Jesus e Prist Rodad Nth’abi Tolang ni Ma Kireban’ Ngodad

1-2. (a) Mang fan ni pi’ Jehovah Fak ni nge yib nga fayleng? (b) Mang e gad ra weliy ko re article ney? (Hebrews 5:​7-9)

SOGONAP’AN 2,000 e duw ni ke yan, me pi’ Jehovah Got Fak nrib t’uf rok ni nge yib nga fayleng. Mang fan? Reb i fan e bochan ni nge chuweg e girdi’ u tan gelngin e denen nge yam’, me sulweg nga rogon e pi n’en ke kirebnag Satan. (John 3:16; 1 John 3:8) Ku manang Jehovah ni n’en nra buch rok Jesus u nap’an nib girdi’ e ra fal’eg rogon ni nge mang Prist Nth’abi Tolang ni ma kireban’ ngodad, ma ma runguydad. I mang Jesus Prist Nth’abi Tolang u tomuren nni taufenag ko duw ni 29 C.E.a

² Gad ra weliy ko re article ney rogon ni bung rogon Jesus ni nge mang Prist Nth’abi Tolang ni ma kireban’ ngodad u daken e pi n’en ni i buch rok u fayleng. Ra yoor ban’en ni tamilang u wan’dad u murung’agen rogon ni ‘par Jesus ni kari fel’ rogon’ ni nge rin’ e maruwel rok, ma ra mom boch ngodad ni ngad meybilgad ngak Jehovah u nap’an ni ke mulan’dad ni bochan e denen ara meewar rodad.​—Mu beeg e Hebrews 5:​7-9.

KE YIB FAK GOT NRIB T’UF ROK NGA FAYLENG

3-4. Mang boch ban’en nri thil u rogon e par rok Jesus u nap’an ni yib nga fayleng?

³ Boor i gadad e ke thil boch ban’en u rogon e par rok, ni bod ni ke chuw u tafen ke yan i par nga bang nib palog rok chon e tabinaw nge pi fager rok. Ireray boch ban’en ni ma thil u rarogon e par rodad nde mom. Machane dariy bagadad ni ke thil rogon e par rok ni bod Jesus. Nap’an ni immoy u tharmiy ma ir e th’abi tolang u fithik’ e pi engel rok Jehovah. Ba t’uf rok Jehovah ma gubin ngiyal’ ni i par nrib felfelan’ ni bochan e ur maruwelgow e Chitamangin u taabang. (Ps. 16:11; Prov. 8:30) Yugu aram rogon, ma be yog e Filippi 2:7 ni “pag e flaab rok ni gubin” u tharmiy nge yib i par nga fithik’ e girdi’ u fayleng ndawor ra flontgad.

⁴ Kum lemnag e n’en ni buch rok Jesus u nap’an nni gargeleg ngu nap’an ni kab bitir. Ba gafgow e tabinaw rok ni bochan e kemus ni l’agruw wochi arche’ nib achig e yag ni nge pi’ e gallabthir rok ni maligach u tempel u tomuren ni kan gargeleg. (Lev. 12:8; Luke 2:24) Nap’an ni nang Herod ni Pilung ni be’ nib kireb ni kan gargeleg Jesus, me guy rogon ni nge thang e fan rok. Ere mil e tabinaw rok nga Egypt u lan ba ngiyal’ ni bochan e ngan ayuweg e yafos rok. (Matt. 2:​13, 15) Rib thil e n’en ni i buch rok Jesus u fayleng nga rogon e par rok u tharmiy!

5. Mang e i guy Jesus u nap’an ni immoy u fayleng, ma uw rogon ni ayuweg e re n’ey ni nge rin’ e maruwel rok ni ir e Prist Nth’abi Tolang? (Kum guy e sasing.)

⁵ Nap’an ni immoy Jesus u fayleng, ma boor e girdi’ ni i guyrad ni yad be gafgow. Dariy e maruwar riy ni yim’ boch e girdi’ nib t’uf rok nib muun Josef ngay ni chitamangin ni pof. Nap’an ni i machib ma i mada’nag e girdi’ ni bay e daraw rorad, nge piin yad ba mmalmit, nge piin nib mugutgut, nge gallabthir ni ke yim’ fakrad, ma i runguyrad. (Matt. 9:​2, 6; 15:30; 20:34; Mark 1:​40, 41; Luke 7:13) Riyul’ ni i guy e girdi’ ni yad be gafgow u nap’an ni immoy u tharmiy. Machane nap’an ni immoy u fayleng nib girdi’, ma rayog ni ngari nang rogon laniyan’ e girdi’ u nap’an ni yad be gafgow. (Isa. 53:4) Pi n’en ni i buch rok u fayleng e ayuweg ni nge nang rogon laniyan’ e girdi’, nge pi n’en ma kankanan’rad ngay, nge amith ni yad ma yan u fithik’. Mus ngak miki aw parwon, miki magawon laniyan’, miki kireban’ ni bod e n’en ma buch ko girdi’.

I DAG JESUS NI MANANG ROGON LANIYAN’ E GIRDI’

6. Mang e gad be fil ko fare yiiy rok Isaiah ni murung’agen e runguy nra i dag Jesus ko girdi’? (Isaiah 42:3)

⁶ Nap’an ni i machib Jesus ma i dag ni manang rogon laniyan’ e piin un gafgownagrad. Re n’ey ni i rin’ e i lebguy boch ban’en ni kan yiiynag. Piin nrib mich Jehovah u wan’rad ni bay murung’agrad u lan e Pi Babyor ko Bible nni Yoloy Nsom’on ni Thin ni Hebrew e bay yu ngiyal’ ni yima taareb rogonnagrad ko milay’ nib dammal e woldug riy ara yu ke gek’iy nib gagang’ ken. (Ps. 92:12; Isa. 61:3; Jer. 31:12) Machane piin yad ba gafgow nge piin un rin’ boch ban’en nde mat’aw ngorad e kan taareb rogonnagrad nga ba ley i rouy ni ke m’ing nge ba magal ni be n’en ni nge math. (Mu beeg e Isaiah 42:3; Matt. 12:20) Nni thagthagnag nga laniyan’ Isaiah ni profet ni nge fanay e gal thin ney ni nge yiiynag rogon nra dag Jesus e t’ufeg nge runguy ngak e piin ndariy farad u wan’ yugu boch e girdi’.

7-8. Uw rogon ni lebguy Jesus e yiiy rok Isaiah?

⁷ Matthew ni yoloy reb e Gospel e dag ni lebguy Jesus fapi thin ni yog Isaiah ni gaar: “Dabi t’ar ba ley i rouy ni ke m’ing, ma dabi thang ba magal ni be n’en ni nge math.” Boor e maang’ang ni i ngongliy Jesus ni fan ngak e piin un rin’ boch ban’en nde mat’aw ngorad nge piin yad be lemnag ndab ki fel’ e par rorad. Bagayad e pi girdi’ ney e be’ nib moon ni kaygi foch e daraw u dow. Ba mudugil ni lemnag ndakuriy ba ngiyal’ nra gol ko m’ar rok ara yan ko gin bay chon e tabinaw nge pi fager rok riy. (Luke 5:​12, 13) Ku bay reb e pumoon nib biling mab kireb e thin u l’igin. Am lemnag rogon laniyan’ u nap’an nra i guy e girdi’ u tooben ni yad be non, machane dabiyog ni nge nang fan e n’en yad be yog. (Mark 7:​32, 33) Machane gathi kemus aray.

⁸ Boor e Jew u nap’an Jesus ni ur lemnaged ni piin bay ba mit e m’ar rorad e yibe gechignagrad ni bochan e denen rorad ara denen ko gallabthir rorad. (John 9:2) Bochan e re n’ey nde puluw ni ur lemnaged, ma aram fan ni un k’aring e piin bay ba mit e m’ar rorad ni ngar lemnaged ndariy farad. Machane i golnagrad Jesus me ayuwegrad ni ngar nanged ni be lemnagrad Got. Uw rogon ni be pi’ e re n’ey e pagan’ nga lanin’dad?

9. Uw rogon ni be tamilangnag e Hebrews 4:​15, 16 ni Prist rodad Nth’abi Tolang ni bay u tharmiy e riyul’ ni ma kireban’ ko girdi’ ndawor ra flontgad?

⁹ Mu beeg e Hebrews 4:​15, 16. Rayog ni nge pagan’dad ngay ni gubin ngiyal’ nra i kireban’ Jesus ngodad. Mang e be yip’ fan e re n’ey? Be’ ni ma kireban’ ko girdi’ e nap’an nra guy be’ ni be gafgow ara be kireban’, maku ma kireban’ ngak. Fare bugithin ni Greek ni kan pilyeg ni “kireban’” e be yip’ fan ni ngam lemnag e n’en be buch rok be’ nge rogon laniyan’ u reb e kanawo’ ni gowa gur e be buch rom. Pi maang’ang ni i ngongliy Jesus ni bay murung’agen u Bible e be dag gelngin ni i runguy e piin yad be gafgow. Da i golnag e girdi’ ni bochan e be lemnag ni ban’en nthingari rin’, ya rin’ ni bochan e riyul’ ni be lemnagrad ma baadag ni nge ayuwegrad. Bod nnap’an ni golnag fare moon nib daraw, ma rayog ni nge par u orel nge golnag e m’ar rok, machane n’en ni rin’ e yan i math ngak nrayog ni fin aray e yay nsom’on u lan boor e duw ni ke math be’ ko re moon ney! Ki fek Jesus fare moon nib biling nga bang nib palog ko girdi’ me golnag u nap’an ni yigoo yow. Ma nap’an ni darifannag ba Farise fare pin ni ke kalngan’ ko denen rok me maluknag rifrifen ay Jesus ko lu’ rok me faley nga piyan lolugen, me yog Jesus boch e thin ni nge ayuweg. (Matt. 8:3; Mark 7:33; Luke 7:44) Da i siyeg Jesus e piin yad ba m’ar ara piin kar ngongliyed reb e denen nib ubchiya’. Ya i pining e pi girdi’ ney ni ngar bad ngak miki dag ngorad ni yad ba t’uf rok. Ere rayog ni nge pagan’dad ngay ni arrogodad ni ku ra i kireban’ ngodad.

GAD MA FOLWOK KO FARE PRIST RODAD NTH’ABI TOLANG E NGIYAL’ NEY

10. Mang boch ban’en ni kan ngongliy e ngiyal’ ney nrayog ni ngad fanayed ni ngad ayuweged e piin nib biling nge piin malmit? (Kum guy e sasing.)

¹⁰ Bochan ni gadad boch i gachalpen Jesus ni gad ba yul’yul’, ma gad ma guy rogon ni ngad folwokgad rok u rogon ni i dag e t’ufeg nge runguy ko girdi’, ma be dag ni manang rogon lanin’rad. (1 Pet. 2:21; 3:8) Yugu aram rogon ndabiyog ni ngad golnaged e piin nib biling ara piin malmit, machane rayog ni ngad ayuweged yad ko tirok Got ban’en. Bod ni bay boch e babyor nib puluw e thin riy ko Bible ni kan ngongliy e chiney u boor ko 100 mit e thin ni fan ko piin nib biling. Kub pag 60 mit e thin ni kan ngongliy boch e babyor riy ni fan ko piin malmit. Kub pag 100 mit e thin ni yibe ngongliy e pi video rodad riy ni bay laman be’ riy ni be weliy e n’en be buch u lan fare video. Kan ngongliy e pi n’ey ni nge ayuweg e piin nib biling nge piin malmit ni ngar chugurgad ngak Jehovah nge Fak.

11. Uw rogon ni ma folwok e ulung rok Jehovah u rogon ni i dag Jesus e runguy ngak urngin mit e girdi’? (Acts 2:​5-7, 33) (Kum guy e sasing.)

¹¹ Boor ban’en ni be rin’ e ulung rok Jehovah ni ngar ayuweged urngin mit e girdi’. Dab mu pagtalin nu tomuren nni faseg Jesus ko yam’, me puog gelngin Got nib thothup nga daken pi gachalpen ya nge yag ni rung’ag e piin kar bad ni ngar uned ko fare madnom ni fan ko rofen ni Pentekost fare thin nib fel’ ‘nlungun e re nam ni kar bad riy.’ (Mu beeg e Acts 2:​5-7, 33.) Ngiyal’ ney e ku be ngongliy e ulung rodad boch e babyor nib puluw e thin riy ko Bible u boor ko 1,000 mit e thin nib puluw nga rogon ni be pow’iy Jesus e ulung. Bay boch e pi thin ney ni kemus nri in e girdi’ e yad ma yog. Bod ni bay boch e thin ni ma yog e piin ka nog e Amerindian ngorad ni kemus nri in e girdi’ u North nge South America e yad ma yog. Yugu aram rogon mab pag 160 e pi thin nem ni kan ngongliy e pi babyor rodad riy, ya nge yag ni rung’ag e piin yad ma yog e pi thin nem fare thin nib fel’. Kub pag 20 mit e thin ni ma yog e piin ka nog e Romany ngorad ni kan ngongliy e babyor rodad riy. Bokum biyu’ e piin yad ma non ko pi thin ney ni kar manged boch e tapigpig rok Jehovah.

12. Ku mang boch e ayuw ni be pi’ e ulung rok Jehovah?

¹² Gathi kemus ni boor ban’en ni be rin’ e ulung rok Jehovah ni ngar wereged fare thin nib fel’, ya ku yad be ayuweg e piin kar gafgowgad ni bochan boch ban’en ni ma buch ni yima gafgow riy. Aram fan ni bokum biyu’ e walag e kar ognaged yad ni ngar ayuweged e pi walag ni ke t’uf e ayuw rorad. Ku ma ngongliy e ulung rodad boch e naun ni tagil’ e liyor nrayog ni nge muulung e girdi’ ngay ni ngkur filed boch ban’en u murung’agen e t’ufeg ni be dag Got ngorad.

RAYOG NI NGE AYUWEGEM E PRIST RODAD NTH’ABI TOLANG

13. Mang boch e kanawo’ ni ma ayuwegdad Jesus riy?

¹³ Bochan ni Jesus e ir faen nib fel’ rogon ni ma gafaliy e saf, ma aram fan ni ma guy rogon ni nge yag ngodad e tin nib t’uf rodad ni fan ko tirok Got ban’en. (John 10:14; Efe. 4:7) Yu ngiyal’ e rayog ni ngad lemnaged ni gad bod ba magal ni be n’en ni nge math ara ba ley i rouy ni ke m’ing. Rayog ni ngari mulan’dad ni bochan ba mit e m’ar ni ke yib ngodad nib ubchiya’, ara ban’en nib kireb ni kad rin’ed, ara bochan ni ke kireb thildad reb e walag. Rayog nib mo’maw’ ni ngad yiluyed e changar rodad ko athap rodad ni bay nga m’on ma dab kud lemnaged e pi magawon nge gafgow ni gad be mada’nag e chiney. Machane dab mu pagtalin ni be guy Jesus e magawon ni ga be mada’nag ma manang rogon lanin’um. Runguy rok ngom e be k’aring ni nge ayuwegem. Bod nrayog ni nge fanay gelngin Got nib thothup ni nge pi’ gelngim u nap’an ni kam meewar. (John 16:7; Titus 3:6) Ku rayog ni nge fanay e piin piilal nge pi walag u lan e ulung ni ngar pied e athamgil nga lanin’um mar ayuweged gur.​—Efe. 4:8.

14. Mang e rayog ni ngad rin’ed u nap’an ni ke mulan’dad?

¹⁴ Faanra ke mulan’um, mag fal’eg i lemnag e n’en be rin’ Jesus ni ir e Prist rodad Nth’abi Tolang. Dab mu pagtalin ni gathi kemus ni pi’ Jehovah ni nge yib nga fayleng ni nge pi’ e yafos rok ni nge biyuliydad, ya ku bochan e nge ayuweg ni ngari tamilang u wan’ rogon e magawon ni ma mada’nag e girdi’ ndawor ra flontgad. Ere nap’an nra mulan’dad ni bochan e denen rodad ara pi meewar rodad, ma rayog rok Jesus ma kub m’agan’ ngay ni nge ayuwegdad “ko ngiyal’ ndabi siy ni ngar ni ayuwegdad.”​—Heb. 4:​15, 16.

15. Mu weliy ban’en ni ke buch ni be dag rogon nrayog ni ngan ayuweg be’ ni ke malog ko ulung rok Jehovah ni ngki sul bayay.

¹⁵ Ku ma pow’iy Jesus e girdi’ rok ni ngar gayed mar ayuweged e piin kar maloggad ko ulung rok Jehovah. (Matt. 18:​12, 13) Am lemnag e n’en ni buch rok Stefano.b Tomuren 12 e duw ni kan tharbog ko ulung, me dugliy ni nge yan i un nga reb e muulung. I yog ni gaar: “De mom e re n’ey, machane gu baadag ni ngkug mang bang ko tabinaw rok Jehovah bayay. Piin piilal nug mada’gad e ra daged ngog ni yad ba felfelan’ ni nggu sul ko ulung. Bay yu ngiyal’ ni ug lemnag ndariy fag, ma gu baadag ni nggu tal ndab kug athamgil. Machane me puguran e piin piilal ngog ni baadag Jehovah nge Jesus ni nggu athamgil. Nap’an nni sulwegeg ko ulung, mab gel e t’ufeg ni dag e ulung ngomad chon e tabinaw rog. Munmun me m’agan’ leengig ngay ni nge un ko fol Bible, ma chiney e gamow ma pigpig ngak Jehovah u taabang.” Ba mudugil nib gel e felfelan’ ni be tay fare Prist rodad Nth’abi Tolang ni be guy ni yibe ayuweg e piin kar kalgadngan’rad ya nge yag ni ngkur sulod ko ulung bayay!

16. Mang fan ni gab felfelan’ ni bay reb e Prist rodad Nth’abi Tolang ni ma kireban’ ngodad?

¹⁶ Nap’an ni immoy Jesus u fayleng, ma boor e girdi’ ni i ayuwegrad ko ngiyal’ nib puluw ni ngan ayuwegrad riy. Ngiyal’ ney e rib pagan’dad ngay nra ayuwegdad ko ngiyal’ nib t’uf e ayuw rodad. Mu lan e bin nib beech e fayleng e ra ayuweg e piin yad ra fol ni nge chuw wenegan e denen rorad mar sulod ngkur flontgad bayay. Ri gad be pining e magar ngak Jehovah ni Got rodad ni gad ba t’uf rok ma ma runguydad ni ke dugliy Fak ni nge mang Prist rodad Nth’abi Tolang ni ma kireban’ ngodad!