“Gur Be’ Nrib Ga’ Fam”!

1-2. Uw rogon nrayog ni ngad nanged nib ga’ fadad u wan’ Jehovah?

YUGU aram rogon nib ga’ fan e pi tapigpig rok Jehovah u wan’, machane bay boch i yad ni yad ma lemnag ndariy farad. Sana rayog ni bay be’ ni ka i darifannagrad. Aray rogon e lem rom, fa? Faanra arrogon, ma uw rogon nrayog ni ngam nang nib ga’ fam u wan’ Jehovah?

² Sana rayog nib fel’ ni ngam beeg murung’agen boch e girdi’ u Bible ni be dag rogon ni baadag Jehovah ni ngaun ngongol ko girdi’. Jesus ni Fak e i tayfan e girdi’. Re n’ey ni i rin’ e be dag ni ir nge Chitamangin e ba ga’ fan u wan’row e piin yad ma lemnag ndariy farad. (John 5:19; Heb. 1:3) Gad ra weliy ko re article ney: (1) rogon ni i ayuweg Jesus e girdi’ ni ngar nanged nib ga’ farad nge (2) rogon nrayog ni ngad micheged nga lanin’dad nriyul’ nib ga’ fadad u wan’ Got.​—Hag. 2:7.

ROGON NI AYUWEG JESUS E GIRDI’ NI NGAR NANGED NIB GA’ FARAD

3. Uw rogon e ngongol rok Jesus ko girdi’ nu Galile ni ur ninged e ayuw ngak?

³ Nap’an ni be machib Jesus u Galile, ma boor e girdi’ nra bad ra guyed ni ngar motoyilgad ngak me golnagrad. I yog Jesus ni pi girdi’ nem e “yad bod e saf nde moy rorad e en ni ma gafaliyrad.” (Matt. 9:36; mu guy e study note.) Ma darifannagrad e pi tayugang’ ko teliw maku yad ma yog ni “ke bucheg Got waathrad!” (John 7:​47-49; study note) Machane i tay Jesus farad ni aram e i tay e tayim ni nge skulnagrad me golnag e m’ar rorad. (Matt. 9:35) Maku reb e ki fil ngak e pi apostal rok rogon ni ngar rin’ed fare maruwel ni machib me pi’ mat’awrad ni ngar golnaged e m’ar ko girdi’, ya nge yag ni ngkur ayuweged yugu boch e girdi’.​—Matt. 10:​5-8.

4. Mang e gad be fil u rogon e ngongol rok Jesus ngak e piin ur motoyilgad ngak?

⁴ Bochan ni i dag Jesus e sumunguy nge tayfan ko piin ur motoyilgad ngak, ma aram me dag ni piin nib ga’ ni ma darifannagrad yugu boch e girdi’ e ba ga’ farad u wan’row e Chitamangin. Faanra ga be pigpig ngak Jehovah ma be maruwar u wan’um ko ba ga’ fam u wan’ fa danga’, ma ngam lemnag rogon e ngongol rok Jesus ngak e piin yad baadag ni nge fil ban’en ngorad. Ga ra rin’ e re n’ey, ma ra ayuwegem ni ngam nang gelngin nrib ga’ fam u wan’ Jehovah.

5. Mu weliy rarogon be’ nib pin nu Galile ni mada’nag Jesus.

⁵ Gathi kemus ni i fil Jesus ban’en ngak yu ulung i girdi’, ya ki fil ban’en ko girdi’ ni be’ nge be’. Bod nnap’an ni i machib u Galile, me mada’nag be’ nib pin ni ke gaman 12 e duw nib m’ar nib molul. (Mark 5:25) Bochan ni be par nib taay nrogon ko Motochiyel, ma aram fan ni en ku ra math ngak e ku ra taay. Ere dabisiy nib ga’ ndakir ma yan ko gin bay e girdi’ riy. Maku reb e dabkiyog ni nge un ko tin ka bay e girdi’ ko pi madnom ni yad ma tay ni fan ko liyor rorad. (Lev. 15:​19, 25) Dariy e maruwar riy nib gel e gafgow ni i tay e re ppin ney ni bochan e m’ar rok miki lemnag ni ir be’ ndariy fan.​—Mark 5:26.

6. Mang e rin’ fare pin ya nge yag ni gol ko m’ar rok?

⁶ Baadag e re ppin ney ni nge golnag Jesus e m’ar rok. Machane de yan i yog ngak ni nge golnag. Mang fan? Sana rayog ni be tamra’ ni bochan e m’ar rok. Fa reb e sana be magar nri puwan’ Jesus ngak ni ke yan nga fithik’ e girdi’ ni kab taay. Ere kemus ni math ko thal ni wuru’ e mad rok Jesus ya ba mich u wan’ nra rin’ e re n’ey ma ra gol. (Mark 5:​27, 28) Ma nni tow’athnag ni bochan e michan’ rok ya gol ko m’ar rok. Ngemu’ me fith Jesus ko mini’ e ke math ngak, ma aram me yog ni ir e ke math ngak. Ere mang e rin’ Jesus?

7. Uw rogon e ngongol rok Jesus ngak fare pin nib gel e gafgow ni be tay? (Mark 5:34)

⁷ I dag Jesus e sumunguy nge tayfan ko fare pin. I guy ni “be da’da’ ko marus.” (Mark 5:33) Ere non ngak u fithik’ e sumunguy me pi’ e pagan’ ngak. Ki fanay fare bugithin ni “fakag” u nap’an ni be non ngak, nre n’ey e be dag ni gathi kemus ni be dag e tayfan ngak ya ku be dag e sumunguy nge t’ufeg ngak. (Mu beeg e Mark 5:34.) Kemus e yay ni be yog e Bible ni fanay Jesus fare bugithin ni “fakag” u nap’an ni be non ngak be’ nib pin. Dabisiy ni yog e re thin ney ni bochan e ke guy ni kari rus e re ppin nem. Ba mudugil nri baud laniyan’ e re ppin nem! Faan gomanga de non Jesus ngak ni aray rogon, ma sana rayog ni chuw u rom ni ke gol ko m’ar rok machane ke magawon laniyan’ ko n’en ke rin’. Yugu aram rogon ma n’en ni rin’ Jesus e ayuweg ni nge nang nib ga’ fan u wan’ e Chitamangin ni bay u tharmiy.

8. Mang boch e magawon ni i mada’nag reb e walag nib pin u Brazil?

⁸ Ku arrogon e ngiyal’ ney ni bay boch e tapigpig rok Got ni bay ba mit e m’ar rorad ni ma k’aringrad ni ngaur pared nib kireban’rad ma yad be lemnag ndariy farad. Mariaa nreb e regular pioneer u Brazil e ni gargeleg ni l’agruw raba’ i ay ndariy, maku dariy e ba’ ni gilay’ e rifrif u pa’. I yog ni gaar: “Gubin ngiyal’ ni yima gafgownageg u skul ni bochan e m’ar rog. Ku yima yog boch e ngachal nib kireb ngog. Mus ko girdi’ u lan e tabinaw rog ndarur ted fag.”

9. Uw rogon nni ayuweg Maria ni nge nang nib ga’ fan u wan’ Jehovah?

⁹ Uw rogon nni ayuweg Maria? Nap’an ni mang reb e Pi Mich Rok Jehovah, ma i fal’eg e pi walag u lan e ulung laniyan’ mar ayuweged ni nge lemnag rarogon ni bod rogon ni ma lemnag Jehovah. I yog ni gaar: “Ri boor e walag ni kar ayuweged gag! Rug be pining e magar ngak Jehovah u polo’ i gum’irchaeg ni ke pi’ reb e tabinaw ngog nrib manigil.” I ayuweg e pi walag Maria ni nge nang nib ga’ fan u wan’ Got.

10. Mang magawon e immoy rok Maria Magdalene? (Kum guy e sasing.)

¹⁰ Kum lemnag rogon ni ayuweg Jesus yugu be’ ni aram Maria Magdalene. Cha’ney e ke ying medlip e moonyan’ ngak! (Luke 8:2) Sana ma ngongol nib mit rogon ni bochan e pi moonyan’ nem ni ke ying ngak, ere der ma chugur e girdi’ ngak. Ba gel e gafgow ni i tay, mab mudugil ni i lemnag ndariy be’ ni baadag daken, ma der pagan’, ma i lemnag ndariy be’ nrayog ni nge ayuweg. Dabisiy ni tuluf Jesus fapi moonyan’ ni ke ying ngak me mang reb i gachalpen. Ku mang reb e kanawo’ ni ayuweg Jesus Maria Magdalene riy ya nge nang rogon nrib ga’ fan u wan’ Got?

11. Uw rogon ni dag Jesus ngak Maria Magdalene ni ir be’ nib ga’ fan u wan’ Got? (Kum guy e sasing.)

¹¹ I pining Jesus Maria Magdalene ni nge un ngak ko milekag ni i tay ni be machib.b Bochan e re n’ey, ma aram me yag ni nge motoyil ngak Jesus u nap’an ni be fil ban’en ko girdi’. Ki m’ug Jesus ngak ko rofen nni faseg ko yam’. Ir bagayad e tin nsom’on i gachalpen ni non ngak e rofen nem. Ki yog Jesus ngak ni nge yan i yog ngak e pi apostal rok ni kan faseg ko yam’. Ireray boch e kanawo’ ni m’ug riy nriyul’ nib ga’ fan u wan’ Jehovah!​—John 20:​11-18.

12. Mu weliy fan ni lemnag Lidia ndariy be’ nra t’ufeg ni bochan e n’en ni i buch rok.

¹² Boor e girdi’ e ngiyal’ ney ni yad ma lemnag ndariy be’ nra t’ufegrad ni bod e n’en ni buch rok Maria Magdalene. Bay reb e walag nib pin u Spain ni ka nog Lidia ngak ni yog nu m’on ni ngan gargeleg, me lemnag e chitiningin ni nge li’ ni ka bay u meyal. Ka be yib ngan’ nnap’an ni kab achichig, ma der ma tiyan’ e chitiningin ngak ma ma yog e thin nib kireb ngak. I yog ni gaar: “Gu ma nameg ni nggu fel’ u wan’ e girdi’ min t’ufegeg. Gu ma magar nri chey ma dariy be’ nra t’ufegeg ni bochan e micheg e chitinag nga lanin’ug ni gag be’ ni gub kireb.”

13. Mang e ayuweg Lidia ni nge nang nib ga’ fan u wan’ Jehovah?

¹³ Tomuren ni fil Lidia e tin riyul’, ma meybil nge fol Bible ni ma tay, nge thin ni ma yog e pi walag ngak u fithik’ e sumunguy, nge ngongol nib manigil ni yad ma rin’ ngak e ayuweg ni nge nang nib ga’ fan u wan’ Jehovah. I yog ni gaar: “Ba ga’ ni ma yog figirngig ngog gelngin ni gub t’uf rok. Gubin ngiyal’ ni ma puguran ngog ni bay fel’ngig. Ku arrogon e n’en ma rin’ e pi fager rog.” Bay be’ ni ga manang nib t’uf ni ngan ayuweg ni nge nang gelngin feni ga’ fan u wan’ Jehovah, fa?

ROGON NI NGAUD LEMNAGNAGED GADAD NI BOD ROGON NI MA LEMNAG JEHOVAH

14. Uw rogon ni be ayuwegdad e 1 Samuel 16:7 ni ngaud lemnaged rarogodad ni bod rogon ni ma lemnag Jehovah? (Kum guy fare kahol ni kenggin e “Mang nib Ga’ Fan e Girdi’ rok Jehovah u Wan’?”)

¹⁴ Dab mu pagtalin nder ma lemnagem Jehovah ni bod rogon ni ma lemnagem e girdi’ nu fayleng. (Mu beeg e 1 Samuel 16:7.) Feni ga’ fam u wan’ e der yan u rogon yaam, ara urngin e salpiy rom, ara tolngin e skul rom. (Isa. 55:​8, 9) Ere mu guy rogon ni ngam lemnagem ni bod rogon ni ma lemnag Jehovah, ma gathi rogon ni ma lemnagem e girdi’ nu fayleng. Rayog ni ngam beeg boch e thin nu Bible ni be dag nib ga’ fan u wan’ Jehovah e piin ni i maruwar u wan’rad ko ba ga’ farad fa danga’ ni bod Elijah, nge Naomi, nge Hannah. Ku rayog ni ngam yoloy nga but’ boch ban’en ni ke buch rom ni be micheg ngom nriyul’ ni gab t’uf rok Jehovah mab ga’ fam u wan’. Maku reb e rayog ni ngam beeg boch ban’en u murung’agen rogon ni ngaum sap nga fel’ngim ni bay u boch e babyor rodad.c

15. Mang fan ni i tay Jehovah Daniel ni ir ‘be’ nrib ga’ fan’? (Daniel 9:23)

¹⁵ Ngam nang nib ga’ fam u wan’ Jehovah ni bochan e gab yul’yul’. Nap’an ni ke pag 90 e duw rok Daniel ni profet, ma bay ba ngiyal’ “nri aw parwon” me mulan’. (Dan. 9:​20, 21, NW) Uw rogon ni pi’ Jehovah e athamgil nga laniyan’? I l’og Gabriel ni engel ni nge puguran ngak ni ir ‘be’ nrib ga’ fan,’ ma ke rung’ag Got e meybil rok. (Mu beeg e Daniel 9:23.d) Mang nrib ga’ fan Daniel u wan’ Got? Bochan nib t’uf rok e tin nib mat’aw mab yul’yul’. (Ezek. 14:14) Ke tay Jehovah murung’agen e re n’ey nga lan e Thin rok ni nge fal’eg lanin’dad. (Rom. 15:4) Ku ma motoyil ko meybil rom, mab ga’ fam u wan’ ni bochan e ba t’uf rom e tin nib mat’aw ma ga ma pigpig ngak u fithik’ e yul’yul’.​—Mik. 6:8; Heb. 6:10.

16. Mang e rayog ni nge ayuwegem ni ngaum lemnag Jehovah nib Matam ni gab t’uf rok?

¹⁶ Um lemnag Jehovah nib Matam ni gab t’uf rok. Baadag ni nge ayuwegem, ma gathi nga i yaliy e oloboch rom. (Ps. 130:3; Matt. 7:11; Luke 12:​6, 7) Boor e girdi’ ni yad ma lemnag ndariy farad ni kar fal’eged i lemnag e re n’ey, ma ke yib angin ngorad. Am lemnag Eliana nreb e walag nib pin u Spain ni i lemnag ndariy be’ nra t’ufeg ma ir be’ ndariy fan ni bochan e boor e duw ni i yog figirngin boch e thin nib kireb ngak. I yog ni gaar, “Nap’an nug ra lemnag ndariy fag, ma gu ma guy rogon ni nggu susunnag ni ke yib i chibiyeg Jehovah be fekeg, ma be t’ufegeg, ma be yororiyeg.” (Ps. 28:9) Lauren nreb e walag nib pin u South Africa e ma puguran ngak ni ma gaar, “Faanra ke runguyeg Jehovah ke pow’iyeg ngak u fithik’ e t’ufeg, ma ke teg ni gub chugur ngak u lan e pi duw ney ni ke yan, ma kki fanayeg ni nggu fil ban’en ko girdi’, me ere ba mudugil nib ga’ fag u wan’ ma ra fanayeg ni nggu rin’ boch ban’en ni fan ngak.”​—Hos. 11:4.

17. Mang e rayog ni nge ayuwegem ni nge mich u wan’um ni gab fel’ u wan’ Jehovah? (Psalm 5:12) (Kum guy e sasing.)

¹⁷ Nge mich u wan’um ni gab fel’ u wan’ Jehovah. (Mu beeg e Psalm 5:​12, BT.) I taarebrogonnag David rogon ni ngan par ni yib fel’ u wan’ Jehovah nga bangi “shield” nib ga’ yang ni ma yororiy e piin yad ba mat’aw. Faanra ga manang ni gab fel’ u wan’ Jehovah ma be ayuwegem, ma rayog ni nge dab um lemnag ndariy fam. Uw rogon nrayog ni ngam nang ni gab fel’ u wan’ Jehovah? Ma micheg e re n’ey nga lanin’um u daken e Thin rok ni bod ni kad weliyed. Ku ma fanay e piin piilal, nge pi fager rom, nge yugu boch e girdi’ ni ngar pugeduran ngom nib ga’ fam u wan’. Ere susun ni nge uw rogon e re n’ey u wan’um?

18. Nap’an ni yira yog ban’en nib fel’ ni kam rin’, ma mang fan nsusun e nge m’agan’um ngay?

¹⁸ Nap’an nra yog e piin yad manangem ma gab t’uf rorad ban’en nib fel’ ni kam rin’ ma dab mu siyeg. Dab mu pagtalin nsana rayog ni be fanayrad Jehovah ni ngar ayuweged gur ni ngam nang ni gab fel’ u wan’. Eliana ni faan kan weliy murung’agen e yog ni gaar: “Gu be fil rogon ni buchuuw ma buchuuw ni nga i m’agan’ug ko thin nib manigil ni ma yog yugu boch e girdi’ ngog. De mom e re n’ey, machane gu manang ni aram e n’en baadag Jehovah ni nggu rin’.” Ke yib angin ngak Eliana e ayuw ni ma pi’ e piin piilal ngak u fithik’ e t’ufeg. Chiney e be pigpig ni ir reb e pioneer maku ir bagayad e piin ma par u bang ngaur pied e ayuw ko maruwel ni yibe rin’ u Bethel.

19. Mang fan nrayog ni nge pagan’um ngay nib ga’ fam u wan’ Got?

¹⁹ Be puguran Jesus ngodad nrib ga’ fadad u wan’ e Chitamangidad ni bay u tharmiy. (Luke 12:24) Ere rayog ni nge pagan’dad ngay nib ga’ fadad u wan’ Jehovah. Manga yugu dab da paged talin e re n’ey! Ma manga yugu da athamgilgad u rogon nrayog rodad ni ngad ayuweged yugu boch e girdi’ ni ngar nanged nib ga’ farad u wan’ Got!