Deer ko Piin Ma Beeg

Mingiyal’ e ra mus nap’an ni ngan machibnag fare thin nib fel’?

I gaar Jesus: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matt. 24:14) Fare bugithin ni Greek ni kan pilyeg ko re verse ney nge verse 6 ni “tomren,” ma kun pilyeg ko verse 13 ni “tomur” e teʹlos. Gal bugithin ney e be yip’ fan e ngiyal’ nra mus e fayleng rok Satan u nap’an e Armageddon. (Rev. 16:​14, 16) Ere gad ra ulul ni ngad machibnaged fare thin nib fel’ nge mada’ ko ngiyal’ ni kari chugur ni nge tabab e Armageddon. Re n’ey e ke thilyeg e n’en ka fin u dogned u murung’agen e re n’ey.

Ka u dogned ni gad ra tal i machibnag fare thin nib fel’ u nap’an nra tabab fare gafgow nib ga’ ko ngiyal’ ni yira thang fare Babylon nib Gilbuguwan. (Rev. 17:​3, 5, 15, 16) Ud lemnaged nnap’an nra buch e re n’ey, ma aram e dabki bing Jehovah e kanawo’ ko girdi’ ni nge m’agan’rad ko fare thin nib fel’. (Isa. 61:2) Kud lemnaged ni piin nra pared ni yad ba yul’yul’ ngak Jehovah u m’on ni nge tabab fare gafgow nib ga’ e aram e piin yad ra magey ni yad ba fos u nap’an e re gafgow nem. Ud taareb rogonnaged yad ko pi Jew nra mageygad ni yad ba fos u nap’an nni gothey yu Jerusalem ko duw ni 607 B.C.E. Pi girdi’ ney e kan mu’ i tay e pow ngorad u m’on riy ni bochan e ur pigpiggad ngak Jehovah mar fanenikayed e ngongol nib kireb ni un rin’. (Ezek. 5:11; 9:4) Machane de puluw e re n’ey ko fapi thin ni yog Jesus ko Matthew 24:14 ni be tamilangnag nsana ra par nib mab e kanawo’ ko girdi’ ni nge m’agan’rad ko fare thin nib fel’ nge mada’ ko ngiyal’ ni kari chugur ni nge yib e tomur u nap’an e Armageddon.

Bochan ni ke tamilang boch u wan’dad fare thin ni bay ko Matthew 24:​14, ma aram fan nib t’uf ni ngkud thilyeged rogon ni gad be weliy fare thin ni bay ko Revelation 16:21 ni murung’agen fare thin ni gad ra machibnag ni murung’agen e pufthin ni kan taarebrogonnag ko ayis ni gagang’ yang ni be mul u lang nga but’. Kan fal’eg i fil murung’agen e gal thin nu Bible ney ma ke tamilang ni bay rogon reb nga reb. Ni uw rogon? Fulweg riy e bay rogon nga rogon nra fol e girdi’ ko fare thin ni murung’agen Gil’ilungun Got. I yoloy apostal Paul ni fare thin nib fel’ e “bon ban’en nra yognag e yafos” u wan’ e “piin ni kar thapgad ngak Got.” Machane re thin ney e “bon ban’en nra nim’ ngay” u wan’ e pi toogor rok Got ara ban’en nib kireb u wan’rad. (2 Kor. 2:​15, 16) Yad be fanenikay fare thin ni murung’agen Gil’ilungun Got ya be tamilangnag nib kireb e re fayleng ney nib t’uf rorad ni Satan e be gagiyegnag, ma dabki n’uw nap’an ma yira thang.​—John 7:7; 1 John 2:17; 5:19.

Kum tay fanam i yan riy “nri ba” elmerin nra i mul fa yungi ayis ni gagang’ yang u lang nga but’ ni bod e n’uw. Re n’ey e rayog ni be yip’ fan nnap’an fare gafgow nib ga’ ma ra gel boch e machib ni ngad ted maku ra yoor boch e girdi’ nra taw e re thin ney ngorad. Bochan e re n’ey, maku ra yoor boch e girdi’ ni yad ra nang fithingan Jehovah. (Ezek. 39:7) Ere gur ra taw ko ngiyal’ nem u tomuren ni kan thang fare Babylon nib Gilbuguwan ma bay boch e girdi’ ni yad ra adag fare thin nib fel’ ni bod ni yad baadag bon ban’en nib fel’ bon, fa? Rayog nra buch e re n’ey. Sana ra yib ngan’rad ara yad ra nang ni ke yoor e duw ni be weliy e Pi Mich Rok Jehovah ni yira thang e pi yurba’ i teliw ni googsur.

Re n’ey e taareb rogon ko n’en ni buch u Egypt kakrom u tomuren fa Ragag i Gafgow. Tomuren ni gechignag Jehovah “urngin e pi got rok yu Egypt” ma “boor yugu boch e girdi’” ni gathi yad piyu Israel nra uned ko girdi’ rok. (Ex. 12:​12, 37, 38, BT) Rayog nnap’an nra guyed ni ke riyul’ e pi n’en ni yog Moses u murung’agen fa Ragag i Gafgow, ma aram mar dugliyed ni ngar uned ko girdi’ rok Jehovah.

En nra dugliy ni nge un ko girdi’ rok Jehovah u tomuren ni kan thang fare Babylon nib Gilbuguwan e ra mab e kanawo’ ngak ni nge un i ayuweg pi walagen Kristus ni ka yad bay u fayleng e ngiyal’ nem. (Matt. 25:​34-36, 40) Bin riyul’ riy e nap’an nra yan e tin ka bay ko piin kan dugliyrad nga tharmiy u m’on ni nge tabab e Armageddon, ma aram e ngiyal’ ni ke mus nap’an ni ngan dugliy e piin yad boch e saf.

Re n’ey ni kan tamilangnag rogon ni yibe weliy e be dag gelngin e t’ufeg nge runguy rok Jehovah. Arrogon, “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.”​—2 Pet. 3:9.