Nge Mich u Wan’um ni Ke N’ag Jehovah Fan e Denen Rom

1-2. Mang e rayog ni nge fal’eg laniyan’ e piin kar kalgadngan’rad ko denen rorad? (Kum guy e sasing.)

I MAGAWON laniyan’ David ni Pilung ni bochan e kireb ni ke rin’. (Ps. 40:12; 51:3; footnote) Yugu aram rogon me kalngan’, ma aram me n’ag Jehovah fan e kireb rok. (2 Sam. 12:13) Bochan e re n’ey, miki nang nib gel e felfelan’ ni yima tay u nap’an nra n’ag Jehovah fan e kireb.​—Ps. 32:1.

² Rayog ni nge fel’ lanin’dad u nap’an nra dag Jehovah e runguy ngodad ni bod e n’en ni buch rok David. Ri be fel’ lanin’dad ni kad nanged ni faanra riyul’ ni kad kalgadngan’dad, ma gad weliy e denen rodad, ma gad athamgil u rogon nrayog rodad ndab kud rin’ed bayay, ma aram e ra m’agan’ Jehovah ngay ni nge n’ag fan rodad ni kub muun ngay e tin nib ubchiya’ e denen ni kad rin’ed! (Prov. 28:13; Acts 26:20; 1 John 1:9) Ku gad ba felfelan’ ni kad nanged ni ma n’ag fan gubin e denen rodad ni gowa bod ndawor da rin’ed e pi denen nem!​—Ezek. 33:16.

3-4. Uw rogon e lem rok reb e walag nib pin u tomuren ni un ko taufe? Mang e gad ra weliy ko re article ney?

³ Machane sana bay yu ngiyal’ ni bay boch e girdi’ nib mo’maw’ ngorad ni nge mich u wan’rad ni ke n’ag Jehovah fan e denen rorad. Am lemnag e n’en ni buch rok Jennifer nni chuguliy ko tin riyul’. Nap’an ni kab fel’ yangaren, ma i un nga boch e ngongol nib kireb ma be mithag ko gallabthir rok. Boch e duw nga tomuren, me sul ngak Jehovah me munmun me bung rogon ni nge un ko taufe. I yog ni gaar: “Kafram e ba m’on e salpiy u wan’ug, ma kug ma un ko ngongol ndarngal, ma gu ma unum nib pag rogon, ma kug ma damumuw nib pag rogon. Gu manang nu tomuren ni gu ra wenig ni ngan n’ag fan e denen rog mug kalngan’ug, ma ra beechnageg e maligach ni pi’ Kristus. Machane de yag ni nge mich u wan’ug ni kan n’ag fan e kireb rog.”

⁴ Bay yu ngiyal’ nib mo’maw’ ni nge mich u wan’um ni ke n’ag Jehovah fan e kireb ni um rin’ kafram, fa? Baadag Jehovah ni nge pagan’um ko runguy rok ni bod David. Gad ra weliy ko re article ney fan nib t’uf ni nge mich u wan’dad ni ke n’ag Jehovah fan e denen rodad, nge n’en nrayog ni nge ayuwegdad ni ngad rin’ed e re n’ey.

MANG FAN NIB T’UF NI NGE MICH U WAN’DAD NI KE N’AG JEHOVAH FAN E DENEN RODAD?

5. Mang e baadag Satan ni ngaud lemnaged? Mu weliy ban’en ni buch.

⁵ Ra mich u wan’dad ni ke n’ag Jehovah fan e denen rodad, ma rayog ni nge dab da awgad nga reb e wup rok Satan. Dab mu pagtalin ndemtrug e n’en nra rin’ Satan ya nge talegdad ndab kud pigpiggad ngak Jehovah. Ere rayog ni nge guy rogon ni nge k’aringdad ni ngaud lemnaged ndabiyog ni ngan n’ag fan e denen rodad. Am lemnag e n’en ni buch rok fare pumoon nu Korinth nni tharbog ko ulung ni bochan e ngongol ndarngal. (1 Kor. 5:​1, 5, 13) Nap’an ni kalngan’ boch nga tomuren ma baadag Satan ndabi n’ag e pi walag fan e denen rok, ma dab ra paged ni nge sul ko ulung. Ku baadag Satan ni nge lemnag e re pumoon nem ndabiyog ni ngan n’ag fan e denen rok, mi “ri gel e kireban’ rok nge pag ir” ndab ki pigpig ngak Jehovah. Ku taab n’en e be nameg Satan. Machane “gadad manang e tin ni be lemnag ngodad.”​—2 Kor. 2:​5-11.

6. Faanra be magawon lanin’dad ni bochan e denen ni ud rin’ed, ma uw rogon nrayog ni nge fel’ lanin’dad?

⁶ Ra mich u wan’dad ni ke n’ag Jehovah fan e denen rodad, ma rayog ni nge fel’ lanin’dad. Ka ban’en ni ma buch ni nge magawon lanin’dad u nap’an ni kad denengad. (Ps. 51:17) Ba manigil e re n’ey, ya rayog ni nge k’aringdad e nangan’ rodad ni ngad thilyeged e ngongol rodad. (2 Kor. 7:​10, 11) Machane faanra ke n’uw nap’an ni kad kalgadngan’dad ko denen rodad ma ka be magawon lanin’dad, ma rayog ni nge mulan’dad. Nap’an nra mich u wan’dad ni ke n’ag Jehovah fan e denen rodad, ma rayog ni nge dabki magawon lanin’dad. Ma aram e ngiyal’ nrayog ni ngad pigpiggad ngak Jehovah ni ke beech e nangan’ rodad ma gad ba felfelan’. (Kol. 1:​10, 11; 2 Tim. 1:3) Machane uw rogon nrayog ni ngad micheged nga lanin’dad nriyul’ ni ke n’ag Got fan e denen rodad?

MANG E RAYOG NI NGE AYUWEGDAD NI NGE MICH U WAN’DAD NI KE N’AG JEHOVAH FAN E DENEN RODAD?

7-8. Mang e weliy Jehovah u murung’agen ngak Moses? Mang e rayog ni nge pagan’dad ngay? (Exodus 34:​6, 7)

⁷ Mu lemnag e n’en ke weliy Jehovah u murung’agen. Mu tay fanam i yan ko n’en ni yog ngak Moses u daken e Burey ni Sinai.a (Mu beeg e Exodus 34:​6, 7.) Yugu aram rogon ni boor ban’en nrayog ni nge weliy Jehovah u murung’agen pi fel’ngin nge rogon ni ma rin’ ban’en, machane i guy nib puluw ni nge yog ngak Moses ni ir fare “Got nri ma runguy e girdi’ ma ma kireban’ ngorad.” Ere gur, rayog rok reb e Got ni aram rogon ni nge par ndabi n’ag fan e kireb rok reb e tapigpig rok nriyul’ ni ke kalngan’ ko denen rok, fa? Dabiyog! Ya faanra rin’ ban’en ni aray rogon ma aram e ra yan i aw ni ir reb e Got nder ma runguy e girdi’ mab kireb, ni aram boch e ngongol ndabiyog ni nge rin’ Jehovah.

⁸ Rayog ni nge pagan’dad ngay ndabi yog Jehovah boch ban’en nde riyul’ u murung’agen, ya ir e Got ko tin riyul’. (Ps. 31:5) Ere rayog ni nge pagan’dad ko thin rok. Faanra ba mo’maw’ ni nge dabki magawon lanin’um ni bochan e kireb ni um rin’ kafram, ma ngam fithem ni nge lungum: ‘Rib mich u wan’ug ni ma runguydad Jehovah ma ma kireban’ ngodad, ma dabiyog ni nge par ndabi n’ag fan e denen rok reb e tadenen ni ke kalngan’, fa? Faanra arrogon, me ere gathi susun e nge mich u wan’ug ni ke n’ag fan e denen rog?’

9. Mang e be yip’ fan ni ngan n’ag fan e denen rodad? (Psalm 32:5)

⁹ Mu fal’eg i lemnag e n’en ni thagthagnag Jehovah nga laniyan’ e piin nra yoloyed e Bible ni nga rogned u murung’agen rogon ni ma n’ag fan e denen. Am lemnag rogon ni weliy David ni yoloy reb e babyor u Bible murung’agen rogon ni ma n’ag Jehovah fan e denen. (Mu beeg e Psalm 32:5.) I gaar: “[Kam] n’ag fan urngin e kireb rog.” Fare bugithin ni Hebrew ni kan pilyeg ni “n’ag fan” e ku rayog ni nge yip’ fan ni ngan “chibiy nga lang” ara “ngan fek.” Ere nap’an ni n’ag Jehovah fan e denen rok David, me thamiy ni gowa ke chibiy Jehovah ba gilab ni be fek nib tomal. Rayog ni nge fel’ laniyan’ ya ke nang ni kari n’ag Jehovah fan e denen rok. (Ps. 32:​2-4) Ku aray e n’en nrayog ni nge buch rodad. Nap’an nra kalngan’dad ko denen rodad, ma dakuriy rogon ni nge magawon lanin’dad ya rayog ni ngad felfelan’gad ni kari n’ag Jehovah fan e denen rodad.

10-11. Mang e gad be fil u murung’agen Jehovah ko fapi thin ni be gaar, ‘ke fal’eg rogon ni nge n’ag fan e kireb’? (Psalm 86:5)

¹⁰ Mu beeg e Psalm 86:​5, NW.b I yog David u roy ni Jehovah e ‘ke fal’eg rogon ni nge n’ag fan e kireb.’ Bay reb e babyor ni murung’agen e Bible ni weliy murung’agen e re thin ney, me yog e pi thin ni baaray u murung’agen Jehovah ni gaar: “Ka bang u ‘rarogon’ ni [ir] be’ ni ma ‘n’ag fan e kireb.’” Mang fan ni aram rogon Jehovah? Be gaar e gin migid ko re verse ney: “Gubin e piin yad ma meybil ngom ni ga ma dag e t’ufeg ngorad u fithik’ e yul’yul’.” Kad filed ko fa binem e article ni ke micheg Jehovah nra dag e t’ufeg u fithik’ e yul’yul’ ngak e piin yad ma t’ufeg ma dariy ba ngiyal’ nra digeyrad. Ere “rra n’ag fan e kireb” rok urngin e pi tadenen ni yad ra kalngan’rad ni bochan e t’ufeg ni ma dag u fithik’ e yul’yul’. (Isa. 55:​7, NW, ftn.) Faanra ba mo’maw’ ni nge mich u wan’um ni ke n’ag Got fan e denen rom, ma rayog ni ngam fithem ni nge lungum: ‘Ba mich u wan’ug ni Jehovah e Ir Be’ ni Ma N’ag Fan e Kireb, ma ke fal’eg rogon ni nge n’ag fan e kireb rok urngin e piin yad be wenig ngak ni nge runguyrad, fa? Faanra arrogon, me ere gathi susun e nge mich u wan’ug ni ke n’ag fan e kireb rog u nap’an ni kug wenig ngak ni nge runguyeg?’

¹¹ Rayog ni nge fel’ lanin’dad ni kad nanged nri manang Jehovah rarogodad ndawor da flontgad. (Ps. 139:​1, 2) Ki m’ug e re n’ey u yugu reb e thin ni yoloy David ni ku rayog ni nge ayuwegdad ni nge mich u wan’dad ni ke n’ag Jehovah fan e denen rodad.

N’EN NI MANANG JEHOVAH U RAROGODAD

12-13. Mang e manang Jehovah u rarogodad nrogon ni be yog e Psalm 103:​14, ma mang e ma k’aring e re n’ey ni nge rin’?

¹² Mu beeg e Psalm 103:14. I yog David ni Jehovah e “manang ni gadad e fiyath.” I yog David e pi thin ney ni nge tamilangnag reb i fan ni ke fal’eg Jehovah rogon ni nge n’ag fan e kireb rok e pi tapigpig rok ni kar kalgadngan’rad: Manang rarogodad ndawor da flontgad. Ngad sulod u daken fapi thin ni yog ya nge yag ni ngari tamilang e re n’ey u wan’dad.

¹³ I yog David ni Jehovah e “manang e n’en nni ngongliydad ngay.” I ngongliy Adam ko “but’” ma manang ni girdi’ ni yad ba flont e ku bay boch ban’en nib t’uf rorad ni bod nib t’uf ni ngaur abichgad, mar molod, mar pogofangad. (Gen. 2:7) Machane bochan ni ke denen Adam nge Efa, ma rayog ni ngkun taarebrogonnag e girdi’ ko fiyath u yugu reb e kanawo’. Ma bochan ni gadad pi fakrow, ma ke af e denen ngodad ni ma k’aringdad ni ngad rin’ed boch ban’en nib kireb. Ri manang Jehovah e re n’ey. Machane nap’an ni yog David ni manang Jehovah ni gadad e fiyath, maku be yip’ fan ni gubin ngiyal’ ni ma dag e runguy ngodad ni bochan e manang ni gadad bogi tadenen. Rayog ni nga dogned ni fan fapi thin ni yog David e: Manang Jehovah ni bay yu ngiyal’ nra ud olobochgad, ma nap’an nra buch e re n’ey ma baadag ni nge runguydad me n’ag fan rodad u nap’an ni kad kalgadngan’dad.​—Ps. 78:​38, 39.

14. (a) Mang e ki yog David u murung’agen rogon ni ma n’ag Jehovah fan e denen rodad? (Psalm 103:12) (b) Mang e rayog ni ngad filed u rogon ni n’ag Jehovah fan e denen rok David? (Mu guy fare kahol ni kenggin e “Rogon ni Ma N’ag Jehovah Fan e Kireb Ma Dabki Lemnag.”)

¹⁴ Mang e ku rayog ni nge ayuwegdad ni nge pagan’dad ni ke n’ag Jehovah fan e denen rodad? (Mu beeg e Psalm 103:12.) I yog David nrogon “feni mal’af thilin e ngek nge ngal” e aram rogon ni ma chuweg Jehovah e denen rodad. Rib palog thilin e gin ma for e yal’ riy nge gin ma aw e yal’ riy. Re n’ey e be yip’ fan nnap’an nra n’ag Jehovah fan e denen rodad ma bod ni ke fek nga bang nrib palog rodad. Ke yan i tay e denen rodad nga bang nrib palog ndakuriy ban’en nra k’aring ni nge lemnag, ara puguran ngodad, ara gechignagdad ni bochan.​—Ezek. 18:​21, 22; Acts 3:19.

15. Mang e rayog ni ngad rin’ed ni faanra gubin ngiyal’ ni be magawon lanin’dad ni bochan e denen ni ud rin’ed kafram?

¹⁵ Uw rogon nrayog ni nge ayuwegdad fapi thin ni yog David ko Psalm 103 ni nge mich u wan’dad ni ke n’ag Jehovah fan e denen rodad? Faanra gubin ngiyal’ ni be magawon lanin’dad ni bochan e denen ni ud rin’ed kafram, ma rayog ni ngad fithed gadad ni nge lungudad: ‘Gu be pagtalin e n’en ni manang Jehovah ni aram e dawor gu flont ma ra n’ag fan e denen rok reb e tadenen ni ke kalngan’ ko denen rok ni bodeg, fa? Ma gur, ku da gur pagtalin e denen rog ni ke n’ag fan ma dabki gechignageg riy, fa?’ Der ma par Jehovah nga i lemnag e denen ni kad rin’ed kafram. Ere susun ni ku aram e n’en ngad rin’ed. (Ps. 130:3) Nap’an nra mich u wan’dad ni ke n’ag Jehovah fan e denen rodad, ma aram e ku gad ra n’ag fan u wan’dad e oloboch ni ud rin’ed kafram ma dab kud lemnaged.

16. Mu susunnag wenegan nrayog ni nge yib riy ni faanra i par be’ ma be lemnag e denen ni i rin’ kafram. (Kum guy e sasing.)

¹⁶ Baaray rogon nrayog ni ngan susunnag. Nap’an ni be kol be’ e yap’ ko karrow, ma rayog ni nge sap ko therek ni nge guy e n’en bay u wuriyal. Rayog ni nge rin’ e re n’ey yu ngiyal’ u nap’an ni be yan ko fare karrow, machane bay e riya’ riy ni faanra yigi par ni be yaliy e n’en be m’ug ko fagi therek. Faanra nge yan fare karrow nib fel’ rogon, ma thingari par ni be sap ko gin be sor ngay. Ku arrogon ni bay yu ngiyal’ ni faan gad ra lemnag e pi oloboch ni ud rin’ed kafram ma rayog ni nge ayuwegdad, ya rayog ni ngad filed ban’en riy me ayuwegdad ndab kud rin’ed bayay. Machane faanra ud pared ni gad be lemnag e pi oloboch ni ud rin’ed kafram, ma rayog ni nge magawonnag e tin nrayog ni ngad rin’ed ni fan ko pigpig rodad ngak Got e chiney ni bochan e yugu be magawon lanin’dad. Ere n’en nib fel’ ni ngad rin’ed e ngaud sapgad ko n’en bay nga m’on. Gad bay u daken fare pa’ i kanawo’ ni be sor ko yafos u lan e bin nib beech e fayleng ni ke micheg Got ni aram e gin gad ra “pag talin” riy e pi n’en nib kireb ni ke buch rodad ni ke par u lanin’dad.​—Isa. 65:17; Prov. 4:25.

UM MICHEG NGA LANIN’UM

17. Mang fan nib t’uf ni nge mich u wan’dad ni gad ba t’uf rok Jehovah ma gubin ngiyal’ ni ke fal’eg rogon ni nge n’ag fan e denen rodad?

¹⁷ Ba t’uf ni nge mich u wan’dad ni gad ba t’uf rok Jehovah ma gubin ngiyal’ ni ke fal’eg rogon ni nge n’ag fan e denen rodad. (1 John 3:19) Mang fan? Bochan e dabi tal Satan i guy rogon ni nge micheg nga lanin’dad ndabiyog ni nge t’ufegdad Jehovah ara n’ag fan e kireb rodad. Demtrug rogon ma taab n’en e be nameg ni aram e nge talegdad ndab kud pigpiggad ngak Jehovah. Gad manang nra ulul Satan i guy rogon ni nge rin’ e re n’ey, ya manang ndaki n’uw nap’an ni nge par. (Rev. 12:12) Ere thingar dab da paged ni nge gel ngodad!

18. Mang e rayog ni ngam rin’ ya ngari mich u wan’um ni gab t’uf rok Jehovah ma ke n’ag fan e denen rom?

¹⁸ Mu fol ko pi fonow ni kan weliy u lan fa binem e article ya ngari mich u wan’um ni gab t’uf rok Jehovah. Mu lemnag e n’en ke weliy Jehovah u murung’agen, ya ngari mich u wan’um ni ke n’ag fan e denen rom. Mu fal’eg i lemnag e n’en ni thagthagnag nga laniyan’ e piin nra yoloyed e Bible ni nga rogned u murung’agen rogon ni ma n’ag fan e denen. Dab mu pagtalin ni manang ndawor mu flont ma ra dag e runguy ngom. Ma dab mu pagtalin nnap’an nra n’ag fan e denen rodad, ma ma n’ag fan ni gubin. Faan ga ra rin’ e pi n’ey, ma rayog ni nge pagan’um nra runguyem Jehovah ni bod David, me yag ni nge lungum, “Jehovah, kammagar ni kam ‘n’ag fan urngin e kireb rog’!”​—Ps. 32:5.