L’agruw i Girdien Fare Ulung ni Ma Pow’iyey ni Ka Yow Bbeech

NAP’AN e October 5, 2024, mi nog u nap’an fare annual meeting ni kan dugliy Brother Jody Jedele nge Jacob Rumph ni ngar mangew bang ko fare Ulung ni Ma Pow’iyey ko Pi Mich Rok Jehovah. Boor e duw ni ke pigpig e gal walag ney ngak Jehovah u fithik’ e yul’yul’.

Ni gargeleg Brother Jedele u Missouri u Meriken, min chuguliy ko tin riyul’. Yad ma par chon e tabinaw rok u bangi ban’en ni buchuuw e Pi Mich Rok Jehovah riy. Ere boor e walag nib thilthil e gin kar bad riy ni ur bad ngaram ni ngar pied e ayuw ko machib ni mada’nagrad. Rib ga’ angin ni yib ngak ni bochan e t’ufeg ni ur daged nge rogon nib taareban’rad. Ni taufenag ko October 15, 1983. Ri baadag e machib ma tomuren ni chuw u skul, me tabab ko regular pioneer ko September ko duw ni 1989.

Nap’an ni kab fel’ yangaren Brother Jedele, ma gallabthir rok e yow ma fekrow e bin baaram e ppin ni walagen nib bitir ngak ni nga ranod ra guyed e Bethel. Re n’ey e k’aringrow ni ngar namegew ni ngar pigpiggow u Bethel, ma yow l’agruw ni yag ni ngar rin’ew e re n’ey. I tabab Brother Jedele ko pigpig u Bethel u Wallkill ko September ko duw ni 1990. Som’on e i maruwel ko Cleaning Department, me boch nga tomuren me yan ko Medical Services.

Ngiyal’ nem e be yoor girdien e pi ulung ni yima non riy ni thin ni Spanish nib chugur ngaram, ma ke t’uf boch e walag ni pumoon ni ngar pied e ayuw ko pi ulung ney. Ere yan i un nga reb e pi ulung nem, me tabab i fil e thin ni Spanish. De n’uw nap’an nga tomuren mar mada’gow Damaris nreb walag nib pin nib pioneer. Munmun mar mabgolgow me un ngak ko pigpig u Bethel.

Nap’an e duw ni 2005 mar talgow ko pigpig u Bethel ni ngar ayuwegew e gallabthir rorow. Ngiyal’ nem e ur pigpiggow ni yow l’agruw e regular pioneer. I pi’ Brother Jedele fare skul ni Pioneer Service School, miki pi’ e ayuw ko Hospital Liaison Committee nge Regional Building Committee ko gin ma par riy.

Nap’an e duw ni 2013, min pining Brother nge Sister Jedele ni ngar sulow bayay nga Bethel ni fan ko dimow naun ni yibe tay u Warwick. Ku immoy ba ngiyal’ ni ur pigpiggow u Patterson nge Wallkill. Ka i pi’ Brother Jedele e ayuw ko fare Local Design/Construction Department nge Hospital Information Services. Nap’an e March ko duw ni 2023 min dugliy ni nge mang bagayad fapi walag ni pumoon ni ma pi’ e ayuw ko fare Service Committee. Nap’an nra lemnag e maruwel ni i rin’, ma ma yog ni gaar: “Bay yu ngiyal’ nrayog ni ngam rus u nap’an ni kan pi’ boch e maruwel nib beech ngom. Machane aram e ngiyal’ ndab mu pagtalin ni ngam taga’ ngak Jehovah, ni bochan e ir e ma ayuwegdad ni ngad rin’ed urngin ban’en ni ke yog ngodad ni ngad rin’ed.”

Ni gargeleg Brother Rumph u California u Meriken. Nap’an ni kab bitir me tal e chitiningin ko muulung nge machib, machane i guy rogon ni nge fil e tin riyul’ u Bible ngak. Maku reb e gubin e duw ni ma yan i guy e titaw rok ni ir reb e Pi Mich nib yul’yul’. Ir e ayuweg ni nge adag e tin riyul’, ma nap’an ni ke gaman 13 e duw rok me yog ni ngan fil e Bible ngak. I un ko taufe u nap’an ni kab fel’ yangaren ko September 27, 1992. Boch nga tomuren me sul e chitiningin ko muulung nge machib bayay, me mon’og e chitamangin nge walagen ni yow l’agruw ko tin riyul’ mar uned ko taufe.

Nap’an ni kab fel’ yangaren Brother Rumph, ma i guy gelngin e felfelan’ ni ma tay e piin pioneer. Ere tomuren ni chuw u skul, me tabab ko pioneer ko September ko duw ni 1995. Nap’an e duw ni 2000, me yan i par nga Ecuador ko gin nib t’uf boch e tamachib riy. Aram e gin nra mada’gow Inga riy nreb e walag nib pin ni be’ nu Canada nib pioneer, me munmun mi yow mabgol. Tomuren nra mabgolgow, ma ur pigpiggow u reb e binaw u Ecuador ni bay in e walag riy. Chiney e ke sum reb e ulung u rom ni ke yoor e walag riy.

Munmun min dugliy Brother nge Sister Rumph ni ngar mangew special pioneer, me boch nga tomuren ma ur lekagew boch e ulung. Nap’an e duw ni 2011 mar unew ko bin 132 e class ko fare skul u Gilead. Tomuren nra mu’nagew e re skul nem, ma ur pigpiggow u boch e nam nib thilthil u ga’ngin yang e fayleng maku boor e maruwel ni ur rin’ew, ya ur pigpiggow u Bethel, ma kur pigpiggow ni yow l’agruw e missionary, maku yow be lekag e ulung. Ki pi’ Brother Rumph fare School for Kingdom Evangelizers.

Bochan fare m’ar ni COVID-19, ma aram me sul Brother nge Sister Rumph nga Meriken. Ere ni piningrow ni ngar pigpiggow u Bethel u Wallkill, ma aram mu un fil ngak Brother Rumph rogon ni nge rin’ boch e maruwel ko Service Department. Boch nga tomuren mu kun pi’row ni ngar sulow bayay ko branch u Ecuador, ma aram mi i pigpig Brother Rumph ni ir reb i girdien e Branch Committee. Nap’an e duw ni 2023, min pi’row nga Warwick. Nap’an e January ko duw ni 2024, min dugliy Brother Rumph ni nge mang bagayad fapi walag ni pumoon ni ma pi’ e ayuw ko fare Service Committee. Nap’an nra lemnag e yungi n’en ka i pigpig riy, ma ma yog ni gaar, “Gathi gin ga be pigpig riy e ma ga’nag fan e maruwel ni ga be rin’, ya piin gimed be maruwel u taabang.”

Rib ga’ fan u wan’dad e maruwel nib gel ni be rin’ e gal walag ney, ma ri yow “ba t’uf” rodad.​—Fil. 2:​29, NW.