1925​​—Raay e Duw ni Ke Yan

DE BUCH E N’EN NRA LEMNAGED

Nap’an e duw ni 1925, ma boor e Piin Yad Ma Fil e Bible nra lemnaged ni aram e ngiyal’ nra Paradis e fayleng. Mang fan? Brother Albert Schroeder ni mang reb i girdien fare Ulung ni Ma Pow’iyey boch nga tomuren e yog ni gaar: “Ug lemnaged nra taw ko duw ni 1925 ma piin kan dugliyrad e yad ra yan nga tharmiy, ma piin yad ba yul’yul’ ni bod Abraham nge David e yira fasegrad ko yam’ mu u rogned e thin ko girdi’ rok Got u fayleng.” Ere nap’an nde buch e re n’ey, ma bay boch e walag ni mulan’rad.​—Prov. 13:12.

Yugu aram rogon ma yooren e Piin Yad Ma Fil e Bible e ra ululgad ko fare maruwel ni machib me tamilang u wan’rad e n’en nib milfan ngorad ni yad boch e Pi Mich Rok Jehovah. Am lemnag e maruwel nrin’ed ni ngar wereged e tin riyul’ u boor e binaw.

KUN NGONGLIY BOCH E RADIO STATION

Nap’an e duw ni 1924, ma boor e girdi’ nra motoyilgad ko fare radio station ni ka nog e WBBR ngay. Ere nap’an e duw ni 1925, me ngongliy e Piin Yad Ma Fil e Bible yugu reb e radio station nib chugur nga Chicago ni bay u Illinois. Re station nem e yima yog e WORD ngay. I yog Ralph Leffler ni ir bagayad e piin ni un i toy e re station nem nra nep’ nib gel e garbeb ma boor e girdi’ ni yad ma par u boch e binaw nib palog ni yad ma motoyil ko re station nem. Bod ni bay reb e tabinaw ni yad ma par u Pilot Station ni bay u Alaska nib pag 3,000 e mayel palogin ko re station nem nra motoyilgad nga reb e tin som’on e welthin nni pi’ riy. Tomuren nra motoyilgad ko re welthin nem, mar yoloyed bangi babyor ngar pied ko piin yad ma maruwel u rom ni yad be pining e magar ngorad ko welthin ni kan pi’ ni ke pi’ e athamgil nga lanin’rad ma ke ayuwegrad ni ngkur nanged boch ban’en u murung’agen Got nge Bible.

I weliy e The Watch Tower ko December 1, 1925 fan ni yag ni nge rung’ag boor e girdi’ ni yad ma par u boch e binaw nib palog e welthin ni yima pi’ ko re radio station nem ni gaar: “Re station ney ni yima yog e WORD ngay e aram reb e radio Station u Meriken nth’abi gel gelngin. Rayog ni ngan rung’ag e n’en yibe weliy riy u ga’ngin yang yu Meriken, ngu Cuba, ngki yan i mada’ ko lel’uch u Alaska. Boor e girdi’ ndawor rrung’aged e tin riyul’ u m’on riy nra adaged ni ngkur filed boch ban’en ni bochan e kar motoyilgad ko n’en yibe weliy ko re station nem.”

Ku aram e ngiyal’ ni be guy e Piin Yad Ma Fil e Bible rogon ni ngar fanayed e radio ni ngar machibnaged fare thin nib fel’ u Canada. Nap’an e duw ni 1924 min ngongliy reb e radio station u Saskatoon ni bay u Saskatchewan ni yima yog e CHUC ngay. Aram reb e tin som’on e radio station nni ngongliy u Canada ni fan nga barba’ e teliw. Nap’an e duw ni 1925, me t’uf ni ngan thilyeg tagil’ e re radio station nem. Ere chuw’iy e ulung rodad ba naun ni un kachido riy kafram ni yima yog e Regent Building ngay ni bay u Saskatoon, mar ngongliyed rogon ni ngan tay e re radio station ney riy.

Bochan e re station ney, ma boor e girdi’ u Saskatchewan ni ur pared u boch e binaw nib achig nge boch nib palog ni aram e som’on ni yag ni ngar rung’aged fare thin nib fel’. Bod ni bay be’ nib pin ni yima yog Mrs. Graham ngak ni ma par u reb e binaw nib palog nu tomuren ni rung’ag ba welthin ko re station nem, me yol ni nge ning ba ken e babyor nib puluw e thin riy ko Bible. I yog Brother George Naish ni m’ug ko thin rok nrib t’uf e ayuw rok, ma aram fan nra pied urngin ken fare babyor ni Studies in the Scriptures nge yan ngak. De n’uw nap’an nga tomuren me tabab Mrs. Graham i machibnag murung’agen Gil’ilungun Got nge yan i mada’ nga boch e binaw nib palog ko gin ma par riy.

KE TAMILANG U WAN’DAD REB E MACHIB NIB GA’ FAN

Bay reb e article nib ga’ fan ni thin ni Meriken ni kenggin e “Birth of the Nation” nni tay ko The Watch Tower ko March 1, 1925. Mang nrib ga’ fan e re article ney? Ke n’uw nap’an ni ke nang e Piin Yad Ma Fil e Bible ni Satan e ir e be gagiyegnag e pi kan nib kireb, nge pi yurba’ i teliw ni googsur, nge pi am, nge pi siyobay ko re fayleng ney. Machane i ayuweg “fare tapigpig nib yul’yul’ ma ba gonop” e pi walag u daken e re article ney ni ngar nanged ni ku bay e ulung rok Jehovah nib thil ko birok Satan mab togopuluw ngay. (Matt. 24:45) Maku reb e tamilangnag fare tapigpig ni tabab Gil’ilungun Got ko gagiyeg ko duw ni 1914, maku aram e re duw ‘nni mahl u thamiy’ min chuweg Satan nge pi moonyan’ rok u tharmiy nga non’rad nga fayleng.​—Rev. 12:​7-9.

Bay boch e Piin Yad Ma Fil e Bible nde m’agan’rad ko biney e machib ni ka fini tamilang. I yog e re article nem ni gaar: “Faanra bay boch e piin yad ma beeg fare Wulyang ko Damit nder m’agan’rad ko n’en kan weliy u roy, ma yibe yog ngorad ni ngar gum’an’naged yad ngar sonnaged Somol mar ululgad ko pigpig u fithik’ e yul’yul’.”

Bay reb e pioneer ni be’ nu Britain ni ka nog Tom Eyre ngak ni weliy rogon laniyan’ yooren e Piin Yad Ma Fil e Bible u murung’agen e re article nem ni gaar: “Ri felfelan’ e pi walag u rogon ni kan tamilang e re thin ney ko Revelation 12. Nap’an nug nanged ni ke tabab Gil’ilungun Got ko gagiyeg u tharmiy, ma ri gamad ba felfelan’ ngay ni nggu weliyed e re thin nib fel’ ney ko girdi’. I k’aringmad ni nggu adaged ni nggu elmeringad boch ko machib ni gamad be tay, miki ayuwegmad ni nggu nanged nra rin’ Jehovah boch ban’en nib manigil boch nga m’on.”

NGAN MACHIBNAG MURUNG’AGEN JEHOVAH

Ngiyal’ ney e ba ga’ ni ma weliy e Pi Mich Rok Jehovah fare thin ni bay ko Isaiah 43:10 ni be gaar: “Gimed e girdi’ nu Israel, gimed e mich rog; kug dugliymed ni ngam manged ba nam ni tapigpig rog.” Machane ba ga’ ni gathi ri yima weliy murung’agen e re thin nu Bible ney u lan e pi babyor rodad u m’on ko duw ni 1925. Machane i thil e re n’ey. Nap’an e duw ni 1925, min weliy murung’agen fare thin ko Isaiah 43:10 nge 12 u lan 11 ken e The Watch Tower!

Tungun e August ko duw ni 1925, me muulung e Piin Yad Ma Fil e Bible nga reb e convention nni tay u Indianapolis u Indiana. Bay ba thin ni yog Joseph F. Rutherford nni tay nga daken e program ko re convention ney ni be gaar: “Kad bad ko re convention ney ni nge pi’ . . . Somol gelngidad ni ngad sulod ko fare maruwel ni machib ni ke gel boch e pasig rodad ni ngad manged boch e pi mich rok.” U lan e re meruk i rran nem nni tay e re convention ney min pi’ e athamgil nga laniyan’ e piin nra uned ko re muulung nem ni ngar machibnaged murung’agen Jehovah u nap’an ni ke mab e kanawo’ ngorad.

Nap’an e Sabado ko August 29 me pi’ Brother Rutherford ba welthin ni thin ni Meriken ni kenggin e “A Call to Action.” I weliy feni ga’ fan fare maruwel ni machib ni gaar: “I gaar Jehovah ko girdi’ rok . . . : ‘Gimed e mich rog. I gag e Got.’ Ngemu’ me tay chilen ngorad ni gaar: ‘Mi gimed tining e pow riy nga lang ya nge yag ni nge nang e pi nam.’ Kemus ni yigoo piin nrayog ni ngar manged pi mich rok Jehovah e aram e piin be ayuwegrad u daken gelngin nib thothup ni bochan e yad girdien.”​—Isa. 43:​12, 13; 62:10.

Tomuren e re welthin ney ni pi’ Brother Rutherford me beeg bangi babyor ni thin ni Meriken ni kenggin e “Message of Hope.” Urngin e piin yad be motoyil ni m’agan’rad ko re thin ney ni be yog ni kemus ni yigoo Gil’ilungun Got e rayog ni nge yibnag e “gapas, nge flaab, me fal’eg fithik’ i dowey, me pi’ e yafos, nge puf rogon, nge felfelan’ ndariy n’umngin nap’an.” Boch nga tomuren min pilyeg e gi babyor ney nga yugu boch e thin min printnag ni bangi tract. Sogonap’an 40 milyon ken e re tract ney nni wereg ko girdi’.

Ki yan in e duw nde tabab e Piin Yad Ma Fil e Bible ni ngar fanayed fare ngachal ni Pi Mich Rok Jehovah. Machane aram e be tabab ni nge tamilang u wan’rad e n’en nib milfan ngorad ni yad e pi mich rok.

KAN SUL NGAK E PIIN YAD BAADAG E MACHIB

Nap’an ni yoor e Piin Yad Ma Fil e Bible u ga’ngin yang e fayleng, ma aram mu kun pi’ e athamgil nga lanin’rad ni ngar sulod ngak e piin nra daged kafram ni yad baadag ni ngar motoyilgad ko fare thin nib fel’. Tomuren fare campaign nni tay ni ngan wereg fagi tract ni thin ni Meriken ni kenggin e Message of Hope, me yog fare Bulletina ni gaar: “Mu sulod ngam guyed e piin nim pied bang fagi tract ngorad ni kenggin e Message of Hope.”

Baaray e n’en ni yog bagayad e Piin Ma Fil e Bible ni ma par u Plano ni bay u Texas u lan fare Bulletin ko January ko duw ni 1925 ni gaar: “Kug gingad ni bochan e nap’an ni kug sulod ko yungi n’en ug machibgad riy kafram, ma boor e girdi’ ni kar motoyilgad. Bay bochi binaw ko gin gamad ma machib riy ni lal yay ni kan machib riy u lan fare ragag i duw ni ke yan. . . . Dawori n’uw nap’an ni ka fini machib Sister Hendrix nge chitinag u rom ma boor e babyor ni kar weregew ko girdi’.”

Ku bay reb e pioneer ko fare nam nu Panama ni yoloy ni gaar: “Boor e girdi’ nra tulufed gag u nap’an nug wan nga taferad ni thil e lem rorad u nap’an nug wan nga taferad ko yay ni migid ara yay ni dalip ngay. Biney e duw e ba ga’ nug be sul ko piin ug mada’nagrad kafram, ma bay boch i yad ni kar motoyilgad.”

YIBE SAP KO N’EN BAY NGA M’ON

Nap’an ni yol Brother Rutherford ngak e piin pioneer u lan bangi babyor ni ma yoloy ni gubin e duw, me weliy murung’agen e maruwel ni kan tay u lan e re duw nem nge maruwel ni bay ni tay boch nga m’on. I yog ni gaar: “Boor e piin ke kireban’rad ni kam fal’eged lanin’rad u lan fare duw ni ke yan. Ba gel e felfelan’ ni kam ted ko re maruwel ney . . . Bin migid e duw ni bayi yib e ra mab e kanawo’ ngomed ni ngam weliyed murung’agen Got nge Gil’ilungun, mi gimed fol ko pi motochiyel ni ke ngongliy ni fan ko girdi’. . . . Ere ngad ululgad ni ngad tangnaged e sorok ngak e Got nge Pilung rodad.”

Tungun e duw ni 1925, me tabab e pi walag i yarmiy rogon ni ngan ga’nag e Bethel u Brooklyn. Nap’an e duw ni 1926, ma yad ra tabab nga reb e maruwel ko dimow naun nib ga’ ni fan ko ulung.