t’uf rom. Kam micheg ngak ni ga ra m’oneg e tin nib m’agan’ ngay u lan e yafos rom ma ga ra ulul ni ngam t’ufeg u polo’ i gum’irchaem, nge lanin’um, nge lem rom, nge gelngim. (Mark 12:30) Ka aram nap’an i yib ni be gel feni t’uf rom. Ere mang e ga ra yog ni faanra fithem be’ ni gaar, “Riyul’ nib t’uf Jehovah rom, fa?” Ra lungum ngak ni ka chingiyal’ nem, “Dariy be’ ara ban’en nib t’uf rog nge migid Jehovah!”

2-3. Mang e baadag Jehovah ni nge mich u wan’dad? Mang e gad ra weliy ko re article ney? (Jeremiah 31:3)

² Machane mang e ga ra yog ni faanra fithem be’ ni gaar, “Rib mich u wan’um ni gab t’uf rok Jehovah, fa?” Gur, ra mo’maw’ ngom ni ngam pi’ e fulweg ko re deer ney ya sana ga be lemnag ndariy rogon ni nge t’ufegem Jehovah, fa? Bay reb e walag nib pin ni un gafgownag u nap’an ni kab bitir ni yog ni gaar: “Gu manang nib t’uf Jehovah rog. De maruwar u wan’ug e re n’ey. Yugu aram rogon, mab ga’ ni ma maruwar u wan’ug ko gub t’uf rok Jehovah fa danga’.” Machane bin riyul’ riy e, uw rogon ni ma lemnagem Jehovah?

³ Baadag Jehovah ni nge mich u wan’um ni gab t’uf rok. (Mu beeg e Jeremiah 31:3.) Bin riyul’ riy e ir e pow’iyem ngak. Ma nap’an nim ognagem ngak ngam un ko taufe, ma aram me dag e t’ufeg ngom u fithik’ e yul’yul’ ni aram ban’en nrib manigil. Re n’ey e be yip’ fan nri gab t’uf rok ma dariy ba ngiyal’ nra pagem. Re n’ey e ma k’aring ni nge lemnag e pi tapigpig rok ni yad ba yul’yul’ ni yad boch e girdi’ nib ‘mil suwrad’ ngak ni gab muun ngay. (Mal. 3:17) Baadag Jehovah ni nge mich u wan’um ni gab t’uf rok ni bod apostal Paul nib mich u wan’ nib t’uf rok Jehovah. Aram fan nib pagan’ u nap’an ni yoloy fapi thin ni be gaar: “Rogon ni gadad ba t’uf rok e mmudugil u wun’ug ndariy ban’en nrayog ni nge daregdad riy, ndemturug ko yam’ ara yafos; ara pi engel ara yugu boch e kan ni be gagiyeg u tharmiy ara gelngin e kan; ara tin ni bay e chiney ara tin ni bay yib; ara bin nu lang e tamilang ara bin nu ar e tamilang​—dariy ban’en u fithik’ urngin e tin ni ke sunumiy Got nrayog rok ni nge daregdad u rogon ni gadad ba t’uf rok Got.” (Rom. 8:​38, 39) Gad ra weliy ko re article ney fan nib t’uf ni ngari mich u wan’dad ni gad ba t’uf rok Jehovah nge n’en nra ayuwegdad ni ngad rin’ed e re n’ey.

FAN NIB T’UF NI NGE MICH U WAN’DAD NI GAD BA T’UF ROK JEHOVAH

4. Uw rogon nrayog ni ngad togopuluwgad nga reb e ban rok Satan?

⁴ Ra mich u wan’dad ni gad ba t’uf rok Jehovah, ma aram e rayog ni ngad togopuluwgad nga reb e “ban” rok Satan. (Efe. 6:11) Demtrug ban’en nrayog ni nge rin’ Satan ya nge yag ni talegdad ndab kud pigpiggad ngak Jehovah. Reb e ban rok e aram e ma k’aring e girdi’ ni ngar lemnaged nder ma t’ufegrad Jehovah. Dab mu pagtalin ni Satan e nap’an nra mab e kanawo’ ngak me rin’ e n’en be lemnag. Ba ga’ ni ma cham ngodad u nap’an ni kad meewargad ni bod u nap’an ni be magawon lanin’dad ni bochan e pi n’en ni i buch rodad kafram, ara pi magawon ni gad be mada’nag e chiney, ara be maruwaran’dad ko n’en nra buch rodad boch nga m’on. (Prov. 24:10) Satan e bod ba layon ni be gay reb e gamanman ndabiyog ni nge ayuweg ir ni nge longuy. Ere ma guy rogon ni nge cham ngodad ko ngiyal’ ni ke mulan’dad ya nge k’aringdad ni nge dab kud pigpiggad ngak Jehovah. Machane faanra ud guyed rogon ni nge mich u wan’dad ni gad ba t’uf rok Jehovah, ma aram e ra mom boch ngodad ni ngad ‘togopluwgad ngak’ Satan nge pi ban rok.​—1 Pet. 5:​8, 9; Jas. 4:7.

5. Mang fan nib t’uf ni ngad nanged ni gad ba t’uf rok Jehovah?

⁵ Ra mich u wan’dad ni gad ba t’uf rok Jehovah, ma aram e rayog ni ngad chugurgad ngak. Am lemnag fan nrayog ni nga dogned e re n’ey. Ke sunmiydad Jehovah nib t’uf ni ngaud t’ufeged e girdi’ maku yibe t’ufegdad. Nap’an nra t’ufegdad be’, ma ma k’aringdad ni ngkud t’ufeged. Ere faan gad ra nang ni gad ba t’uf rok Jehovah, ma aram e ra gel feni t’uf rodad. (1 John 4:19) Ma nap’an nra gel feni t’uf rodad, ma aram e ri gad ra t’uf rok. Be gaar e Bible: “Mu chugurgad ngak Got, me chugur ngomed.” (Jas. 4:8) Machane uw rogon nrayog ni ngari mich u wan’dad ni gad ba t’uf rok Jehovah?

MANG E RAYOG NI NGE AYUWEGDAD NI NGE MICH U WAN’DAD NI GAD BA T’UF ROK JEHOVAH?

6. Mang e rayog ni ngad yibilayed murung’agen ya nge mich u wan’dad ni gad ba t’uf rok Jehovah?

⁶ Mu weliy urngin ban’en ni bay u lanin’um ma dab mu tal ko meybil. (Luke 18:1; Rom. 12:12) Rayog nib t’uf ni ngam meybil ngak Jehovah ni boor yay u reb e rran ni nge ayuwegem ni ngam nang rogon ni be lemnagem. Bay yu ngiyal’ nrayog ni ngaum lemnag ni bay ban’en ni ga be rin’ nib kireb, ma aram me mo’maw’ ni nge mich u wan’um ni gab t’uf rok Jehovah. Machane dab mu pagtalin ni Jehovah e kab ga’ nga lanin’um. (1 John 3:​19, 20) Kab fel’ rogon ni manangem nga rogon ni ga manang, ma ma guy boch ban’en u rarogom nsana dabiyog ni ngam guy. (1 Sam. 16:7; 2 Kron. 6:30) Ere dab mmagagawon ni ngam ‘weliy ngak urngin’ ban’en ni bay u lanin’um ma gog ngak ni nge ayuwegem ni nge mich u wan’um ni gab t’uf rok. (Ps. 62:8) Tomuren ni kam meybil, ma aram mag ngongol nib puluw ko n’en kam yibilay ni aram e ngam fol ko pi n’en baaray.

7-8. Uw rogon ni be micheg fapi thin ko Psalms ngodad ni gad ba t’uf rok Jehovah?

⁷ Nge mich u wan’um e n’en ke yog Jehovah. I thagthagnag nga laniyan’ e piin nra yoloyed e Bible ni ngar weliyed e tin riyul’ u murung’agen. Am lemnag rogon ni weliy David ni ir fare psalmist rarogon Jehovah. “I Somol e ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay.” (Ps. 34:​18, BT) Nap’an nra kireban’um nib gel, ma rayog ni ngam lemnag ni yigoo gur. Machane ke micheg Jehovah ni aram e ngiyal’ nib chugur ngom ya be guy ni kari t’uf e ayuw rok rom. Ki yoloy David ni gaar: “Kam yoloy gubin gaf i luag ni ke map’ [“mu chaariy e lu’ rog nga tafen e ran rom ni kan ngongliy ko keru’ e gamanman,” NW].” (Ps. 56:​8, BT) Nap’an nra kireban’um ma ma guy Jehovah. Ri ma lemnagem nge magawon ni ga be yan u fithik’. Gowa bod ni ma kunuy gubin gaf i luam ni ke map’ ma rib ga’ fan u wan’ ni bod be’ ni be milekag nrib ga’ fan u wan’ e chuuw i ran ni bay u tafen e ran rok ni kan ngongliy ko keru’ e gamanman. Be gaar e Psalm 139:3: “[Jehovah] ga manang urngin e ngongol rog.” Gubin ban’en ni ga ma rin’ ni ma guy Jehovah, machane tin nib fel’ riy e ir e ma tiyan’ ngay. (Heb. 6:10) Mang fan? Ya rib ga’ fan u wan’ e athamgil ni ga ma tay ni ngam rin’ e tin nib m’agan’ ngay.a

⁸ Ma fanay Jehovah boch e thin nu Bible ni aray rogon nra fal’eg lanin’uy ni nge yog ngom nri ma lemnagem ma ri gab t’uf rok. Machane kad filed faram nreb e ban rok Satan e aram e ma k’aringem ni ngam lemnag nder ma t’ufegem Jehovah. Ere faanra bay yu ngiyal’ ni ma maruwar u wan’um ko gab t’uf rok Jehovah fa danga’, mag tal ngam fithem ni nge lungum, ‘Mini’ e ra mich u wan’ug e thin rok​—faanem ni ir “chitamangin urngin e malulifith” ara fare ‘Got nib yul’yul’’?’​—John 8:44; Ps. 31:5.

9. Mang e ke micheg Jehovah ngak e piin yad ma t’ufeg? (Exodus 20:​5, 6)

⁹ Mu lemnag rogon ni ma lemnag Jehovah e piin yad ma t’ufeg. Am lemnag e n’en ni yog ngak Moses nge piyu Israel. (Mu beeg e Exodus 20:​5, 6.) Ke micheg nra ulul ni nge dag e t’ufeg u fithik’ e yul’yul’ ngak e piin yad ma t’ufeg. Be micheg e pi thin ney nga lanin’dad ni Got rodad nib yul’yul’ e dariy ba ngiyal’ nra pag e pi tapigpig rok ni ngar t’ufeged ma dabi dag e t’ufeg ngorad. (Neh. 1:5) Ere faanra bay yu ngiyal’ nib t’uf ni ngan micheg nga lanin’um ni gab t’uf rok Jehovah, mag tal ngam fithem ni nge lungum, ‘Ba t’uf Jehovah rog, fa?’ Ngemu’ mag lemnag e re n’ey: Faanra ba t’uf rom ma ga be athamgil u rogon nrayog rom ni ngam rin’ e tin nib m’agan’ ngay, me ere rayog ni nge pagan’um ngay nri gab t’uf rok. (Dan. 9:4; 1 Kor. 8:3) Re n’ey e be yip’ fan ni faanra ba mich u wan’um nib t’uf Jehovah rom, me ere dariy rogon ni nge maruwar u wan’um ni gab t’uf rok. Rayog ni ngari pagan’um ngay ni gubin ngiyal’ nra i t’ufegem ma dariy ba ngiyal’ nra digeyem.

10-11. Uw rogon ni baadag Jehovah ni ngaum lemnag fare biyul? (Galatia 2:20)

¹⁰ Um fal’eg i lemnag fare biyul. Fare biyul ni maligach ni pi’ Jesus Kristus e aram e bin th’abi fel’ e tow’ath ni ke pi’ Jehovah ko girdi’. (John 3:16) Machane gur, kun pi’ e re tow’ath ney ni fan ngom, fa? Arrogon! Am lemnag e n’en ni buch rok apostal Paul. Dab mu pagtalin ni i ngongliy boch e denen nib gel e ubchiya’ riy u m’on ni nge mang reb e Kristiano mab t’uf ni nge ulul i guy rogon ni nge gel ko pi meewar rok. (Rom. 7:​24, 25; 1 Tim. 1:​12-14) Yugu aram rogon me mich u wan’ ni fare biyul e ba tow’ath ni ke pi’ Jehovah ni fan ngak. (Mu beeg e Galatia 2:20.) Dab mu pagtalin ni thagthagnag Jehovah nga laniyan’ Paul ni nge yoloy e pi thin ney. Ma gubin ban’en ni kan yoloy nga Bible ni nge fonownagdad. (Rom. 15:4) Ere fapi thin ni yog Paul e be tamilangnag rogon ni baadag Jehovah ni ngaum lemnag fare biyul. Baadag ni ngaum lemnag ni aram reb e tow’ath ni ke pi’ ni fan ngom. Nap’an ni ga ra lemnag fare biyul ni aray rogon, ma aram e rra mich u wan’um nri gab t’uf rok Jehovah.

¹¹ Gad be pining e magar ngak Jehovah ni ke pi’ Jesus ke yib nga fayleng ni nge yim’ ni fan ngodad. Machane ku reb i fan ni yib Jesus nga fayleng e aram e nge weliy ko girdi’ e tin riyul’ u murung’agen Got. (John 18:37) Re n’ey e ba muun ngay rogon ni ma lemnag Jehovah pi fak.

ROGON NI KE AYUWEGDAD JESUS NI NGE MICH U WAN’DAD NI GAD BA T’UF ROK JEHOVAH

12. Mang fan nrayog ni nge pagan’dad nga rogon ni i weliy Jesus rarogon Jehovah?

¹² Nap’an ni immoy Jesus u fayleng ma baadag ni ma weliy rarogon Jehovah ko girdi’. (Luke 10:22) Ere bay fan ni nge pagan’dad nga rogon ni i weliy Jesus rarogon Jehovah. Bin riyul’ riy e bokum bilyon e duw ni i par Jesus u tooben Jehovah u tharmiy u m’on ni nge yib nga fayleng. (Kol. 1:15) Manang gelngin nrib t’uf rok e Chitamangin. Ma kki guy rogon ni ke t’ufeg e chitamangin e pi engel ni yad ba yul’yul’ nge urngin pi fak u fayleng ni yad ba yul’yul’. Uw rogon ni ma ayuweg Jesus e girdi’ ni nge mich u wan’rad ni yad ba t’uf rok Got?

13. Uw rogon ni baadag Jesus ni ngaud lemnaged Jehovah?

¹³ Baadag Jesus ni ngaud lemnaged Jehovah ni bod rogon ni ma lemnag. Ba pag 160 yay ni yog Jesus e “Chitamag” ngak Jehovah u lan e pi Gospel. Ma nap’an ni i non ngak pi gachalpen ma i fanay fapi thin ni “Chitamangimed” ara “Chitamangimed nu tharmiy.” (Matt. 5:16; 6:26) Be gaar e study note ko Matthew 5:16: “Tin som’on e tapigpig rok Got e boor e liw nib tolang ni ur fanayed u nap’an ni yad be weliy murung’agen Jehovah ara nap’an ni yad be non ngak nib muun ngay fare liw ni ‘Gubin ma Rayog Rok,’ nge ‘En ni Th’abi Tolang,’ nge ‘en ni sunumiydad,’ machane bochan ni boor yay ni i fanay Jesus fare thin ni ‘Chitamangiy’ ma be tamilangnag nrib chugur Got ko pi tapigpig rok.” Ba tamilang ni baadag Jesus ni ngaud lemnaged Jehovah ni bod rogon ni ma lemnag, ni aram e ngaud ted ni ir e Chitamangidad nib t’uf pi fak rok. Ere chiney e ngad weliyed l’agruw e kanawo’ ni i fanay Jesus fare bugithin ni “Chitamangiy” riy.

14. Uw rogon ni dag Jesus nib ga’ fadad u wan’ e Chitamangidad ni bay u tharmiy ni be’ nge be’? (Matthew 10:​29-31) (Kum guy e sasing.)

¹⁴ Som’on e ngam lemnag fapi thin ni yog Jesus ni bay ko Matthew 10:​29-31. (Mu beeg.) Sparrow e ba mit e arche’ nib achichig ndariy ba ngiyal’ nra t’uf Jehovah rorad ara ra liyorgad ngak. Yugu aram rogon ma rib ga’ farad u wan’ e Chitamangidad, ya ra mul taa bagayad nga but’ ma manang. Ere ba mudugil nib ga’ fan u wan’ ma ma lemnag e pi tapigpig rok ni yad ba yul’yul’ ni be’ nge be’ ni bochan e yad ma pigpiggad ngak u fithik’ e t’ufeg! Be weliy e study note ko verse 30 murung’agen fapi thin ni “mus nga piyan lolugmed ni ke m’ay i theeg” ni gaar: “Bochan nri manang Jehovah gubin ban’en u rarogodad ngki mada’ ko tin nrib achig riy, ma be micheg nri ma lemnag pi gachalpen Kristus ni be’ nge be’.” Ere ba tamilang ni baadag Jesus ni nge mich u wan’dad nib ga’ fadad u wan’ e Chitamangidad ni bay u tharmiy ni be’ nge be’.

15. Mang e be yog fapi thin ni yog Jesus ni bay ko John 6:44 ngom u murung’agen e Chitamam ni bay u tharmiy?

¹⁵ Mu tay fanam i yan ko bin migid e kanawo’ ni fanay Jesus fare bugithin ni “Chitamangiy” riy. (Mu beeg e John 6:44.) Chitamam ni bay u tharmiy e ir e pow’iyem ara k’aringem ni ngam adag e tin riyul’. Mang fan? Ya guy nib munguy lanin’um ma kub m’agan’um ngay ni ngam fil e tin riyul’. (Acts 13:48) Nap’an ni yog Jesus fapi thin ni bay ko John 6:​44, ma rayog ni be weliy murung’agen fapi thin ni yog Jehovah ni bay ko Jeremiah 31:3. I gaar Jehovah ko girdi’ rok: “Bay ug par ni gu be dag ngomed ni gimed ba t’uf rog.” (Jer. 31:3; mu taarebrogonnag ko Hosea 11:4.) Am lemnag e n’en be yip’ fan e re n’ey. Be ulul e Chitamangidad ni bay u tharmiy ni nge yaliy boch ban’en nib fel’ u rarogom nsana dabiyog ni ngam guy.

16. (a) Mang e be yog Jesus ngodad, ma mang fan nsusun e nge pagan’dad ko thin rok? (b) Uw rogon nrayog ni ngari mich u wan’um ni Jehovah e ir e bin th’abi fel’ e Matam nra yag ngom? (Mu guy fare kahol ni kenggin e “Bin Th’abi Fel’ e Matam Nra Yag Ngodad.”)

¹⁶ Nap’an ni yog Jesus ni Jehovah e Chitamangidad ma gowa be gaar ngodad: “Gathi yigoo gag e Chitamag Jehovah, ya ku Chitamangimed. Gu be micheg ngomed ni gimed ba t’uf rok ma ri ma lemnagmed ni be’ nge be’.” Ere faanra bay yu ngiyal’ ni ma maruwar u wan’um ko gab t’uf rok Jehovah fa danga’, mag tal ngam fithem ni nge lungum, ‘Gur, gathi nge pagan’ug ko thin rok Jesus ni ir e en ni manang e Chitamangidad nrib fel’ rogon ma gubin ngiyal’ ni ma yog e tin riyul’?’​—1 Pet. 2:22.

UM GUY ROGON NI NGARI MICH U WAN’UM NI GAB T’UF ROK JEHOVAH

17. Mang fan nthingar ud guyed rogon ni ngari mich u wan’dad ni gad ba t’uf rok Jehovah?

¹⁷ Ba t’uf ni ngaud guyed rogon ni ngari mich u wan’dad ni gad ba t’uf rok Jehovah. Kad filed faram ndabi tal Satan ni toogor rodad i guy rogon ni nge talegdad ndab kud pigpiggad ngak Jehovah. Ra ulul Satan i guy rogon ni nge k’aringdad ni nge dabki mich u wan’dad ni gad ba t’uf rok Got, ya nge meewarnagdad. Thingar dab da paged ni nge gel ngodad!​—Job 27:5.

18. Uw rogon nrayog ni ngari mich u wan’um ni gab t’uf rok Jehovah?

¹⁸ Um meybil ngak Jehovah ni nge ayuwegem ni ngaum lemnagem ni bod rogon ni ma lemnag, ya ngari mich u wan’um ni gab t’uf rok. Um fal’eg i lemnag rogon ni i weliy e piin nra yoloyed e Bible murung’agen e t’ufeg rok. Mu lemnag rogon ni ma lemnag e piin yad ma t’ufeg; dariy ba ngiyal’ nra pag be’ ni nge t’ufeg ma dabi dag e t’ufeg ngak. Kum fal’eg i lemnag fan nrayog ni ngaum lemnag fare biyul nib tow’ath ni kan pi’ ni fan ngom. Miki pagan’um ko n’en ke yog Jesus ni Jehovah e Chitamam ni bay u tharmiy. Faan ga ra rin’ e pi n’ey, ma nap’an nra fithem be’ ni gaar, “Rib mich u wan’um ni gab t’uf rok Jehovah?,” ma aram e rayog ni ngam fulweg u fithik’ e pagan’ ni nge lungum, “Arrogon! Ma gubin e rran nug ma athamgil u rogon nrayog rog ni nggu dag ngak nib t’uf rog!”